MERHBA FIL

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LID-DEPUTAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

L-Unjoni Ewropea ordnat li mis-sena 2010 il-Maltin u l-Għawdxin iħallsuha

€182,192 kuljum misruqa minn ħalq uliedek

Se nħallsu prezz għoli għall-Ewro

Il-Ġimgħa l-oħra l-President tal-Bank Ċentrali ta’ l-Unjoni Ewropea, Jean-Claude Trichet, qagħad jiskomoda ruħu u jiġi f’Malta ħalli jieħu sehem fil-ftuħ ta’ kampanja ta’ propaganda mifruxa fuq tliet xhur, favur il-munita Ewro, u biex jitkellem f’konferenza dwarha, organizzata mill-Kumitat Nazzjonali dwar l-Ewro (il-NECC) u l-Bank Ċentrali ta’ Malta, bl-għajnuna ta’ l-Unjoni Ewropea.

Huwa wera l-ferħ kbir tiegħu li pajjiżna se jdaħħal l-Ewro, u faħħar ħafna lil pajjiżna għall-passi li ħa biex jikkwalifika li jidħol fiż-żona tal-pajjiżi ta’ l-Unjoni li jużaw l-Ewro.

Li ma qalx Trichet huwa xi prezz pajjiżna se jħallas biex ikun jista’ juża l-Ewro.

Huwa ma semma xejn li Malta se tagħti lill-Bank Ċentrali ta’ l-Unjoni, kull sena, bejn 11 u 12-il miljun liri Maltin (jew 25 u 28 miljun Ewro rispettivament), biex minflok il-lira Maltija, ikollna l-Ewro.

Għax mill-ewwel tas-sena d-dieħla, il-profitti li l-Bank Ċentrali ta’ Malta kien jagħmel fis-sena (bejn 11 u 12-il miljun liri Maltin), issa se jkun jista’ jagħmilhom il-Bank Ċentrali ta’ l-Unjoni li se jieħu r-riservi barranin tal-Bank Ċentrali ta’ Malta.

Kellu raġun għalhekk il-President tal-Bank Ċentrali ta’ l-Unjoni jkun daqstant ferħan li pajjiżna se jċedi l-lira Maltija għall-Ewro.

Għax il-Bank Ċentrali ta’ l-Unjoni jista’ jagħmel qligħ tajjeb kull sena minn fuq ir-riservi barranin ta’ Malta, u pajjiżna se jħallas prezz għoli billi se jitlef 11 jew 12 il-miljun liri Maltin kull sena.

Fil-kampanja twila ta’ propaganda għad-dħul ta’ l-Ewro f’pajjiżna, ħadd ma kellu d-diċenza li jispjega lill-poplu Malti kemm hu kbir il-prezz li l-poplu se jkollu jħallas biex juża l-Ewro flok il-lira Maltija.

Lit-tfal ta’ l-iskola u l-istudenti żgħażagħ tagħna se fil-kurrikulu tagħhom, jisquhom tagħrif ta’ propaganda favur l-Ewro u l-Unjoni Ewropea, iżda mhux se jispjegawlhom li pajjiżna se jħallas il-prezz ta’ 11 jew 12 il-miljun liri Maltin kull sena ħalli huma jużaw l-Ewro.

L-irjus kbar ta’ Malta wrew il-ferħ kbir tagħhom lill-President tal-Bank Ċentrali ta’ l-Unjoni matul iż-żjara tiegħu fostna.

Min-naħa tiegħu, huwa ma wrihomx kemm rahom baħnana li lanqas jintebħu li pajjiżhom se jitlef il-profitti li jagħmel il-Bank Ċentrali ta’ Malta, u li l-Bank Ċentrali ta’ l-Unjoni se jiggwadanja bid-dħul ta’ l-Ewro f’pajjiżna.

Il-propagandisti ta’ l-Unjoni Ewropea qegħdin isostnu li l-poplu Malti se jagħmel pass storiku meta fl-1 ta’ Jannar li ġej, jaqleb għall-Ewro.

Se tkun telfa, mhux rebħa, storika għall-poplu tagħna għax il-munita komuni ta’ l-Unjoni se tkompli ttellfilna mis-sovranità tagħna.

Se nitilfu l-kontroll fuq kemm ikunu r-rati ta’ l-imgħaxijiet fuq is-self u fuq id-depożiti.

Mhux se jibqgħalna l-fakultà li permezz ta’ l-aġġustament tar-rata ta’ l-imgħax, ngħinu ħalli jiżdiedu l-impjiegi f’pajjiżna.

Ma jkunx aktar possibbli li permezz tal-valur tal-munita Maltija, ngħinu biex il-prezzijiet ma jgħolewx ħafna u b’hekk jitrażżan l-għoli tal-ħajja, u biex ngħinu ħalli nkabbru l-esportazzjoni.

Min jirrispetta lill-Maltin u jħares tassew l-interessi nazzjonali, għandu jgħarraf lill-poplu mhux bil-vantaġġi biss ta’ l-Ewro, iżda wkoll bl-iżvantaġġi li se nġarbu.

