MERHBA FIL

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LILL-KANDIDAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

L-Unjoni Ewropea ordnat li mis-sena 2010 il-Maltin u l-Għawdxin iħallsuha

€182,192 kuljum misruqa minn ħalq uliedek

Kisbiet li m’humiex ta’ l-UE

Bl-iskop li ssir propaganda favur l-Unjoni Ewropea, dan ix-xahar qegħdin jinsġu paniġierki sbieħ fuq it-Trattat ta’ Ruma li kien iffirmat 50 sena ilu minn sitt pajjiżi Ewropej, li waqqfu l-Komunità Ekonomika Ewropea, li żviluppat fl-Unjoni Ewropea tal-lum.

Ħadd mill-kelliema u l-kittieba ma jistqarr kemm l-Unjoni tal-lum hija għal kollox differenti u tbiegħdet mill-Komunità kif twaqqfet 50 sena ilu.

Sabiex ikollna ħjiel ta’ kemm l-Unjoni Ewropea tal-lum mhix bħall-Komunità Ekonomika Ewropea ta’ 50 sena ilu, biżżejjed insemmgħu ftit fatti.

Fil-waqt li l-ewwel tliet mexxejja fundaturi tal-Komunità, Robert Schuman ta’ Franza, Konrad Adeneur tal-Ġermanja u Alcide De Gasperi ta’ l-Italja, kellhom viżjoni Nisranija għall-għaqda li waqqfu, il-Parlament ta’ l-Unjoni Ewropea tal-lum m’aċċettax lill-Professur Rocco Buttiglione bħala Kummissarju, prinċipalment għax huwa stqarr pubblikament it-twemmin Nisrani tiegħu.

Meta tfasslet il-Kostituzzjoni ta’ l-Unjoni Ewropea, m’aċċettawx li jingħad fiha li l-Ewropa għandha għeruq Insara.

U nfakkru fatt ieħor li juri kemm l-Unjoni tal-lum m’għandhiex il-valuri Nsara tal-fundaturi tal-Komunità ta’ 50 sena ilu.

Illum l-Unjoni uffiċjalment tippromwovi politika favur l-abort u thedded li ma tagħtix għajnuna lill-pajjiżi fqar li ma jippermettux l-abort fil-ġlieda kontra l-faqar.

Tajjeb li nisħqu li meta pajjiżna jħallas kull sena kontribuzzjoni lill-Unjoni Ewropea, il-poplu Malti jkun qiegħed jgħin u japprova l-politika u l-aġir ħażin ta’ l-Unjoni li l-Insara li mhumiex biss tal-kelma, ma jmisshomx jgħinu u japprovaw.

U fiċ-ċelebrazzjonijiet u l-funzjonijiet anki reliġjużi li se jsiru fil-50 anniversarju tat-Trattat ta’ Ruma, ikunu qegħdin jitfaħħru mhux il-valuri Nsara tal-Komunità Ekonomika Ewropea ta’ 50 sena ilu, iżda l-valuri u l-politika ħażina ta’ l-Unjoni Ewropea tal-lum.

Il-paċi fl-Ewropa

Fil-paniġierki dwar l-Unjoni Ewropea jingħadu ħwejjeġ li mhumiex korretti, biex iħallu impatt favorevoli fuq il-poplu.

Fl-ewwel lok, il-propagandisti ta’ l-Unjoni jiftaħru li dawn l-aħħar 50 sena ma kienx hawn gwerer fl-Ewropa minħabba l-Unjoni Ewropea.

Iżda dan mhux korrett, għax waqt li l-iskop ewlieni għat-twaqqif tal-Komunità Ekonomika Ewropea, (bħal ma kien dak qabel tal-Komunità Ewropea tal-Faħam u l-Azzar) kien biex jiżgura paċi bejn Franza u l-Ġermanja, l-istudjużi ta’ l-istorja kontemporanea jaqblu li l-paċi nżammet fl-Ewropa minħabba fatturi oħrajn.

Kien hemm il-fattur li eluf ta’ suldati Amerikani ilhom mill-aħħar Gwerra Dinjija stazzjonati fil-Ġermanja u f’pajjiżi ta’ l-Ewropa tal-Punent, u wkoll it-twaqqif tal-CSCE (Konferenza dwar is-Sigurtà u l-Koperazzjoni fl-Ewropa) li l-isem ta’ Malta baqa’ marbut magħha minħabba l-ħidma tal-Prim Ministru Mintoff biex iġiegħel lill-potenzi kbar bħall-Istati Uniti ta’ l-Amerika u l-Unjoni Sovjetika jaqblu li ma jistax ikun hemm sigurtà fl-Ewropa jekk ma jkunx hemm paċi fil-Mediterran.

Id-drittijiet fundamentali tal-bniedem

Il-propagandisti ta’ l-Unjoni Ewropea jiftaħru wkoll li l-Unjoni żgurat il-prinċipji tad-demokrazija u tad-drittijiet fondamentali tal-bniedem.

Għalkemm huwa minnu li l-Unjoni tistqarr dawn il-prinċipji u tisħaq li jitħarsu fil-pajjiżi mseħbin fl-Unjoni, mhux korrett li dawn il-prinċipji daħlu bis-saħħa ta’ l-Unjoni Ewropea.

