MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

Il-Ġimgħa l-oħra l-mexxejja tal-pajjiżi tal-Unjoni Ewropea (inkluż il-Prim Ministru Malti) qablu li lill-poplu Irlandiż jiżgurawh, qabel ma jerġa’ jagħmel referendum dwar it-Trattat ta’ Lisbona fil-ħarifa tas-sena d-dieħla, li l-Irlanda u kull pajjiż ta’ l-Unjoni ikollhom dejjem kummissarju u li t-Trattat ta’ Lisbona mhux se jdgħajjef in-newtralità ta’ l-Irlanda, mhux se jagħmel li t-taxxi jkunu l-istess fil-pajjiżi ta’ l-Unjoni u mhux se jġiegħel lill-Irlanda taċċetta l-abort.

L-Unjoni Ewropea tittama’ li dawn l-assikurazzjonijiet jegħlbu l-oppożizzjoni tal-poplu Irlandiż għat-Trattat ta’ Lisbona.

Iżda kull demokratiku veru fl-Unjoni Ewropea jittama’ li l-poplu Irlandiż jerġa’ jivvota kontra t-Trattat, ħalli l-politiċi, anki Maltin, jifhmu kemm kasbru l-prinċipju ewlieni tad-demokrazija meta huma ddeċidew li jċaħħdu lill-popli tal-Unjoni milli jivvotaw fuq it-tibdil li t-Trattat ta’ Lisbona se jagħmel lill-Unjoni.

Waħda mit-tibdiliet li t-Trattat ta’ Lisbona jagħmel hija dwar in-numru ta’ Kummissarji Ewropej.

It-Trattat jgħid li m’għandux kull pajjiż membru dejjem ikollu Kummissarju, bħal m’hemm illum, iżda pajjiż, kull għaxar snin, jagħmel ħames snin mingħajr Kummissarju, għaliex kull ħames snin terz mill-pajjiżi membri jitilfu l-Kummissarju tagħhom għal ħames snin.

Minkejja li t-Trattat jgħid dan, l-Unjoni Ewropea – biex tipprova tikseb il-vot tal-Irlandiżi favur it-Trattat – qablet li ma jsirx dak li jgħid it-Trattat u għalhekk kull pajjiż jibqa’ jkollu Kummissarju dejjem.

Bis-saħħa tal-poplu Irlandiż intrebaħ il-prinċipju li kull pajjiż ikollu dejjem Kummissarju Ewropew.

Il-Prim Ministru Gonzi ftaħar li issa Malta se jkollha dejjem Kummissarju.

Huwa jmissu staħa, mhux ftaħar, għax huwa kien aċċetta li Malta kull għaxar snin titlef il-Kummissarju tagħha għal ħames snin, meta huwa qabel li jiffirma t-Trattat ta’ Lisbona.

L-istess, il-Parlament Malti meta rratifika t-Trattat, qabel li Malta titlef l-Kummissarju tagħha għal ħames snin.

Kieku pajjiżna kellu mexxejja u parlamentari ta’ sinsla u li jħarsu l-interessi nazzjonali, pajjiżna wkoll bħall-Irlanda, ma kienx jivvota favur it-Trattat ta’ Lisbona jekk pajjiżna ma jkollux dejjem Kummissarju.

Kif l-Unjoni Ewropea kellha ċċedi dan il-punt lill-poplu Irlandiż, kien ikollha ċċedih ukoll lill-poplu Malti.

L-Unjoni Ewropea aċċettat ukoll li tiżgura lill-Irlanda dwar in-newtralità tagħha.

Malta wkoll hija pajjiż newtrali, iżda l-Gvern u l-Parlament Malti ma seħqux li l-Unjoni tiddikjara u tiżgura li tħares in-newtralità ta’ pajjiżna.

Dan huwa ta’ għajb kbir għall-Gvern u għall-Parlament tagħna.

Il-poplu m’għandux jittollerah.

L-idea li

* Għawdex isir awtonomu u

* joħroġ mill-Unjoni Ewropea

* qanqlet interess fost l-Għawdxin,

* li qegħdin jistaqsu x’jirbaħ Għawdex jekk jieħu dawk il-passi.

Il-mistoqsija hija f’waqtha u t-tweġiba għaliha għandha tikkonvinċi lill-Għawdxin bil-vantaġġi li jiksbu,

* billi Għawdex ma jkunx marbut li japplika bil-fors il-liġijijiet li jsiru f’Malta u

* lanqas li jkollu bil-fors jobdi d-direttivi u l-politika tal-Unjoni Ewropea.

