MERHBA FIL

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LILL-MEMBRU PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

L-Unjoni Ewropea ordnat li mis-sena 2010 il-Maltin u l-Għawdxin iħallsuha

€182,192 kuljum misruqa minn ħalq uliedek

X’tilfu ż-żgħażagħ bis-sħubija fl-UE

Kittieb f’ġurnal lokali tal-Ħadd, l-ewwel ta’ April kiteb dwar it-tifkira ta’ Jum il-Ħelsien, u qal

“Eluf ta’ votanti fl-elezzjoni ġenerali li jmiss ma jiftakrux l-anniversarji li seħħew f’pajjiżna ta’ qabel is-Snin 70. Sfortunatament wisq inqas jimportahom mit-tifkiriet ta’ ġrajjiet li ma għexuhomx”.

“Jien l-ewwel wieħed li nifhem li l-familji pjuttost żgħażagħ ta’ wara l-bidu tas-Snin 90, li ħafna minhom għadhom qegħdin irabbu, jimpurtahom mil-lum. Jimpurtahom mill-futur tagħhom u ta’ uliedhom. L-istess iż-żgħażagħ tal-lum u ta’ għada”.

Issa jekk il-qagħda hija kerha kif intqal mill-kittieb, parti kbira tat-tort huwa tal-politiċi li naqsu li jgħallmu lill-poplu minn fejn telaq biex wasal fejn hu llum.

jekk ħadd ma jurihom li dawn il-benefiċċji ma kienux minn dejjem, kif jistgħu n-nanniet tagħhom jgħidu liż-żgħażagħ.

U jekk iż-żgħażagħ jimpurthom mill-futur tagħhom u ta’ wliedhom, jagħmlu ħażin il-politiċi li ma jgħidulhomx li fil-futur dawn il-benefiċċji huma mhedda minħabba s-sħubija ta’ pajjiżna fl-Unjoni Ewropea li qiegħda timponi politika li tgħid li gvern għandu jnaqqas l-ispiża u l-piżijiet soċjali tiegħu.

Illum qegħdin jidħku biex żgħażagħ dawk il-politiċi li jgħidu li l-kwistjoni tas-sħubija fl-Unjoni Ewropea hija magħluqa, meta settur wara l-ieħor tal-popolazzjoni qiegħed jilminta mill-effetti ħżiena tas-sħubija u jrid li dawn l-effetti ħżiena jitwaqqfu u dan jista’ faċilment isir billi pajjiżna jgħid lill-Unjoni li se joħroġ mill-Unjoni.

Daħku biż-żgħażagħ dawk li qabel ir-referendum tas-sħubija fl-Unjoni qalulhom li fl-Unjoni Ewropea kollox huwa ‘ward u zahar’.

Ħafna miż-żgħażagħ li emmnu dak id-diskors, sabu ruħhom illiċenzjati mill-impjieg għax il-fabbrika tagħhom kellha tagħlaq konsegwenza tas-sħubija ta’ pajjiżna fl-Unjoni.

Żgħażagħ oħrajn sabu li l-prezzijiet tad-djar u l-kirjiet tad-djar huma tant għoljin, li assolutament ma jistgħux ileħħqu magħhom, ukoll konsegwenza tas-sħubija fl-Unjoni.

Żgħażagħ oħrajn qegħdin jaraw li postijiet tax-xogħol addattati għalihom ma jingħatawx lilhom, iżda jingħataw lil baranin li ġejjin f’pajjiżna mill-pajjiżi ta’ l-Unjoni.

Għal ħafna żgħażagħ il-ħolma ta’ l-Unjoni Ewropea saret ħmar il-lejl, ħlief għal dawk il-ftit mijiet li sabu impjieg tajjeb ma’ l-Unjoni, jew li ħatfu l-okkażjonijiet ta’ ftit safar minn fuq l-Unjoni.

Ix-xhur tas-safar jgħaddu u ż-żgħażagħ isibu ruħhom ifittxu x-xogħol f’pajjiżna u ma jsibuhx, għax ma beżgħux għal-ħelsien li sħubija fl-Unjoni tellfitna.

Aġir skandaluż ta’ l-Unjoni Ewropea

It-theddid ta’ l-Unjoni Ewropea lill-Gvern tal-Nikaragwa għax dan għadda liġi kontra l-abord, imissu jixxokkja lil dawk kollha li kienu jemmnu fil-valuri ta’ l-Unjoni.

Saċerdot magħruf, b’esperjenza pastorali vasta, Dun Pawl Camilleri, jumejn ilu wera ruħu mkexkex dwar dan il-fatt, tant li bagħat ittra pubblika lill-membri tal-Parlament Ewropew, Simon Busuttil u David Casa, li ma’ Eddie Fenech Adami u Lawrence Gonzi, kienu ppredkaw ħafna fuq il-valuri ta’ l-Unjoni, qabel ir-referendum.

Fl-ittra tieghu Dun Camilleri rrefera għal dak li kien qara fil-ġurnali, li Daniel Ortega, il-mimmi ta’ għajnejn ix-xellugin fit-tmeninijiet, reġa’ tela’ Mexxej tan-Nikaragwa.

