MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

  Jaqblilna noħorġu mill-Unjoni Ewropea

Spiss qegħdin nisimgħu nies li vvotaw favur li Malta tissieħeb fl-Unjoni Ewropea jilmentaw li bellgħuhielhom għax qalulhom it-tajjeb ta’ l-Unjoni bla ma ħadd fissrilhom il-ħafna ħażin tagħha.

Dawn m’humiex biss ħaddiema u impjegati li jew tilfu l-impjieg b’riżultat tas-sħubija ta’ pajjiżna fl-Unjoni, jew huma mhedda li jitilfu xogħolhom, jew kellhom tnaqqis fil-kundizzjonijiet tax-xogħol tagħhom.

Dawn l-ilmenti nisimgħuhom ukoll mingħand imprendituri, mingħand nies tan-negozju u tal-ħwienet, mingħand nies li jaħdmu għal rashom, u mingħand nisa tad-dar.

Dawn in-nies kollha huma ddispjaċuti għax qegħdin isibu kemm fl-Unjoni Ewropea hemm ħwejjeġ li mhux biss m’humiex tajbin għalina, iżda li saħansitra qegħdin jagħmlu ħsara kbira lil pajjiżna.

Lil dawn aħna niżgurawhom li nistgħu nikkoreġu l-iżball li sar meta l-maġġoranza vvotat favur is-sħubija fl-Unjoni.

Nikkoreġuh l-iżball, billi nifformaw maġġoranza li trid toħroġ lil Malta mill-Unjoni Ewropea u trid li nagħmlu ftehim ieħor ta’ sħubija ma’ pajjiżi ta’ l-Unjoni.

Infakkruhom f’dak li jingħad li huwa uman li wieħed jiżbalja, iżda wieħed ikun imxajtan li jibqa’ fl-iżball.

Jekk il-maġġoranza kellha s-setgħa ddaħħalna fl-Unjoni Ewropea, il-maġġoranza għandha s-saħħa toħroġna minnha.

La qegħdin nifhmu li l-politika ta’ l-Unjoni ma tgħoddx għalina, inkunu ġwejjef jekk nibqgħu nħaddnu dik il-politika.

Fl-interess tal-poplu

Mhux fl-interess tal-poplu Malti li ngħidu li la darba dħalna fl-Unjoni Ewropea, m’għandniex naħdmu biex noħorġu minnha minkejja l-ħsara li qiegħda tagħmlilna u ħsara akbar li se tagħmlilna fil-futur.

M’għandniex inħallu l-interessi tal-ftit li se jgawdu ħafna mill-Unjoni, jegħlbu l-interessi tal-kotra tal-poplu li se tbati minħabba s-sħubija fl-Unjoni.

Mhux fl-interess tal-poplu tagħna li jitmexxa skond ma jaqtgħu l-barranin ta’ l-Unjoni u mhux skond ma l-poplu jiddeċiedi fl-elezzjonijiet ġenerali tal-pajjiż.

Imseħbin fl-Unjoni, m’għadniex aktar nikkmandaw f’darna.

Huma ta’ l-Unjoni li jikkmandawna x’nagħmlu u x’ma nagħmlux.

Il-Prim Ministru u l-Ministri tagħna jkollhom jimxu skond ma tridhom l-Unjoni, għalkemm ipinġu li qegħdin imexxu skond ma jiddeċiedu huma.

Bħall-marjonetti li jiċċaqilqu skond kif jiġbdulhom l-ispaga.

Minflok tmexxija vera, għandna “puppet show” imħaddma minn Brussels.

Tragedja tal-biki

Iżda din il-“puppet show” mhix kummiedja tad-daħk. 

Hija traġedja tal-biki. 

Għax il-poplu mhux qiegħed jintebah li n-nazzjon li b’tant sagrifiċċji bnejna, qiegħed jinħatt biċċa biċċa, u li ruħu wkoll qiegħda tinbiegħ lill-barrani.

Poplu bla ruħ mhux nazzjon.

