MERĦBA FIL-PAĠNA TAS-CNI
KAMPANJA ĦELSIEN NAZZJONALI
Kienet, għadha u tibqa' favur il-ħaddiema Maltin
u kontra s-sħubija ta' Malta fl-Unjoni Ewropea
Mill-Kampanja Ħelsien Nazzjonali CNI
JEKK TIRRISPETTA L-KOSTITUZZJONI TA' PAJJIŻEK GĦID
LID-DEPUTAT PARLAMENTARI TIEGĦEK JIRRISPETTA L-FEHMIET
TIEGĦEK U MA JIVVOTAX FAVUR IL-KOSTITUZZJONI TA' L-UNJONI EWROPEA
LI TKASBAR IL-KOSTITUZZJONI TA' MALTA.
Il-mewt tal-Kostituzzjoni Ewropea
Franza nisslet l-Unjoni Ewropea, rabbietha u kabbritha.
Issa Franza sabet li l-wild tagħha ħarbet minn taħt idejha, qabdet triq mimlija saram u qiegħda
tagħmlilha ħsara.
Għalhekk Franza qalet issa daqshekk lill-Unjoni Ewropea u vvotat kontra l-Kostituzzjoni l-ġdida ta’ l-Unjoni stabbilita bit-Trattat li kien iffirmat f’Ruma fid-29 ta’ Ottubru, 2004.
Ħafna mill-mexxejja ta’ l-Unjoni, kif ukoll il-mexxejja ta’ x’uħud mill-pajjiżi membri mseħbin fl-Unjoni, ħadu xokk bid-deċiżjoni tal-Franċiżi, u fl-isturdament tagħhom dawn il-mexxejja ma ntebħux li Franza kienet fil-fatt qatlet il-Kostituzzjoni Ewropea.
Huma istintivament iddikjaraw li xorta waħda huma se jkomplu mexjin bil-proċess tar-ratifika tal-Kostituzzjoni li mingħalihom hija biss feruta, iżda fir-realtà hija mejta.
Ħadd ħlief il-Franċiżi ma jistgħu jirxuxtaw il-Kostituzzjoni Ewropea.
U dan il-miraklu ma jseħħx jekk ma jaqblux l-Ingliżi, iċ-Ċeki, il-Pollakki u d-Daniżi.
Il-miraklu ta’ l-irxuxtar tal-Kostituzzjoni Ewropea ma jsehħħx billi aħna l-Maltin nirratifikawha fil-Parlament Malti, avolja fil-Parlament nagħmlulha kantata solenni ta’ tifħir mingħajr stonatura waħda.
Għaliha nittamaw li l-membri parlamentari jmorru lebsin skur u bl-ingravata sewda, kif jixraq l-okkazjoni.
Għaliex ma nivvotawx “iva”
Mhux il-mexxejja Ewropej kollha ddispjaċihom għal-“le” tal-Franċiżi u ta’ l-Olandiżi.
Il-President tar-Repubblika Ċeka sklama, meta sema’ bir-riżultat tar-referenda, li din kienet rebħa għal-libertà u għad-demokrazija fl-Ewropa.
Il-Prim Ministru Taljan,
Berlusconi, sfoga li l-UE għamlet numru kbir esaġerat ta’ liġijiet u
regolamenti u kellha burokrazija kbira wisq.
Laurent Fabius, ex-Prim Ministru ta’ Franza,
ikkundanna l-Kostituzzjoni Ewropea għax timponi kompetizzjoni mingħajr rażan u
mingħajr skrupli, u la darba m’għaddietx, issa jkollha tiġi diskussa u
nnegozjata mill-ġdid.
Il-membru tal-Parlament Olandiż, Geert Wilders, ikkritika l-Kostituzzjoni
Ewropea għax tieħu wisq setgħat minn idejn il-gvern nazzjonali u tgħaddihom
lill-UE u b’hekk tgħaffeġ is-sovranità tal-pajjiż.
Is-Sunday Times
ta’ Londra ma qagħditx iġġewweż
kliemha.
Qalet li l-Kostituzzjoni Ewropea żżid l-integrazzjoni tal-pajjiżi membri, u minħabba f’hekk hija kienet kontra l-Kostituzzjoni u ma riditx li jkun hemm ‘closer union’ għall-pajjiżi ta’ l-Ewropa.
