MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

Il-kliem tal-Ambaxxatur Amerikan kontra n-newtralità ta’ Malta qanqal reazzjoni fost il-pubbliku u ma naqsux l-ittri u l-artikli fil-ġurnali dwaru.

Filwaqt li meta xhur ilu kienet tqanqlet il-kwistjoni tan-newtralità, kellna kelliema mill-partiti politiċi li fissru l-fehmiet tagħhom dwarha, din id-darba l-partiti politiċi ma tniffsux, ħlief li ngħad b’mod ġeneriku li għandna nimmodernizzaw il-Kostituzzjoni ta’ Malta.

Il-fatt li l-Ambaxxatur Amerikan wera ruħu pubblikament li ma jaqbilx li pajjiżna jkun newtrali u l-fatt li l-politiċi tagħna ma jirreaġġixxux għal kliemu, jagħti lok għal tħassib serju li qiegħda ssir pressjoni minn barra fuq pajjiżna biex ma jibqax newtrali u li l-politiċi tagħna jidhru li lesti jċedu biex isir it-tibdil meħtieġ fil-Kostituzzjoni tagħna.

Dawn iż-żewġ fatti jmisshom iqanqlu l-istmerrija u l-oppożizzjoni tal-poplu tagħna.

Għax fl-ewwel lok, l-Ambaxxatur Amerikan ma kellux jgħid dak li qal dwar in-newtralità ta’ pajjiżna.

Hu mhux biss ikkritika aspett importanti tal-politika barranija ta’ pajjiżna,

* iżda ħadha kontra l-Kostituzzjoni ta’ Malta      

* li tgħid li pajjiżna huwa stat newtrali                  

* li jaħdem attivament għall-paċi,                         

* is-sigurtà u l-progress soċjali fost il-ġnus,         

* billi jħaddan politika ta’ non-allineament           

* u jirrifjuta li jieħu sehem f’kull alleanza militari.

Żgur li l-Gvern Amerikan mhux se jippermetti li l-Ambaxxatur ta’ Malta fl-Istati Uniti jikkritika pubblikament l-politika barranija Amerikana u jitkellem kontra xi parti mill-Kostituzzjoni Amerikana.

Tqum għalhekk il-mistoqsija jekk l-Ambaxxatur qalx li qal minn jeddu jew inkella kienx imqabbad mill-Gvern tiegħu biex jgħidu?

Jekk kien imqabbad, wieħed għandu jistenna li dan huwa l-bidu ta’ proċess li hu maħsub li jwassal lil pajjiżna biex ma jibqax newtrali.

U s-skiet u n-nuqqas ta’ reazzjoni mill-politiċi tagħna għandhom jingħataw it-tifsira li huma parti minn dan il-proċess.

Fi kliem ieħor, il-politiċi tagħna se jċedu għall-pressjoni biex jarmu n-newtralità ta’ pajjiżna.

Għax li kieku l-politiċi tagħna ma humiex lesti li jarmu n-newtralità tagħna, konna nistennewhom li jqumu fil-pront jipprotestaw bil-qawwa għad-diskors tal-Ambaxxatur Amerikan u jsejħu lill-poplu ħalli niddefendu l-politika tan-newtralità u l-Kostituzzjoni ta’ pajjiżna.

Dan l-attakk fuq il-politika barranija tan-newtralità ta’ pajjiżna qiegħed jaħbat fi żmien meta l-Unjoni Ewropea qiegħda tieħu passi konkreti ħalli tagħti ħajja lill-politika barranija tagħha.

L-Unjoni għadha kif ħatret lill-Ingliża Lady Ashton bħala l-kelliema tal-UE dwar il-politika barranija komuni tagħha.

Qed jitħejja wkoll il-grupp ta’ eluf ta’ uffiċjali li se jservu fil-qasam tal-affarijiet barranin tal-UE taħt l-istess Lady Ashton.

U l-UE biħsbieha tfassal il-politika barranija komuni tagħha li tkun il-politika uffiċjali barranija tal-pajjiżi kollha membri.

Għalhekk l-Unjoni trid li l-politika barranija komuni tagħha tkun ukoll il-politika barranija uffiċjali ta’ Malta.

Ladarba l-Unjoni Ewropea trid li

* Malta timxi skont il-politika barranija komuni Ewropea,

* l-UE ma tistax tkompli taċċetta

* li Malta timxi b’politika barranija differenti ta’ newtralità

* skont mhi mfissra fil-Kostituzzjoni ta’ Malta,

* ladarba l-politika barranija tal-Unjoni

* mhix politika ta’ newtralità

* li ma tħallix li pajjiż jieħu sehem f’alleanza militari.

