MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

Issa li l-elezzjoni għall-Parlament Ewropew għaddiet, nistgħu nitkellmu aktar ċar, mingħajr ma nfixklu l-votazzjoni.

M’aħniex kontra l-Ewropa, iżda kontra l-Unjoni Ewropea.

L-Ewropa mhix l-Unjoni Ewropea.

Hawn madwar 20 pajjiż ieħor fl-Ewropa li mhumiex imsieħba fl-Unjoni.

Sabiex inkunu l-aqwa pajjiż fl-Ewropa, ma għandniex bżonn inkunu mseħbin fl-Unjoni.

L-aqwa żewġ pajjiżi Ewropej – l-Isvizzera u n-Norveġja – huma barra l-Unjoni.

It-tnejn żammew il-munita tagħhom u ma daħħlux l-ewro.

La marru lura u lanqas huma iżolati.

Huma b’saħħithom aktar mill-aqwa pajjiżi fl-UE.

Pajjiżna huwa fl-Ewropa mhux għax issieħeb fl-Unjoni Ewropea.

Kien fl-Ewropa qabel ma daħal fl-Unjoni.

Jibqa’ fl-Ewropa meta jerġa’ jkun barra mill-Unjoni għax Malta tagħmel ġeografikament parti mill-Ewropa.

Biex ma nkunux poplu iżolat fl-Ewropa, ma jeħtiġilniex nagħmlu parti mill-Unjoni Ewropea.

Aħna ilna s-snin nagħmlu parti mill-Kunsill tal-Ewropa li għandu s-sede tiegħu fi Strasbourg, bieb ma’ bieb mal-Parlament Ewropew.

Fil-laqgħat tal-Kunsill tal-Ewropa jieħdu sehem regolarment il-Ministri Maltin u l-Membri Parlamentari miż-żewġ naħat tal-Kamra.

Il-Kunsill tal-Ewropa għandu l-Qorti Ewropea tal-Ġustizzja fi Strasbourg, li taqta’ kawżi dwar ksur tad-drittijiet fondamentali tal-bniedem.

Wieħed mill-Imħallfin tal-Qorti tal-Kunsill tal-Ewropa huwa Malti.

L-għanijiet tal-Kunsill tal-Ewropa huma li jħares is-sistema demokratika u d-drittijiet u l-libertajiet fondamentali tal-bniedem.

F’Malta ngawdu l-benefiċċji tas-sistema demokratika, tal-ħarsien tal-liġi u tar-rispett tad-drittijiet u l-libertajiet fondamentali tal-bniedem, mhux għaliex imseħbin fl-Unjoni Ewropea.

Il-poplu tagħna kiseb dawn il-benefiċċji ċivili qabel ma l-Unjoni Ewropea firxet il-ħakma tagħha fuq Malta, u ma hemmx bżonn l-Unjoni biex il-poplu Malti jiddefendi dawn il-kisbiet ħalli jibqa’ jgawdihom.

Għax aħna kontra s-sħubija fl-Unjoni Ewropea, ma jfissirx li aħna kontra l-Ewropa jew kontra l-ħbiberija u l-koperazzjoni bejn il-popli tal-Ewropa.

Aħna kontra s-sħubija ta’ Malta fl-Unjoni għaliex din ġabitilna aktar piżijiet milli tatna benefiċċji, u għaliex ma bqajniex indipendenti u ħielsa.

Aħna kontra s-sħubija fl-Unjoni kemm minħabba l-mod kif l-Unjoni titmexxa,

* kif ukoll għaliex l-Unjoni tħaddan politika ekonomika u soċjali ħażina

* li tgħakkes lis-setturi żgħar tal-poplu

* u tkabbar id-diżugwaljanzi bejn min igawdi mill-ġid tal-Unjoni

* u min ikun imċaħħad minnu,

* kif qiegħed iseħħ f’pajjiżna.

Dawn ir-raġunijiet ma jħalluniex nirrassenjaw ruħna li Malta tibqa’ politikament kolonja tal-Unjoni Ewropea,

* imneżża’ mis-sovranità ta’ nazzjon ħieles u indipendenti,

* fejn ir-rieda tal-maġġoranza tal-poplu Malti ma tiswa xejn

* quddiem il-maġġoranza tal-pajjiżi tal-Unjoni Ewropea

* li jiddeċiedu huma kif jitmexxa pajjiżna,

* anke kontra l-interessi tal-poplu tagħna.

Għalhekk aħna m’aħniex kuntenti b’Malta fl-Ewropa sakemm Malta ma tkunx barra l-Unjoni Ewropea.

BARRANIN mill-pajjiżi tal-Unjoni Ewropea li qegħdin jgħixu f’Malta, fl-elezzjonijiet għal-Parlament Ewropea jivvutaw hawn bhal ma l-Maltin li joqogħdu fil-pajjiżi l-oħrajn tal-Unjoni jivvutaw f’dawk il-pajjiżi.

