MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LILL-KANDIDAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

Waħda mill-agħar konsegwenzi ħżiena tal-ftehim tas-sħubija ta’ Malta fl-Unjoni Ewropea hija ż-żieda qawwija fl-għoli tal-ħajja li s-sħubija sejra ġġib magħha.

Bil-miżuri li diġà ttieħdu biex niġu skond ir-regoli u l-politika ta’ l-Unjoni,

* il-ħajja għoliet u l-ispejjeż żdiedu,

* tant li ħafna familji diġà ma jistgħux ilaħħqu magħhom. 

Bil-miżuri ġodda li se jkollna nibilgħu wara li pajjiżna jissieħeb formalment fl-Unjoni fl-1 ta’ Mejju li ġej, il-piż taż-żieda fl-għoli tal-ħajja minħabba r-regoli u l-politika ta’ l-Unjoni se jitqal ħafna aktar u t-tbatijiet għal ħafna familji se joktru bil-bosta.

L-aħbar li hawn f’Malta eluf ta’ familji li nqatgħalhom is-servizz ta’ l-elettriku għax ma setgħux iħallsu l-kontijiet tad-dawl, għandu jixxukkjana u jiftħilna għajnejna għall-gwaj soċjali li qegħdin niffaċċjaw.

Eżempju ċar ta’ kif is-sħubija fl-Unjoni Ewropea se tikkaġuna direttament żieda kbira fl-għoli tal-ħajja għall-familji Maltin huwa dak li se jiġri wara l-1 ta’ Mejju fil-prezz tal-laħam impurtat taċ-ċanga.

Illum, fuq laħam taċ-ċanga li jiġi minn barra, hemm levy ta’ 10 ċenteżmi l-kilo. 

Jekk iċ-ċanga tinġieb minn pajjiż membru ta’ l-Unjoni Ewropea, iċ-ċanga tinbiegħ lil Malta bil-prezz ta’ 2.5 Euro l-kilo.

Wara li nissieħbu fl-Unjoni fl-1 ta’ Mejju, iċ-ċanga li nixtru minn pajjiżi membri ta’ l-Unjoni se tinbiegħ lilna bil-prezz ta’ 4.5 Euro l-kilo, minflok dak tal-lum ta’ 2.5 Euro. 

Il-mara tad-dar li tixtri ċanga ta’ barra li ġejja mill-Unjoni Ewropea s jkollha żieda ta’ 9 Euro kull kilo ċanga li tixtri.

Fil-każ tal-laħam taċ-ċanga

* li nixtru minn pajjiżi li m’humiex fl-Unjon Ewropea,

* bħall-Arġentina

* u New Zealand,

* il-mara tad-dar

* se jkollha tħallas ħafna aktar

* wara s-sħubija ta’ Malta fl-Unjoni fl-1 ta’ Mejju li ġej.

Għax skond ir-regoli ta’ l-Unjoni Ewropea,

* fuq kull kilo ta’ ċanga impurtat minn barra l-Unjoni,

* hemm tariffa ta’ 2.21 Euro l-kilo

* u dazju ta’ 12.8 fil-mija tal-prezz li jitħallas għaċ-ċanga.

B’dan il-mod,

* jekk per eżempju

* l-prezz taċ-ċanga mixtrija minn barra l-Unjoni Ewropea

* hija 2.5 Euro l-kilo

* u l-levy hija 10 ċenteżmi l-kilo,

* wara l-1 ta’ Mejju

* l-prezz ta' kilo ċanga

* jiżdied bit-tariffa ta’ 2.21 Euro

* u bid-dazju ta’ 0.32 Euro

* u l-prezz minn 2.60 Euro l-kilo

* se jsir 5.03 Euro l-kilo.

Iż-żieda fil-prezz tal-laħam taċ-ċanga tolqot ħażin ħafna lill-familji tagħna. 

Iżda tolqot ħażin ħafna wkoll lill-industrija tat-turizmu li llum diġà qiegħda batuta.

Għax il-lukandi u r-ristoranti jkollhom jgħollu l-prezzijiet tagħhom u nkomplu niġu inqas kompetittivi speċjalment fil-konfront ta’ destinazzjonijiet turistiċi oħra li m’humiex milquta biż-żieda tal-prezz tal-laħam taċ-ċanga li jimpurtaw, għax m’humiex fl-Unjoni Ewropea.

