MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

  NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LILL-KANDIDAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

Issa qegħdin jaqblu magħna

Intom li taqraw il-ġurnali u tisimgħu l-aħbarijiet, żgur li tafu li f’dawn l-aħħar erba’ jew ħames ġimgħat diversi għaqdiet – kemm tal-Knisja kif ukoll lajċi – kif ukoll politiċi u xi korrispondenti fil-ġurnali, qegħdin kollha jsemmu l-għoli sfrenat tal-prezzijiet ta’ l-artijiet u tal-bini f’pajjiżna.

Qegħdin jitkellmu dwar kif dan l-għoli sfrenat qed jikkawża tbatija kbira lil eluf ta‘ żgħażagħ Maltin u Għawdxin, li diġà tgħabbew bi djun enormi biex ikollhom xi erbat ikmamar fejn joqogħdu u jrabbu familja.

Ħafna qegħdin jilmentaw li din il-problema qiegħda tagħmilha diffiċli ferm għal eluf ta’ żgħażagħ għarajjes li jixtiequ jsibu huma wkoll post ħalli jieħdu l-istat tagħhom.

Aħna qegħdin ninnotaw li waqt li dawn l-għaqdiet u l-individwi kollha qegħdin isemmu xi raġuni jew oħra li setgħet ikkawżat din il-problema, ĦADD minnhom ma jsemmi s-sħubija ta’ Malta fl-Unjoni Ewropea bħal l-akbar kawża li taħti għall-qagħda kritika ħafna li qegħdin isibu ruħhom fiha ż-żgħażagħ tagħna.

Is-CNI kienet wissiet

Ferm qabel ir-Referendum ta’ l-2003 is-CNI kienet wissiet li bis-sħubija fl-UE jkollna problema kbira fil-qasam tal-prezzijiet tal-proprjetà minħabba n-numru sostanzjali ta’ ċittadini mill-UE, speċjalment koppji ta’ pensjonanti mill-pajjiżi ta’ l-Ewropa ta’ fuq – l-aktar mill-Ingilterra – li jagħżlu li jiġu jgħixu fostna.

U waqt li qabel li sseħibna fl-UE stajna nillimitaw ħafna n-numru tagħhom bir-regolamenti li kellna dwar l-inqas prezz tal-proprjetà li setgħu jixtru, u l-ammont ta’ kapital li ried jibqgħalhom barra minn Malta, konna wissejna li jekk nidħlu fl-UE, dawn il-limitazzjonijiet ma nkunux nistgħu aktar nimponuhom fuq iċ-ċittadini barranin li jiġu mill-istati membri Ewropej.

Dak li konna wissejna li jseħħ, beda jseħħ mill-2003, meta d-deċiżjoni li Malta tidħol fl-UE ttieħdet bir-riżultat ta’ l-Elezzjoni Ġenerali f’dik is-sena. 

Il-prezzijiet ta’ l-artijiet u l-bini bdew telgħin b’rata mgħaġġla u komplew jisplodu ’l fuq fis-snin ta’ wara. 

Issa, wara li “ż-żwiemel ħarbu mill-istalla”, ħafna qegħdin jiftħu ħalqhom jew jiktbu dwar din il-problema li qiegħda tolqot bil-kbir, speċjalment liż-żgħażagħ tagħna.

Kemm il-Knisja, kif ukoll il-Ġiżwiti – li x’uħud minnhom kienu ħeġġew lill-Maltin biex jivvotaw favur is-sħubija fl-UE – ħassew li l-qagħda fis-settur tal-proprjetà hija waħda inkwetanti għall-aħħar.

