MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALIU ILLEGALI TA' L-UNJONI EWROPEA

Ikollha tfassal Kostituzzjoni ġdida

FL-Unjoni Ewropea qegħdin jipprovaw iqajmu l-kadavru tal-Kostituzzjoni ta’ l-Ewropa li l-popli ta’ Franza u ta’ l-Olanda vvotaw kontriha f’Ġunju tas-sena l-oħra.

Wara ż-żmien twil li l-Kummissjoni Ewropea ilha siekta dwar il-Kostituzzjoni li l-mexxejja tal-pajjiżi membri ta‘ l-Unjoni Ewropea ffirmaw b’solennità kbira f’Ruma fid-29 ta’ Ottubru, 2004 (fosthom il-Prim Ministru u l-Ministru ta’ l-Affarijiet Barranin ta’ Malta), il-Viċi-President tal-Kummissjoni, Margot Wallstrom, qalet dan l-aħħar li l-Kummissjoni ma tixtieqx li jsiru ħafna tibdiliet fil-Kostituzzjoni Ewropea.

Wallstrom sostniet li fid-diskussjonijiet dwar il-Kostituzzjoni Ewropea, kulħadd għandu jżomm fermi l-partijiet ewlenin tal-Kostituzzjoni li kienu ġew maqbulin wara negozjati li ħadu fit-tul u mimlijin diffikultajiet, u għalhekk dawn il-partijiet ewlenin tal-Kostituzzjoni Ewropea m’għandhomx jerġgħu jkunu suġġetti għad-diskussjoni.

ll-Viċi-President tal-Kummissjoni Ewropea qalet li hija kellha f’moħħha r-regoli li tfasslu biex tinkiseb il-maġġoranza fil-votazzjonijiet, it-twaqqif tal-Ministru ta’ l-Affarijiet Barranin għall-Unjoni Ewropea, id-dritt taċ-ċittadini ta’ l-Unjoni Ewropea li jitolbu lill-Kummissjoni Ewropea tieħu azzjoni, iż-żieda fis-setgħat tal-Parlament Ewropew u ċ-Charter tad-Drittijiet tal-Bniedem.

B’dak li qalet Margot Wallstrom uriet li għandu jkun hemm tibdil f’partijiet oħrajn tal-Kostituzzjoni, għax l-Unjoni Ewropea ma tistax tipperikola li għat-tieni darba ma tgħaddix il-Kostituzzjoni li l-Unjoni Ewropea tippreżenta liċ-ċittadini tal-pajjiżi membri tagħha.

X’qalet il-Kummissjoni

Il-Kummissjoni Ewropea stqarret li għadu kmieni wisq biex wieħed jiddiskuti fid-dettal it-tibdil fil-Kostituzzjoni meħtieġ biex il-Franċiżi u l-Olandiżi jaċċettawha.

B’danakollu l-Kummissjoni wriet li hija favur li tidħol fil-Kostituzzjoni ġdida li l-Unjoni Ewropea jkollha bħala politika tagħha l-għan li tiġġieled kontra l-ħwejjeġ li qegħdin iġibu tibdil fil-klima, iżda hija kontra li jingħata l-jedd lil xi pajjiżi membri ta’ l-Unjoni Ewropea li ma jħaddnux ir-regoli tal-politika soċjali ta’ l-UE, għax dan iwassal għal firda bejn il-pajjiżi membri ta’ l-Unjoni Ewropea.

Il-Kummissjoni Ewropea lanqas ma hija favur li jkunu diskussi mill-ġdid l-istruttura tal-baġit ta’ l-UE, għax din toħloq diskussjoni mqanqla ħafna u negozjati diffiċli ħafna, u ma jkunx jista’ jintlaħaq l-għan li jsir ftehim dwar il-Kostituzzjoni ġdida ħalli jitfassal Trattat ieħor tal-Kostituzzjoni sas-sena 2009, kif il-pajjiżi membri ta’ l-Unjoni Ewropea jixtiequ.