Għax snin qabel ma twaqqfet il-Komunità Ekonomika Ewropea 50 sena ilu, twaqqaf mill-pajjiżi Ewropej il-Kunsill ta’ l-Ewropa, inkluża Malta, li kienet wieħed mill-ewwel pajjiżi kollha ta’ l-Ewropa li ssieħbu.

L-għanijiet ewlenin tal-Kunsill ta’ l-Ewropa, li għandu ċ-ċentru tiegħu fi Strasburgu, fejn kien jiltaqa’ l-Parlament ta’ l-Unjoni Ewropea qabel ma l-Unjoni bniet Parlament ġdid ħdejn iċ-ċentru tal-Kunsill ta’ l-Ewropa, huma l-ħarsien tad-Demokrazija u tad-Drittijiet Fondamentali tal-Bniedem.

L-Unjoni Ewropea spiċċat biex ħadet il-bandiera tal-Kunsill ta’ l-Ewropa, li hija l-bandiera bi sfond blu u ċirku ta’ 12-il stilel, barra li ħatfet ħafna xogħol ieħor li kien jagħmel il-Kunsill ta’ l-Ewropa.

Fiċ-ċelebrazzjonijiet tal-50 anniversarju ta’ l-Unjoni Ewropea, nagħmlu tajjeb li niftakru li ħafna mit-tfaħħir dwar l-kisbiet ta’ l-Unjoni, bħal ma huma l-paċi, id-demokrazija u d-drittijiet fondamentali tal-bniedem, mhumiex kisbiet ta’ l-Unjoni, u jkun qiegħed iqarraq bin-nies, min jippreżentahom bħala kisbiet ta’ l-Unjoni Ewropea.

Il-Ministru Gatt baqa’ ma weġibx

Il-propagandisti ta’ l-Unjoni Ewropea jħobbu jgħidu li l-proġett ta‘ SmartCity se jsir f’Malta għax pajjiżna huwa msieħeb fl-Unjoni Ewropea.

Fil-programm tas-CNI fuq Smash TV tal-25 ta’ Jannar ta’ din is-sena konna għamilna għadd ta‘ mistoqsijiet lill-Ministru Austin Gatt dwar il-proġett tar-Rikażli, SmartCity.

Konna għednielu li jekk ma kellux x’jaħbi, imissu jirrispondihom qabel l-elezzjonijiet għall-Kunsilli Lokali ta’ l-10 ta’ Marzu.

Sakemm ħejjejna din il-paġna, la l-Ministru u lanqas ħadd mill-uffiċjali tal-ministeru tiegħu, ma lissnu jew kitbu kelma biex iserrħulna rasna li l-proġett ta’ SmartCity mhux veru li hu aktar spekulazzjoni ta’ proprjetà milli “Belt tat-teknoloġija ta’ l-Informatika”.

Ħafna għalhekk qegħdin jgħidu li l-figura ta’ 5,600 impjieg tista’ tkun fittizja għax jekk ma jilħqux dik il-figura, kull ma jridu jħallsu f’multa hi s-somma ta‘ Lm260,000.

Oħrajn qegħdin jistaqsu jekk hux veru li ħafna mill-impjiegi jistgħu jkunu “partajm” u mhux “fultajm”.

Hemm min qed isostni li m’hemm ebda garanzija li l-għadd ta’ ħaddiema jistgħu jonqsu wara li jibda jopera l-proġett.

Jidher li veru li dak li konna għedna aħna, jiġifieri li l-ħaddiema barranin mill-Unjoni Ewropea se jkollhom l-istess dritt għall-impjieg daqs il-ħaddiema Maltin għax fl-Unjoni ma nistgħux niddiskriminaw kontra ħaddiema mill-Unjoni.

Kollox juri li l-kumpanija Tecom Investments ma kinitx tiġi f’pajjiżna kieku l-Gvern ma tahomx dik l-art kollha fir-Rikażli, u dan allavolja Malta kienet xorta waħda fl-Unjoni Ewropea.

Is-skiet ta’ l-Onorevoli Ministru jikkonferma dak li staqsejna u li hu ma taniex tweġiba.

L-Ewro – il-poplu diġà beda jinsteraq!

Waqt kummentarju tas-CNI fuq Smash TV ta’ nhar il-Ħamis, 1 ta’ Marzu, semmejna xi “tricks” li jistgħu jagħmlu ċerti negozjanti bla skrupli ta’ xejn, biex japprofittaw ruħhom mid-dħul ta’ l-Ewro f’pajjiżna.

Wieħed mit-“tricks” li semmejna – u wissejna dwaru – kien li l-prezzijiet jibdew jiżdiedu bil-mod il-mod ħalli meta jasal l-1 ta’ Lulju ta’ din is-sena u l-prezzijiet ikollhom jidhru kemm bil-Lira Maltija u anke bl-Ewro, ma jkunx hemm għalfejn ibagħbsu bir-rata tal-kambju – u b’hekk jiksru l-liġi – għax it-“tbagħbis” ikunu diġà għamluh qabel.