Waqt li sa Novembru tas-sena l-oħra tista’ tgħid li ħadd ma kien tkellem, ħlief is-CNI, dwar l-għoli tal-prezzijiet ta’ l-artijiet u d-djar, f’dawn l-aħħar ġimgħat l-istorja nbidlet, għalkemm s’issa l-Gvern għadu ċċassat – il-Prim Ministru s-Sibt li għadda stqarr li ftit hemm x’wieħed jista’ jagħmel – iħares lejn il-problema bla ma jaf x’se jagħmel għax jidher li jibqa’ jirfes il-kallijiet ta’ dawk li jimpalaw l-eluf ta’ liri lill-partit meta dan jorganizza ġbir ta’ fondi.

Fi Franza, il-Gvern qal li biħsiebu jgħaddi liġi li tagħmilha DRITT FUNDAMENTALI għaċ-ċittadini tiegħu li jkollhom post diċenti fejn joqogħdu. 

Dan ifisser li l-Gvern ikollu r-responsabbiltà politika biex jagħti dan id-dritt liċ-ċittadini kollha tiegħu. 

Biex jirnexxielu jagħmel dan, bilfors se jkollu jieħu deċiżjonijiet radikali.

Waħda mill-proposti li qiegħda tiġi rakkomandata hija r-rekwiżizzjoni ta’ postijiet li ilhom vojta u mitluqin għal perjodu twil ta’ żmien. 

Il-Gvern imbagħad jirranġahom u fihom jiġbor lil dawk li qegħdin jgħixu fit-toroq, jew jgħixu f’postijiet li m’humiex diċenti.

Waqt li fi Franza, fejn ixxandru għall-ewwel darba d-drittijiet fundamentali tal-bniedem, waslu biex jikkunsidraw li jieħdu dawn id-deċiżjonijiet radikali ħalli jsolvu l-problema tan-nies mingħajr dar diċenti, f’Malta għandna lil min isostni li anke spekulaturi li xtraw toroq fejn dawn id-djar jinstabu, għandhom id-dritt li jagħmlu li jridu bil-proprjetà tagħhom, u dan id-dritt tagħhom jiġi qabel id-dritt li kull ċittadin Malti jkollu saqaf fuq rasu u post diċenti fejn jgħix!

Fl-interess nazzjonali… noħorġu mill-UE!

FL-2003 maġġoranza żgħira ta’ Maltin u Għawdxin ħasbet li sħubija fl-Unjoni Ewropea kienet se tkun aktar ta’ ġid milli ta’ ħsara għal pajjiżna.

Minkejja l-fatt li t-tliet partiti politiċi huma favur is-sħubija fl-Unjoni, u minkejja l-propaganda ma taqta’ xejn favuriha, l-ilmenti kontriha minn ħafna setturi tal-poplu qegħdin dejjem jiżdiedu.

Sentejn u nofs wara li sseħibna fl-UE fl-1 ta’ Mejju 2004, jidher li l-maġġoranza tal-poplu m’għadhiex taħsibha l-istess bħall-2003. 

Kif seħħet ir-rieda tal-maġġoranza ta’ l-2003 favur is-sħubija fl-Unjoni, għandha wkoll isseħħ illum ir-rieda tal-maġġoranza kontra s-sħubija. 

Ir-rieda tal-maġġoranza tal-lum isseħħ billi pajjiżna joħroġ mill-blokk Ewropew.

X’uħud jaħsbu li finanzjarjament pajjiżna ma jaqbillux joħroġ mill-Unjoni. 

Iżda huma żbaljati. 

Meta jsiru sewwa l-kontijiet, insibu li anke finanzjarjament jaqblilna noħorġu mill-UE.

L-Unjoni se tagħti lil Malta 885 miljun Ewro għal seba’ snin, li jġibu madwar Lm52 miljun u tagħti wkoll il-qliegħ li l-Bank Ċentrali ta’ Malta jagħmel fuq ir-riservi barranin li f’din is-sena huma stmati Lm11-il miljun. 

Minħabba s-sħubija fl-Unjoni, pajjiżna tilef madwar Lm14-il miljun fis-sena li kien idaħħal mill-Protokoll Taljan. 