Ir-rappreżentant ta’ l-UE fin-Nikaragwa, qal li “l-għajnuna kontra l-faqar hi marbuta ma’ l-aċċessibilità ta’ l-abort u mad-drittijiet tan-nisa. Nittama’ li l-Gvern il-ġdid ikun dispost u kapaċi jiftaħ diskussjoni mingħajr is-sħana ta’ kampanja elettorali”.

Dun Pawl issokta jikteb li skond l-istess ġurnali, il-Ministru ta’ l-Iżvilupp Ġermaniz (bħalissa l-Ġermanja għandha l-Presidenza ta’ l-UE), għamilha ċara li “ikun hemm konsegwenzi jekk il-liġi ma tiġix emendata”.

U dan meta l-liġi kienet għaddiet mill-Parlament tan-Nikaragwa b’maġġoranza.

Il-ġurnali sejjaħ dan il-kliem tal-Ministru Ġermaniz rikatt politiku (Political blakmail) u loġikament staqsew li, jekk l-UE qiegħda tagħmel din il-pressjoni fuq pajjiż li mhux membru, ara kemm tagħmel iżjed pressjoni fuq pajjiż memru (bħal Malta)?

“Ġa bdejna bil-pulit dwar id-divorzju. X’taħsbu li jkun imiss biex ninqatgħu mill-periferija kulurali ta’ l-Ewropa?”

Dun Pawl qal lil Simon Busuttil u David Casa, li huwa persważ li huma jistmaw il-ħajja umana mill-bidunett tagħha almenu daqs l-immigrazzjoni llegali, il-kaċċa u l-insib u li jistmaw id-demokrazija u kull dritt ta’ kull Stat li l-politika dwar żwieġ u ħajja jiddeċiduha biss iċ-ċittadini ta’ dak l-Istat, bla ebda forma ta’ indħil barrani u inġust, biex ma jingħadx, skandaluż.

Għandu raġun Dun Pawl jitkexkex bl-aġir skandaluż ta’ l-UE dwar l-abort.

Malta, bis-sħubija tagħha fl-UE, hija kompliċi ma’ l-UE f’dan l-aġir skandaluż, għax tappoġġa l-politika uffiċjali ta’ l-UE, u tikkontribwixxi kull sena għall-fondi ta’ l-UE.

Il-kontribuzzjonijiet ta’ kull sena jsiru miċ-ċittadini Maltin u Għawdxin għax isiru mit-taxxi li jitħallsu.

Min fil-kuxjenzi jħoss li m’għandux ikun kompliċi ta’ dan, għandu jasal għad-deċiżjoni li naqtgħu l-obbligazzjonijiet li għandna ma’ l-UE, billi ma nibqgħux imseħbin fiha.

L-Unjoni Ewropea trid taħtaf aktar pajjiżi

Ħafna kummentaturi jgħidu li l-Unjoni Ewropea qiegħda tbati minn għejja kkaġunata mit-tkabbir mgħaġġel ta’ l-UE.

Iżda l-uffiċċjali ta’ l-UE qegħdin jimmanuvraw ħalli l-Unjoni taħtaf aktar pajjiżi, bħall

Hemm numru ta’ mexxejja Ewropej li jaħsbu li l-UE kibret wisq u qiegħda tistieden li jiġri diżastru mill-UE.

Il-laqgħat tal-mexxejja u tar-rappreżentanti tal-pajjiżi membri ta’ l-UE qegħdin jieħdu fit-tul wisq.

Fihom jintqal ħafna diskors, iżda ġeneralment ma joħroġ xejn konkret minnhom, ħlief riżoluzzjonijiet ħalli jsiru aktar laqgħat.

Il-burokrazija kbira li hemm fl-UE ttaqqal ħafna il-proċess li jwassal biex jittieħdu ftit deċiżjonijiet.

Is-sistema li kull ma jingħat u jinkiteb irid jiġi tradott fil-linwi tal-pajjiżi kollha ta’ l-UE hija sistema assurda; inutli, tqum flejjes kbar u ħela ta’ ħin u ta’ nies.

Għalhekk ħafna jsostnu li l-esperiment ta’ l-UE se jispiċċa biex ifalli.

Kulħadd jaf li l-Parlament Ewropew m’hux parlament iżda palk ta’ reċtar fejn membru ma jistax jitkellem aktar minn tliet minuti u fejn il-voti jittieħdu bit-tużżana f’ħames minuti.

M’għandux s-saħħa ta’ Parlament nazzjonali, għalhekk għandu aktar minn seba’ mitt membru.

L-ispiża tal-Parlament Ewropew hija enormi u żejda għax il-qofol tad-deċiżjonijiet ta’ l-UE ma jittieħdux fil-Parlament, iżda mill-Kummissjoni Ewropea u mill-Kunsill Ewropew.

Minkejja n-nuqqasijiet kbar li hemm fl-UE, xorta waħda dawk li jridu li l-UE tikber aktar, jirnexxilhom fl-għan tagħhom.