Fil-ġurnal It-Torċa tal-25 ta’ Frar deħer rapport qasir iżda importanti ħafna.

Tajjeb għalhekk nirrepetu dak li kien hemm f’dak ir-rapport, għax jikkonferma kemm kellna raġun inwissu lit-telespettaturi ta’ Smash TV dwar xi “tricks” li jistgħu qegħdin jintużaw minn ċerti negozjanti.

Nagħmluha ċara li dan ma jfissirx li kull negozjant qiegħed jagħmel hekk.

Anzi nemmnu li l-maġġoranza kbira tan-negozjanti mhijiex se tasal li tagħmel dan.

Però wieħed irid ikun attent għal dawk li lesti jaħtfu kull opportunità biex jisolħu lill-proxxmu tagħhom, għax il-kilba għall-profitt tiżboq is-sens ta’ rġulija u ta’ negozju ġust.

Mela f’It-Torċa ġiet ippubblikata tabella ta’ tliet prodotti u kif dawn għolew bejn Awissu, 2006 u Frar, 2007.

Hawn xi ħadd jemmen li dawn iż-żidiet kbar saru b’kumbinazzjoni u mhux biex meta jkollna l-prezzijiet anki bil-Ewro, taparsi l-prezz ma jkunx żdied u bil-Gvern jidher li kellu raġun, jiġifieri, li bl-Ewro “se tinbidel biss il-munita u mhux il-prezzijiet?”

Nerġgħu nappellaw lill-qarrejja biex jieħdu nota tal-prezzijiet li qegħdin jiżdiedu u jinformaw bihom lis-Segretarju tas-CNI, 60A, Triq id-Dejqa, Valletta, billi tibagħtu nota f’dan l-indirizz.

Naċċertawkom li fejn jirriżulta li qegħdin isiru dawn it-“tricks”, aħna nikxfuhom, kemm f’din il-paġna kif ukoll fil-kummentarju li nagħmlu fil-programm tas-CNI kull nhar ta’ Ħamis, fis-6.30 p.m, b’repetizzjoni l-Ħadd, fis-7.30 p.m.

Il-viltà qiegħda wkoll li l-istess Gvern meta għadda liġi li taparsi tipproteġi lill-konsumaturi billi min ma jżommx ir-rata uffiċjali tal-kambju, jiġi mħarrek u jittella’ l-Qorti – fejn jista’ jeħel multa.

Iżda l-istess Gvern ta l-poter lill-ministru responsabbli, li jista’ jħassar il-multa ta’ dak in-negozjant li jkun serqek!

Però, ma għamel xejn il-Gvern fil-liġi li tipprojbixxi żidiet anki skandalużi.

Kif jidher fit-tabella ta’ hawn, li kienet ippubblikata fi It-Torċa, żidiet qegħdin isiru QABEL ma jidħlu fis-seħħ il-prezzijiet biż-żewġ muniti.

Fil-fatt, f’dik il-propaganda kollha tan-NECC (il-Kumitat dwar id-dħul ta’ l-Ewro), imkien ma jgħidu li l-prezzijiet ma jistgħux jiżdiedu.

Jgħidu biss li r-rata tal-kambju għal sitt xhur (iż-żmien li l-prezzijiet se jkunu biż-żewġ muniti) trid tkun dik uffiċjali.

Data/Ditta/Prodott/Piż/Prezz

“Flimkien fl-Inflazzjoni”

Għal darb’oħra Derek Bennett, li mill-Ingilterra dejjem juri li jieħu interess ġenwin f’Malta, għamel kumment floku f’ġurnal bl-Ingliż tat-Tnejn li għadda.

Huwa kiteb li meta tqis li ħafna mill-pajjiżi ta’ l-Unjoni Ewropea ssieħbu fiha f’dawn l-aħħar snin, tintebaħ kemm is-‘slogan’ magħżul għall-50 anniversarju tat-twaqqif tal-Komunità Ekonomika Ewropea, “Flimkien mill-1957” huwa ħlieqa falza oħra tal-propagandisti ta’ l-Unjoni.

Fil-każ ta’ Malta, is-sħubija fl-Unjoni seħħet fl-2004, ir-Rumanija u l-Bulgarija għadhom kif issieħbu fil-bidu ta’ din is-sena.

Bennet irrefera għar-rapport li deher fil-bidu ta’ Frar li kien jgħid li l-poplu Malti huwa nkwetat l-aktar bl-inflazzjoni, u nnota li f’dik l-istess ġimgħa Malta applikat biex iddaħħal l-Ewro.

Huwa kkummenta li f’kull pajjiż li daħħal l-Ewro, kien hemm żieda qawwija fl-inflazzjoni.

Huwa għalhekk qal li Malta ftit se jkollha x’tiċċelebra s-sena d-dieħla meta bid-dħul ta’ l-Ewro, titlef il-ħelsien ekonomiku u jiżdied l-għoli tal-ħajja.

Minħabba dan, Derek Bennett issuġġerixxa li s-‘slogan’ jixraq li jkun “Flimkien fl-Inflazzjoni”.

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.