MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

Biex Malta tkun fost l-aħjar pajjiżi tal-Ewropa, trid toħroġ mill-Unjoni Ewropea (UE).

L-aħjar pajjiżi –

* l-Isvizzera u

* n-Norveġja –

* m’humiex fl-Unjoni.

Hekk ukoll Malta ma tridx tkun imxekkla bil-politika u r-regolamenti tal-UE biex tkun tista’ tilħaq il-livelli tagħhom.

Hemm numru ta’ pajjiżi żgħar fl-Ewropa li ma ssieħbux fl-UE u sejrin tajjeb, waqt li baqgħu jgawdu l-indipendenza u l-ħelsien tagħhom.

Fost dawn hemm

* Greenland,

* Lichtenstein,

* Andorra,

* Monaco,

* Ġibiltà

* u l-gżejjer awtonomi tar-Renju Unit,

* Channel Islands,

* Jersey u

* Gernsey.

Bħal dawn, Malta u Għawdex jistgħu jkunu barra l-Unjoni waqt li jagħmlu parti mill-Ewropa.

Bħalhom

* pajjiżna jista’ jkun               

* indipendenti u                    

* ħieles u                               

* mhux immexxi mill-Unjoni.

Huma m’humiex iżolati għax m’humiex fl-Unjoni Ewropea, u Malta, meta toħroġ, lanqas ma tkun iżolata.

Mhux minnu li ladarba Malta ssieħbet fl-UE, ma tistax toħroġ minnha.

Il-gżira ta’ Greenland kienet imsieħba u meta ħadet l-awtonomija tagħha mid-Danimarka, ma baqħetx fl-Unjoni.

Mal-UE,

* Greenland issa għandha ftehim mhux ta’ sħubija,

* iżda ta’ ħbiberija li

* jippermettilha timxi ’l quddiem bl-aħjar politika għaliha,

* mhux dik tal-Unjoni.

 

Bħalma għamlet Greenland,

* Malta wkoll tista’ ma tibqax fl-UE u   

* tista’ tagħmel ftehim ta’ ħbiberija u    

* koperazzjoni magħha                            

* li jkun iħares l-interessi tal-pajjiż,        

* mhux bħalma huwa l-ftehim ta’ sħubija

* li Malta għamlet mal-Unjoni,                

* li jħares l-ewwel l-interessi tal-Unjoni  

* mhux dawk tal-Maltin.                          

Issa li t-Trattat ta’ Lisbona daħal fis-seħħ, żgur ħadd ma jista’ jgħid li Malta ma tistax toħroġ mill-Unjoni.

Għax it-Trattat ta’ Lisbona jgħid iswed fuq l-abjad, fl-artiklu 49A, li:

“Kull stat membru jista’ jiddeċiedi… li joħroġ mill-Unjoni”.

Skont l-istess artiklu,

* meta Malta tgħarraf lill-Unjoni bl-intenzjoni li toħroġ,

* din tal-aħħar għandha fi żmien sentejn

* tinnegozja u tikkonkludi ma’ Malta

* ftehim dwar il-ħruġ mis-sħubija sħiħa,

* li jfassal qafas tar-relazzjonijiet futuri ta’ Malta mal-Unjoni.

It-trattat jaħseb ukoll li jekk imbagħad Malta terġa’ tkun trid tidħol, tista’ titlob biex tissieħeb mill-ġdid.

Għalhekk ladarba m’hemmx kwistjoni jekk Malta tistax toħroġ mill-Unjoni Ewropea, jibqa’ biss il-kwistjoni jekk Malta jaqblilhiex tagħmel dan.

Dawk li jsostnu li Malta tmur lura jekk ma tibqax fl-UE, dejjem isemmu l-miljuni li din wegħdet li tagħti lil pajjiżna.

Iżda qatt ma jfakkru kemm miljuni qegħdin inħallsu bħala pajjiż lill-Unjoni,

* u dejjem jaħbu kemm miljuni aktar Malta tonfoq fi spejjeż

* biex tlaħħaq ma’ dak li l-Unjoni trid minna.

Dak li l-propagandisti favur is-sħubija fl-Unjoni ma jfakkrux, jgħiduh l-estimi uffiċjali tal-Gvern kull sena.

Skont l-estimi,

* fl-ewwel sena tas-sħubija (2004),

* l-UE “xorbot” lill-poplu Malti                                                                  €32,871,104;

* fl-2005 ħaditilna                                                                                        €51,562,900;  

* fis-sena ta’ wara                                                                                       €51,655,989;  

* fis-sena 2007 “selħitilna”                                                                         €53,164,031;  

* is-sena l-oħra ħriġna għall-Kaxxa tal-UE                                                €63,937,324;  

* u fis-sena li ninsabu fiha l-estimi jbassru li l-Unjoni se toħdilna             €56,000,000,

* iżda sal-lum għadu mhux magħruf kemm se tieħu aktar minn hekk.

Dan kollu jfisser li minn meta sseħibna se nkunu ħallasna total ta’ €376,291,348 lill-Unjoni Ewropea.