Fl-artiklu 437
tal-Kostituzzjoni Ewropea hemm imdaħħal il-ftehim (pakkett jinten) li l-Gvern
Nazzjonalista għamel ma’ l-Unjoni Ewropea fis-16 ta’ April, 2003 (it-Trattat ta’
Ateni).
Għalhekk
min jivvota “IVA” għall-Kostituzzjoni Ewropea jkun qed jivvota favur dak
il-Ftehim.
134,000 ivvotaw “le” għall-Ftehim Nazzjonalista f’Marzu, 2003.
Żgur li ħadd minn dawn il-134,000 ma jiddispjaċih li vvota kontra.
Iżda
żgur ukoll li llum hemm ħafna li vvotaw fl-2003 favur dak il-Ftehim, li
jiddispjaċihom li vvotaw “iva” dak in-nhar.
Il-134,000
li vvotaw “le” għall-Ftehim fl-2003 u dawk li llum jiddispjaċihom li vvotaw
”iva” dak in-nhar, żgur ma jieħdux gost li llum nivvotaw favurih kif huwa
mdaħħal fil-Kostituzzjoni Ewropea.
L-Oppożizzjoni Laburista fil-Parlament ivvotat kontra r-ratifika tal-Ftehim ta’ l-2003.
Jekk
issa l-Oppożizzjoni Laburista tivvota ”iva” għar-ratifika tat-Trattat li
Jistabilixxi Kostituzzjoni għall-Ewropa, hija tkun qiegħda tivvota favur
il-Ftehim ta’ l-2003.
Il-Konferenza
Ġenerali tad-Delegati Laburisti fid-9 ta’ Novembru ta’ l-2003 ma approvatx
il-Ftehim Nazzjonalista ta’ l-2003 kif sar.
Hija qatgħet li l-Partit waqt li jkun fl-Oppożizzjoni, jaħdem biex ixejjen l-aspetti negattivi kollha ta’ dak il-ftehim żvantaġġuż u ta’ ħsara għall-poplu Malti, speċjalment għall-ħaddiema.
Jekk
l-Oppozizzjoni Laburista issa tivvota “iva” għall-Kostituzzjoni Ewropea tkun
qiegħda tapprova l-Ftehim żvantagguż u ta’ ħsara li n-Nazzjonalisti għamlu ma’
l-Unjoni Ewropea fl-2003, bl-aspetti negattvi tiegħu kollha.
Meta ma nivvotawx favur il-Kostituzzjoni Ewropea, ma nkunux qegħdin immorru kontra l-Unjoni Ewropea jew kontra s-sħubija fiha.
Il-Franċiżi
u l-Olandiżi li vvotaw bi ħġarhom “le” għall-Kostituzzjoni Ewropea ma vvotawx
kontra l-Unjoni Ewropea jew kontra s-sħubija fiha.
Min jivvota “le” għat-Trattat li Jistabblixxi Kostituzzjoni għall-Unjoni Ewropea ikun qed jgħid li jippreferi li l-Unjoni tibqa’ kif inhi llum.
Dan ifisser li jippreferi li tibqa’ l-Unjoni Ewropea li l-maġġoranza tal-Maltin u l-Għawdxin ivvotaw għaliha fir-referendum u fl-elezzjoni ġenerali ta’ l-2003.
Min irid jirrispetta r-rieda ta’ dik il-maġġoranza, għandu jivvota “le” għall-Kostituzzjoni Ewropea ta’ llum u ta’ l-2003.
Għalhekk min ma jivvotax “iva” għall-Kostituzzjoni Ewropea, mhux biss ma jkunx qed imur kontra l-maggoranza li vvotat ”iva” fl-2003, iżda ma jkunx qed imur kontra l-134,000 li vvotaw “le” fl-2003.
Ikun qed jirrispetta lil kulħadd.
Jibżgħu mir-referendum f’Malta
M’HEMMX dubju li l-miljuni ta’ Franċiżi u ta’ l-Olandiżi li vvotaw kontra l-Kostituzzjoni Ewropea fetħu għajnejn il-popli l-oħrajn fil-pajjiżi membri ta’ l-Unjoni Ewropea għan-nuqqasijiet kbar kbar ta’ l-Unjoni u għall-politika ħażina ħafna tagħha.