Iżda n-numru tal-Maltin fil-pajjiżi l-oħrajn huwa insinifikanti hdejn id-daqs tal-popolazzjoni ta’ dawk il-pajjiżi tal-Unjoni, u għalhekk ma jistgħax jinfluwenza r-riżultat tal-votazzjoni.

Mentri fil-każ ta’ Malta,

* ftit mijiet ta’ votanti barranin jistgħu jfissru liema kandidati jiġu eletti

* u ta’ liema partit politiku jkunu.

Għalhekk ir-riżultat tal-votazzjoni f’pajjiżna jkun jiddependi mill-votanti barranin.

Dan huwa ħażin għal pajjiżna, u qiegħed iseħħ għaliex l-UE tridu.

L-Unjoni Ewropea għandha l-għan li fiż-żmien li ġej,

* barranin mill-Unjoni li joqogħdu f’pajjiżna

* jkollhom id-dritt jivvutaw ukoll fl-elezzjoni għall-Parlament Malti,

* u li l-immigranti illegali li jingħataw l-istatus ta’ refuġjati

* u dawk li jingħataw protezzjoni umanitarja

* jkollhom ukoll id-dritt tal-vot.

Ma hemmx dubju li dawk il-passi jħarbtu għal kollox il-qagħda politika f’pajjiżna

* għaliex min jitla’ fil-Gvern biex imexxi l-poplu tagħna

* jkun jiddependi mhux mill-Maltin u l-Għawdxin,

* iżda mill-voti tal-immigranti illegali meqjusin bħala refuġjati

* u min dawk mogħtijin protezzjoni umanitarja.

Imbagħad ikun jista’ jingħad żgur li trajna ma għadux f’idejna ħtija tal-UE.

L-UNJONI Ewropea trid li f’pajjiżna jsir inċineratur li jaħraq l-iskart, u l-Gvern Malti aċċetta li jagħmel wieħed fin-naħa t’isfel ta’ Malta, aktarx lejn Marsaxlokk.

Biex ikun effiċjenti u ġustifikat ekonomikament, l-inċineratur irid jitħaddem il-ħin kollu.

Iżda pajjiżna ma joħloqx ammont ta’ skart li jista’ jħaddem l-inċineratur il-ħin kollu.

Għalhekk qiegħed jingħad li se jkollna nġibu skart minn pajjiżi oħra biex jinħaraq fl-inċineratur li l-UE tridna nagħmlu bl-għajnuna tal-fondi tagħha.

Pajjiżi ewlenin tal-UE sabu li jaqblilhom jesportaw l-iskart tagħhom lejn pajjiżi oħrajn milli joqogħdu jeqirduh għandhom.

Huma jħeġġu u jgħinu lil pajjiżi oħrajn biex iwaqqfu impjanti ta’ inċineraturi li jiġġeneraw l-enerġija, u jingħatalhom l-iskart biex jiġġeneraw l-enerġija bih.

Iżda mhux l-ewwel darba li ntbagħat skart mill-aktar velenuż li jikkawża problemi kbar għas-saħħa tal-bniedem.

Għalhekk saret il-Konvenzjoni ta’ Basle (fl-Isvizzera) dwar il-Moviment bejn il-Fruntieri ta’ Skart Velenuż.

Irridu noqogħdu attenti li bl-iskuża tal-għoti tal-fondi, l-UE ma ġġibniex f’qagħda li nimpurtaw l-iskart velenuż ta’ pajjiżi oħrajn tal-Unjoni Ewropea biex l-inċineratur jiġġeneralna l-enerġija.

L-ELEZZJONIJIET li saru għal-Parlament Ewropew mhux se jsolvulna l-problemi li għandu pajjiżna, fosthom l-immigrazzjoni illegali.

Fl-aħħar ġimgħa tal-kampanja elettorali tħabba li l-UE qatgħet li jsir proġett pilota ta’ ‘burden sharing’ għal Malta, u li l-missjonijiet tal-Frontex jissaħħu billi l-Frontex tgħin fir-rimpatrijar tal-immigranti.

Intqal ukoll li se jiflu l-proposta li ssir l-investigazzjoni tal-immigranti qabe jitilqu mil-Linja, biex jinstab min minnhom ħaqqu jitqies bħala refuġjat jew jingħata protezzjoni umanitarja.

Hemm ħafna x’jingħad dwar kull waħda mit-tliet proposti imsemmijin.

Dwar il-proġett pilota tal-‘burden sharing’ hemm l-oġġezzjoni fundamentali li din il-miżura tinkoraġġixxi aktar immigranti illegali jiġi Malta bit-tama li jintbagħtu lejn il-pajjiżi kbar tal-Ewropa.