Dawn il-miljuni kollha ta’ ewro jitħallsu mit-taxxi tal-Maltin u l-Għawdxin, u allura meta ma nibqgħux imseħbin fiha niffrankaw li nkomplu nħallsuhomlha.

Meta Malta toħroġ mill-UE il-familji Maltin u Għawdxin ikunu wkoll jistgħu jaraw tnaqqis kbir fl-għoli tal-ħajja jekk titneħħa t-taxxa li l-Unjoni imponiet li tiddaħħal f’pajjiżna.

U l-prezzijiet tal-prodotti u

* s-servizzi,                                           

* li titħallas il-VAT fuqhom,                 

* jitbaxxew bit-tneħħija ta’ 18% VAT.

Kieku dan iseħħ,

* bit-tneħħija ta’ din it-taxxa imposta mill-UE,              

* fis-sena 2010                                                                 

* il-familji lokali jiffrankaw l-ammont ta’ €494,720,000,

* li skont l-estimi uffiċjali                                                 

* hu stmat li se jinġabru                                                   

* minn fuq il-prodotti u                                                     

* s-servizzi                                                                         

* li se jitħallsu s-sena d-dieħla.                                        

B’hekk meta Malta toħroġ mill-Unjoni,

* il-ħajja tista’ torħos ħafna u         

* jonqsu t-tbatijiet ta’ ħafna familji

* li ma jistgħux ilaħħqu mal-ħajja,  

* kemm ilu li pajjiżna ssieħeb fl-UE.

Dawn huma ftit ħjiel ta’ kemm il-poplu Malti jaqbillu li ma jibqax imsieħeb fl-Unjoni.

Hemm ħafna vantaġġi oħrajn li jkollna okkażjoni nsemmu ’l quddiem.

Eluf ta’ Maltin u Għawdxin huma kontra s-sħubija ta’ Malta fl-Unjoni Ewropea.

Minkejja dan il-fatt, il-mexxjja politiċi spiss jgħidu li issa kulħadd f’pajjiżna jaqbel mas-sħubija.

Saħansitra dan l-aħħar, tliet eks-Presidenti tar-Repubblika ftaħru b’dan.

Iżda kemm il-mexxejja politiċi,                  

* kemm l-eks-Presidenti,                          

* kif ukoll il-midja li ddoqq l-istess diska,

* qegħdin jgħixu f’gidba                            

* għax mhux kulħadd f’pajjiżna                

* jrid li nibqgħu maħkumin mill-UE.         
 

L-eluf li ma jaqblux mas-sħubija fl-unjoni għandhom dritt jistennew li ma jkunux injorati.

Jemmnu bis-sħiħ li s-sħubija fl-UE tellfet lill-poplu Malti l-Indipendenza u l-Ħelsien, u li l-poplu m’għadx għandu rajh f’idejh.

Jaraw li l-Parlament Malti

* m’għadux iwettaq ir-rieda tal-maġġoranza tal-Maltin u l-Għawdxin,

* iżda x’tgħid u x’tiddeċiedi l-maġġoranza tal-pajjiżi tal-UE,                

* anke meta dan ma jkunx jaqbel għall-interessi tal-poplu Malti,       

* u għalhekk il-Parlament Malti m’għadux sovran.                              

L-eluf ta’ Maltin u Għawdxin

* li huma kontra s-sħubija fl-UE                     

* jifhmu li l-politika ekonomika,                     

* dik soċjali,                                                     

* il-politika barranija, u                                   

* dik tad-difiża Ewropea                                  

* mhumiex l-aħjar għall-poplu Malti,              

* u li l-poplu tilef,                                             

*  mhux rebaħ,                                                   

* meta f’dawn l-oqsma                                     

* rema l-politika li kien iħaddan                      

* qabel ma kellu jibda jħaddem dik tal-Unjoni.

Billi Malta toqgħod iċċiċċi kwieta madwar il-mejda għolja tal-pajjiżi tal-Unjoni, leħen Malta ma jinstemax aktar milli kien jistema’ minn meta Malta kienet tkanta solista għal rasha f’fora internazzjonali u mhux f’kor ta’ 27 pajjiż, b’għadd minnhom b’vuċijiet primi li jitfu l-ilħna tal-oħrajn.

Il-progress li l-poplu tagħna għamel wara l-kisba tal-Indipendenza u l-Ħelsien, ma kisbux bis-saħħa tal-UE.

Fil-ħames snin li pajjiżna ilu msieħeb fl-Unjoni,

* il-kotra tal-poplu ma tejbitx il-livell tal-għixien,

* u għal ħafna familji,

* id-diffikultajiet żdiedu

* u l-faqar reġa’ kiber.

Is-servizzi soċjali kollha li l-poplu għandu, saru qabel ma dħalna fl-Unjoni, u bis-sħubija sħiħa qegħdin jiġu mheddin, mhux jissaħħu.

Ftit ftit, it-tmexxija tal-aqwa intrapriżi f’pajjiżna qegħdin jerġgħu jaqgħu f’idejn il-barranin.

