MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LID-DEPUTAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

Ahna dejjem sostnejna li l-politika soċjali ta' l-Unjoni Ewropea hija ta' theddida serja għall-valuri tal-familja Maltija. 

Dejjem tkażajna kif dan l-aspett fondamentali negattiv għall-aħħar ta' l-Unjoni ngħata l-ġenb għall-konsiderazzjonijiet politiċi partiġġjani meta l-poplu ntalab fl-2003 jivvota jaqbilx mas-sħubija ta' pajjiżna fl-Unjoni. 

Naqsu minn dmirhom li jgħidu lill-poplu li s-sħubija fl-Unjoni kienet se timmina f'pajjiżna il-valuri tal-familja, kif seħħ f'kull pajjiż li ssieħeb fl-Unjoni.

Issa l-Isqfijiet Ewropej (mhux il-Maltin u l-Għawdxin), donnhom stenbħu u ħarġu qatta' bla ħabel kontra l-Unjoni Ewropea, b'rapport bit-titlu "Proposal for a strategy of the European Union for the Support of Couples and Marriage".

Huma xlew lill-Unjoni li bil-politika tagħha qiegħda tinjora għal kollox l-importanza taż-żwieġ fl-oqsma ta' l-impjiegi, tal-ħarsien soċjali u tat-tnaqqis tal-faqar. 

Huma kkundannawha wkoll li minflok tappoġġja, qiegħda tiddiskrimina kontra ġenituri li ma joħorġux jaħdmu biex jieħdu ħsieb it-trobbija ta' wliedhom.

Għax l-Unjoni Ewropea sfaċċatament tqis lill-ommijiet li ma jmorrux jaħdmu biex irabbu lil uliedhom, bħala riżors uman fil-qasam tax-xogħol moħli jew mhux utilizzat, u għalhekk hija ssus biex il-pajjiżi membri jkabbru l-‘participation rate’ ta' l-ommijiet ta' l-ulied, għandha anqas importanza mill-kontribuzzjoni ta' l-ommijiet għall-ekonomija tal-pajjiż.

L-Isqfijiet Ewropej ikkritikaw bl-aħrax il-proposta ta' l-Unjoni Ewropea biex il-pajjiżi membri jagħrfu bħala rabta ċivili li żewġ persuni jgħixu flimkien (‘de facto union’), u jagħtu għarfien legali ftehim ta' sħab bejn żewġ persuni (‘registered partnership’). 

Huma jisħqu li dawn il-proposti ta' l-Unjoni, li jridu jwasslu biex l-istati membri li għadhom ma jirrikonoxxux bil-liġi dawn ir-rabtiet, jaċċettawhom, idgħajfu b'mod perikoluż l-importanza taż-żwieġ.

L-Isqfijiet oġġezzjonaw li l-Unjoni Ewropea tindaħal fid-dritt ta' kull pajjiż sovran li jirregola huwa ż-żwieġ, skond il-liġijiet nazzjonali tiegħu, għax meta l-Unjoni tgħid lill-pajjiż x'għandu jagħmel f'dan il-qasam tant fundamentali għall-ħajja soċjali tal-poplu, hija tkun qiegħda tmur lil hinn mill-mandat tagħha.

Mhix kwistjoni jekk l-Unjoni Ewropea hux se tagħti każ x'qalu l-Isqfijiet, u jekk hux se tissokta bil-politika tagħha ta' ħsara għall-familja. 

Il-kwistjoni hija jekk l-Insara Ewropej (inklużi l-Maltin u l-Għawdxin) jagħtux widen għat-twissijiet ta' l-Isqfijiet fuq il-familja, jew humiex se jkunu servili għall-Unjoni, akkost li din teqred il-familja. 

Fil-fehma tagħna, il-familja Maltija tista' ssalva biss jekk pajjiżna ma jibqax iħaddan il-politika ta' l-Unjoni Ewropea.