Jidher ċar kemm il-pajjiżi ta’ l-Unjoni Ewropea li rratifikaw il-Kostituzzjoni Ewropea wara r-riżultati negattivi ta’ Franza u l-Olanda, fosthom Malta, żbaljaw u se jisbu li rratifikawha għal xejn.

Għax huma jkollhom jaċċettaw kull tibdil li jsir fit-Trattat ġdid biex jikseb l-approvazzjoni tal-Franċiżi u l-Olandiżi.

Biex dan iseħħ, il-Kostituzzjoni ġdida jrid ikollha politika ekonomika u soċjali differenti minn dik tal-lum ta’ l-Unjoni Ewropea, u trid treġġa’ lura lill-popli tal-pajjiżi membri x’uħud mis-setgħat li l-Unjoni Ewropea ħatfet għaliha matul is-snin.

Il-fatt li l-Unjoni Ewropea qiegħda tifhem li jekk trid li l-popli ta’ l-Unjoni japprovaw Kostituzzjoni ġdida, trid tkun waħda differenti mill-Kostituzzjoni li nqatlet mill-Franċiżi u l-Olandiżi, joffri opportunità lill-Ewro-xettiċi bħalna li jimmontaw kampanja popolari ħalli l-Unjoni Ewropea tinbidel, jew il-Ewro-xettiċi ma jibqgħux jagħmlu sehem mill-Unjoni Ewropea kif hija llum u bil-politika li għandha llum.

Il-partiti politiċi Maltin ikunu boloħ jekk jgħaddsu rashom u jkomplu jopponu li jsiru tibdiliet kbar fl-Unjoni Ewropea.

Jiġrilhom bħal ma ġralhom il-partiti politiċi kbar fi Franza, fl-Olanda, fid-Danimarka u fl-Isvezja, li fi kwistjonijiet li għandhom x’jaqsmu ma’ l-Unjoni Ewropea, il-massa tal-partitarji marret kontra l-linja uffiċjali tal-partiti u vvotat LE għal dak li l-partiti qalulha biex tapprova.

X’se nitilfu bid-dħul ta’ l-Ewro

Il-Ġimgha l-oħra l-Bank Ċentrali ta’ Malta għolla r-rata ta’ interessi ghal 3.75 fil-mija.

Wara ftit jiem il-banek lokali għollew ir-rati ta’ l-interessi li jħallsu fuq id-depożiti u għollew ukoll ir-rati ta’ interessi li jitħallsu huma fuq is-self li jagħmlu.

Meta ndaħħlu l-Ewro flok il-Lira Maltija fl-1 ta’ Jannar 2008, il-Bank Ċentrali Malti jitlef id-dritt li jiffissa huwa r-rata ta’ interessi, kif għamel il-ġimgħa l-oħra u kif ilu s-snin jagħmel minn mindu twaqqaf fis-sittinijiet.

Ir-rata ta’ interessi tibda tkun dik li jiffissa minn żmien għal żmien il-Bank Ċentrali ta’ l-UE għall-pajjiżi kollha li jkollhom bħala munita l-Ewro.

Ir-rati ta’ imgħax li l-banek lokali jagħtu fuq il-flus depożitati u li jieħdu fuq il-flus minnhom mislufa, jibdew jinħadmu fuq ir-rata ta’ interessi li l-Bank Ċentrali ta’ l-UE jibda jiffissalna wara d-dħul ta’ l-Ewro f’pajjiżna.

Meta jagħmel dan, il-Bank Ċentrali ta’ l-UE ma jagħtix kas tal-qagħda ekonomika ta’ pajjiżna, iżda jiffissa r-rata ta’ interessi skond l-attività ekonomika u l-qagħda monetarja ta’ l-Unjoni Ewropea kollha f’daqqa.

Għalhekk waqt li llum il-Bank Ċentrali Malti juża r-rata ta’ interess bħala għodda biex jinfluwenza biha l-attività ekonomika tagħna wara li ndaħħlu l-Ewro, jiġri li r-rata ta’ interessi ffissata mill-Bank Ċentrali ta’ l-Unjoni Ewropea tista’ tkun tajba għall-attività ekonomika ta’ xi pajjiżi ta’ l-Unjoni, iżda ma tkunx tajba għall-attività ekonomika li pajjiżna jkollu, u minflok ġid, tagħmlilna deni.

