MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

JEKK TIRRISPETTA L-KOSTITUZZJONI TA' PAJJIŻEK GHID LID-DEPUTAT PARLAMENTARI TIEGHEK JIRRISPETTA L-FEHMIET TIEGHEK U MA JIVVOTAX FAVUR IL-KOSTITUZZJONI TA' L-UNJONI EWROPEA LI TKASBAR IL-KOSTITUZZJONI TA' MALTA.

GĦID LILL-KANDIDAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

Il-ġrajjiet li seħħew f’pajjizna u fl-Unjoni Ewropea minn mindu l-maġġoranza tal-Maltin ivvotaw favur il-ftehim tas-sħubija ta’ Malta fl-Unjoni Ewropea, saħħew ir-rieda tal-Kampanja Ħelsien Nazzjonali (CNI) li tissokta fil-ħidma tagħha biex tikxef il-qerq tal-kampanja favur is-sħubija u tal-propaganda ta’ l-Unjoni favur il-politika tagħha.

L-ewwel xempju tal-qerq jagħtihulna l-Gvern li kien ftaħar li wasal fi ftehim ma’ 31 għaqda ħalli l-pajjiż, wara li jivvota favur il-ftehim tas-sħubija, jitmexxa bil-kunsens tagħhom ilkoll u mhux skond ma jiddeċiedi waħdu l-Partit Nazzjonalista. 

Iżda ġara li f’kull deċiżjoni li l-Gvern ħa mill-aħħar elezzjoni ’l hawn, l-għaqdiet milquta mid-deċiżjonijiet, jew xlew lill-Gvern li ma kkonsultahomx, jew ilmentaw li l-Gvern iddeċieda kontra l-fehma li huma wrew lill-Gvern.
 

Rajna 

* l-Federazzjoni ta’ l-Industriji, 

* il-Kamra tal-Kummerċ, 

* il-General Retailers and Traders Union, 

* l-Assoċjazzjoni tal-Lukandi u Ristoranti, 

* l-Alternattiva Demokratika, 

* l-Union Ħaddiema Magħqudin, u 

* għaqdiet oħra

* jieħduha kontra l-Gvern

* dwar hafna deċiżjonijiet li ha kontra l-fehma tagħhom. 

Il-wegħda li l-Gvern kien għamlilhom qabel l-elezzjoni lill-għaqdiet li kienu appoġġjawh fil-kampanja tas-sħubija fl-Unjoni Ewropea, sfat fix-xejn bħalma sfaw fix-xejn il-maġġoranza kbira tal-wegħdiet li l-Gvern Nazzjonalista jagħmel u ma jwettaqx.

Eżempju ieħor tal-qerq tal-Gvern huwa l-mod kif iġib ruħu ma’ l-Oppożizzjoni Laburista. 

Il-Gvern jippretendi li l-Oppożizzjoni taqsam miegħu r-responsabbiltà tal-falliment f’kull qasam li l-Gvern ġab lill-pajjiż fih, fl-istess ħin li f’kull okkażjoni li jkollu jkasbar lill-Partit Laburista u jitfa’ fuqu l-ħtija ta’ l-istat ħażin li ninsabu fih.

Wara 14-il sena ta’ tmexxija Nazzjonalista, il-Prim Ministru u l-Ministri Nazzjonalisti għandhom il-wiċċ sfaċċat li jitfgħu t-tort ta’ kulma hawn ħażin fil-pajjiż fuq il-gvernijiet Laburisti ta’ qabel. 

Iżda l-kriżi finanzjarja li l-pajjiż jinsab fiha hija kollha kemm hi tort ta’ Fenech Adami, John Dalli u sħabhom li wrew li m’humiex għaqlin fit-tmexxija tal-pajjiż li faqqruh u dejnuh minkejja l-kwantità kbira ta’ taxxi li għabbewh bihom.

Jiddispjaċik tara x’uħud mil-Labuisti li jaħsbu li l-Partit jista’ jiggwadanja fil-voti jekk huma ma jopponux bl-aktar mod assolut it-tmexxija tal-Gvern li qiegħed jogħdos aktar fil-fond bl-iżbalji li qiegħed jagħmel. 

