MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

Mhux minnu li ma nistgħux noħorġu mill-Unjoni Ewropea.

Araw dan il-video tal-Parlament Ewropew kif nistgħu noħorġu

L-Unjoni Ewropea hi ta’ eżempju ħażin għall-gvernijiet tal-pajjiżi membri.

Filwaqt li tħeġġiġhom inaqqsu s-salarji

* u l-pagi tal-ħaddiema fis-settur pubbliku

* u tgħidilhom inaqqsu l-infiq pubbliku,

* hi se żżid is-salarji tal-uffiċjali

* u l-impjegati tagħha

*  u qiegħda żżid il-baġit u l-infieq tagħha.

Fl-24 ta’ Novembru, il-Qorti tal-Ġustizzja tal-Unjoni Ewropea qalet li s-salarji tal-uffiċjali u l-impjegati tal-UE għandhom jiżdiedu bi 3.7% bejn Lulju, 2009 u Ġunju, 2010.

Is-sentenza ngħatat f’kawża li l-Unjins tal-uffiċjali u l-impjegati tal-UE għamlu kontra l-Kummissjoni Ewropea għax din setgħet tagħti żieda ta’ 1.8% biss skond ma l-Kunsill tal-Ministri tal-pajjiżi membri kien iddeċieda.

Il-Ministri tal-pajjiżi membri tal-UE kienu raġunaw li fiż-żmien meta l-gvernijiet tal-pajjiżi maħkumin minn riċessjoni kbira qegħdin irażżnu s-salarji u l-pagi tal-impjegati tas-settur pubbliku u jimponu miżuri ta’ awsterità fuq il-poplu, ma kienx xieraq li s-salarji u l-pagi tal-uffiċjali u l-impjegati tal-UE jogħlew.

Iżda l-Qorti tal-UE rraġunat li skond ir-regolamenti tal-impjieg tal-UE, din kienet marbuta li żżid is-salarji u l-pagi skond mekkaniżmu awtomatiku li jqis iż-żiediet fis-salarji tal-impjieg pubbliku fl-aħjar tmien pajjiżi tal-UE, fosthom il-Ġermanja, Franza, l-Ingliterra u l-Italja.

Wara s-sentenza tal-Qorti tal-UE, Michael Mann, kelliem għall-Kummissjoni Ewropea qal li għandhom jitħallsu wkoll imgħaxijiet għax-xhur li fihom iż-żieda ma kinitx tħallset.

Bl-għoti taż-żieda lill-uffiċjali u l-impjegati tal-UE, il-gvernijiet tal-pajjiżi membri ġew f’sitwazzjoni imbarazzanti ħafna mal-poplu tagħhom.

Għax f’pajjiżhom mhux qegħdin iżidu s-salarji u l-pagi tal-impjegati u l-ħaddiema fis-settur pubbliku, u f’xi każi qegħdin inaqqsuhom, saħansitra l-paga minima.

Iżda fl-istess żmien lill-impjegati u l-uffiċjali li jitħallsu mill-fondi li l-gvernijiet nazzjonali jagħtu lill-UE, l-istess mexxejja fil-Kunsill tal-Ministri tal-UE se jkollhom jawtorizzaw il-ħlas taż-żieda fis-salarji.

Barra ż-żieda ta’ 3.7% għas-sena Lulju, 2009 – Ġunju, 2010 il-Kummissjoni Ewropea fit-18 ta’ Novembru qablet li l-istess uffiċjali u impjegati tal-UE jingħataw żieda ta’ 0.4% oħra għas-sena Lulju, 2010 – Ġunju 2011, li b’kollox tiswa spiża oħra ta’ €9.7 miljun fis-sena.

Il-Ministri tal-gvernijiet membri tal-UE aktarx ikollhom jaċċettaw li titħallas din iż-żieda wkoll, li nħadmet fuq l-istess mekkaniżmu awtomatiku li s-sentenza tal-Qorti tal-UE ħadmet fil-każ taż-żieda ta’ 3.7%.

Anki dan l-infieq u l-baġit tagħha, l-Unjoni Ewropea qiegħda timxi bil-maqlub ta’ kif hi trid li l-gvernijiet tal-pajjiżi membri jimxu billi jnaqqsu l-infiq pubbliku.

Aktar kmieni din is-sena l-Kummissjoni Ewropea fasslet baġit għas-sena li ġejja li jżid l-infiq tal-UE b’6% fuq l-infiq tas-sena 2010.