Dawn it-tlieta flimkien iġibu Lm47 miljun fis-sena.

L-ispejjeż li pajjiżna jkollu jagħmel minħabba s-sħubija jlaħħqu aktar minn Lm5 miljun fis-sena, u għalhekk bejn dak li nħallsu u dak li tlifna, insibu li dawn jammontaw aktar mill-Lm52 miljun li ndaħħlu fis-sena mill-Unjoni.

Għalkemm tlabna lill-Gvern biex ixandar il-kontijiet ta’ kemm inħallsu lill-UE u kemm se nitilfu minħabba s-sħubija u kemm hija l-ispiża kollha ta’ pajjiżna minħabba s-sħubija, il-Gvern baqa’ ma xandarhomx għax ma jridx li l-poplu Malti jara li aktar se nirruftaw milli se ndaħħlu.

Huwa fl-interess ta’ pajjiżna li ma nħaddmux il-politika ta’ l-UE f’diversi oqsma, u l-ewwelnett fil-qasam tax-xogħol.

Pajjiżna biex jgħix u jimxi ’l quddiem, irid iżid ix-xogħol u l-bejgħ tal-prodotti u servizzi lill-barranin. 

L-Unjoni Ewropea ma tħallix lill-Gvern jindaħal ħalli joħloq ix-xogħol u li jagħti għajnuniet lill-impriżi biex iżommu l-impjegati u jżidu l-impjegati tagħhom. 

Jekk ma nibqgħux marbutin bil-politika u r-regoli ta’ l-Unjoni fil-qasam tax-xogħol, inkunu nistgħu nadottaw il-miżuri kollha meħtieġa biex inkattru x-xogħol u nħarsu l-impjiegi.

Dan l-aħħar ħafna wrew it-tħassib tagħhom dwar il-problema tal-prezzijiet għoljin esaġeratament tad-djar.

Bis-sħubija fl-Unjoni, kibret id-domanda għax-xiri tad-djar f’pajjiżna mill-barranin ta’ l-UE. 

Kibret ukoll l-ispiża

* tal-kostruzzjoni tal-bini

* u konsegwentement tal-prezzijiet tad-djar,

* bit-taxxa ta’ 18 fil-mija fuq ix-xogħol tal-bini,

* ta’ l-aperturi,

* tal-‘plumbing’,

* ta’ l-istallazzjoni ta’ l-elettriku,

* tat-tqegħid tal-madum,

* tat-tibjid u taż-żebgħa,

* u tad-drittijiet tal-periti.

Iż-żieda fid-domanda għax-xiri tad-djar u l-impożizzjoni tat-taxxa tal-VAT fuq l-ispejjeż tal-kostruzzjoni huma konsegwenzi tas-sħubija fl-Unjoni Ewropea.

Biex nibdew insibu tarf tal-problema tal-prezzijiet għoljin tad-djar, irridu nnaqqsu d-domanda għax-xiri mill-barranin u nneħħu t-taxxa tal-VAT minn fuq il-bini – żewġ miżuri li l-UE ma tħalliniex nieħdu.

L-alternattiva hija li noħorġu mill-Unjoni la darba din mhix lesta li tħallina nieħdu dawk il-passi li l-poplu tagħna jeħtieġ.

Għalhekk huwa fl-interess nazzjonali li noħorġu mill-Unjoni Ewropea!

Fl-Unjoni Ewropea ma tistax tagħti kas l-orjentazzjoni sesswali (’sexual orientation’) ta’ persuna għax jekk tagħmel hemm tkun mixli bi ksur ta’ dritt fundamentali ta’ dik il-persuna billi tkun qiegħed tiddiskrimina bejnha u persuni li m’għandhomx l-orjentazzjoni sesswali tagħha.