Jaħsbu li jekk ma jaċċettawx għal kollox il-ftehim tas-sħubija fl-Unjoni Ewropea li ma ġabx iktar minn 12,000 vot fuq il-134,000 vot li ntefa’ kontrih, il-Partit Laburista ma jkunx jista’ jikseb l-appoġġ tal-maġġoranza. 

Meta jirraġunaw hekk, ikunu qegħdin jaqgħu fin-nasba tal-Gvern u l-alleati tiegħu, inklużi l-gazzetti bl-Ingliż u l-kittieba li huma propagandisti Nazzjonalisti, u għalhekk ifaħħru biss dak li jkun jaqbel għall-Partit Nazzjonalista u mhux dak li jista’ jagħmel ġid lill-Partit Laburista. 

Iżda x’uħud mil-Laburisti huma tant fidili li lanqas nasba bħal dan ma jxommu.

Hemm ukoll ġrajja oħra li qiegħda sseħħ fl-Unjoni Ewropea li turi kif il-poplu tagħna ġie ngannat qabel ir-referendum u l-elezzjoni ġenerali. 

Meta l-maġġoranza tal-poplu qalet li taqbel mas-sħubija ta’ Malta fl-Unjoni Ewropea, l-Unjoni Ewropea kellha trattati li kienu jirregolaw it-tmexxija tagħha, bl-aħħar wieħed dak ta’ Nizza, li ħaseb għat-tkabbir ta’ l-Unjoni u kif l-Unjoni kellha titmexxa wara li jissieħbu fiha l-pajjiżi li kienu applikaw biex jissieħbu, fosthom Malta.

Iżda issa l-Unjoni Ewropea se jkollha Kostituzzjoni ġdida li hija ħafna differenti minn kif kienet l-Unjoni fiż-żmien li sar ir-referendum tas-sħubija f’Malta. 

Malta, bħala membru fl-Unjoni, se ssib ruħha marbuta b’Kostituzzjoni li l-poplu Malti qatt ma approva u li mhux se jkollu l-opportunità jgħid jekk jaqbilx li jkun marbut biha.

Hemm punt li għalkemm mhux ta’ importanza kbira, huwa meqjus bħala punt li juri n-nuqqas ta’ valuri ta’ l-Unjoni Ewropea, minkejja l-ftaħir tal-valuri tagħha minn ħafna mill-Insara li tant ippriedkaw favur is-sħubija ta’ Malta fl-Unjoni. 

Għalxejn il-Knisja ċċappset favur l-Unjoni Ewropea, l-UE qiegħda tirrifjuta li tagħraf fil-Kostituzzjoni ġdida tagħha s-sehem tal-Kristjaneżmu fil-bini ta’ l-Ewropa.

Is-CNI kellha raġun tgħid li l-Unjoni Ewropea għandha nuqqas ta’ valuri Nsara. 

Iċ-ċaħda ta’ l-għarfien ta’ Alla fil-Kostituzzjoni ġdida ta’ l-Unjoni, u n-nuqqas ta’ l-għarfien tat-twemmin Nisrani fil-bini ta’ l-Ewropa, għandhom ikunu kaġun ta’ għajb u mistħija għal dawk l-Insara Maltin li għażlu l-Unjoni Ewropea minkejja li l-Unjoni Ewropea m’għarfitx la ’l Alla u lanqas il-Kristjaneżmu.

Dwar din il-kwistjoni, ħafna mill-Maltin li vvotaw favur is-sħubija ta’ Malta fl-Unjoni Ewropea llum iħossuhom ingannati li ma ntqalilhomx li l-Unjoni Ewropea ma tħaddanx il-valuri Nsara, iżda tħaddan valuri li jixirqu aktar lill-pagani.

Issa wara l-elezzjoni ġenerali qegħdin jipprovaw jingannaw lill-poplu billi jgħidulu li ma għadx hawn kwistjoni dwar is-sħubija ta’ Malta fl-Unjoni Ewropea. 

Jgħidu dan biex forsi jtaffu l-għadab li ħafna għandhom għax iħossu li ġew ittraduti u oħrajn li jħossu li ġew ingannati meta qegħdin jaraw li ħafna milli ntqal qabel ir-referendum mhux minnu u meta qegħdin iħossu l-konsegwenzi ħżiena tal-ftehim tas-sħubija.

