MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LID-DEPUTAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

Fl-interess nazzjonali t-Tarzna għandha tibqa’ topera

Fl-interess nazzjonali tagħna t-Tarzna għandha tkompli topera. 

Ebda regolamenti u ebda politika ta’ l-Unjoni Ewropea ma għandhom jegħlbu l-interess nazzjonali tagħna.

Għalhekk wara Diċembru ta’ din is-sena għandna niżguraw li t-Tarzna ma tagħlaqx għax hekk trid l-Unjoni.

Wara kollox għaliex l-Unjoni ma tridx li t-Tarzna tkompli tingħata għajnuna? 

Ir-raġuni li l-Unjoni tagħti għal dan hija li l-istat ma għandux jagħti għajnuna lill-intrapriża kummerċjali. 

U għaliex l-Unjoni ma tridx li intrapriża kummerċjali tingħata għajnuna? 

Ir-raġuni ta’ l-Unjoni għal dan hija li l-għajnuna lill-intrapriża kummerċjali tkun ta’ dannu għal intrapriżi kummerċjali kompetituri u hija kontra l-kompetizzjoni ħielsa fil-kummerċ.

Mela skond l-Unjoni, għajnuna mogħtija lit-Tarzna Maltija hija ta’ dannu għat-tarznari kompetituri. 

Liema huma t-tarznari kompetituri għat-Tarzna Maltija? 

Fil-bini tal-vapuri, it-tarznari kollha tad-dinja huma kompetituri tat-tarzna tagħna. 

Imma fit-tiswija tal-vapuri, it-tarznari kompetituri tagħna fl-Unjoni Ewropea huma dawk fil-Mediterran,

* tal-Greċja, 

* ta’ l-Italja, 

* ta’ Franza, 

* ta’ Spanja u 

* tal-Portugall.

Għall-benefiċċju tat-tarznari fl-Unjoni Ewropea li jibnu l-vapuri, u ta‘ dawk fil-Mediterran li jsewwew il-vapuri, l-Unjoni sitt snin ilu rabtet lil Malta, jekk din riedet li tidħol fl-Unjoni,

* li tagħlaq it-Tarzna tal-Marsa u 

* ċċekken it-Tarzna ta’ Bormla, 

* billi tnaqqas in-numru ta’ ħaddiema għal 1,400, 

* tillimita l-ammont ta’ xogħol għal żewġ miljuni ‘men-hours’ biss fis-sena, 

* tuża azzar mhux aktar minn 10,000 tunellata fis-sena, u 

* tagħlaq għal kollox il-Baċir Numru 1. 

L-Unjoni ma kinitx kuntenta timponi dawn ir-restrizzjonijiet u limitazzjonijiet, iżda wkoll insistiet li titwaqqaf l-għoti ta’ għajnuna wara Diċembru ta’ l-2008.

Dan kollu juri li l-Unjoni tqis li l-ammont ta’ xogħol magħmul mit-Tarzna ta’ Malta skond il-Ftehim ta’ Ristrutturar huwa aċċettabbli għall-kompetituri tat-Tarzna Maltija fl-Unjoni.

Issa l-għoti ta’ għajnuna lit-Tarzna Maltija mhux se żżid l-ammont ta’ xogħol magħmul minnha aktar minn dak permess fil-ftehim, u għalhekk mhux se jkun ta’ dannu għall-kompetituri tat-Tarzna fl-Unjoni.

La darba l-ammont ta’ xogħol li t-Tarzna hija permessa li tagħmel fis-sena, skond il-Ftehim ta’ Ristrutturar impost mill-Unjoni, mhux se jkun ta’ dannu għall-kompetituri ħielsa fil-kummerċ. 

Iżda dan mhux prinċipju li l-Unjoni tapplikah f’kull qasam. 

Ma tapplikahx fil-biedja fejn l-Unjoni tagħti ammont kbir ta’ sussidju. 

Fuq kollox, l-Unjoni tippermetti li l-istat jagħti għajnuniet kbar lil ċerti industriji, bħal dik ta’ l-ajruplani u dik tat-turiżmu.

Fil-każ tat-turiżmu, per-eżempju, is-sussidju li jagħti Gvern ta’ pajjiż jgħin lill-impriżi turistiċi kompetituri f’pajjiżi oħrajn ta’ l-Unjoni, barra li dan huwa kontra l-prinċipju tal-kompetizzjoni ħielsa fil-kummerċ.

Ħafna pajjiżi membri fl-Unjoni Ewropea jagħtu għajnuna kbira lill-intrapriżi tagħhom fl-interess nazzjonali.

Insemmu

* lill-Ingilterra, 

* Franza u 

* l-Italja, li lkoll jagħmlu dan. 

L-Ingilterra, sa waslet biex tinnazzjonalizza l-intrapriża kummerċjali finanzjarja Northern Rock biex ma tħallihiex tfalli u jintilfu ħafna depożiti. 