Għaldaqstant nistennew li l-UE tagħmel pressjoni ħalli l-Kostituzzjoni ta’ Malta tinbidel billi jitneħħa l-obbligu li l-pajjiż iħares in-newtralità kif tgħid il-Kostituzzjoni Maltija.

L-attakki li qegħdin isiru kontra n-newtralità ta’ Malta huma parti minn dan l-eżerċizzju moħbi li l-UE trid li jsir mingħajr ma tikxef idejha.

L-UE taf li f’pajjiżna se ssib min hu lest li jaqdiha!

Nifhmu li l-politiċi ma jsibuhiex ħaġa faċli li jfehmu lill-poplu li jridu li Malta ma tibqax newtrali.

Huma se jfittxu li jressqu ħafna raġunijiet u jġibu ħafna skużi biex jipprovaw jiġġustifikaw it-tibdil fil-Kostituzzjoni.

Iżda r-raġuni vera tkun li l-Unjoni Ewropea u l-Istati Uniti jridu li Malta ma tibqax newtrali.

F’din il-kwistjoni għandna nistaqsu:

l-UE u l-Istati Uniti jridu li Malta ma tibqax newtrali u li tidħol f’alleanza militari magħhom, fl-interess ta’ Malta jew fl-interess tagħhom?

It-tweġiba hi ovvja:

Dawn iridu li dan iseħħ fl-interess tagħhom, mhux għal wiċċna.

Iżda aħna, l-ewwel interessi tagħna huma li niżguraw bl-aħjar mezzi l-ħarsien, is-sigurtà u s-sliem tal-Maltin u l-Għawdxin.

U l-aħjar mezz biex niżguraw dan mhux li nieħdu sehem fl-alleanza militari tal-UE jew tal-Istati Uniti, iżda li ma nkunu meqjusin għedewwa minn ħadd li huwa kontra l-Ewropa u l-Istati Uniti.

Għax newtrali ma jkonna għadu lil ħadd!

Jiena kont wieħed minn tal-ewwel li lqajt il-ħsieb u l-politika li Malta ssir membru tal-Unjoni Ewropea u vvotajt “Iva” fir-referendum, fost raġunijiet oħrajn, għax kont nemmen li l-UE kienet se twaqqaf lill-immigranti illegali milli jidħlu.

Iżda llum li sseħibna fl-Unjoni

* qegħdin isoddulna ħalqna

* billi jagħtuna l-flus biex nagħmlu dan,

* spiċċajna biex intlejna bihom,

* ma nistgħux ngħidu li aħna ma rridux inżommuhom,

* qegħdin iġiegħluna nagħtuhom l-istess dritijiet bħall-Maltin,

* jekk mhux nippreferuhom,

* u jekk ma nagħmlux hekk jgħajruna “razzisti”.

Wasalna biex xi sidien,

* bejn Malti u immigrant,

* jagħżlu li jimpjegaw lill-barrani.

Tant hu hekk

* li f’lukanda popolari lokali

* hemm immigrant Chief Security Officer

* u kemm il-management tal-lukanda

* kif ukoll il-Prim Ministru

* jidhru kuntenti b’dan,

* għax iħalluh isir.

L-istess preferenzi mal-immigranti qegħdin isiru anki f’xi programmi televiżivi fejn irebbħu kompetizjonijiet lill-immigranti biex ma jingħadx li aħna razzisti.

Meta tħabbar li twaqqfet il-forza marittima Frontex, jiena kont ħadt pjaċir għax għedt li kienet se twaqqaf lill-immigranti illegali milli jkomplu jitilqu pajjiżhom għall-Ewropa.

Iżda llum nara li din kienet ‘gimmick’ oħra tal-UE u sfortunatament waqajna għaliha.

Ġara li wara ftit xhur li bdiet tiffunzjona, il-Frntex żviluppat f’forza ta’ salvataġġ u bidet tintuża biex issalva lill-immigranti illegali li jsibu ruħhom f’diffikulatjiet.

B’hekk l-iskop tal-Frontex spiċċa għal kollox u saret forza kontra l-iskop li għalih twaqqfet.

Dan huwa falliment ieħor tal-UE fil-problema tal-immigranti illegali.

‘Gimmick’ oħra tal-UE kienet il-‘burden sharing’, li l-Gvern qiegħed jinqeda biha biex jipprova jsalva wiċċu għall-fjask politiku dwar l-immigrazzjoni.