Fit-12 ta’ Awwissu r-rappreżentanti tal-gvernijiet tal-pajjiżi membri fil-Kunsill tal-Ministri naqqsu €3.6 biljun mill-baġit propost mill-Kummissjoni Ewropea.

Il-baġit paprovat mill-Kunsill tal-Ministri jfisser li l-infiq tal-UE fis-sena 2011 se jkun €126.6 biljun.

Il-Parlament Ewropew ma qabilx mal-baġit imnaqqas mill-Kunsill tal-Ministri, u siostna dak li l-Kummissjoni Ewropea kienet fasslet.

L-isforzi li saru mir-rappreżentanti tal-Parlament Ewropew u dak tal-Kunsill tal-ministri għadhom ma waslux fi ftehim ta’ kompromess.

Il-Kunsill tal-Ministri qiegħed isostni li t-tnaqqis fl-ammont li bih għandha żżid il-baġit tas-sena li ġejja, huwa skond il-politika tal-gvernijiet tal-pajjiżi membri li qegħdin inaqqsu l-infiq fuq is-servizz pubbliku fil-pajjiżi tagħhom.

Huma konxju li kull żieda fl-infiq tal-UE ġejja mill-fondi li l-pajjiżi membri jħallsu kull sena lill-UE, u għalhekk żieda fl-infiq tal-UE, tfisser żieda fil-ħlasijiet li l-gvernijiet membri jkollhom jagħmlu.

Jekk jittieħed l-eżempju ta’ Malta,

* jinstab li filwaqt li fis-sena 2010

* pajjiżna kellu jħallas lill-UE €66.4 miljun,

* is-sena d-dieħla,

* skond l-Estimi Uffiċjali tal-Gvern,

* Malta se tħallas lill-UE €68 miljun,

* biex fi tmien snin ta’ sħubija fl-UE,

* Malta tkun ħallset lill-UE

* ‘l fuq minn €444 miljun.

Hu skandaluż li filwaqt li l-popli tal-pajjiżi membri tal-UE

* qegħdin jintagħfsu b’miżuri ħorox ta’ awsterità

* u mgħaffġin b’piżijiet kbar ta’ taxxi u żiediet fit-tariffi,

* l-Unjoni Ewropea tkompli tonfoq aktar,

* tgħolli s-salarji u żżid il-benefiċċji għall-uffiċjal u l-impjegati tagħha,

* u tisparpalja miljuni kbar ta’ ewro fil-ħela u f’lussu żejjed.

M’hemmx tama li l-Unjoni Ewropea xi darba titjieb,

* għax minflok tbiddel il-politika tagħha

* li wasslitha f’xifer ta’ falliment,

* qiegħda tgħarraq il-qagħda mwiegħra soċjali

* tal-poplu tal-pajjiżi membri

* b’miżuri li jżidu l-faqar għall-kotra

* u jżidu l-qagħad tal-ħaddiema,

* waqt li jkattru l-ġid tal-ftit.

Minflok tħaddem politika li tgħolli li s-setturi t’isfel biex magħhom jogħlew is-setturi l-oħrajn ta’ fuqhom, l-UE qiegħda tgħaffeġ aktar lis-setturi t’isfel u taġevola aktar lil ftit ta’ fuq, u b’hekk qiegħda tkabbar id-differenzi soċjali u ekonomiċi bejn is-setturi tal-poplu.

L-UE hi kuntenta li tnaqqas il-paga minima ta’ ħaddiem minħabba l-awsterità, waqt li nies b’salarju ta’ mijiet ta’ eluf, tkompli żżidhom.

L-UE tbierek fil-fatt li, fi żmien ta’ riċessjoni ekonomika, Prim Ministru u Ministri jiżdiedu f’daqqa €500 u €600 fil-ġimgħa, u l-ħaddiema jiżdiedu biss €1.16 fil-ġimgħa.

L-istess persuni sfaċċatili jagħtu lilhom infushom din iż-żieda imorru Brussells biex jiftehmu ma’ sħabhom x’piżijiet għandhom jiżdiedu fuq il-ħaddiema, l-impjegati u l-pensjonanti tal-pajjiżi mseħbin fl-UE, biex permezz ta’ dawn isolvu l-krizijiet finanzjarji li qegħdin jaħkmu lill-pajjiż tal-UE.