Dak li se jiġri fir-rigward tal-laħam li nimpurtaw,

* se jiġri wkoll fir-rigward ta’ ħwejjeġ oħra ta’ l-ikel,

* bħal m’huma d-dqiq

* u z-zokkor. 

Dawn il-ħwejjeġ nixtruhom minn pajjiżi barra l-Unjoni Ewropea bi prezzijiet orħos minn dawk ta’ l-Unjoni.

Biex tiskuraġġina li nagħmlu dan u minflok nixtru mill-pajjiżi membri, l-Unjoni Ewropea ġġagħalna nħallsu tariffa u dazju li tiffissa hija.

Aktar minn hekk. 

Fil-waqt li llum li għadna barra, dawn il-ħwejjeġ li hija tbegħelna tagħtihom bi prezzijiet orħos għax issussidjati, meta nissieħbu wara l-1 ta’ Mejju l-Unjoni tibda tbiegħhomna bi prezzijiet ogħla kif jinbiegħu fis-suq intern wieħed ta’ l-Unjoni kollha.

Issa qegħdin nifhmu aħjar għaliex wieħed mill-preżentaturi ta’ programm regolari fuq Super One Radio dejjem jara kif jaqta’ qalb u t-tama tas-semmiegha meta xi ħadd iċempel waqt il-programm u jgħid li l-Partit għandu jaħdem, meta jerġa’ jkun fil-Gvern, biex Malta toħroġ mill-Unjoni Ewropea.

Lil dan il-preżentaturi xi ftit xhur ilu konna smajnih jirrispondi lis-semmiegħa li jisħqu li ’l quddiem Malta ghandha toħroġ mill-Unjoni ħalli tikseb lura l-ħelsien u s-sovranità tagħha, billi qalilhom li jekk noħorgu mill-UE, “l-Unjoni tista’ titlobna lura l-flus li tkun tatna”!

Dan l-aħħar lil dan l-istess preżentatur smajnih jerġa’ jirrispondi lil semmiegħ li ċempillu u għamillu diversi argumenti validi ħafna għala Malta għandha toħroġ mill-Unjoni Ewropea.

Il-preżentatur deher li ma jafx kif jaqbad jirrispondih, iżda biex s-semmiegħ li ċempel ma jħallix impatt negattiv dwar l-UE fuq is-semmiegħa tal-programm, il-preżentatur qallu hekk: 

“Nistgħu nibqgħu niddibattu dan is-suġġett lejl sħiħ. Iżda kemm ikun għaqli jekk meta ħames snin oħra jkun hemm Gvern Laburista u ngħidu li rridu noħorġu mill-UE, meta l-uġiegħ tas-sħubija jkun għadda?”

Issa kull min jaf anki xi ħaġa żgħira dwar dak “il-pakkett jinten” li l-Prim Ministru Malti ffirma għalih f’Atene, jaf li l-uġiegħ il-kbir jibda ħames snin oħra – għax ikunu spiċċaw dawk il-perjodiċi transizzjonali li l-UE tatna ħalli l-qatgħa u l-uġiegħ il-kbir ma jasalx qabel ir-referendum u l-elezzjoni ġenerali tas-sena l-oħra.

Jidher ċar li r-raġuni vera għala dak il-preżentatur qiegħed iġib dawk ir-raġunijiet banali biex jaqta’ qalb u t-tama tas-semmiegħa Laburisti, hija li dak l-istess preżentatur se jikkontesta l-elezzjoni għall-Parlament Ewropew f’Ġunju li ġej. 

Kif qatt huwa jista’ jaqbel ma’ min iċempel lis-Super One u jgħid li Malta għandha terġa’ toħroġ mill-Unjoni Ewropea meta huwa jrid jidħol fil-Parlament tagħha! 

Imma kif jista’ jippretendi li jivvotawlu dawk l-eluf ta’ Laburisti li ma jaqblux mas-sħubija ta’ Malta fl-UE?

Huwa fatt li Malta jkollha dritt toħroġ mill-UE u tinnegozja ftehim ġdid allavolja tkun barra l-UE. 