Il-Gvern Ingliż ħareġ mhux miljuni, iżda biljuni ta’ liri sterlini biex jagħmel dan. 

Franza toħroġ ammonti kbar sabiex iżżomm it-trenijiet nazzjonali. 

L-Italja tagħmel l-istess. 

Eżempji bħal dawn insibuhom f’pajjiżi oħrajn ta’ l-Unjoni.

Għaliex Malta ma għandhiex dritt tagħmel l-istess u toħroġ kemm hemm bżonn f’għajnuna biex iżżomm it-Tarzna miftuħa u topera fl-interess nazzjonali? 

Jekk l-oġġezzjoni hija li t-Tarzna illum hija intrapriża kummerċjali u mhux dipartiment governattiv, is-soluzzjoni hija li l-Gvern għandu jinnazzjonalizza t-Tarzna u jmexxiha bħal ma jmexxi d-Dipartiment tax-Xogħlijiet Pubbliċi.

L-Unjoni Ewropea ma għandhiex toġġezzjona għal dan il-pass, la darba l-Unjoni mhix qiegħda toħroġ flus biex it-Tarzna tkompli topera. 

Kif jonfoq flusu l-poplu Malti għandu jiddeċidih huwa, mhux il-burokratiċi barranin ta’ l-Unjoni.

Kienu wegħdu lill-poplu li kollox se jkun possibbli meta nidħlu fl-art imwegħda ta’ l-Unjoni Ewropea. 

U ħames snin ilu l-maġġoranza tal-poplu emmnithom. 

Iżda ħafna sabu li ngannawhom bil-kbir.

Fost dawk li ġew ingannati bil-kbir insibu n-nisa tad-dar, li f’ittra li bagħtulhom kienu qalulhom li jekk nidħlu fl-UE u jitneħħew il-‘levies’ fuq il-ħxejjex u prodotti oħrajn ta’ l-ikel, il-ħajja se torħos b’Lm1.27ċ fil-ġimgħa.

U kif in-nisa tad-dar kollha jafu, ġara l-kontra u l-ħajja għoliet infern.

Ġew ingannati wkoll il-bdiewa u r-raħħala, li bil-miktub iswed fuq l-abjad, kienu wegħduhom li f’każ ta’ importazzjoni qawwija li tkun tħassrilhom is-suq tal-wiċċ tagħhom, tintuża l-klawsola tas-salvagwardja li ftehmu ma’ l-UE ħalli jipproteġuhom.

Din il-klawsola tas-salvagwardja qatt ma ntużat, u b’hekk ħafna bdiewa u raħħala sofrew telf kbir fid-dħul li kien ikollhom qabel. 

U biex ma jegħrqux għal kollox, qegħdin jinħarġu l-miljuni ta’ Ewro kull sena f’sussidju mill-flus li aħna lkoll inħallsu f’taxxi. 

Però anke dan is-sussidju se jkollu jispiċċa jekk ma nurux lill-Unjoni Ewropea li ma aħniex lesti naraw lill-bdiewa u r-raħħala Maltin u Għawdxin jispiċċaw fuq l-altar tas-sagrifiċċju ta’ l-Unjoni Ewropea.

Ġew ingannati l-ħaddiema tal-fabbriki u tat-tarznari, li tgħidx kemm kitbulhom u qalulhom li jekk nidħlu fl-Unjoni Ewropea, dawn l-azjendi ma jagħlqux. 

U wara li dħalna fl-UE, ħafna fabbriki bdew jagħlqu u oħrajn għandhom jagħlqu, b’Ministru stess jilgħab il-flus li l-fabbriki tal-manifattura tal-ħwejjeġ se jagħlqu kollha. 

U diġà ftaħar li rebaħ l-imħatra.

Il-ħaddiema tat-Tarzna wkoll illum indunaw li ħobżhom huwa mdendel b’xagħra għax it-Tarzna faċilment tista’ tingħalaq is-sena d-dieħla, jekk mhux se nkunu lesti ngħidu lill-UE li l-għeluq tat-Tarzna jkun ta’ ħsara kbira għal Malta u ma aħniex se naċċettaw li dan jiġri, allavolja hawn min qata’ qalbu li jdawwar il-ħsieb ta’ l-UE.

U fl-aħħar u forsi l-akbar ingann li sar kien tal-kaċċaturi u nassaba, li wegħduhom uffiċjalment aktar minn darba u tawhom garanzija li l-kaċċa u l-insib se jibqgħu jiġu pprattikati l-istess bħal qabel jekk nidħlu fl-UE. 

Illum, l-istess kaċċaturi u nassaba, li dak in-nhar qabel ir-Referendum u l-Elezzjoni Ġenerali ta’ l-2003 ma emmnux lill-mexxejja tagħhom, qegħdin iduqu l-imrar ta’ l-ingann li ġarrbu.