Mhux ta’ b’xejn li qegħdin jinferxu mal-ibliet tal-pajjiżi tal-UE l-protesti fit-toroq u l-irvellijiet mill-ħaddiema, mill-impjegati, mill-pensjonanti u mill-istudenti, kontra l-miżuri ta’ awsterità li l-Unjoni Ewropea qiegħda tisħaq li jittieħdu mill-gvernijiet tal-pajjiżi membri.

Il-popli qegħdin ftit ftit jifhmu

* li l-politika tal-Unjoni Ewropea

* mhix il-kura tal-gwaj li hawn illum,

* iżda l-kaġun tiegħu,

* u biex ikun hemm fejqan,

* trid tinbidel il-politika falluta tal-UE,

* u jekk dan ma jistax iseħħ,

* l-Unjoni Ewropea għandha xxolji

* u kull pajjiż membru jħaddem l-aħjar politika għalih

* skond iċ-ċirkostanzi partikolari tiegħu,

* kif kien jagħmel qabel ma ssieħeb fl-Unjoni.

Meta xi snin ilu l-Arġentina ddikjarat li kienet falluta, ma ħaditx il-mistura tal-Fond Monetarju Internazzjonali (IMF) u ma sselfitx il-biljuni biex tħallas lill-kredituri tagħha.

Lil dawn qaltilhom biex jaċċettaw li jistennew is-sin biex jitħallsu lura s-self li kienu silfuha (“rescheduling” tad-dejn).

U biż-żmien reġa’ ġie fuq saqajh finanzjarjament.

Il-pajjiżi tal-ewro ma jistgħux jaddottaw il-kura tal-Arġentina

* għax l-Unjoni Ewropea ma tħallihomx ma jħallsux lill-kredituri tagħhom,

* għax il-kredituri tagħhom huma l-banek

* u l-istituzzjonijiet finanzjarji kbar

* tal-Ġermanja,

* Franza

* u l-Ingliterra.

Għalhekk l-UE qiegħda timponi  fuq il-pajjiżi membri li ma jistgħux iħallsu d-djun tagħhom jissellfu l-biljuni tal-ewro li l-gvernijiet tal-pajjiżi tal-ewro huma marbutin mill-UE li jsellfu lil dawk li ma jistgħux iħallsu d-dejn, bħal ma ġara fil-każ tal-Greċja u fil-każ tal-Irlada.

Fl-istess ħin l-UE qalet lil-gvernijiet tal-pajjiżi tal-ewro jsellfu l-miljuni jew il-biljuni lill-pajjiżi li ma jistgħux iħallsu d-djun tagħhom, hi tgħid li l-istess gvernijiet jiġbru lura l-miljuni jew biljuni li sellfu, mit-taxxi li l-gvernijiet ikollhom jimponu fuq il-poplu tagħhom, u mill-flus li l-gvernijiet qegħdin jagħmlu, se jġibuh minn fuq dahar il-poplu tagħhom.

Din il-politika li l-UE qiegħda timponi fuq fuq il-pajjiżi membri qiegħda trażżan u ċċekken l-ekonomiji tagħhom għax biha l-poplu jispiċċa b’inqas flus x’jonfoq, u dan kemm minħabba ż-żieda fit-taxxi u fit-tariffi tal-gvern, kif ukoll għax eluf kbar jispiċċaw qiegħda bla xogħol u bla paga.

Il-gvernijiet tal-pajjiżi tal-ewro, minflok jonfqu l-miljuni biex ikattru x-xogħol, l-impjiegi u jkabbtru l-attività ekonomika tal-poplu tagħhom, qegħdin jisilfuhom lill-pajjiżi oħrajn biex dawn ikunu jistgħu jħallsu lura d-djun li għandhom mal-banek u l-istituzzjonijiet finanzjarji barranin.

Fil-każ ta’ Malta,

* il-poplu Malti mhu se jibbenefika xejn

* bis-self li qiegħed jagħmel lill-Greċja

* u bil-miljuni ta’ ewro f’garanziji

* li qiegħed jagħmel bħal fis-sehem tiegħu

* fil-Fond ta’ €740 biljun,

* l-Unjoni Ewropea,

* il-Fond Monetarju Internazzjonali

* u l-Bank Ċentrali tal-UE.

Dawn qegħdin jitwaqqfu biex jgħinu lill-pajjiżi tal-ewro li jkunu se jfallu, bħal ma seħħ fil-każ tal-Irlanda u kif qiegħed jintqal li se jiġri fil-każ tal-Portugall u ta’ Spanja.