Nazzjon li jitmexxa mill-barrani, mhux ħieles.

Mingħajr ħelsien mill-barranin, m’aħniex indipendenti.

Bis-sħubija fl-Unjoni, tlifna l-indipendenza u l-ħelsien tagħna, u ħwejjiġna tlaqnihom f’idejn il-barranin.

Sirna nazzjon meta l-mexxejja taghna fatmuna mill-ħalib tal-barranin u għallmuna ngħixu bix-xogħol ta’ dirgħajna u moħħna.

Issa reġgħu newlulna ż-żejża tal-barranin u ħafna qegħdin jissaraw min jaħtaf l-aktar minnha minflok jaħdmu bħal ma ħdimna fl-imgħoddi biex artna tkun tista’ titma’ l-uliedha kollha.

Il-ftit li għandhom biex jixbgħu, qegħdin jagħmlu minn kollox bil-mezzi tal-midja biex jistordu lill-kotra u jġagħluha taħseb li ma hemmx triq aħjar minn dik tas-sħubija fl-Unjoni Ewropea biex ikollna ħajja aħjar.

Erġajna għall-istorja ta’ l-iskjavi li kienu jħossuhom aktar kuntenti meta s-sidien kienu jiżgurawlhom l-għejxien tagħhom, milli meta nħelsu iżda kellhom jiżguraw ħobżhom bl-inizjattiva tagħhom.

Sakemm huma fehmu li ġieħhom bħala bnedmin ħielsa kien aqwa mill-istonku mimli iżda r-rieda mhux tagħhom.

Rajna mhux f’idejna

Għandna bżonn infehmu lill-poplu tagħna

* li sakemm nibqgħu fl-Unjoni Ewropea,

* ma nistgħux inbiddlu l-politika ekonomika

* permezz ta’ votazzjoni demokratika f’elezzjoni ġenerali,

* m’għandniex saħħa nfasslu politika kummerċjali

* li tkun ta’ ġid għalina,

* u lanqas għandna s-setgħa li nħaddmu politika fiskali

* li ma tkunx kif l-Unjoni tridha.

Dawn il-ħwejjeġ importanti ħafna barra oħrajn, saru issa bis-sħubija ta’ pajjiżna fl-Unjoni, “reserved matters” għall-Unjoni.

Nistgħu ngħidu li ma għadniex nikkmandaw f’darna, jew aħjar, minn dak li baqa’ minn darna.

L-akbar bank li kellna, ħaduh il-barranin.

Il-barranin imexxu

* l-Posta,

* il-Lottu,

* il-Freeport,

* l-Air Terminal,

* l-Air Malta.

Qegħdin jiftehmu biex it-Maltacom tgħaddi f’idejn il-Cable & Wireless, 30 sena wara li ħadniha minn taħt idejhom.

Il-barranin jiftħu negozji f’pajjiżna u joqtlu n-negozji tal-Maltin.

Il-barranin jixtru kemm iridu proprjetà f’Malta u l-Maltin ma jlaħħqux mal-prezzijiet tagħhom.

Artna mhux se tibqa’ tagħna.

Lanqas ħallewlna d-dritt li ndaħħlu u nżommu jaħdmu f’pajjiżna lil min ma jieħux ħobż il-Maltin, u ma’ l-immgranti llegali jkollna nimxu kif tgħidilna l-Unjoni Ewropea.

Rajna m’għandux f’idejna.

Rajna jerġa’ jiġi f’idejna meta noħorġu mill-Unjoni Ewropea u nagħmlu ftehim li jaqblilna mal-pajjiżi tagħha.

Jekk għandna r-rieda, għandna s-saħħa nagħmlu dan.

QABEL Malta ssieħbet fl-Unjoni Ewropea, il-propagandisti ta’ l-Unjoni Ewropea ta’ l-Unjoni kienu jiżgurawna li hija ma tindaħalx fit-taxxi li jsiru fil-pajjiżi membri. 