Żerniq ġdid għal Malta indipendenti u ħielsa

Ix-xahar id-dieħel nagħlqu ħames snin minn meta maġġoranza żgħira ta’ dawk li vvotaw fir-referendum qalet li taqbel mal-ftehim tas-sħubija ta' pajjiżna fl-Unjoni Ewropea. 

Aħna qatt ma waqafna nsostnu li l-votazzjoni la kienet 'fair' u lanqas demokratika, minħabba l-miljuni kbar li ntefqu mill-Unjoni Ewropea fil-propaganda favur is-sħubija, b'kuntrast mal-mezzi żgħar li ngħataw dawk li ma kinux jaqblu mas-sħubija.

Ma setax jonqos li l-iżbilanċ fil-mezzi tal-propaganda influwenzaw il-votanti u ma ħallewhomx f'qagħda ħielsa li jiżnu tajjeb kienx jaqbel jew le li pajjiżna jissieħeb fl-Unjoni. 

Għalhekk dejjem sostnejna u se nkomplu nsostnu, li dik id-deċiżjoni kienet ivvizzjata, u li anke fuq hekk biss, għandha titwarrab.

Iżda anke kieku l-votazzjoni ta' l-2003 favur is-sħubija fl-Unjoni ma kinitx ivvizzjata, xorta waħda d-demokrazija tgħidlek li dik id-deċiżjoni tista' tinbidel f'kull mument b'votazzjoni popolari oħra. 

Meta l-maġġoranza tal-Maltin u l-Għawdxin iridu, għandhom ikollhom il-mezz li jivvotaw ħalli titħassar id-deċiżjoni favur is-sħubija ta’ pajjiżna fl-Unjoni Ewropea.

Dan id-dritt demokratiku issa għandu l-għarfien uffiċjali tal-Parlament Malti li vvota favur ir-ratifika tat-Trattat ta’ Lisbona, li fl-Artikolu 49 tiegħu jipprovdi għall-ħruġ ta' stat membru mill-Unjoni. 

Għalhekk issa ħadd ma għandu jkompli jqarraq bil-poplu billi jgħidlu li s-sħubija ta' pajjiżna fl-Unjoni huwa pass irriversibbli u impossibbli.

Ladarba huwa possibbli li pajjiżna joħroġ mill-Unjoni Ewropea, għandna dritt patrijottiku, aħna tal-Kampanja Ħelsien Nazzjonali (CNI), li naħdmu ħalli jkun hemm maġġoranza li taqbel li pajjiżna ma jibqax imsieħeb fl-Unjoni u ma jibqax jitmexxa minnha bħal kolonja, iżda jerġa' jitmexxa skond ir-rieda tal-maġġoranza tal-Maltin u Għawdxin, kif imfissra demokratikament fl-elezzjonijiet ġenerali.

Il-kwistjoni mhix jekk għandniex dritt noħorġu mill-Unjoni Ewropea, imma jekk għandniex nagħmlu dan fl-interess ġenerali tal-poplu Malti. 

Aħna tal-Kampanja Ħelsien Nazzjonali (CNI) nilqgħu din l-isfida li nipprovaw li jkun ta' ġid għall-poplu Malti li ma jibqax marbut bir-regoli ta' l-Unjoni u ma jkollux bilfors iħaddem il-politika ta' l-Unjoni li hija ta' ħsara għal pajjiżna.

* Finanzjarjament, 

* ekonomikament, 

* soċjalment u 

* politikament 

* jaqblilna li noħorġu mill-Unjoni Ewropea. 

Finanzjarjament jaqblilna għax aktar qegħdin inħallsu u nagħmlu spejjeż, milli nirċievu fondi minħabba s-sħubija fl-Unjoni. 

Ekonomikament jaqblilna għax nistgħu aktar nattiraw u nżommu fabbriki f'pajjiżna jekk ma nkunux marbutin bir-regolamenti u mgħobbijin bil-piżijiet ta' l-Unjoni Ewropea. 