Għawdex awtonomu u barra l-Unjoni Ewropea jkollu d-dritt li jagħżel jekk il-liġijiet li jsiru f’Malta jgħoddux għall-gżira u jekk il-gżira jaqblilhiex li timxi skond id-direttivi u l-politika tal-Unjoni Ewropea.

Fi kliem ieħor,

* Għawdex ikun ħieles li jiddeċiedi huwa x’liġijiet,

* x’direttivi u

* x’politika jkunu ta’ vantaġġ għall-Għawdxin u

* liema minnhom ma jgħoddux għalihom u

* għalhekk ma jkunux applikati minnhom.

L-Għawdxin

* ikollhom id-dritt tal-għażla u

* d-dritt li jagħmlu liġijiet u

* jimxu b’politika li huma jqisu l-aħjar għalihom,

* anki jekk il-liġijiet u

* l-politika li jagħżlu ma jkunux jaqblu mal-liġijiet u

* l-politika ta’ Malta u tal-EU.

B’Għawdex awtonomu u barra l-Unjoni Ewropea,

* l-Għawdxin ikunu jistgħu jbaxxu r-rati tat-taxxi kemm fuq id-dħul,

* kif ukoll tal-Vat, u

* b’hekk, barra li jgawdi l-poplu Għawdxi,

* dan il-pass ikun inċentiv qawwi ħalli l-barranin jinvestu u joperaw f’Għawdex,

* la darba il-piżijiet fiskali hemm ikunu eħfef minn dawk f’Malta u fil-pajjiżi l-oħra imseħbin fl-UE

Għawdex ikun jista’ iħabbatha ma’ dawk il-pajjiżi żgħar li huma barra l-Unjoni Ewropea,

* bħal Jersey,

* iċ-Channel Islands,

* Ġibiltà u

*  Gernsey,

* li huma magħrufa sew għall-flejjes kbar barranin li għandhom jew depożitati, jew investiti għandhom u għal numru kbir ta’ kumpaniji barranin li huma rreġistrati magħhom.

Jista’ wieħed jimmaġina xenarju aħjar minn dak,

* jekk Għawdex isir “duty free” u

* jkun ċ-ċentru “duty free” tal-Mediterran,

* li żgur jiġbed lejh kummerċ kbir,

* bħal m’huma ċ-ċentri “duty free” kollha li hawn madwar id-dinja.

* Il-volum tal-kummerċ,

* l-ammont kbir ta’ barranin u

* l-attività ekonomika kollha li tinħoloq b’ pass bħal dan,

* jissarrfu f’ħafna postijiet tax-xogħol u

* opportunitajiet ta’ impjiegi għaż-żgħażagħ Għawdex.

Iżda Għawdex ma jista’ jagħmel xejn minn dan

* sakemm ma jkunx awtonomu minn Malta u

* barra mill-Unjoni Ewropea.

Jekk Għawdex jikseb l-awtonomija u l-ħelsien, xorta waħda jkun jista’ jżomm ir-rabtiet li jrid ma’ Malta u ma’ l-Unjoni Ewropea.

Ikunu iżda rabtiet li jgħinu lil Għawdex jimxi ’l quddiem u mhux jibqa’ fil-periferija tal-Ewropea u mxekkel bid-direttivi u l-politika tal-Unjoni.

Meta l-kotra tal-poplu hija mgħaddba għax il-Gvern Malti u l-Unjoni Ewropea (UE) ma jridux jieħdu l-passi meħtieġa biex titwaqqaf l-invażjoni ta’ pajjiżna mill-immigranti illegali, tħabbar li l-UE se tagħti lil Malta €112 miljun fil-ħames snin li ġejjin, biex inkunu nistgħu nikkontrollaw aħjar il-fruntieri tal-Unjoni.

Il-Gvern Malti, biex ikompli jinganna lill-poplu, qal li dawn il-fondi se jingħataw mill-UE biex niġġieldu l-immigrazzjoni illegali.

Mentri mhux se nwaqqfu l-immigrazzjoni.

Anzi, parti mill-fondi se jintużaw biex inaqqsu iktar il-perikli ta’ għarqa lill-immigranti li jkunu qegħdin ibaħħru, u għalhekk dan il-fatt se jkun ta’ iktar inkoraġġament, u mhux ta’ skoraġġament, biex l-immigranti jissugraw ibaħħru mix-xtut tal-Afrika għal Malta u Sqallija.