Mentri l-poplu Malti seta’ jibbenefika ħafna li kieku dawn il-miljuni ta’ ewro li sellef lill-Greċja u li ggarantixxa lil pajjiżi l-oħrajn, minflok investihom f’pajjiżna u ħoloq aktar xogħol għall-poplu tagħna.

U waqt li qiegħda sseħħ din il-ħsara kollha lill-poplu tagħna,

* il-Parlament Malti qisu mhu jiġri xejn,

* u l-Prim Ministru u l-Ministri

* jiġu lura minn Brussels fejn dan kollu qiegħed jinħema,

* ferħanin daqs l-anġli tal-vara.

Tal-MAFJA,

* kuntrabandisti,

* traffikanti ta’ persuni u tad-droga,

* delinkwenti u kriminali

* ta’ 26 pajjiż tal-Unjoni Ewropea

* jistgħu jiġu Malta

* mingħajr lanqas ma neżaminaw il-passaport

* u mingħajr Visa,

* għax isseħibna fl-Unjoni Ewropea.

Għax isseħibna fl-UE iżda,

* familji Libjani tal-affari tagħhom

* ma nħalluhomx jiġu Malta

* jekk ma nissuġġettawhomx jittallbu Visa

* u wara ħafna ġranet ta’ taħbit biex jiksbuha

* kemm-il darba l-UE ma taċċettax li nagħtuhom Visa.

Tajjeb li jintqal li t-Taljani jistgħu jmorru l-Libja mingħajr il-ħtieġa li jagħmlu Visa.

Dan l-arranġament daħal fis-seħħ minn tliet xhur l-hawn.

Jekk it-Taljani,

* li huma bħalna fl-UE

* u fiż-Żona Schengen,

* neħħew il-Visa għal-Libja,

* għaliex il-Maltin

* ma nistgħux inneħħu wkoll il-Visa għal-Libjani?

La l-Libjani jidħlu l-Italja mingħajr Visa, għaliex aħna l-Maltin ma nistgħux inħallu l-Libjani jiġu Malta mingħajr Visa?

It-tneħħija tal-Visa għall-Maltin li jmorru l-Libja

* hi ta’ vantaġġ kbir għax jagħmliha inqas diffiċli

* biex ħaddiema Maltin imorri jaħdmu hemm,

* biex negozjanti Maltin imorru jinnegozjaw il-prodotti tagħhom mal-Libjani,

* biex kuntratturi Maltin imorru jieħdu kuntratti ta’ xogħolijiet f’dak il-pajjiż

* fejn hemm opportunitajiet ta’ xogħol

* u kuntratti ta’ xogħolijiet kbar.

Illum ix-xogħol u l-kuntratti fil-Libja qegħdin jittieħdu mit-Taljani u mit-Torok, it-tnejn neħħew il-ħtieġa tal-Visa għal-Libjani li jmorru fl-Italja u t-Turkija.

Fil-każ tagħna,

* L-Unjoni Ewropea saħqet fin-negozjati tas-sħubija ta’ pajjiżna fl-UE,

* li l-Gvern Malti jimponi l-Visa għal-Libjani,

* u l-Gvern Malti la kellu rieda politika

*  u lanqas kellu l-kuraġġ jieqaf lil-Unjoni Ewropea

* u juriha li kien fl-interess nazzjonali tagħna

* li jitkompla l-ftehim li kellna mal-Libja

* li l-Maltin imorru l-Libja bla Visa

* u huma jiġu hawn bla Visa.

Meta fuq pressjoni tal-Unjoni Ewropea ħassarna l-ftehim li kellna mal-Libja,

* dawn fehmu li l-Maltin ma konniex lesti nkomplu nistmawhom bħala ħbieb tagħna,

* li ma xtaqnihomx ikomplu jiġu Malta numerużi kif kienu jiġu fis-snin ta’ qabel.

Nistgħu ngħidu li wara li sseħibna fl-UE,

* ma bqajniex aħna nikkmandaw min jidħol f’darna,

* iżda l-UE,

* li la huma maħturin minna

* u lanqas ma jirrapreżentawna.

Il-muftieħ ta’ darna qiegħed għandhom.

Tant, li meta ta’ Schengen ddeċidew li ma jħallux numru ta’ Libjani jmorru l-UE, aħna kellna wkoll ma nħalluhomx jiġu Malta.

Morna ħażin aħna għax b’riżultat ta’ hekk, il-Libjani ma ħallewniex immorru l-Libja.

Il-Ħamis, 9 ta’ Diċembru, 2010.

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

60A, Triq id-Dejqa,

Valletta

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