Dawn is-setturi tal-poplu tagħna mhux se jinsew min ingannahom, u lanqas se jinsew li l-mexxejja ta’ l-Unjoni Ewropea, bil-preżenza tagħhom f’pajjiżna, u bil-miljuni li ħarġu għall-propaganda, kienu kompliċi, jew aħjar ħatja wkoll, fl-ingann kbir li seħħ ħames snin ilu. 

Għandhom mitt raġun issa ma jafdawx lil min dak in-nhar ingannahom bil-kbir. 

Aktar inganni jistgħu jisennew minnhom ’il quddiem.

Il-Ġlieda għall-indipendenza se tissokta wara l-Elezzjoni

Ikun xi jkun ir-riżultat ta’ l-Elezzjoni Ġenerali, il-ġlieda għall-indipendenza ta’ Malta mill-Unjoni Ewropea trud tissokta u tikber. 

Għax il-poplu Malti tilef is-sovranita` tiegħu bis-sħubija fl-Unjoni u jerġa’ jiksibha lura biss billi joħroġ mill-Unjoni. 

Ma hemmx triq tan-nofs għal kull Malti li jgħożż l-indipendenza u l-ħelsien ta’ pajjiżu.

Qabel kull twemmin politiku partiġġjan, kull Malti għandu jemmen li l-poplu Malti għandu dritt sagrosat li jkollu rajh f’idejgħ u li ma jkunx maħkum mill-barranin, lanqas minn ta’ l-Unjoni Ewropea.

L-indipendenza ta’ poplu m’għandhiex tinbiegħ bi prezz. 

Tinkiseb bl-għola prezz tat-tixrid tad-demm, tas-sagrifiċċju kbir tal-poplu, u bid-dehen u l-għaqal tal-mexxejja.

Tintilef bit-tradiment tal-miljuni mwegħdin li bihom il-poplu jinxtara jekk ikun immexxi minn irġiel tat-tiben, mhux ta’ l-azzar. 

Pajjiżna missitu din l-isfortuna u b’hekk tlifna l-Indipendenza u l-Ħelsien. 

Issa jkollna nbatu d-danni sakemm jirnexxilna nerġgħu ninfdew mill-kolonjaliżmu, din id-darba ta’ l-Unjoni Ewropea.

Wara l-Elezzjoni, irridu nagħtu bidu għal moviment nazzjonali għal-indipendenza ta’ Malta. 

Il-militanti tal-moviment iridu jidħlu f’kull partit politiku, f’kull trejdunjin u f’kull organizzazzjoni soċjali ħalli jagħmlu l-ħmira għall-għajta tal-poplu għall-indipendenza. 

Trid tinbena maġġoranza favur l-indipendenza li l-partiti politiċi ma jkunux jistgħu jirreżistu l-pressjoni tagħha, ħalli meta l-poplu jiġi mistoqsi jekk iridx l-indipendenza mill-Unjoni Ewropea, il-kotra kbira twieġeb IVA. 

Din id-darba l-IVA tkun biex noħorġu, mhux nidħlu, mill-Unjoni Ewropea.

Ma hemmx dubju li l-ġlieda għall-indipendenza se tkun iebsa ħafna. 

Se nsibu kontra tagħna dawk li mill-Unjoni qegħdin jerdgħu u ma jimpurtahomx minn huthom li qegħdin ibatu.

Se nħabbtu wiċċna ma forzi kbar kummerċjali li jmorru tajjeb bil-politika ta’ l-Unjoni, mingħajr ma jagħtu kas il-ħsara li qiegħda tagħmel lill-kotra tal-poplu. 

Se jintużaw miljuni fi propaganda favur l-Unjoni u biex iwerwru lill-poplu bil-ħrafa li pajjiżna ma jistax jgħix indipendenti barra l-Unjoni u jkun iżolat u maqtugħ mill-Ewropa.

Iżda lill-poplu rridu nfehmuh li barra l-Unjoni ma tfissirx mhux fl-Ewropa. 

Li mhux imseħbin fl-Unjoni, ma nkunux iżolati, iżda nkunu sħab mal-pajjiżi kollha ħbieb ta’ Malta li għax iridulna l-ġid, jgħinuna biex inkunu indipendenti u ħielsa, kif kienu jagħmlu qabel ma sseħibna fl-Unjoni. 

Nuru lill-poplu li barra l-Unjoni, inkunu aħjar finanzjarment għax il-piżijiet u l-ispejjeż tas-sħubija fl-Unjoni huma akbar mill-fondi li jingħatawna minnha. 

Fuq kollox, jerġa’ jkollna l-aktar ħaġa għażiża, il-liberta`, li s-sħubija fl-Unjoni telfitna.

IRRIDU L'INDIPENDENZA MILL-UNJONI EWROPEA

Il-Ħamis, 6 ta’ Marzu, 2008

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