Min biegħ ruħu lill-Unjoni Ewropea qiegħed jissagrifika l-interessi nazzjonali u jinganna lill-poplu.

Iżda jasal iż-żmien meta l-poplu jintebaħ li ġie ttradut, u jbiddel f’imrar il-ferħ ta’ dawk kollha li llum huma ħatja ta’ dan l-għajb nazzjonali u disprezz tal-poplu.

L-għada li Trichet ħalla Malta, tħabbar li fl-Italja seba’ miljuni huma foqra minħabba l-Ewro li t-Taljani daħħlu flok il-Lira Taljana.

Aktar tagħrif dwar l-UE

Waqt li kien f’Malta, Jean-Claude Trichet ma setax ma jqanqalx mal-Prim Ministru l-kwistjoni ta’ l-indipendenza tal-Bank Ċentrali Ewropew mill-influwenza tal-pajjiżi ta’ l-Unjoni Ewropea.

Il-Bank Ċentrali Ewropew kien ingħata “status” speċjali, differenti minn dak ta’ l-istituzzjonijiet l-oħrajn ta’ l-Unjoni, fil-Kostituzzjoni miftehma f’Ruma f’Ottubru, 2004.

Iżda t-Trattat il-ġdid ta’ Riforma jqis lill-Bank Ċentrali l-istess bħal l-istituzzjonijiet l-oħrajn ta’ l-Unjoni.

Minħabba dan, Trichet jibża’ li l-Bank Ċentrali se jkun suġġett wisq għal dak li jridu l-pajjiżi membri, u b’hekk, tkun imtiefsa l-indipendenza tal-Bank.

Trichet talab li l-Bank Ċentrali jingħata l-istess “status” li kellu fil-Kostituzzjoni tal-2004, iżda t-talba ma ntlaqgħetx.

Il-President Franċiż Nicolas Sarkozy l-aktar li jisħaq li l-Bank Ċentrali ta’ l-Unjoni jagħti kas kif jaħsbuha l-pajjiżi membri.

Fil-Laqgħa Ġenerali Annwali tas-CNI li saret fis-7 ta’ Ottubru, fl-uffiċċju Nru 60A Triq id-Dejqa, il-Belt, il-membri tas-CNI approvaw din ir-riżoluzzjoni mressqa minn Harry Demarco.

“Din il-Laqgħa Ġenerali Annwali tal-Kampanja Ħelsien Nazzjonali CNI, illum, 7 ta’ Ottubru, 2007, tinnota:

(a) Li għalkemm għaddew sitt xhur mill-għeluq tal-perjodu ta’ tliet snin, 2004-2006, meta Malta tat lill-Unjoni Ewropea Lm73,750,000, għadu ma ntqalx uffiċjalment kemm, mill-Lm154,710,000 li l-Unjoni suppost tatna, fil-fatt tathomlna. (Qed jingħad li tawna inqas minn nofshom).

(b) Li flok ix-xogħol jiġri wara l-ħaddiema Maltin, kif kien wiegħed il-Prim Ministru Fenech Adami, għandna iktar minn 100 fabbrika li għalqu, eluf ta’ ħaddiema mkeċċijin minn xogħolhom, iktar minn 6,000 permessi maħruġin lill-barranin, u hemm theddida li s-sena d-dieħla, is-sinsla ta’ l-għixien ta’ pajjiżna li jiddependi mill-vapuri, titkisser u tgħib.

Għalhekk, tappella lill-partiti politiċi kollha u lill-għaqdiet tal-ħaddiema kollha, ma jħallux li sseħħ il-vendetta tal-Kummissarju Gunther Verheugen li, bil-kompliċità ta’ x’uħud fostna, ikisser it-Tarzna ta’ Malta, li l-Luftwaffe Ġermaniża ma rnexxilhiex tagħmel bil-gelgul ta’ bombi.”

Għax illum kollox jiddependi minn xi tgħid l-Unjoni Ewropea, minn kemm nistgħu nagħmlu xogħol fit-Tarzna, sa l-inqas ħaġa, kemm inħallsu taxxa fuq il-ħrieqi tat-trabi.

Tqanqlu ħafna punti ta‘ kritika.

Intqal li l-poplu Malti qisu tilef il-ħila li jmexxi lilu nnifsu u skond kif jaqbillu.

Il-Kostituzzjoni ta’ Malta tkasbret, u pajjiżna qed jingħata biċċa biċċa lill-barranin, l-agħar fosthom, il-medda kbira ta’ art f’Ta’ Qali, għall-bini ta’ l-Ambaxxata bażi Amerikana.

Xogħol tal-Maltin qed jingħata lill-barranin, bħall-każ tas-Sea Malta, b’dannu għall-ħaddiema u għall-esportaturi, li mhux qegħdin jingħataw servizz regolari, kif kienet tagħtihom il-kumpanija nazzjonali.

Bis-sħubija fl-Unjoni Ewropea, pajjiżna tilef ħafna, fosthom il-miljuni ta’ kull sena mill-Protokoll Taljan, u l-qligħ ta’ kull sena tal-Bank Ċentrali ta’ Malta.