Wara 

* s-sensji li ngħataw u oħrajn li huma mhedda, 

* wara t-taxxi li saru u oħrajn li huma mħabbra, 

* wara l-avviżi li ngħataw tat-tibdil fil-pensjonijiet, 

* tat-tnaqqis fl-għoti tas-servizzi soċjali, 

* tal-ħlas li se jsir fis-servizzi tas-saħħa, u 

* tal-piżijiet l-oħra li l-poplu se jitgħabba bihom

* inkella s-sħubija fl-Unjoni ma tkunx sostenibbli, 

* mhux talli mhux kulħadd huwa magħqud dwar is-sħubija fl-Unjoni Ewropea,

* iżda l-għadd ta’ dawk li llum huma kontra s-sħubija

* huwa aktar minn dak li kien qabel ir-referendum.

Min ma jagħrafx dan il-fatt, ikun imqarraq jew irid iqarraq.

Ir-rappreżentanti ta’ l-Organizzazzjoni tas-Sigurtà u Koperazzjoni fl-Ewropa  u tal-Kunsill ta’ l-Ewropa għamlu stqarrija dwar l-elezzjonijiet ta’ nhar il-Ħadd fir-Russja u li huma kienu marru biex jissorveljaw.

Huma kkundannaw il-mod kif il-Gvern tal-President Putin mexxa l-elezzjonijiet, għax kellu vantaġġ kbir ta’ riżorsi ta’ l-istat favurih li stunaw ir-riżultat. 

Il-proċess elettorali kien pass lura fil-mixja lejn id-demokrazija tal-pajjiż. 

L-avversarji politiċi ta’ Putin ukoll qalu li l-elezzjonijiet kienu farsa.

Iżda ħdejn l-iżbilanċ enormi u sfaċċat li kellna fir-referendum f’Malta dwar is-sħubija fl-Unjoni Ewropea, dak li seħħ fir-Russja kien żgħir. 

L-iżbilanċ fir-referendum f’Malta ma kienx biss fil-flejjes kbar mill-fondi pubbliċi li l-Gvern Malti abbużivament nefaq fil-kampanja favur is-sħubija fl-Unjoni Ewropea. 

Agħar minn hekk kellna l-indħil barrani bi ksur tal-liġi minn ruxmata ta’ mexxejja u uffiċjali kemm ta’ l-Unjoni Ewropea stess, kif ukoll ta’ pajjiżi membri ta’ l-Unjoni.

Qatt daqs dik id-darba l-poplu Malti ma kien suġġett għall-bumbardament hekk massiċ ta’ propaganda fina u maħsuba biex tinfluwenzah tant li ma ħallitux aktar kapaċi juża l-ġudizzju tiegħu ħalli jagħmel għażla ħielsa. 

B’danakollu lanqas nofs il-Maltin u l-Għawdxin li kellhom dritt jivvotaw, ma vvotaw favur is-sħubija ta’ Malta fl-Unjoni Ewropea.

Skond il-kriterji li l-Organizzazzjoni tas-Sigurtà u Koperazzjoni fl-Ewropa u tal-Kunsill ta’ l-Ewropa applikaw fil-każ ta’ l-elezzjonijiet fir-Russja, il-votazzjoni fir-referendum f’Malta kienet għal kollox mhux demokratika u kundannabbli. 

B’danakollu, għax fin-nofs kien hemm is-sħubija ta’ Malta fl-Unjoni Ewropea, ħadd, la l-Organizzazzjoni tas-Sigurtà u l-Koperazzjoni fl-Ewropa, la l-Kunsill ta’ l-Ewropa u ebda organizzazzjoni internazzjonali ohra minn dawk li jħarsu kif jitmexxew il-votazzjonijiet biex jaraw jekk jitmexxewx skond il-prinċipji demokratiċi, ma kkundannaw u lanqas ma lmentaw mill-mod ta’ l-għajb u oxxen kif tmexxiet il-kampanja tar-referendum f’pajjiżna.

L-Unjoni Ewropea u l-Gvern Malti ttradewna dwar is-sħubija fl-Unjoni għax qalu mod u issa sibna mod ieħor. 

Kemm l-Unjoni kif ukoll il-Gvern qalu li Malta se tingħata miljuni kbar fis-sena. 

Demarco u Fenech Adami u Josef Bonnici wegħduna mitt miljun, disgħin miljun u tmenin miljun.

