MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LID-DEPUTAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

Meta fit-18 ta’ Ġunju, 2008, il-Prim Ministru Lawrence Gonzi u l-Ministru Austin Gatt ħabbru li l-Gvern iddeċieda li jbiegħ it-Tarzna, ftaħru li investituri barranin kienu ilhom interessati fit-Tarzna. 

Ma stħawx li l-poplu se jgħidilhom li jekk ħafna barranin iridu t-Tarzna, iriduha għax jemmnu li jistgħu jagħmlu l-qligħ minnha. 

Allura kif il-Gvern Malti qed isostni li ma tistax tkun viabbli u għalhekk għandu jfittex li jeħles minnha malajr, sa l-aħħar tas-sena?

Il-Prim Ministru u l-Ministru Gatt żiedu jgħidu li biex it-Tarzna ta’ Malta tkun viabbli, irid jonqos drastikament l-għadd ta’ ħaddiema tagħha, biex b’hekk tkun attraenti għall-investituri potenzjali. 

Iżda l-Kampanja għall-Ħelsien Nazzjonali (CNI) taf li mhux l-investituri potenzjali kollha jesiġu tnaqqis drastiku fin-numru ta’ ħaddiema. 

Is-CNI taf li almenu fil-każ ta’ wieħed żgur, dan iddikjara pubblikament li jekk it-Tarzna tkun f’idejh, ikollu jżid in-numru tal-ħaddiema biex ilaħħaq max-xogħol kollu li jġibilha.

Is-CNI tfakkar lill-pubbliku li fl-2006, imprenditur barrani, Joseph Calà kien ġie Malta wara li l-aqwa aġenzija fil-qasam tal-vapuri, il-Lloyds ta’ Londra, żguratu li l-ħaddiema tat-Tarzna ta’ Malta huma fost l-aqwa fid-dinja għat-tiswija tal-vapuri.

Huwa ried jagħti kuntratt kbir li kien ifisser xogħol għal ħafna snin u miljuni kbar għat-Tarzna, iżda l-maniġment eżekuttiv tat-Tarzna u l-Gvern għamlu minn kollox biex inaffru lill-imprenditur Calà u kien biss wara insistenza pubblika mill-General Workers’ Union (GWU) li dan ingħata stima tax-xogħol.

Minkejja dan, il-maniġment eżekuttiv u l-Gvern ma ridux jiftehmu miegħu. 

Issa Joseph Calà qiegħed jagħmel ix-xogħol li ried jagħti lit-Tarzna, f’tarzni Ewropej oħrajn. 

U llum, il-Prim Ministru, il-Ministru Gatt u l-Ministru Tonio Fenech jridu li l-poplu jemminhom li hemm bżonn li jonqsu mill-inqas elf ħaddiem mit-Tarzna, meta sentejn ilu l-imprenditur Joseph Calà ried jieħu f’idejh it-Tarzna u jżid l-għadd ta’ ħaddiema tagħha.

Is-CNI ssostni li t-tnaqqis ta‘ mill-inqas elf ħaddiem mit-Tarzna mhux fl-interess tal-pajjiż li jeħtieġlu żieda fin-nies li jaħdmu, mhux tnaqqis. 

Dan in-numru kbir huwa wkoll ta’ ħsara għall-ħaddiema li jippreferu li jkomplu jaħdmu, milli li jitilqu mix-xogħol, kif il-Gvern qed iħeġġiġhom jagħmlu.

Aktar milli jħeġġeġ lill-ħaddiema, il-Gvern qed jheddidhom li jekk ma jaċċettawx li jirtiraw volontarjament, ikollu jagħlaq it-Tarzna wara l-aħħar ta’ din is-sena u b’hekk l-għadd ta’ ħaddiema li huma mhedda li jitifu x-xogħol huwa ta’ 1,726.

Is-CNI għandha tagħrif li jekk hemm ħaddiema li jippreferu li jirtiraw mit-Tarzna u jieħdu somma mingħand il-Gvern, hemm ukoll ħaddiema li jridu jkomplu jaħdmu fit-Tarzna u mhux lesti jħallu li l-impjieg tagħhom ikun mitmum. 

Is-CNI hija konvinta li l-GWU hija determinata li tiddefendi akkost ta’ kollox, lill-ħaddiema kollha li ma jridux jirtiraw u jieħdu s-somma.

Is-CNI temmen li ħaddiema mhux se jħallu li t-Tarzna tagħlaq, għax jekk il-Gvern jirtira mit-tmexxija tagħha u milli jkompli jagħtiha għajnuna, il-ħaddiema tat-Tarzna li jridu jibqgħu fl-impjieg, għandhom il-ħila u l-mezz biex imexxu huma t-Tarzna, mingħajr indħil u s-sussidju tal-Gvern.

Il-Gvern ilu s-snin imexxi kampanja kontra l-ħaddiema tat-Tarzna. 

Iżda l-imprenditur Joseph Calà mhux lill-ħaddiema sab ineffiċjenti, iżda lill-maniġment eżekuttiv, imħallas b’mijiet ta’ eluf ta’ ewro u lill-Gvern li dejjem bierek l-ineffiċjenza tat-tmexxija skandaluża tagħhom.

Fabbriki jnaqqsu n-nies meta jonqsilhom il-bejgħ tal-prodotti tagħhom. 

It-Tarzna ta’ Malta mhix nieqsa mix-xogħol, kieku l-maniġment eżekuttiv u l-Gvern tassew iridu li jiżdied ix-xogħol tat-Tarzna.

Hija ħaġa ċara li t-Tarzna jeħtieġilha riorganizzazzjoni fit-tmexxija għolja tagħha u li l-mexxejja tagħha u l-Gvern jimmotivaw lill-ħaddiema jaħdmu iżjed, mhux jiddemoralizzawhom bit-tgħajjir ta’ nuqqas ta’ produttività u kwalità mhux tajba tax-xogħol u theddid ta’ għeluq tat-Tarzna jekk ma jitnaqqsux mill-inqas elf ħaddiem minnha.

Is-CNI tixli lill-Gvern li bil-mod kif qed jimxi dwar il-ġejjieni tat-Tarzna, qed jogħġob lill-Unjoni Ewropea, iżda qed jimmina l-interessi nazzjonali, minbarra li qed jagħmel ħsara kbira lil ħafna ħaddiema u l-familji tagħhom.

Il-poplu m’għandux iħalli jseħħ fil-każ tat-Tarzna, l-aġir kriminali li kien seħħ fil-każ tas-Sea Malta u tal-impjegati tagħha.

It-tiswija tal-vapuri u x-xogħol fuq il-jottijiet jagħmluh il-ħaddiema lis-sidien tal-vapuri u tal-jottijiet, mhux il-Gvern u l-maniġment eżekuttiv tat-Tarzna u l-ħaddiema jistgħu jkomplu jagħmluh mingħajr il-Gvern u l-maniġment eżekuttiv wara l-Ewwel tas-Sena d-dieħla.

L-Erbgħa, 6 ta’ Awwissu, 2008

IRRIDU L'INDIPENDENZA MILL-UNJONI EWROPEA

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

60A, Triq id-Dejqa,

Valletta

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