Dwar il-proposta tal-Frontex li tgħin biex jittieħdu lura l-immigranti illegali, għandu jingħad li l-Frontex għandha

* l-ewwel ma tħallix id-dgħajjes bl-immigranti jkomplu sejrin lejn l-Ewropa,

* mhux tagħtihom l-għajnuna biex jaslu qawwijin u sħaħ f’pajjiżna

* u f’pajjiżi oħrajn tal-Ewropa kif qiegħda tagħmel.

Imbagħad, it-tielet miżura li trid li ssir l-investigazzjoni tal-immigranti illegali qabel jitilqu mil-Libja, ma tweġibx il-mistoqsija:

min se jieħu ħsieb l-immigranti li jirriżulta li għandhom jitqiesu bħala refuġjati jew li jistħoqqilhom protezzjoni umanitarja?

Liema pajjiżi tal-Unjoni lesti joħduhom?

Kieku din il-proposta kellha titħaddem,

* miljuni ta’ immigranti mill-pajjiżi tal-Afrika jmorru l-Libja

* bit-tama li jitqiesu bħala refuġjati

* jew jingħataw protezzjoni umanitarja.

Mill-mod kif l-UE trattat il-problema tal-immigrazzjoni illegali s’issa, jidher li din ma tridx li l-immigrazzjoni titrażżan, għaliex l-Unjoni għandha bżonn l-immigranti.

Min-naħa tagħna,

* Malta għandha bżonn trażżan l-immigrazzjoni illegali,

* u għalhekk jeħtieġ li nimxu b’mod differenti mill-Unjoni.

Għandna nieħdu passi li jiskoraġġixxu għal kollox l-immigranti illegali milli jiġu Malta.

L-aqwa miżura hija li ma nżommuhomx hawn, taħt ebda skuża u għall-ebda raġuni.

Għandna nibgħatuhom lura minn fejn ikunu ġew, jew inħalluhom sejrin fejn iridu jmorru fl-Ewropa.

Nagħmlu dak li huwa sewwa għal pajjiżna u mhux dak li trid l-UE.

IT-TNAQQIS fil-persentaġġ tal-votanti fl-aħħar elezzjoni tal-Parlament Ewropew jixhdu tnaqqis fl-appoġġ popolari għall-Unjoni Ewropea, minkejja l-miljuni li ntefqu fi propaganda favur l-Unjoni.

Ir-riżultat tal-votazzjoni jfisser kundanna għall-politika tal-Unjoni mwettqa mill-Gvern Malti

* fl-oqsma tax-xogħol,

* tal-għoli tal-ħajja,

* tal-privatizzazzjoni

* u dwar l-immigrazzjoni illegali.

Il-maġġoranza tal-Maltin u l-Għawdxin ma jaqblux mal-UE li ġiegħlet lill-Gvern iħarbat l-impjieg ta’ 1,700 ħaddiem tas-sengħa tat-Tarzna.

Ma kienx hemm bżonn li jisr dan id-diżastru nazzjonali tal-universita’ tas-snajja f’pajjiżna biex ma jibqax jingħata sussidju lit-Tarzna.

Kellha tingħata tmexxija effiċjenti.

Il-maġġoranza lanqas taqbel mal-UE li qiegħda ġġiegħel lill-Gvern

* li jieħu x-xogħol tat-trasport pubbliku mingħand il-mijiet tas-sidien tax-xarabanks

* biex jagħtih bl-offerta lil kuntrattur wieħed li aktarx ikun barrani.

Il-poplu ma jistax jaqbel li biex nimxu mar-regola tal-UE,

* nagħtu permess lil xi 4,000 ħaddiem mill-pajjiżi tal-Unjoni biex jaħdmu f’pajjiżna

* u jieħdu l-ħobż ta’ numru daqstant ieħor ta’ ħaddiema Maltin.

IL-maġġoranza tal-poplu ma taqbilx li biex jissodisfa lill-UE,

* il-Gvern ma baqgħax iħallas sehem mill-ispiża tas-servizzi essenzjali tal-ilma u d-dawl mit-taxxi li jiġbor,

* u minflok għolla ħafna r-rati tagħhom.

Il-poplu ma japprovax il-politika ta’ privatizzazzjoni li l-UE qiegħda timponi fuq il-Gvern.

Il-poplu kollu tista’ tgħid jikkundanna l-politika tal-UE dwar l-imigrazzjoni illegali li l-Gvern kellu jsegwi,

* li ssarrfet fl-eluf ta’ uimmigranti illegali li għandna fostna,

* li huma ta’ piż ekonomiku kbir għalina.

Għalhekk il-vot tas-6 ta’ Ġunju kien kundanna tal-politika tal-UE li l-Gvern qiegħed isegwi f’pajjiżna.

Il-Ħamis, 11 ta’ Ġunju, 2009.

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

60A, Triq id-Dejqa,

Valletta

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