Dan ir-ragunar insibuh miktub fil-Karta tad-Drittijiet Fundamentali ta’ l-Unjoni Ewropea u huwa meqjus bħala wieħed mill-valuri tad-dinjità umana li l-UE tħares u li ssostni li għandu jitħares f’kull pajjiż membru tagħha.

Naturalment wara li Malta ssieħbet fl-UE dan ir-raġunar jgħodd għal pajjiżna u jorbotna li nħaddmuh f’kull qasam tal-ħajja ċivili u soċjali tagħna. 

Insibuh imfisser fl-Artiklu II-81 tat-Trattat li jistabbilixxi Kostituzzjoni għall-Ewropa li l-Parlament Malti vvota favuriha fis-6 ta’ Lulju 2005.

L-applikazzjoni tar-regola li ma tistax tittratta ma’ persuna minħabba l-orjentazzjoni sesswali tagħha differenti milli tittratta ma’ persuni li m’għandhomx dik l-orjentazzjoni sesswali, tista’ toħloq ħafna diffikultajiet kemm fil-qasam tat-trobbija u ta’ l-edukazzjoni tat-tfal u ż-żgħażagħ, kif ukoll f’oqsma oħrajn tal-ħajja ċivili u soċjali.

Eżempju ċar tad-diffikultajiet li t-twettiq ta’ din ir-regola ta’ l-UE li tipprojbixxi li tikkonsidra l-orjentazzjoni sesswali ta’ persuni, qiegħed jingħata prominenza kbira fl-Ingilterra bħalissa.

Fl-Ingilterra għaddiet ligi, ‘The Equality Act’, li għandha tidħol fis-seħħ f’April li ġej u li tagħmilha illegali li ma tipprovdix oġġetti, ma toffrix faċilitajiet, jew ma tagħtix servizz lil xi persuna minħabba l-orjentazzjoni sesswali tagħha. 

Bis-saħħa ta’ din il-liġi, koppja ta’ omosesswali ma tistax tiċċaħħad li tadotta tfal bħalma tagħmel koppja ta’ mara u ragel miżżewġin.

L-Arċisqof ta’ Westminister f’Londra, il-Kardinal Cormac Murphy-O’Connor, l-ogħla dinjità tal-Knisja Kattolika fl-Ingilterra, għadu kif bagħat ittra lill-Prim Ministru Tony Blair li fiha talbu biex l-aġenziji Kattoliċi li jaħdmu biex jiġu adottati tfal, ikunu meħlusin mil-liġi li ġġiegħelhom ma jiċħdux lill-koppji ta’ omosesswali li jadottaw tfal.

Il-Kardinal Cormac Murphy-O’Connor qal lill-Prim Ministru Blair li mhix ħaġa flokha u ġusta li l-Gvern jinsisti li biex l-aġenziji Kattoliċi jkomplu jaħdmu favur l-adozzjoni tat-tfal, ikollhom imorru kontra l-kuxjenza tagħhom u jiksru l-liġijiet tal-Knisja Kattolika dwar l-oġġezzjoni li koppji ta’ omosesswali jadottaw tfal.

Jekk l-aġenziji Kattoliċi ta’ l-adozzjoni tat-tfal ma jkunux eżenti mit-twettieq ta’ ‘The Equality Act’ fil-każ ta’ l-adozzjoni ta’ tfal minn koppji omosesswali, l-aġenziji Kattoliċi ma jkunux jistgħu jkomplu jagħtu dan is-servizz fejjiedi għat-tfal u għas-soċjetà. 

It-12-il aġenzija Kattolika tat-tfal flimkien imexxu madwar terz ta’ l-adozzjonijiet kollha li jsiru kull sena fl-Ingilterra u Wales.

L-Unjoni Ewropea mhix se tħalli lill-Gvern Ingliż jagħti din l-eżenzjoni lill-Kattoliċi Ingliżi. 

L-istess storja tista’ tiġri f’pajjiżna erbat ijiem oħrajn.

Il-Ħamis, 8 ta’ Frar, 2007.

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