L-għajta qawwija tal-“le” tal-popli ta’ Franza u l-Olanda, mhux biss f’Malta nstemghet, iżda anki saħħet l-oppożizzjoni mifruxa ħafna tal-Maltin u l-Għawdxin għall-Kostituzzjoni ġdida ta’ l-UE.
Kieku kellu jsir referendum f’pajjiżna, il-maġġoranza tal-“le” llum tkun ikbar mill-55 fil-mija ta’ Franza u l-61 fil-mija ta’ l-Olanda.
GĦALHEKK MA JRIDUX JAGĦMLU REFERENDUM F’MALTA.
Mhux għax f’pajjiżna l-proċess tar-ratifika ta’ trattati huwa b’votazzjoni fil-Parlament.
Għax minkejja dan il-fatt għamilna referendum f’Marzu ta’ l-2003 dwar it-Trattat tas-Sħubija ta’ Malta fl-UE, u wara saret ir-ratifika tiegħu f’Lulju ta’ l-istess sena, fil-Parlament Malti.
L-istess seta’ jsir referendum f’Malta dwar it-Trattat li Jistabbilixxi Kostituzzjoni għall-Ewropa biex inkunu nafu kif il-Maltin u l-Għawdxin jaħsbuha dwaru.
Kieku l-maġġoranza kienet tgħid “iva” għalih, issir imbagħad ir-ratifika tiegħu fil-Parlament.
Imma jafu li l-maġġoranza tal-Maltin u l-Għawdxin illum m’humiex favur il-Kostituzzjoni Ewropea, u għalhekk qegħdin iġibu l-iskuża li l-proċess tar-ratifika ta’ trattati huwa f’Malta bil-vot fil-Parlament.
Fi Franza u fl-Olanda wkoll ir-ratifika tat-trattati ssir permezz ta’ vot fil-parlamenti nazzjonali, u mhux meħtieġ li jsiru referenda.
B’danakollu dwar it-Trattat li Jistabbilixxi Kostituzzjoni għall-Ewropa, billi din il-Kostituzzjoni tolqot direttament lill-popli, barra li tolqot lill-istati, kemm il-Gvern Franċiż kif ukoll dak Olandiż fehmu li kellhom jaraw jekk il-popli tagħhom kinux jaqblu magħha, minkejja li r-rappreżentanti parlamentari tal-popli wrew li huma favuriha.
U għalkemm la l-Gvern Franċiż u lanqas dak Olandiz m’huma marbuta bir-riżultat negattiv tar-referenda konsultattivi li saru u lanqas jaqblu miegħu, iż-żewġ gvernijiet stqarrew bla tlaqliq li se jħarsu r-riżultat negattiv, u mhux se jkomplu bil-proċess tar-ratifika fil-parlamenti nazzjonali.
Gurnalist investigattiv ittrattat ħażin mill-UE
Hans Martin Tillack huwa ġurnalist investigattiv Ġermaniż.
Xi żmien ilu kiteb dwar l-investigazzjoni ta’ każi ta’ korruzzjoni fit-taqsima mwaqqfa apposta fl-UE biex tinvestiga każi ta’ frodi u korruzzjoni. Din it-taqsima hija magħrufa bl-isem ta’ OLAF.
L-OLAF ma ħaditx gost b’dak li Hans Martin Tillack kiteb dwarha.
Hija ġiegħlet lill-pulizija ta’ Brussels jieħdu mill-uffiċċju ta’ Tillack il-‘files’ u d-dokumenti konnessi max-xogħol investigattiv tiegħu.
Tillack għamel ilment lill-Ombudsman dwar l-aġir abbużiv u intimidatorju ta’ l-uffiċjali ta’ l-OLAF.
Dawn ippruvaw jiġġustifikaw l-imġiba ħażina tagħhom billi jgħidu li kellhom tagħrif li Tillack kien xaħħam xi mpjegati ta’ l-OLAF biex jagħtu iformazzjoni fuq il-każijiet ta’ korruzzjoni li dwarhom kiteb.
Iżda l-Ombudsman ta’ l-Unjoni Ewropea mhux talli ma aċċettax ir-raġunijiet li l-uffiċjali tawh, talli saħansitra qal li huma jmisshom jammettu li kienu għamlu stqarrijiet mhux korretti u qarrieqa.