Din kienet waħda mis-sensiela ta’ tagħrif falz li bellgħulna fil-kampanja biex il-poplu jivvota IVA għas-sħubija. 

Hija falza, għax l-Unjoni timponi taxxi li jsiru fil-pajjiżi membri u tikkontrolla x’eżenzjonijiet jingħataw minnhom.

F’dawn l-aħħar ġimgħat, anki l-Knisja Kattolika fi Spanja ġarrbet l-indħil dirett ta’ l-Unjoni Ewropea dwar il-ħlas tat-taxxa tal-VAT fuq ċerti fornimenti ta’ prodotti li jsirulha. 

L-Unjoni oġġezzjonat għall-eżenzjonijiet mogħtija lill-Knisja Kattolika mill-ħlas tal-VAT. 

L-Unjoni qiegħda tinsisti mal-Gvern Spanjol u s-Santa Sede fil-ftehim li kienu għamlu dwar l-affarijiet ekonomiċi fis-sena 1979.

L-Unjoni Ewropea qiegħda ssostni li dawn l-eżenzjonijiet mill-ħlas tat-taxxa tal-VAT ma jaqblux mar-regoli ta’ l-Unjoni dwar il-VAT. 

L-Unjoni qiegħda thedded lill-Gvern Spanjol li tieħdu l-Qorti tal-Ġustizzja ta’ l-Unjoni jekk il-Gvern ma jneħħix l-eżenzjonijiet fi żmien xahrejn oħra.

Anki f’Malta sibna li l-Unjoni tindaħal fit-taxxi li jsirulna. 

Hija ġegħlet lill-Gvern Malti jneħħi t-taxxa fuq id-dixxijiet tat-television. 

Fl-istess ħin, hija ġegħlet lill-Gvern Malti jagħmel taxxa fuq il-prodotti taż-żejt minkejja ż-żieda fil-prezz taż-żejt. 

Bl-istess mod l-Unjoni ġegħlet lill-Gvern idaħħal it-taxxa tal-VAT f’Malta, u saħansitra li jintaxxa l-ikel fir-ristoranti, il-lezzjonijiet tat-tagħlim, u l-kotba tat-tagħlim. 

'Il quddiem, se jkunu ntaxxati wkoll il-mediċini. 

Is-sena l-oħra mponiet fuqna l-ECO Tax. 

U fiż-żmien li ġej, twikkielna taxxi oħrajn.

F’kull pajjiż li ssieħeb fl-Unjoni Ewropea, it-taxxi żdiedu mhux naqsu. 

L-istes qiegħed jiġri f’Malta. 

Għax hekk ordnat l-Unjoni, meta tmur għand avukat, trid tħallas lilu u taxxa ta’ 18 fil-mija fuq il-ħlas tiegħu, lill-Gvern. 

L-istess ikollok tagħmel jekk tqabbad perit. 

Għal kull Lm100 li tagħtih, trid tagħti Lm18 lill-Gvern. 

Fuq l-ispejjeż tat-tieġ, trid tħallas 18 fil-mija lill-Gvern. 

L-Unjoni tieħu persentaġġ minn dak li nħallsu lill-Gvern.

Jekk jidhrilna li mhux sew li nkomplu nħallsu dawn it-taxxi fuq is-servizzi li għandna bżonn, ma nistgħux nieqfu li nħallsuhom, sakemm nibqgħu mseħbin fl-UE. 

Meta noħorġu mill-Unjoni, inkunu nistgħu niddeċiedu aħna x’ghandna nintaxxaw, u x’ma għandninex nintaxxaw. 

Sakemm inkunu fl-Unjoni, il-poplu tagħna m’għandux setgħa jiddeċedi huwa.

Is-Sibt, 7 ta’ Jannar, 2006.

e-mail: cnimalta at yahoo.co.uk 

IRRIDU L'INDIPENDENZA MILL-UNJONI EWROPEA

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien?

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola liċ-

Segretarju Finanzjarju  CNI,

60A, Triq id-Dejqa,

Valletta

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