Dawn il-fatturi kollha wasslu lill-membri tal-Kampanja Ħelsien Nazzjonali (CNI) biex fil-laqgħa annwali li saret nhar il-Ġimgħa, 4 ta’ Diċembru, jaqblu dwar proposta li għandha tittieħed azzjoni ħalli titwaqqaf il-ħsara kbira li l-poplu qed iġarrab b’konsegwenza tas-sħubija ta’ Malta fl-UE.

Il-proposta li għaddiet fil-laqgħa annwali

* hija maħsuba biex toħloq mezz

* ħalli l-leħen tal-eluf ta’ Maltin u Għawxin,

* ta’ kull kulur politiku,

* li huma kontra s-sħubija ta’ pajjiżna fl-UE,

* ma jibqax ikun injorat

* kemm lokalment,

* kif ukoll barra minn pajjiżna.

Filwaqt li kulħadd jista’ jkompli jħaddan it-twemmin politiku li għandu,

nistgħu niftehmu dwar kwistjoni mill-aktar importanti għal kulħadd:     

* li nerġgħu nkunu poplu indipendenti u ħieles,                                      

* li jitmexxa demokratikament minn parlament sovran,                        

* fl-aħjar interessi tal-pajjiż,                                                                     

* mhux kif jiddeċiedu l-maġġoranza tal-barranin tal-Unjoni Ewropea.   

Dawn kienu r-raġunijiet li wasslu biex issir il-proposta li

“il-Kumitat li nħatar għas-sena d-dieħla għandu jistħarreġ il-ħtieġa ta’ twaqqif ta’ moviment politiku li jaħdem għall-ħelsien u l-indipendenza mill-ġdid tal-poplu Malti.”

Il-ġimgħa l-oħra l-pajjiżi tal-Unjoni Ewropea qablu li pajjiżna jkollu l-uffiċċju tal-aġenzija ġdida li se titwaqqaf ħalli tagħti appoġġ lill-pajjiżi tal-Unjoni fl-immaniġġjar tar-refuġjati (European Asylum Support Office).

Issa l-mexxejja tal-istati membri tal-Unjoni Ewropea huma mistennijin li fil-laqgħa għolja tal-lum u t’għada japprovaw il-qbil milħuq li l-uffiċċju ta’ din l-aġenzija jkun f’Malta.

Il-kelliema tal-Gvern Malti lill-poplu qegħdin jagħtuh x’jifhem li l-uffiċċju f’Malta ta’ din l-aġenzija huwa ta’ għajnuna fil-problema tal-immigranti illegali.

Dan huwa qerq,

* għax din l-aġenzija ġdida tal-Unjoni Ewropea

* għandha x’taqsam biss mar-refuġjati, u

* mhux mal-immigranti illegali

* li m’humiex intitolati li jitqiesu bħala refuġjati.

U l-kriżi li għandna f’pajjiżna mhux l-aktar minħabba l-mijiet ta’ refuġjati li hawn,

* iżda minħabba l-eluf ta’ immigranti illegali li hawn f’Malta,

* li m’humiex refuġjati.

Il-Patt tal-Unjoni Ewropea tas-16 ta’ Ottubru 2008 dwar l-Immigraz­zjoni u l-Ażil, jifred lill-immigranti illegali mir-refuġjati, u jgħid ċar u tond li l-pajjiżi tal-Unjoni Ewropea għandhom jibagħtu lill-immigranti illegali lura lejn pajjiżhom jew lejn il-pajjiżi minn fejn ikunu telqu l-aħħar għall-pajjiżi tal-Unjoni Ewropea.

Il-Patt jgħid li l-immigranti illegali għandhom l-ewwel jiġu mħeġġa jmorru lura volontarjament, iżda jekk dan ma jagħmluhx, għandhom jintbagħtu lura kontra r-rieda tagħhom.

Iżda l-Gvern Malti mexa bil-maqlub ta’ x’jgħid il-Patt tal-UE dwar l-Immigrazzjoni u l-Ażil.

Mhux talli ma ħax il-passi kollha meħtieġa biex jibgħathom lura lill-immigranti illegali, iżda saħansitra għamel tibdil fil-liġi biex l-immigranti illegali ma jitqiesux “illegali”, iżda jitqiesu biss immigranti “irregolari”.

U l-eks-President Eddie Fenech Adami,                            

* f’konferenza nazzjonali dwar l-immigrazzjoni,               

* sa wasal biex iċanfar lill-kelliema                                  

* li rreferew għall-immigranti illegali f’pajjiżna,               

* minflok irreferew għalihom bħala immigranti irregolari.

Hija ħaġa ta’ għajb li l-Parlament Malti                  

* jsib il-ħin biex jiddiskuti kollox,                            

* imma ma jħossux fid-dmir                                     

* li jiddiskuti l-problema gravissima                       

* li eluf ta’ immigranti illegali                                  

* qegħdin jinżammu f’pajjiżna u                               

* mhux jintbagħtu lura jew f’pajjiżhom,                   

* jew fil-pajjiżi fejn kienu l-aħħar qabel ġew Malta.

Il-Ħamis, 10 ta’ Diċembru, 2009

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

60A, Triq id-Dejqa,

Valletta

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