L-Ombudsman jidher li qabel ma Tillack li dejjem sostna li ma kien hemm ebda prova li huwa ma jistax jifhem kif l-uffiċjali ta’ l-OLAF sostnew li kellhom tagħrif minn sorsi li wieħed jorbot fuqhom, bħal membri tal-Parlament Ewropew, meta l-istqarrijiet ta’ dawn kienu biss ‘hearsay evidence’ (jiġifieri, li huma kienu semgħu mingħand ħaddieħor) u mhux dwar fatti li huma kienu jafu.
Ir-rapport ta’ l-Ombudsman dwar l-ilment ta’ Hans Martin Tillack issa qiegħed quddiem il-kumitat tal-membri tal-Parlament Ewropew.
Iżda milli jidher ma tantx hemm tama li l-membri tal-Parlament Ewropew jieħdu xi azzjoni dwar l-aġir abbużiv u intimidatorju ta’ l-uffiċjali ta’ l-OLAF.
Qed jingħad dan għax il-gruppi tal-partiti politiċi fil-Parlament Ewropew jidhru li jistennew lill-membri tagħhom fil-Parlament li jaċċettaw u jittolleraw żbalji u skandli magħmulin minn uffiċjali ta’ l-Unjoni Ewropea ħalli ma jkabbrux aktar kritika kontra l-Unjoni u l-mod ħażin li topera.
Ġurament ta' lealta` li jieħdu l-Membri Parlamentari kollha
Jiena ................................................ solennement naħlef / niddikjara li nkun tassew fidili u leali lejn il-Poplu u r- Repubblika ta’ Malta u l-Kostituzzjoni tagħha. (Hekk Alla jgħini).
Ġurament għall-qadi xieraq tal-kariga ta’ Prim Ministru jew Ministru ieħor jew Segretarju Parlamentari.
Jiena ................................................ solennement naħlef / niddikjara li naqdi fedelment u skond il-kuxjenza d-dmirijiet tiegħi bħala (Prim Ministru/Ministru/Segretarju Parlamentari) skond il-Kostituzzjoni u l-liġijiet ta’ Malta, mingħajr biża’ jew favur. ( Hekk Alla jgħini).
Ġurament għall-qadi xieraq tal-kariga ta’ President.
Jiena ..............................................., solennement naħlef / niddikjara li naqdi fedelment il-kariga ta’ President (li naqdi fedelment il-funzjonijiet tal-President) ta’ Malta, u li, skond l-aħjar ħila tiegħi nikkonserva, inħares u niddefendi l-Kostituzzjoni ta’ Malta. (Hekk Alla jgħini).
Sezzjoni 6 tal-Kostituzzjoni ta' Malta
6. Bla ħsara għad-disposizzjonijiet tas-subartikoli (7) u (9) ta’ l-artikolu 47 u ta’ l-artikolu 66 ta’ din il-Kostituzzjoni, jekk xi liġi oħra tkun inkonsistenti ma’ din il-Kostituzzjoni, din il-Kostituzzjoni għandha tipprevali u l-liġi l-oħra għandha, safejn tkun inkonsistenti, tkun bla effett.
Artiklu I-6 tal-Kostituzzjoni ta' l-Unjoni Ewropea
Dritt ta' l-Unjoni
Il-Kostituzzjoni u l-liġijiet adottati mill-istituzzjonijiet ta’ l-Unjoni fl-eżerċizzju tal-kompetenzi konferiti lilha għandhom jipprevalu fuq id-dritt ta’ l-Istati Membri.
Tista' tafda lil min jikser il-ĠURAMENT tiegħu/tagħha?
L-Erbgħa, 8 ta' Ġunju, 2005.
<< Lura http://www.cnimalta.org/2005.html
Inroddulek ħajr li żort il-paġna tagħna
Appoġġ fil-ġlieda għall-Indipendenza u l-Ħelsien
Trid tgħin biex niksbu mill-ġdid l-Indipendenza u l-Ħelsien?
Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.
Issieħeb fis-CNI billi tibgħat Lm2 flimkien ma' din il-formola liċ-
Chairman CNI,
Dr Karmenu Mifsud Bonnici LL.D.
81, Triq Ġuże Pace,
Ħamrun.
Isem .......................................................
Indirizz ...................................................
ID Numru ...............................................
Inroddulek ħajr ta’ l-għajnuna tiegħek
Malta ħielsa u newtrali fl-aħħar tirbaħ