Nurukom dan il-ġimgħa d-dieħla. 

Iżda din hija xi ħaġa li ħadd ma jsemmiha lis-semmiegħa tas-Super One.

NRU 7 – L-Artiklu 1 – 5(1), biex jogħġob xi ftit lil dawk li jemmnu fis-sovranità ta' pajjiż, jgħid hekk: "L-Unjoni tirrispetta l-identità Nazzjonali ta' l-istati membri tagħha …" 

Din hija biss retorika għax l-identità nazzjonali mhix kunċett li wieħed jista' jagħmel kawza dwaru jekk ma jkunx rispettat. 

L-identità nazzjonali hija ferm differenti mid-demokrazija nazzjonali jew l-indipendenza li l-Kostituzzjoni qiegħda formalment tkisser. 

Poplu jista' jżomm l-identità tiegħu kemm fl-iskjavitù kif ukoll fil-ħelsien, kif jixhdu ħafna pajjiżi madwar id-dinja li għandhom l-identità iżda m'għandhomx indipendenza, bħall-Kurdi, il-Palestinjani u ċ-Ċeċeni.

Aktar importanti minn dan, l-Artiklu 1 – 10(1) jgħid hekk: "Il-Kostituzzjoni u l-liġi addottata mill-istituzzjonijiet ta' l-Unjoni waqt li jeżerċitaw il-kompetenzi tagħhom, għandhom ikunu superjuri għal-ligi ta' l-istati membri."

Innutaw li qiegħda ssir distinzjoni bejn il-Kostituzzjoni u l-liġijiet magħmula mill-Istituzzjonijiet ta' l-Unjoni.

It-tnejn għandhom supremazija fuq il-liġi ta' l-istati membri. 

Aktar minn hekk. 

Il-Kostituzzjoni ta' l-UE għandha supremazija fuq il-kostituzzjonijiet ta' l-istati membri u tal-liġi kostituzzjonali tagħhom.

Huwa ċarissimu li stati li jpoġġu lilhom infushom taħt Kostituzzjoni li tinkludi artiklu bħal dan, ma jistgħux jibqgħu jqisu lilhom infushom bħala indipendenti u sovrana bħal m'huma l-bqija ta' madwar 170 stat fid-dinja li m'humiex fl-Unjoni Ewropea. 

L-istati membri ta' l-UE jsiru aktar qishom

* il-Bavarja, reġjun fil-Ġermanja,

* Virġinia, reġjun fl-Istati Uniti ta' l-Amerika,

* Quebec fil-Kanada

* u New South Wales, reġjun fl-Awstralja,

* u dawn kollha huma stati subordinati (li jiġu taħt) jew provinċji,

* fi Stat Federali Ewropew,

* li għandu d-dritt jirrappreżentahom internazzjonalment.

Dan l-artiklu huwa konklussiv rigward il-karattru federali ta' l-UE. 

Fi Stati Federali, il-poter tal-gvern jiġi eżerċitat kemm fil-livell federali, kif ukoll fil-livell ta' l-istat subordinat lokali jew provinċjali. (ikompli l-ġimgha d-dieħla)

Tgħid dan iseħħ f’Malta?

Fl-Isvezja qiegħed jiġi ffurmat Partit Euroxettiku ġdid (jiġifieri kontra kif hija magħmula l-Unjoni Ewropea) taħt it-tmexxija ta' Nils Lundgren, Soċjal Demokratiku u ekonomista. 

Hemm tamiet qawwija fl-Isvezja li dan il-partit politiku ġdid jirbaħ sa erba' siġġijiet fil-Parlament Ewropew f'Ġunju li ġej.

Tgħid għad naraw jiġri l-istess f'Malta, jekk dawk l-eluf kollha li ma jaqblux mas-sħubija ta' pajjiżna fl-UE u dawk kollha li għalkemm ivvutaw favur is-sħubija, jduru kontriha minħabba l-effetti diżastrużi tagħha, jħossu li ebda partit ma jkun qiegħed jirrappreżentahom?

Il-Ħamis, 11 ta’ Marzu, 2004.

IRRIDU L'INDIPENDENZA MILL-UNJONI EWROPEA

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

60A, Triq id-Dejqa,

Valletta

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