Spiċċajna biex Dalli fil-Budget qalilna li fl-2004 l-Unjoni Ewropea mistennija tagħtina 33 miljun u aħna se nagħtuha 29 miljun.

Jibqgħalna erba’ miljuni, li lanqas huma kwart ta’ l-ispejjeż li rridu nagħmlu biex inkunu nistgħu nimxu skond ir-regolamenti ta’ l-Unjoni. 

B’hekk se nirruftaw minn ġewwa u mhux se mmorru minn fuq finanzjarjament.

L-Unjoni Ewropea u l-Gvern Malti ttradewna meta assigurawna li bis-Suq Komuni kbir ta’ l-Unjoni x-xogħol u l-impiegi f’pajjiżna se jiżdiedu ħalli nlaħħqu maż-żieda fil-bejgħ tal-prodotti tagħna. 

Minflok seħħ dan, ingħataw u qegħdin jingħataw sensji lill-ħaddiema tagħna u x-xogħol qiegħed jonqos u mhux jiżdied.

L-Unjoni Ewropea u l-Gvern Malti ttradewna meta qalulna li bis-sħubija ta’ Malta fl-Unjoni Ewropea jiżdied l-investiment produttiv f’pajjiżna.

Issa wara li sseħibna sibna li mhux biss investiment produttiv ma ġiex, iżda intrapriżi mwaqqfa f’pajjiżna għalqu u marru f’pajjiżi barra l-Unjoni u oħrajn qegħdin jhedduna li jagħmlu l-istess għax ma bqajniex kompetittivi.

1. L-Unjoni Ewropea u l-Gvern Malti ttradewna meta qalulna li jekk ma nisseħbux fl-UE nitilfu t-turisti li l-akbar numru minnhom jiġu mill-pajjiżi ta’ l-UE. 

Issa wara li sseħibna qegħdin naraw in-numru tat-turisti jonqos mill-pajjiżi ta’ l-UE u l-ispejjeż ta’ l-industrija tat-turiżmu f’pajjiżna jiżdiedu bid-dħul tar-regolamenti ta’ l-Unjoni u bit-taxxi li żdiedu minħabba s-sħubija fl-Unjoni.

2. L-UE u l-Gvern Malti ttradewna meta ftaħru li bis-sħubija fl-Unjoni l-livell ta’ l-għixien f’pajjiżna se jogħla.

Wara l-miżuri mħabbra fil-Budget, il-piżijiet tat-taxxi żdiedu u l-ispejjeż tas-servizzi żdiedu wkoll l-aktar ta’ dawk li mhux se jibqgħu jingħataw bla ħlas.

B’hekk il-livell ta’ l-għixien jitbaxxa u mhux jogħla għal hafna familji li jsibu li bil-paga jistgħu jixtru inqas għalkemm jonfqu aktar fi prezzijiet ogħla.

3. L-Unjoni Ewropea u l-Gvern Malti ttradewna meta qalulna li l-Unjoni ma tidħolx fil-pensjonijiet u fis-servizzi soċjali tagħna għax dawn jibqgħu taħt il-Gvern tagħna. 

Issa sibna li l-Unjoni Ewropea tordna lill-Gvern Malti x’għandu jbiddel fil-pensjonijiet u x’għandu jnaqqas mis-servizzi soċjali u liema għandu jagħmel bi ħlas u mhux aktar b’xejn u nisimgħuhom jgħidulna li xejn m’hu b’xejn.

B’inqas pensjonijiet u bi ħlas aktar għas-servizzi, il-livell ta’ l-għixien tal-pensjonanti u ta’ min jgħaddi bil-paga jitbaxxa mhux jogħla.

Il-pensjonanti fid-djar ta’ l-anzjani llum jilmentaw li ġew ittraduti.

Il-ħaddiema tat-tarzni li tneħħew mix-xogħol tat-tarznar bir-raġun huma mgħaddba għax iħossuhom ittraduti mill-Gvern.

Fiz-żewġ każi taħti wkoll l-UE.

IRRIDU L'INDIPENDENZA MILL-UNJONI EWROPEA

Il-Ħamis, 11 ta’ Diċembru, 2003

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola liċ-

Segretarju Finanzjarju  CNI,

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