MERHBA FIL

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LID-DEPUTAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

L-Unjoni Ewropea ordnat li mis-sena 2010 il-Maltin u l-Għawdxin iħallsuha

€182,192 kuljum misruqa minn ħalq uliedek

Il-Parlament m’għandux japprova t-trattat ta’ riforma

F’konferenza ta’ l-aħbarijiet li s-CNI għamlet fil-5 ta’ Novembru, fil-Belt, iċ-Ċermen tas-CNI ikkundanna bl-aħrax lill-Unjoni Ewropea li qiegħda ċċaħħad liċ-ċittadini tagħha jgħidu jaqblux jew le mat-trattat il-ġdid li se jkun iffirmat fit-13 ta’ Diċembru.

L-Unjoni taf li l-maġġoranza kbira taċ-ċittadini (‘l fuq minn 70 fil-mija, inklużi ċ-ċittadini Maltin), iridu referendum dwar it-trattat, iżda l-Unjoni assolutament ma tridx dan, għax tibża’ li jiġi miċħud, bħalma ġara fil-2005 fil-każ tat-Trattat tal-Kostituzzjoni ta’ l-Unjoni.

Iċ-Ċermen tas-CNI ikkundanna wkoll il-fatt li l-Unjoni ċaħdet it-talba li saritilha biex tippubblika l-emendi tat-trattat flimkien mat-trattati eżistenti li huma jemendaw.

L-Unjoni qalet li mhux se tagħmel dan qabel ma l-pajjiżi kollha ta’ l-Unjoni jirratifikaw it-trattat.

Din iċ-ċaħda hija maħsuba biex il-popli ma jkunux jistgħu jiflu x’fih it-trattat li nkiteb apposta b’mod li l-poplu ma jifhmux u ma joġġezzjonax għalih.

Iċ-Ċermen tas-CNI ikkritika lill-Parlament Malti li se jivvota favur it-trattat mingħajr m’għadu ddiskutih.

Hemm numru ta’ raġunijiet li minħabba fihom il-Parlament Malti m’għandux japprova t-trattat.

Skond is-CNI, it-trattat se jżid 68 każ ta’ deċiżjonijiet li l-Unjoni tieħu mingħajr il-kunsens tal-pajjiżi membri kollha.

Għalhekk Malta qiegħda tipperikola li fi 68 każi ġodda tista’ ma tkunx taqbel mad-deċiżjonijiet tal-maġġoranza ta’ l-Unjoni, u xorta waħda jkollha toqgħod għalihom.

F’49 każi ġodda fit-trattat, il-Parlament nazzjonali tal-pajjiżi membri se jitilfu mill-influwenza li għandhom fuq l-Unjoni.

F’19 il-każ biss it-trattat jagħti aktar influwenza milli għandu llum il-Parlament Ewropew.

Jekk it-trattat se jsaħħaħ lill-Unjoni, bħal meta se jagħtiha 105 kompetenzi ġodda li m’għandhiex illum, dawn se joħodhom mingħand il-gvernijiet tal-pajjiżi membri.

L-Unjoni se żżid ħafna l-impjegati tagħha għas-setgħat ġodda li t-trattat jagħtiha.

Il-President ta’ l-Unjoni se jkollu 3,500 impjegat, u r-Rappreżentant Għoli għall-Affarijiet Barranin u Sigurtà se jkollu “staff” ta’ 5,000 impjegat.

Bis-sistema ta’ votazzjoni tat-trattat, is-saħħa ta’ Malta se tiddgħajjef, għax waqt li llum

* (popolazzjoni ta’ 400,000 f’popolazzjoni ta’ l-Unjoni ta’ 500,000.000).
* Illum Malta għandha Kummissarju.

* Bit-trattat, kull għaxar snin, Malta ma jkollhiex Kummissarju għal ħames snin.

Iċ-Ċermen tas-CNI saħaq li meta skond it-trattat il-ġdid l-Unjoni jkollha politika barranija komuni, din ma tkunx politika ta’ newtralità li Malta għandha fil-Kostituzzjoni.

L-istess ħaġa se jiġri fir-rigward ta’ politika komuni ta’ difiża skond it-trattat.