Soċjalment jaqblilna għax ma jkollniex bilfors nimxu b'politika anti-soċjali ta' l-Unjoni u nkunu nistgħu nsaħħu, mhux inħottu, s-servizzi soċjali tagħna. 

Politikament jaqblilna li nkunu indipendenti mill-Unjoni Ewropea ħalli ma nkunux marbutin bil-politika barranija komuni ta' l-Unjoni u ma nkunux qegħdin imsieħbin f'politika ta' difiża komuni li l-Unjoni qiegħda tfassal.

U fuq kollox jaqblilna politikament għax, ħielsa mill-ħakma ta' l-Unjoni, il-poplu Malti u Għawdxi jkun jista' jerġa' kull ħames snin jiddeċiedi b'liema politika finanzjarja, ekonomika, politika u soċjali jrid li jitmexxa, skond ir-rieda tal-maġġoranza espressa demokratikament f'pajjiżna.

B'hekk il-poplu jerġa' jsir sovran, indipendenti u ħieles u mhux aktar kolonja tal-barrani, kif ġralna bis-sħubija fl-Unjoni Ewropea. 

Għal dak iż-żerniq aħna tal-Kampanja Ħelsien Nazzjonali (CNI) se nissoktaw naħdmu.

Nixtiequ nkunu nafu x'għadda minn moħħ dawk il-ftit qassisin politikanti li kienu jiktbu fil-ġurnali qabel ir-Referendum biex iħeġġu lill-fidili Maltin u Għawdxin jivvotaw iva, ħalli aħna l-Maltin inkunu "nistgħu nesportaw il-fidi u l-valuri Insara tagħna lejn l-Ewropa", meta qraw l-aħbar f'dawn l-aħħar ġranet li l-Qorti Ewropea għad-Drittijiet tal-Bniedem qatgħetha li koppji 'gay' (omosesswali) għandhom ikollhom id-dritt li jaddottaw it-tfal.

Billi Malta hija firmatarja tal-Konvenzjoni Ewropea tad-Drittijiet tal-Bniedem, id-deċiżjoni tal-Qorti Ewropea trid tiġi wkoll applikata minn Malta.

Punt importanti li joħroġ minn din id-deċiżjoni hu x'jiġri jekk din l-istess Qorti għad tiddeċiedi – jekk mhux diġà ddeċidiet – li anke l-abort hu dritt fundamentali tal-bniedem, jew f'dan il-każ, tal-mara.

X'siwi jkollha d-deroga li ngħatat lil Malta mill-Kummissjoni Ewropea, li Malta tista' tibqa' żżomm il-leġislazzjoni li għandha li tipprojbixxi kull tip ta' abort?

Se tkun tista' Malta tgħid lill-Qorti tad-Drittijiet tal-Bniedem li għandna deroga dwar l-abort u għalhekk m'aħniex marbutin b'xi deċiżjoni li tieħu l-Qorti Ewropea tad-Drittijiet tal-Bniedem, meta din il-Qorti hija indipendenti u m'għandhiex x'taqsam ma' l-UE, u għalhekk ma tiddependix minn xi deċiżjoni tal-Qorti tal-Ġustizzja ta' l-UE għad-deċiżjonijiet tagħha?

Min jaf għadx nisimgħu l-awtoritajiet Ekkleżjastiċi jitkellmu ċar u tond dwar din id-deċiżjoni u l-konsegwenzi tagħha anke fejn jidħol l-abort, speċjalment meta nafu li l-istess Unjoni Ewropea ilha taċċetta mhux biss l-addozzjoni tat-tfal minn koppji omosesswali, iżda anke żwiġijiet ta' koppji omosesswali!

Aktar u aktar aħna ħerqanin x'se jiktbu dawk il-qassisin jew reliġjużi li kienu kitbu fil-paġna tagħhom f'The Sunday Times qabel ir-Referendum: "Even God wants us to join the EU" (anke Alla jridna nidħlu fl-UE).

IRRIDU L'INDIPENDENZA MILL-UNJONI EWROPEA

Il-Ħamis, 7 ta' Frar, 2008.

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