Il-Gvern qed jgħaddas rasu u l-ewwel jilqa’ f’pajjiżna lill-immigranti illegali u wara jipprova jibgħathom f’pajjiżi oħrajn fl-Ewropa u fl-Istati Uniti ta’ l-Amerika.

Il-Gvern jittama li jbellagħha lill-poplu li din hija l-unika soluzzjoni għal din il-problema.

Iżda soluzzjoni tajba hi li l-immigranti illegali tilqagħhom hawn bil-patt li mill-aktar fis u fl-iqsar żmien possibbli tirripatrijahom jew tibgħathom lura minn fejn ikunu ġew.

B’hekk fi ftit ġimgħat issolvi l-kwistjoni kollha.

Il-Gvern imissu jaf li l-poplu Malti ma jridx li jkollu eluf ta’ immigranti illegali jiġġerrew it-toroq tiegħu.

Hawn kwistjoni oħra li qegħda tinkwieta ħafna lill-poplu u din hija l-kwistjoni dwar il-kurċifissi.

Din il-kwistjoni qalgħetha persuna barranija fl-Italja u għalhekk hija eżempju ta’ ndħil barrani.

L-istess jistgħu jagħmlu l-immigranti illegali li jibdew jindaħlulna wara li jkunu waddbu l-“ankri” hawn.

Meta jfettlilhom jistgħu jippruvaw jimponu fuqna dak li jkunu jridu huma.

Hawn ta’ min jistaqsi lill-Gvern Malti u lill-membri Maltin fil-Parlament Ewropew x’kien jiġrilna kieku aħna l-Maltin kellna mmorru fil-pajjiżi tal-immigranti illegali u nibdew ngħidulhom biex dak l-oġġett ma jkomplux jagħmluh jew dik il-ħaġa l-oħra jneħħuha għax ma togħġobniex?

Jiena ċert li kieku kellna nagħmlu dan, konna nistiednu li jagħtuna l-forka u mhux iħalluna nagħmlulhom kawża fil-Qorti Ewropea li ddeċidiet li fl-Ewropa l-kurċifissi għandhom jitneħħew mill-klassijiet (filwaqt li l-Parlament Ewropew qal li jitneħħew minn postijiet pubbliċi).

Dwar din il-kwistjoni ta’ min jgħid “prosit” lill-Gvern tal-Polonja li wera kemm huwa sod u tal-affari tiegħu, meta qal li “tiddeċiedi x’tiddeċiedi l-Qorti, il-kurċifiss mhux se jitneħħa!”.

Min-naħa tiegħi nibża

* li din tal-kurċifiss hija preludju

* ta’ x’nistennew li jista’ jiġri fil-ġejjieni,

* bħalma hu t-tneħħija tas-slaleb min fuq il-knejjes,

* l-istatwi reliġjużi minn mal-ħitan,

* il-Bambini u l-presepji fi żmien il-Milied,

* iwaqqfuna milli noħorġu l-vari fil-Ġimgħa l-Kbira

* u l-qaddisin fil-festi rispettivi,

* ma jħalluniex noħorġu l-purċissjonijiet fil-festi liturġiċi,

* bħall-Ġimgħa l-Kbira,

* il-Milied u oħrajn,

* u imbagħad iduru għall-midja

* u ma jħallux lill-istazzjonijiet televiżivi

* u l-gazzetti

* juru manifestazzjonijiet reliġjużi

* u dan kollu bl-iskuża

* biex ma noffendux is-sentimnti reliġjużi

* ta’ min huwa kontra dawn il-ħwejjeġ.

Lil dawk li jidrilhom li qed nesaġera, ngħidilhom li ħafna drabi affarijiet jibdew żgħar, imbagħad jikbru u jkunu diffiċli li twaqqafhom.

Kien hawn aktar minn mexxej wieħed li beda tajjeb u spiċċa biex sar dittatur u l-poplu tiegħu ma setgħax jiċċaqlaq fil-morsa li kien marbut.

Inħoss li hemm bżonn li ngħidu lill-Prim Ministru      

* u lill-Membri Parlamentari Ewropew Maltin          

* li għandhom jagħmluha ċara lill-Unjoni Ewropea li,

* tgħid x’tgħid hi,                                                         

* aħna l-Maltin u l-Għawdxin                                      

* mhux se nneħħu l-kurċifiss                                       

* u li l-flus mhux se jagħmlu bina.                               

Il-Ħamis, 7 ta’ Jannar, 2010

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

60A, Triq id-Dejqa,

Valletta

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