MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

Il-problemi tal-immigranti illegali f’pajjiżna qegħdin jikbru u mhux qegħdin nieħdu l-passi meħtieġa biex insolvuhom.

Dan l-aħħar inħolqot il-problema bid-deċiżjoni bla sens li ttieħdet ħalli l-immigranti, wara xi żmien fiċ-ċentri miftuħin, ikollhom jitilqu minnhom mingħajr ma jkun ipprovdut lilhom fejn imorru.

Din id-deċiżjoni żbaljata qiegħda toħloqilhom tbatija kbira, u hija ta’ inkwiet serju għall-poplu.

Għax l-immigranti jkollhom idabbru rashom billi jisgassaw djar battala u jisirqu biex jieklu jekk ma jkollhomx xogħol.

Għalhekk din id-deċiżjoni assurda qiegħda żżid il-problemi soċjali li għandna.

Problema oħra tirrigwarda l-inkwiet li qiegħed spiss jinqala’ fiċ-ċentri ta’ detenzjoni, kemm bejn l-istess immigranti kif ukoll protesti minnhom dwar il-kundizzjonijiet li qegħdin fihom.

Iż-żamma tal-ordni qiegħda ssir dejjem aktar diffiċli u spiss membri tal-Korp tal-Pulizija u tal-Forzi Armati jkollhom jintbagħtu fiċ-ċentri ta’ detenzjoni.

Il-qagħda sejra għall-agħar u wieħed jistenna li jinqala’ storbju akbar u ġlied li jallarma lill-poplu.

Hemm problema oħra li ġejja mill-fatt stramb li seħħ dan l-aħħar li f’diversi okkażjonijiet dgħajjes mimlijin bl-immigranti illegali waslu sax-xtut tagħna bla ħadd ma waqqafhom.

Dan il-fatt jikxef kemm hi nieqsa s-sorveljanza u kemm m’għandniex sigurtà f’pajjiżna.

Għandna mijiet ta’ persuni fil-forzi tas-sigurtà moħlijin biex jieħdu ħsieb l-eluf ta’ immigranti fostna, filwaqt li m’għandniex nies biżżejjed biex jieħdu ħsieb ix-xtut mid-dħul ta’ persuni mhux awtorizzati.

Issa faqqgħet problema oħra b’immigranti illegali li jitilqu bil-moħbi minn pajjiżna biex jipprovaw imorru f’postijiet oħrajn fl-Ewropa.

Qegħdin inwaħħluhom ħabs talli jagħmlu dan.

Biżżejjed ma ngħinuhomx imorru fejn jixtiequ fl-Ewropa, talli qegħdin nippenalizzawhom jekk jipprovaw jagħmlu dan.

Għax l-Unjoni Ewropea hekk trid minna!

Li lil dawk li nagħtuhom l-istatus ta’ refuġjati u l-oħrajn li nagħtuhom protezzjoni umanitarja ma nħalluhomx imorru lejn l-Ewropa.

Ikollna nżommuhom hawn kontra qalbhom u fl-istess ħin inkabbru l-problemi soċjali tagħna stess fejn jidħol xogħol, akkomodazzjoni, manteniment u servizzi soċjali għalihom.

Din il-politika tal-UE qiegħda toħloqilna problema oħra ta’ diskriminazzjoni u hija bi ksur tal-prinċipju fundamentali tal-moviment ħieles tal-persuni, wieħed mill-prinċipji ewlenin tal-Unjoni stess.

Filwaqt li ċ-ċittadini Maltin għandhom dan id-dritt, l-eluf ta’ refuġjati u immigranti fuq protezzjoni umanitarja huma mċaħħdin minnu.

Din iċ-ċaħda hija diskriminatorja għax hija bbażata fuq ir-razza u l-pajjiż tal-oriġini tagħhom.

Qegħdin nagħtuhom dan it-trattament diskriminatorju mhux fl-interess tal-poplu Malti, iżda fl-interess tal-UE.

Il-poplu tagħna għandu l-interess li l-eluf ta’ refuġjati u immigranti li ngħataw protezzjoni umanitarja f’pajjiżna jħallu Malta mill-aktar fis.

Dawn il-problemi u l-oħrajn kollha li l-immigrazzjoni illegali qiegħda toħloqilna nistgħu nsolvuhom jekk ngħarfu kif ġew fuqna.

Ġew fuqna għax l-UE ġiegħlet lill-Gvern Malti jħassar ir-riservi li kellu għall-Konvenzjoni dwar ir-Refuġjati u rabtitna li nħarsu r-regolamenti tagħha kif imfasslin fil-Ftehim ta’ Dublin.