Tilef ukoll id-dritt li skond il-liġi jibgħat lura l-immigranti illegali jew li jagħtihom għajnuna xierqa biex ikomplu fi triqthom lejn l-Ewropa.

Waqt li ftit mijiet qegħdin igawdu mill-Unjoni Ewropea, il-kotra tal-poplu qiegħda tbati bil-politika u r-regolamenti tagħha.

Il-membri tas-CNI qablu li jżidu l-ħidma tagħhom ħalli mill-iktar fis tinbena maġġoranza li trid li Malta terġa’ tieħu l-indipendenza u l-ħelsien mill-UE, billi l-Maltin jerġgħu jieħdu rajhom f’idejhom.

Fil-Laqgħa Ġenerali ntagħżel il-kumitat għas-sena 2007-2008 tas-CNI:

Ċermen: Dr Karmenu Mifsud Bonnici;

Membri: P. Barbara, C. Galea, L. Galea, R. Galea, C. Gatt, M. Gatt, C. Lewis, E. Sultana, M. Sultana; Awdituri: E. Farrugia u E. Privitera.

L-ambjent pagan u Mażoniku ta’ l-Unjoni Ewropea

F’ġurnal lokali tal-Ħadd li għadda, Mons Anton Gauci rrefera għar-rapport f’ħarġa ta’ qabel tal-ġurnal, li qal li l-Knisja f’Malta tista’ tispiċċa investigata mill-Unjoni Ewropea għas-sussidju li l-Gvern jagħtiha, wara li hija għaddietlu, bi ksur tar-rieda tad-donaturi jew testaturi, il-proprjetà li dawn ħallewlha b’mottiv spiritwali.

Dan ir-rapport deher wara li sar magħruf li qegħdin isiru sforzi fl-Unjoni Ewropea ħalli jinvestigaw lill-Istat Taljan għall-għajnuna finanzjarja li jagħti lill-Knisja Kattolika.

Il-Papa Benedittu XVI rabat dan il-fatt mal-Mażunerija mferrxa li hemm fl-Unjoni Ewropea.

Dwar it-theddida ta’ investigazzjoni mill-Unjoni Ewropea, Monsinjur Gauci kkummenta li

“issa hemm il-biża’ tal-waħx li l-Unjoni Ewropea, li xi sinjuri mexxejja Maltin għoġobhom idaħħluna fiha. Ma nitkellimx mill-intenzjoni tagħhom. Din il-ħaġa jarawha huma u jaraha Alla li ma jħallasx bilfors nhar ta’ Sibt, imma li mmankabbilment iħallas, ħafna drabi anki minn din id-dinja, u żgur fl-oħra”.

Monsinjur Gauci kompla jilmenta hekk:

“Xeħtuna f’ambjent li tellifna s-sovranità tagħna, tellifna l-vera indipendenza tagħna. Naturalment ma nistenniex li jaqblu miegħi dawk li fattru l-froġa, bħalma nistenniex li jaqblu miegħi dawk li qegħdin ipappuha grazzi għal din il-mossa.

“U huma bosta dawk il-Maltin li qegħdin ipappuha u jpappuha tajjeb ħafna. Miniex nirreferi biss għal dawk li qegħdin barra minn Malta b’salarji fenominali u bi kwalità ta’ ħajja superjuri għal dik ta’ impjegati ta’ l-istat ta’ l-istess livell li jaħdmu lokali, forsi anki jgħixu f’ambjent oltre lussuż imma anki pagan.”

“Lanqas nistenna li jaqblu miegħi dawk il-politiċi li daħħluna f’dak l-ambjent deskritt minn ħabibna Ratzinger, bħala wieħed ta’ Mażunerija” kiteb Mons Gauci, li fisser li n-natura umana għandha l-karatteristika li tiġbed lejn l-interessi personali tagħha, fil-każ tagħna, anki lejn dawk tal-politika partiġġjana.

Il-kittieb jissokta jagħmel għadd ta’ mistoqsijiet dwar x’kien l-atteġġjament tal-Knisja f’Malta fil-kwistjoni tas-sħubija fl-UE, u jfakkar fil-qawl li jgħid li min ikun kaġun tal-ħsara tiegħu stess, għandu jibki miegħu nnifsu.

Għalhekk min tkellem favur l-UE, jew naqas li jwissi dwar il-perikli tagħha, issa jagħti t-tort lilu nnifsu jekk l-Unjoni tieħu atteġġjament negattiv kontra l-Knisja.

Monsinjur Gauci jisħaq li:

“Jekk jirnexxielna niċċajtaw mal-poplu, ma’ Alla żgur mhux se jirnexxielna. La lilna tal-Knisja, u lanqas lill-politiċi għatxana għal setgħa, unuri u flus.”

“Assolutament mhix ċajta ddaħħal lil pajjiżek f’ambjent pagan u massoniku”.

IRRIDU L'INDIPENDENZA MILL-UNJONI EWROPEA

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.