Minbarra dan l-iżvantaġġ kbir, id-dħul ta’ l-Ewro f’pajjiżna f’Jannar 2008 se jtellifna l-qligh li l-Bank Ċentrali ta’ Malta jagħmel kull sena minn fuq ir-riservi barranin tagħna.

Skond l-estimi ta’ l-2007, il-qligħ tal-Bank Ċentrali Malti huwa stmat li se jkun Lm11-il miljun is-sena d-dieħla.

Il-Bank Ċentrali ta’ Malta jgħaddi kull sena l-qligħ li jagħmel lill-Gvern Malti u jingħaddu mad-dħul tal-Gvern.

Meta naqilbu ghall-Ewro f’Jannar 2008 ir-riservi barranin tagħna ma jibqgħux għandna (f’idejn il-Bank Ċentrali tagħna), iżda jgħaddu għand il-Bank Ċentrali ta’ l-Unjoni Ewropea.

Għalhekk mad-dħul ta’ l-Ewro f’pajjiżna, pajjiżna se jitlef il-qligħ tal-Bank Ċentrali Malti (stmat Lm11-il miljun għas-sena 2007), u l-Gvern Malti mhux se jdaħħal aktar qligħ kull sena mill-Bank Ċentrali ta’ Malta.

It-telf li l-Gvern Malti se jġarrab billi jonqoslu l-qligħ tal-Bank Ċentrali Malti, huwa mistenni li l-Gvern jagħmel tajjeb għalihom mit-taxxi oħrajn li jiġbor minn fuq il-poplu.

Il-poplu Malti għalhekk se jispiċċa jħallas f’taxxi diretti jew indiretti għan-nuqqas ta’ qligħ minn fuq ir-riservi barranin li mhux se jibqgħu tagħna wara li naqilbu għall-Ewro.

Xejn mis-somma ta’ Lm700,000 li l-Gvern Malti se joħroġ is-sena d-dieħla lill-kumitat li twaqqaf biex iħejji għad-dhul ta’ l-Ewro u għall-propaganda favur l-Ewro m’hu se jintefaq biex lill-poplu jingħata dan it-tagħrif dwar l-iżvantaggi li se nġarrbu bid-dħul tal-munita Ewro minflok il-Lira Maltija.

L-Unjoni Ewropea tħoss ħtieġa ta’ aktar propaganda

L-Unjoni Ewropea taf li l-kotra taċ-ċittadini f’ħafna mill-pajjiżi membri ta’ l-Unjoni Ewropea huma kritiċi hafna tal-politika u t-tmexxija ta’ l-Unjoni u jaraw fiha korruzzjoni kbira, ħela li ddardrek u ineffiċjenza li tiddisgustak.

Il-fatt li għal 12-il sena l-awdituri stess ta’ l-Unjoni oġġezzjonaw għaż-żamma tal-kontijiet u l-infieq tal-fondi ta’ l-Unjoni, jixxokkja lil kull min huwa ta’ l-affari tiegħu u ma jistax jittollera li jagħmel sehem minn għaqda li tippretendi li tgħid kif għandhom jitmexxew il-pajjiżi membri tagħha.

Biex tipprova tegħleb l-ostilità u l-antagonizmu tal-kotra, l-Unjoni Ewropea qiegħda tonfoq miljuni kbar fi propaganda favuriha.

Anki f’Malta, il-propaganda favur l-Unjoni qiegħda tiżdied.

Din hija prova li l-Unjoni tifhem li anki f’Malta hemm bżonn kampanja propagandista għax l-appoġġ għas-sħubija qiegħed dejjem jonqos.

Kieku l-appoġġ popolari qed jiżdied, ma jkunx hemm għalfejn jintefqu tant flejjes f’attivitajiet ta’ propaganda favur l-Unjoni.