Għal Malta dan ifisser li pajjiżna jmur kontra l-Kostituzzjoni Maltija li ma tħalliniex ikunu parti minn alleanza militari.

It-trattat isostni wkoll li l-liġijiet ta’ l-Unjoni huma aqwa mil-liġijiet magħmulin mill-Parlament tagħna u d-deċiżjonijiet tal-Qorti ta’ l-Unjoni jorbtu lill-Qrati Maltin.

Minħabba dan kollu, il-Parlament Malti ma jmissux jivvota favur it-Trattat ta’ l-Unjoni, sostna ċ-Ċermen tas-CNI.

Jikber id-“Democratic Deficit” fl-UE

Lill-poplu Malti faħħrulu t-Trattat ġdid imsejjaħ ta’ Riforma ta’ Unjoni Ewropea mingħajr ma fissrulu x’fih.

Lanqas iridu li l-poplu jaqrah u jifhmu, tant hu magħmul b’mod apposta li ma jinqarax u jinftiehem ħlief mill-esperti fil-liġijiet u minn dawk imdorrijin jemendaw il-liġijiet.

Għax ma jridux jipperikolaw lil l-poplu li jifhmu u jkollu għalhekk jivvota kontrih.

L-Unjoni Ewropea ma tridx tagħti l-opportunità lill-poplu jgħid jaqbilx mat-trattat għax tibża’ li jgħid li ma jaqbilx miegħu.

Dan il-fatt huwa l-akbar kundanna popolari li l-Unjoni tista’ tiddobba – li turi biċ-ċar li l-poplu ma japprovax dak li l-Unjoni qiegħda tagħmel.

It-trattat jista’ jidħol fis-seħħ bis-saħħa tal-voti tal-membri parlamentari li jivvotaw, iżda jkun nieqes mil-leġittimità demokratika tal-poplu.

Ma tistax l-Unjoni tagħti lilha nfisha ċertifikat aqwa tan-nuqqas ta’ l-appoġġ popolari.

It-trattat, aktar milli jirriformaha, se jaqtagħha aktar mill-poplu li mhux se jinsa li ċaħditlu d-dritt demokratiku li jgħid kif għandha titmexxa l-Unjoni.

Aktar ma l-politiċi jiftaħru bit-trattat, filwaqt li jinsistu li ma jsirux referendi dwaru, aktar il-poplu jikkundannahom li jridu jimponulu ħwejjeġ li huwa ma jħossx li jagħmlulu ġid.

Waħda mill-akkużi ewlenin li jsiru lill-Unjoni Ewropea hija li nieqsa mid-demokrazija, id-“democratic deficit”.

Bit-trattat li mhux se jitressaq għar-referendi, l-akkuża tad-“democratic deficit” ta’ l-Unjoni se tikber aktar.

* Kif tista’ l-Unjoni tippriedka d-demokrazija lill-pajjiżi oħrajn, meta hija qiegħda tiċħadha liċ-ċittadini tal-pajjiżi tagħha?

X’jiswew il-ħafna laqgħat, konferenzi u ‘seminars’ li l-Unjoni torganizza bi spejjeż kbar biex taparsi tisma’ x’għandhom xi jgħidu ċ-ċittadini, meta mbagħad l-Unjoni tagħmel li trid hi u ma tħallix liċ-ċittadini jiddeċiedu dak li jmissu jsir mill-Unjoni?

* li tagħti lill-mezzi tal-komunikazzjoni tal-massa u lil min jinfluwenza l-opinjoni pubblika,

Il-mexxejja ta’ l-Unjoni u tal-pajjiżi membri huma ġwejjef li m’għandhomx il-ħila jipperswadu lill-popli tagħhom li t-Trattat il-ġdid se jtejjeb il-qagħda tal-popli u għalhekk se jimponuh fuq il-popli mingħajr ma jfissrulhom sewwa x’fih.

Dan l-aġir miskin għandu jkompli jżid l-oppożizzjoni popolari għall-Unjoni Ewropea.