Huma waslu biex fl-1 ta’ Jannar ta’ din is-sena, sieħbu fl-UE żewġ pajjiżi oħrajn ta’ l-Ewropa tal-Lvant,

L-UE sseħħbithom magħha lil dawn iż-żewġ pajjiżi eks-komunisti, mhux għax huma jissodisfaw il-kundizzjonijiet ta’ demokrazija u ndafa fit-tmexxija pubblika li l-UE tinsisti li l-pajjiżi membri għandhom ikollhom.

L-UE seħħbithom għax hija jaqblilha tespandi lejn il-Lvant ta’ l-Ewropa u jiswilha li taħtaf taħt idejha r-riżorsi tal-gass u raffineriji taż-żejt tar-Rumanija, kif ukoll l-istrutturi li jwasslu ż-żejt (oil pipelines) mil-baħar l-Iswed għall-Ewropa, mingħajr dawn il-“pipelines” ma jgħaddu mir-Russja.

Għalkemm ir-Rumanija u l-Bulgarija huma relattivament fqar, xorta waħda jiswew ħafna għall-UE għax għandhom ħafna ħaddiema tas-snajja li huma mdorrijiet jaħdmu ħafna (highly motivated), li se jkunu ta’ ġid kbir għall-ekonomija ta’ l-UE.

Tant għandha bżonnhom li l-UE, li hija warrbet 40 biljun Ewro għalihom, jiġifieri lilhom hija lesta tagħtihom ’il fuq minn 46 elf daqs kemm lesta li tagħti lil Malta f’seba’ snin (885 miljun Ewro).

L-UE tinsab fi kriżi

Il-professur Sabino Acquaviva, għalliem tas-soċjoloġija reliġjuża, ippubblika ktieb bit-titlu “L-Eklissi ta’ l-Ewropa”.

Madwar xahar ilu dehret intervista tal-Professur Acquaviva f’rivista reliġjuża Taljana.

F’din l-intervista l-Professur Acquaviva saħaq li l-Ewropa tinsab fi kriżi.

Huwa sostna li l-Kristjaneżmu kien emigra mill-Ewropa (minkejja li ċ-ċentru tiegħu, il-Vatikan, huwa fl-Italja).

* l-Ewropa saret kontinent li jiddubita minn kollox u ma jemmen f’xejn (għalhekk xettiku),

ħsiebu biss jgħix mil-lum għal għada fid-dinja ċkejkna tiegħu.

Il-Professur Acquaviva fisser li hemm żewġ konsegwenzi ta’ din il-kriżi ta’ l-Ewropa.

L-ewwel, hawn il-kollass u t-tkissir tal-familja, u t-tieni, billi r-rata tat-twelid tbaxxiet ħafna, il-popolazzjoni ta’ l-Ewropa nieżla ’l isfel, filwaqt li qiegħda tikber b’ħeġġa l-ġenerazzjoni żagħżugħa ta’ l-Indja u ċ-Ċina.

Dan kollu qiegħed iwassal ukoll għal kriżi ekonomika fl-Ewropa, għaliex is-saħħa ekonomika fid-dinja m’għadhiex fl-Ewropa, iżda tinsab fl-Asja.

Fl-imgħoddi l-kontinent Ewropew kien ekonomikament (u wkoll militarment) jiddomina d-dinja.

Fil-qasam morali u reliġjuż il-kriżi fl-Ewropa tidher ukoll mill-fatt li l-knejjes tbattlu mill-fidili, u l-pornografija xterdet kullimkien u qiegħda therri l-fibra morali tas-soċjetà Ewropea.

Fl-istess waqt, il-komsumiżmu sfrenat qiegħed jeqred is-sistema tal-valuri ta’ l-Ewropa, u l-Ewropej li għandhom kollox, ma saru japprezzaw xejn.

Il-Professur Acquaviva wasal għall-konklużjoni li qegħdin naraw l-eklissi ta’ l-Ewropa u taċ-ċiviltà Ewropea, għaliex il-kontinent ta’ l-Ewropa jinsab għan-niżla, assedjat minn miljuni minn pajjiżi barra l-Ewropa li se jgħaddu lill-Ewropej.

Għalhekk huwa ta t-titlu lill-ktieb tiegħu, l-Eklissi u mhux il-mewt, għaliex għadu jittama ftit li jista’ jkun hemm ġejjieni, jekk inbiddlu kif qegħdin naħdmu u jekk nerġgħu nagħtu sens lill-ħajja li qegħdin ngħixu fl-Ewropa.

Il-propagandist f’Malta ta’ l-UE jeħtieġilhom jaqraw il-ktieb ta’ Acquaviva ħalli jintebħu x’sagrileġġ għamlu meta ħadmu biex Malta tissieħeb fl-UE biex tkun ħaġa waħda, ma’ l-Ewropa dekadenti moralment, ekonomikament u soċjalment.

Għad nistgħu nsalvaw il-ġejjieni ta’ uliedna billi neħilsu lill-pajjiżna mill-madmad ta’ l-UE ħalli nerġgħu ngħożżu l-valuri bnina ta’ missirijietna.

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.