Jekk wieħed jifli għal-liema skopijiet se jingħataw il-€112 miljun mill-UE, isib li dawn se jingħataw biex jinxtraw erba’ ‘patrol boats’ ġodda, jinxtraw laneċ għall-pulizija, tagħmir ġdid għall-militar u għall-pulizija, u biex jiġu modernizzati l-mezzi tal-komunikazzjoni u tas-sorveljanza, u biex jittejbu l-faċilitajiet li għandna f’pajjiżi barranin għall-għoti tal-visa.

Wieħed jista’ jinduna, ebda wieħed minn dawn l-iskopijiet m’hu se jgħin biex iwaqqaf lill-immigranti illegali milli jiġu f’pajjiżna.

Jekk inqisu x-xiri tal-‘patrol boats’ ġodda, għandna nsibu li dawn se jkunu mezz aħjar milli jeżisti llum biex l-immigranti illegali jinġabru min-nofs il-baħar u jinġiebu Malta, la darba r-rondi tal-‘patrol boats’ ma jreġġgħux lura l-immigranti lejn ix-xtut minn fejn ikunu telqu.

Jiġifieri, is-suldati Maltin se jkollhom mezzi aktar moderni biex isalvaw lill-immigranti, u biex iwassluhom f’pajjiżna.

Ebda ewro mill-€112 miljun mhu se jingħata biex nilqgħu għall-invażjoni tal-immigranti illegali.

Kif lanqas ebda ewro mill-istess somma m’hu se jingħata biex intejbu l-qagħda taċ-ċentri fejn l-immigranti jinżammu, jew biex intejbu s-servizzi li qegħdin nipprovdulhom.

Dawn il-fondi mhux se jingħataw biex nibbenefikaw minnhom aħna, imma se jingħataw biss biex l-UE ssaħħaħ il-kontroll fuq kull min jidħol f’pajjiżna, bħala pajjiż li jagħmel parti mill-UE.

Dawn il-fondi se jgħinu lill-Gvern Malti biex ikun jaf aħjar x’immigranti illegali se jidħlu f’pajjiżna, u biex l-UE jkollha mezzi aktar effettivi ħalli l-immigranti illegali li jiġu f’pajjiżna ma jitħallewx imorru fil-pajjiżi l-oħrajn tal-UE.

B’dawn il-fondi l-UE qiegħda tħares aktar is-sigurtà tagħha u mhux qiegħda tgħin lil pajjiżna.

B’danakollu, il-Gvern Malti qiegħed jiftaħar bl-għoti ta’ dawn il-fondi, u qiegħed jipprova jinganna lill-poplu billi jagħtih x’jifhem li l-pajjiż se jiġġieled l-immigrazzjoni illegali.

Jekk verament irridu niġġieldu l-immigrazzjoni illegali, irridu niddeċiedu li ma nħalluhomx joqogħdu f’pajjiżna taħt ebda skuża, u li nreġġgħuhom lura lejn pajjiżhom, minkejja li l-UE tgħidilna nagħmlu mod ieħor.

Lill-pajjiżi minn fejn jiġu l-immigranti, għandna ngħinuhom milli nistgħu, u lill-UE li trid li x’uħud mill-pajjiżi tagħha jdaħħlu immigranti, għandna nisħqu magħha li għandha torganizza skemi ta’ immigrazzjoni regolari billi talloka l-fondi għal dak l-iskop.

Fiż-żmien meta gvernijiet oħrajn qegħdin joħorġu l-miljuni biex jgħinu l-intrapriżi ma jnaqqsux mill-ħaddiema tagħhom, il-Gvern Malti qiegħed joħroġ il-miljuni (madwar €56 miljun euro) biex itemm l-impjieg ta’ 1,700 ħaddiema ta’ l-eqdem intrapriżi fil-pajjiż – it-Tarzna.

Qatt daqs iż-żminijiet tal-lum il-Gvern Malti kien imissu jgħin kemm hemm bżonn ħalli jsalva kull impjieg li jeżisti, u mhux jeqred 1,700 impjieg, kif qiegħed jagħmel bl-iskuża tal-privatizzazjoni tat-Tarzna.

Dan l-aġir irresponsabbli tal-Gvern huwa delitt kontra l-interessi nazzjonali, u m’ għandux jinħafer mill-poplu Malti, speċjalment mill-klassi tal-ħaddiema.

Il-fatt li l-Unjoni Ewropea trid li sseħħ din l-istraġi nazzjonali mill-aqwa ħaddiema tas-sengħa fil-pajjiż, ma jiskrunġax lill-Gvern Malti, fil-waqt li jkompli juri kemm l-Unjoni ma tħarisx l-interessi veri tal-poplu tagħna.

Il-Ħamis, 8 ta’ Jannar, 2009

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