Biex inkunu nistgħu nilqgħu għall-mewġ tal-immigranti illegali rridu għalhekk nerġgħu ndaħħlu r-riservi li kellna qabel isseħibna fl-UE u rridu ninħallu mill-irbit tal-Ftehim ta’ Dublin.

Fi kliem ieħor, jekk irridu nsibu tarf għall-kriżi tal-immigranti illegali, irridu nimxu b’politika differenti minn dik tal-Unjoni u li tkun tħares l-interessi tal-poplu Malti.

Din hija l-isfida kbira li l-Parlament Malti għandu.

Irid iħares l-interessi nazzjonali qabel dawk tal-UE.

L-Aqwa mexxejja Nazzjonalisti, bħal Nerik Mizzi u Ġorġ Borg Olivier, żgur li jistħu l-ftehim sagrilegu li l-Gvern Malti għamel mal-Unjoni Ewropea biex it-Tarzna ma tibqax intrapriza Maltija u biex il-faċilitajiet stupendi tagħha jaqgħu f’idejn il-barranin.

Sa mill-1920, Nerik Mizzi tkellem kontra l-isfruttament tal-faċilitajiet tat-Tarzna minn “kapitali barranin”.

Fil-fatt fis-6 ta’ Marzu, 1920, f’dibattitu waqt laqgħa tal-Kunsill tal-Gvern dwar proposta biex tinfetaħ tarzna għall-bini tal-vapuri, il-Kunsillier Mizzi kien qal hekk:

“Aħna fil-prinċipju kollha favor l-iżvilupp kummerċjali u industrijali tal-pajjiż… imma altru l-isfruttament b’kapitali barranin. L-ewwel wieħed iwassal għall-ħelsien ekonomiku, it-tieni jdaħħalna direttament fil-jasar ekonomiku. Il-jasar ekonomiku…. huwa aktar perikoluż minn dak politiku għax iservi biex jiġġustifika lil dan.”

Dan il-kliem jurina li Nerik Mizzi żgur ma kienx jaqbel u kien jikkumbatti bl-aħrax li t-Tarzna ma tibqax intrapriża Maltija.

Gorġ Borg Olivier kien ukoll jiġġieled kontra dan,

* tant li kien hu bħala Prim Ministru li fl-1968

* innazzjonalizza t-Tarzna billi,

* bl-appoġġ sħiħ tal-Oppożizzjoni laburista mmexxija mill-Perit Mintoff,

* ressaq liġi fil-Parlament

* li bis-saħħa tagħha t-Tarzna ma baqgħetx għand id-ditta barranija ta’ Bailey

* u saret tal-poplu Malti għax għaddiet għand il-Gvern Malti.

Għal snin twal qabel dan,

* it-Tarzna kienet dejjem f’idejn il-ħakkiema barranin ta’ Malta,

* l-ewwel f’idejn il-Kavallieri ta’ San Ġwann

* u wara f’idejn il-Gvern Imperjali Ngliż.

Fl-1959 l-Ammiraljat Ingliż kien kera t-Tarzna lil ditta kummerċjali minn Wales, ta’ Bailey.

Is-sena l-oħra,

* il-Prim Ministru Lawrence Gonzi

* u l-Ministru Austin Gatt

* ċaħdu kemm lil Nerik Mizzi

* kif ukoll lil Ġorġ Borg Olivier

* u baxxew rashom għar-rieda tal-UE

* li ddeċidiet li t-Tarzna ma tibqax aktar tal-poplu Malti

* u titmexxa mill-Gvern Malti.

Li jfisser li l-faċilitajiet kbar u strateġiċi tagħna jgħaddu mill-ġdid f’idejn il-barranin.

Bil-faċilitajiet għat-tiswija u l-bini tal-vapuri f’idejn il-barranin,

* bil-Port il-Kbir immexxi mill-barranin,

* bil-Port Ħieles f’idejn il-barranin,

* bil-banek f’idejn il-barranin,

* bil-telefonija f’idejn kumpanija barranija,

* il-poplu jħoss li reġa’ ġie mmexxi mill-barranin

* bis-saħħa tas-sħubija ta’ pajjiżna fl-UE

* li tmexxi wkoll lill-Gvern dejjem  suġġett għaliha.

L-Unjoni Ewropea, jew aħjar il-Kummissjoni Ewropea, u l-politiċi li jappoġġjawha fl-Islanda ilhom is-snin jaraw kif jistgħu jikkonvinċu lill-poplu Islandiż biex jaqbel li l-pajjiż jissieħeb fil-blokk.

L-‘elite’ li dejjem mexxew l-Unjoni ma jgħaddilhomx mill-istonku tagħhom li xi pajjiż fl-Ewropa ma jkunx irid jissieħeb fl-UE.