Għalkemm it-tliet partiti politiċi jagħmlu propaganda favur l-Unjoni Ewropea, l-Unjoni tħoss il-ħtieġa li hija stess tagħmel propaganda favuriha kemm f’Malta kif ukoll f’Għawdex, għax minkejja li l-partiti politiċi huma favuriha, l-Unjoni tirrealizza li eluf mill-partitarji tagħhom huma kontra l-politika u t-tmexxija ta’ l-Unjoni.

Il-mezzi pubbliċi tal-midja f’Malta qegħdin sfaċċatament jintużaw ħalli jpinġu b’kuluri sbieħ l-istituzzjonijiet u l-politika ta’ l-Unjoni Ewropea, mingħajr ma jagħtu l-opportunijiet li tinstema’ kritika oġġettiva tal-politika u l-istituzzjonijiet ta’ l-Unjoni.

L-Awtorità tax-Xandir li xogħlha huwa li tħares li jkun hemm bilanċ fi kwistjonijiet ta’ interess pubbliku, qiegħda tonqos milli ġġiegħel lil Xandir Malta li fuq ir-radju u fit-televizjoni jtella’ programmi li jsemmgħu l-qanpiena l-oħra ta’ min huwa kritiku tas-sħubija ta’ pajjiżna fl-Unjoni u tal-politika u t-tmexxija ta’ l-Unjoni.

Naturalment dan kollu qed iseħħ bil-barka ta’ l-Unjoni Ewropea.

Perikli ġodda għall-Għawdxin

Wara li spiċċa s-servizz tal-helikopter ta’ Għawdex, reġgħet qamet il-kwistjoni ta’ ‘runway’ u ajruport żgħir f’din il-gżira.

Niftakru li fil-bidu tas-snin 90 saret applikazzjoni biex issir ‘runway’ bl-iskuża li kienet meħtieġa mill-Forzi Armati ta’ Malta.

Ħafna Għawdxin qalu li kemm it-tluq tal-ħelikopter, kif ukoll l-użu mill-Forzi Armati kif kien intqal fis-snin 90, huma skużi biex isir l-ajruport f’Għawdex.

Huma jsostnu li r-raġuni vera hija li l-Unjoni Ewropea u n-NATO huma wara li jsir l-ajruport biex ikun jista’ jintuża mill-forzi militari ta’ l-Unjoni u tan-NATO għall-eżerċizzji militari fir-reġjun tal-gzejjer Maltin billi l-ajruport f’Għawdex ikun maqtugħ mit-traffiku kummerċjali ta’ l-ajruport tal-Gudja.

Naturalment, l-ajruport f’Għawdex ikun jista’ jintuża f’każ ta’ operazzjonijiet militari min-NATO u mill-armata ta’ l-Unjoni Ewropea.

Illum m’hemmx bżonn ta’ ‘runways’ twal ħafna għall-ajruplani militari.

L-Għawdxin jgħidu wkoll li jekk issir r-‘runway’ għall-ajruplani żgħar, malajr tinstab skuża biex ir-‘runway’ titwal.

Huma fakkru li t-Torri ta’ Gourgon li l-Amerikani kienu waqqgħu fl-aħħar gwerra dinjija biex jagħmlu ‘runway’ f’Għawdex, baqa’ qatt ma reġa’ inbena wara li r-‘runway’ ma baqgħetx tinuża.

Huma ħafna dawk l-Għawdxin li ma jridux li ssir ir-‘runway’ u l-ajruport fi gżirithom, għax ma jridux li ħajjithom titqiegħed fil-periklu b’ajruplani militari jittajru fuq Għawdex u ma jridux li jkunu fil-mira ta’ attakki bi tpattija minn min ikun suġġett għall-ajruplani li jittajru mill-ajruport ta’ Għawdex.

Fondi ta’ l-Unjoni Ewropea, minflok jintefqu fuq l-ajruport f’Għawdex, aħjar jintużaw għal proġett utli għall-Għawdxin.

Il-Ħamis, 9 ta’ Novembru, 2006.

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

60A, Triq id-Dejqa,

Valletta

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