Aktar tagħrif dwar l-Unjoni Ewropea:

Smart City

Il-Gvern Malti żvela l-ġimgħa l-oħra li l-Kummissjoni Ewropea kitbitlu dwar il-ftehim ta’ Smart City li huwa għamel ma’ kumpanija minn Dubaj.

Il-Kummissjoni trid tinvestiga jekk bil-ftehim il-Gvern tax għajnuna statali lill-kumpanija minn Dubaj li jagħtiha vantaġġ fuq kumpaniji kompetituri, u b’hekk tiddisturba l-kompetizzjoni kummerċjali.

Il-Gvern stqarr li qal lill-Kummissjoni li huwa jemmen li bil-ftehim li għamel ma marx kontra l-liġi ta’ l-UE.

Dan il-fatt jixhed f’liema qagħda umiljanti pajjiżna jinsab bis-saħħa tas-sħubija fl-Unjoni.

Il-Gvern Malti lanqas jista’ jagħmel ftehim kummerċjali li huwa jemmen ikun ta’ ġid għall-pajjiż, għax il-ftehim ma jkunx jaqbel mal-politika kummerċjali ta’ l-Unjoni!

Mur ġib lill-Gvern immexxi mill-Perit Mintoff fejn kien jibgħatha lill-Unjoni Ewropea li tipprova tfixkel x’jagħmel għall-ġid ta’ Malta!

Jekk l-Unjoni ma taqbilx miegħu, il-Gvern Malti jkun ikkundannat iħallas multa ħarxa, u l-Parlament Malti jkollu jivvota l-flus biex il-multa titħallas.

Il-Parlament Ewropew

Jikkonsidra ħafna rapporti, jgħaddi ħafna riżoluzzjonijiet u jivvota fuq ħafna liġijiet li jsiru mill-Kummissjoni Ewropea jew mill-Kunsill tal-Ministri, u jaħtar għadd kbir ta’ kumitati f’oqsma differenti.

Diffiċli għal 785 membru li jsegwu sewwa x’votazzjonijiet ikunu qegħdin isiru.

In-nuqqas tas-serjetà tal-Parlament Ewropew intweriet bil-kbir f’waħda mis-seduti plenarji li saret ġimgħat ilu fi Strasburg.

F’sitt okkażjonijiet tal-votazzjoni fl-istess seduta, min kien qiegħed jippresjiedi, iddikjara li l-maġġoranza kienet approvat emendi.

Iżda meta xi membri oġġezzjonaw u talbu li jittieħed vot elettroniku, fis-sitt okkażjonijiet irriżulta li min kien jippresjiedi, ħa żball, u l-maġġoranza kienet ivvotat kontra, mhux favur l-emendi.

Żbalji bħal dawn jittieħdu sikwit minħabba l-kwantità kbira ta’ votazzjonijiet li jsiru f’temp qasir ta’ żmien.

U b’hekk spiss il-Parlament Ewropew jispiċċa jgħaddi liġijiet li fil-fatt ma jkunux approvati mill-maġġoranza tal-membri.

Schengen

Il-Parlament Malti approva n-nefqa kbira li pajjiżna se jkollu jagħmel biex iħaddem il-ftehim ta’ Schengen li bih ċittadini tal-pajjiżi ta’ l-Unjoni Ewropea jistgħu jivvjaġġaw minn pajjiż għall-ieħor ta’ l-Unjoni Ewropea mingħajr xkiel ta’ passaporti u ta’ kontrolli u dan anki fir-rigward ta’ trasport ta’ merkanzija.

Pajjiżna se jkollu 40 membru tal-Korp tal-Pulizija jaħdmu fuq dan l-arranġament ta’ Schengen, li aħjar jissejjaħ “Kbir Ġenn”.

Għax ġenn kbir li llum, meta hawn tant theddid ta’ terroriżmu, tant traffikar ta’ droga u ta’ prostituzzjoni, u tant kriminalità organizzata mifruxa fuq ħafna pajjiżi, li pajjiż ineħħi jew inaqqas il-kontrolli dwar min jidħol u x’merkanzija tidħol fil-pajjiż.

IRRIDU L'INDIPENDENZA MILL-UNJONI EWROPEA

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.