Għax sakemm jibqgħu jeżistu pajjiżi fl-Ewropa li jibqgħu verament indipendenti u sovrani, jibqgħu jeżistu eżempji u provi li pajjiż jista’ xorta waħda jagħmel progress ekonomiku u soċjali mingħajr il-bżonn li jsir membru tal-Unjoni.

In-Norveġja u l-Isvizzera huma prova ta’ dan.

Rapport li deher f’dan il-ġurnal fit-28 ta’ Lulju li għadda,

* bit-titlu “Negozjati mgħaġġla bejn l-UE u l-Islanda”,

* kompla kixef l-ingann ta’ dawk li bellgħuha lill-maġġoranza tal-poplu

* li biex Malta jkollha aċċess għas-suq wieħed komuni tal-UE

* bilfors kellha tissieħeb fil-blokk Ewropew.

Jirriżulta li l-Islanda,

* minkejja li mhix membru fl-UE,

* xorta waħda tifforma parti mis-suq wieħed tal-UE

* kif ukoll tifforma parti miż-Żona Schengen.

Dan seta’ jsir permezz ta’ ftehim speċjali li stat barra l-Unjoni jista’ jagħmel mal-blokk meta dak l-istat għal xi raġuni jew oħra ma jkunx jixtieq li jitgħabba b‘regolamenti u d-direttivi kollha tal-UE.

Malta wkoll setgħet tagħmel dan flok tissieħeb fl-Unjoni.

Meta faqqgħet il-kriżi finanzjarja internazzjonali

* li ġabet kaos sħiħ fl-istituzzjonijiet finanzjarji u bankarji,

* speċjalment fl-Istati Uniti,

* fl-Ewropa

* u fl-Asja,

l-Islanda kienet wieħed mill-pajjiżi li laqqatha bil-kbir.

Ir-raġuni kienet li t-tliet banek tal-Islanda kienu qegħdin jitmexxew totalment b’mod irresponsabbli dwar l-investimenti tagħhom ta’ eluf ta’ miljuni ta’ flus b’banek u f’istituzzjonijiet finanzjarji internazzjonali.

Dawn ikkaġunaw telf enormi lill-banek Islandiżi.

Kieku l-banek f’Malta kienu mmexxijin bl-istess mod, konna nispiċċaw bħall-Islanda u jkollna bżonn l-għajnuna barranija tal-Fond Monetarju Internazzjonali (IMF) biex infendu.

Il-mexxejja tal-UE,

* flimkien mal-Gvern Islandiż,

* ħatfu din l-okkażjoni biex jimpressjonaw lill-poplu Islandiż

* li kieku l-pajjiż kien membru sħiħ

* ma kienx jinħakem daqstant mill-kriżi finanzjarja internazzjonali.

Bħallikieku pajjiżi oħrajn li huma fl-UE,

* bħall-Ungerija,

* ir-Repubblika Ċeka,

* l-Ingilterra,

* Spanja,

* il-Greċja

* u oħrajn

mhux ukoll laqqtuha bil-kbir.

Imma l-importanti għall-Kummissjoni Ewropea kien li sabu skuża li biha setgħu jbeżżgħu lill-poplu Islandiż li jekk jibqgħu barra mill-UE għad jista’ jiġrilhom l-istess ħaġa.

U għalhekk din l-għaġġla biex lill-Islanda jdaħħluha tiġri fil-blokk qabel ma tgħaddi din il-kriżi għal kollox u forsi l-poplu Islandiż jerġa’ jibdel fehmtu għax jinduna li aktar se jitlef milli jirbaħ jekk jintrabat li jaċċetta r-regoli u d-direttivi kollha Ewropej.

Żgur li l-ewwel li jlaqqatha se jkun is-settur tas-sajd, li huwa pilastru ewlieni tal-ekonomija Islandiża.

Jekk irid, il-Gvern Islandiż jista’ jinnegozja biex il-pajjiż jidħol fiż-Żona Ewro minflok jibqa’ bil-munita lokali, jekk jifhem li b’hekk ikun hemm aktar stabilità finanzjarja u ekonomika fil-pajjiż.

Iżda jidher li l-maġġoranza tal-politiċi Islandiżi waqgħu għat-tentazzjoni li jirkbu l-“gravy train” tal-UE u din it-tentazzjoni għelbet is-sens ta’ lealtà li supost ikollhom lejn pajjiżhom.

Hekk ġralhom il-maġġoranza assoluta tal-politiċi fl-istati l-oħrajn tal-Ewropa.

Issa sabu x-xoqqa f’moxtha u jridu jgħaġġlu ħalli dan iċ-ċans ma jiżloqx minn idejhom.

B’hekk anke l-Islanda tiżdied mal-istati “kolonji” tal-UE.

Il-Ħamis, 23 ta’ Lulju, 2009

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

60A, Triq id-Dejqa,

Valletta

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