MERHBA FIL

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LID-DEPUTAT PARLAMENTARI TIEGĦEK LI TRID LI MALTA TIKSEB LURA

L-INDIPENDENZA U L-ĦELSIEN!

L-Unjoni Ewropea ordnat li fis-sena 2011 il-Maltin u l-Għawdxin iħallsuha €68,000,000

€186,000 kuljum misruqa minn ħalq uliedek

minn Karmenu Mifsud Bonnici Kampanja ghall-Helsien Nazzjonali CNI

Mewġa popolari kontra l-UE

Il-gimgha l-oħra l-Unjoni Ewropea tat prova li ma tistmax id-demokrazija, għalkemm tħobb tippriedkaha.

Għax meta l-Prim Ministru Grieg ippropona li jħalli l-poplu Grieg jiddeċiedi f’referendum jekk jaċċettax il-pjan ta’ salvataġġ u l-miżuri ta’ awsterità miftehmin bejnu u l-Unjoni Ewropea, il-mexxejja tal-Unjoni u partikolarment il-Kanċillier tal-Ġermanja Angela Merkel u n-Napuljun Sarkozy ta’ Franza, oġġezzjonaw li l-poplu Grieg jeżerċita d-dritt demokratiku tiegħu dwar il-pjan ta’ salvataġġ u l-miżuri ta’ awsterità.

Il-mexxejja tal-Unjoni, Merkel u Sarkozy qalu lill-Griegi li jekk ma jaċċettawx il-pjan ta’ salvataġġ u l-miżuri ta’ awsterità miftehmin, ma tingħatax aktar għajnuna lill-Greċja.

Minħabba dan l-‘ultimatum’, id-deputati kollha tal-partit fil-Gvern fil-Parlament Grieg ivvotaw favur il-pjan ta’ salvataġġ u l-miżuri ta’ awsterità, minkejja li jafu li l-maġġoranza tal-poplu Grieg hu kontrihom.

Dan il-fatt juri li s-sistema tad-demokrazija parlamentari ma tirrispettax aktar ir-rieda tal-maġġoranza popolari, u minflok demokrazija parlamentari għandna dittatorjat parlamentari li jifga d-demokrazija popolari.

Unjoni anti-demokratika

L-oppożizzjoni tal-Unjoni Ewropea għar-referendum fil-Greċja ma kinitx okkażjoni iżolata, għax wara l-votazzjonijiet kuntrarji fir-referenda ta’ Franza u tal-Olanda dwar it-Trattat tal-Kostituzzjoni Ewropea, il-mexxejja tal-Unjoni ddeċidew li ma jitħallewx isiru aktar referenda fil-pajjiżi membri minħabba l-periklu li l-voti popolari jkunu kontra dak li tkun trid l-Unjoni.

Għalhekk meta l-Unjoni ħejjiet it-Trattat ta’ Lisbona flok it-Trattat tal-Kostituzzjoni Ewropea, il-mexxejja tal-Unjoni insistew li jkunu l-parlamenti nazzjonali li jintalbu jirratifikaw it-Trattat, mingħajr ma jkun sottomess għall-approvazzjoni popolari.

B’dan il-mod anti-demokratiku l-Unjoni Ewropea trid li dak li hi tiddeċiedi jseħħ dejjem, anke meta l-maġġoranza taċ-ċittadini tal-pajjiżi membri jkunu kontra.

Dan jiġri għax is-sistema ta’ rappreżentanza parlamentari tippermetti li r-rappreżentanti parlamentari jaġixxu kontra r-rieda tal-maġġoranza tal-votanti li jkunu ħatruhom fl-elezzjoni ġenerali.

B’hekk is-sistema parlamentari hi ċaħda tas-sistema tad-demokrazija popolari, u l-Unjoni Ewropea qiegħda tinkoraġġixxi ċ-ċaħda tal-prinċipju bażiku tad-demokrazija u ssostni dittatorjat billi timponi d-deċiżjonijiet tagħha fuq iċ-ċittadini tal-pajjiżi membri.

Mewga kontra l-UE

Il-mexxejja politiċi tal-pajjiżi tal-UE mhux qed jaċċettaw li jsiru referenda dwar l-Unjoni Ewropea għax jafu li hawn mewġa popolari kontriha.

L-aħħar eżempju ta’ dan tahulna l-Prim Ministru tar-Renju Unit, fejn minkejja li l-istħarriġ pubbliku juri li l-maġġoranza tal-poplu tar-Renju Unit irid li jsir referendum dwar jekk ir-Renju Unit għandux jibqa’ fl-Unjoni Ewropea, il-Gvern Ingliż oppona mozzjoni parlamentari favur li jsir referendum, għalkemm madwar 100 deputat tal-partit fil-Gvern ivvotaw favoriha, kontra r-rieda tal-Prim Ministru Cameron.

Il-mexxejja tal-Unjoni Ewropea u tal-pajjiżi membri jafu li l-maġġoranza tal-popli tal-pajjiżi membri ma jinteressahomx mill-Unjoni Ewropea, tant li inqas min-nofs il-votanti jindenjaw ruħhom imorru jivvotaw fl-elezzjonijiet għall-membri tal-Parlament Ewropew.

Dan għax il-maġġoranza tal-poplu jħoss li l-Unjoni hi tal-politiċi u mhux tal-poplu.

Daqskemm l-Unjoni Ewropea m’għandhiex fiduċja fil-popli tal-pajjiżi membri, daqstant ieħor il-popli m’għandhomx fiduċja fl-Unjoni Ewropea.

F’pajjiżna wkoll din il-mewġa kontra l-Unjoni Ewropea qiegħda dejjem aktar tikber.

Opinjonisti li minn dejjem kienu favur is-sħubija ta’ Malta fl-Unjoni Ewropea, issa qegħdin jikkritikawha apertament fil-kitba tagħhom fil-ġurnali.

Ħafna li emmnu li l-munita ewro kienet se tkun ta’ ġid għal pajjiżna, issa qegħdin jintebħu li l-ewro hi mażżra li qiegħda ttaqqal il-progress ta’ pajjiżna u qiegħda ddaħħalna f’piżijiet kbar li ma nifilħux għalihom, bis-self u l-garanziji lill-pajjiżi taż-Żona Ewro li huma f’diffikultajiet finanzjarji.

Jidher li kieku l-Gvern Malti kellu jsejjaħ referendum dwar jekk nibqgħux imseħbin fl-UE, jew nagħmlux ftehim ta’ sħab magħha, il-maġġoranza tal-Maltin u Għawdxin jagħżlu li jivvotaw li noħorġu mill-UE u nagħmlu ftehim ġdid ta’ sħab magħha, mingħajr ma nitgħabbew bil-piżijiet kollha ta’ l-Unjoni Ewropea.

Fittex li tiffirma l-petizzjoni popolari lill-Parlament Malti biex jgħaddi miżuri li jrażżnu l-immigrazzjoni illegali f’pajjiżna.

IRRIDU L'INDIPENDENZA MILL-UNJONI EWROPEA

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.