MERĦBA FIL-PAĠNA TAS-CNI
KAMPANJA ĦELSIEN NAZZJONALI
Kienet, għadha u tibqa' favur il-ħaddiema Maltin
u kontra s-sħubija ta' Malta fl-Unjoni Ewropea
GĦID LID-DEPUTAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!
Fis-seba’ snin 2007 – 2013 il-Maltin u l-Għawdxin se jkunu ħallsu lill-Unjoni Ewropea €420,000,000
Il-farsa
tat-taxxa “tat-tluq” u t-taxxa fuq il-ħrieqi!
Biex aktar tikkonvinċi kemm l-Unjoni Ewropea m’għandhiex
ruħ soċjali u l-prijoritajiet tagħha huma maqlubin ta’ taħt
fuq, qrajna dan l-aħħar li dwar it-taxxa “tat-tluq” (“Departure
tax”) li wieħed iħallas meta jsiefer bl-ajru, il-Kummissjoni Ewropea
ħadet il-pożizzjoni li l-Gvern Malti qiegħed jikser ir-regolament
2408/92 ta’ l-Unjoni Ewropea.
Ir-raġunijiet li nġiebu biex jissostanzjaw il-pożizzjoni ta’ l-Unjoni Ewropea ma rajnihom konvinċenti xejn, biex ma ngħidux li kienu tad-daħk!
Qegħdin ngħidu dan mhux għax ma nieħdux pjaċir li meta nsiefru nħallsu taxxa anqas, iżda għax meta nxebbħu t-taxxa fuq l-ivvjaġġar – li skond l-Unjoni Ewropea l-Gvern Malti għandu jneħħi jew inaqqas – mat-taxxa fuq il-ħrieqi tat-trabi u ta’ l-anzjani, li l-Unjoni Ewropea mponiet fuq il-Gvern Malti.
U li heddedt lill-Gvern biex iżid l-ammont tat-taxxa
tal-VAT li titħallas fuq dawn il-ħrieqi, ma nistgħux ma
niskantawx u nistagħġbu!
Skond ir-rapporti li qrajna s’issa, l-Unjoni Ewropea
ġabet tliet raġunijiet biex tiġġustifika l-pożizzjoni
tagħha, li kienu:
1. L-Unjoni Ewropea tqis li hu diskriminatorju li tiġi mposta taxxa fuq xi
ħadd li jkun se jsiefer “bl-ajru” barra minn Malta. Waqt li dawk li
jmorru Għawdex bil-ħelikopter ma jħallsux din l-istess taxxa!
2. Il-Kummissjoni Ewropea temmen ukoll li din it-txxa fuq l-ivvjaġġar
qiegħda tagħmilha aktar diffiċli għall-Maltin biex jipprovdu
u jirċievu servizzi. Bħala eżempju tafu x’ġabet (tidħkux!)?:
“L-Unjoni Ewropea tqis li jkun ta‘ disinċentiv li avukati u tobba ma
jkunux jistgħu jżuru l-klijenti tagħhom barra minn Malta b’mod
faċli”!
3. L-Unjon Ewropea wkoll qiegħda tqis li la din it-taxxa saret biex
il-Gvern idaħħal aktar flus, allura dan mhux konformi mal-liġi
ta’ l-Unjoni Ewropea.
Ma nistgħux ma nurux il-banalità u ipokresija ta’ dawn l-argumenti:
1. Dwar l-ewwel punt ngħidu li Għawdex huwa parti mill-istat Malti.
Mela meta wieħed imur Għawdex bil-ħelikopter ma jkunx qiegħed
“isiefer” lejn xi pajjiż ieħor. Mela l-argument ta’ l-Unjon
Ewropea huwa bla bażi ta’ xejn u redikolu.
2. Dwar it-tieni punt, ngħidu li huwa veru li meta jsiefru bl-ajru t-tobba
u l-avukati, jew in-negozjanti, qegħdin iħallsu ż-żieda
fit-taxxa tat-tluq. Iżda ma taħsibx l-Unjoni Ewropea, li dawn jinkludu
ż-żieda tat-taxxa (anzi t-taxxa kollha) u l-prezz tal-biljett,
fil-kont li jippreżentaw lil klijenti tagħhom? Jew bħala spiża
tal-kumpanija f’każ tan-negozjanti? Mela mhux huma se jħallsu din
it-taxxa!
3. Dwar it-tielet punt, nistaqsu lill-Kummissjoni Ewropea: mela t-taxxi ġeneralment mhux dejjem isiru biex il-Gvern jiġbor aktar flus biex jiffinanzja l-baġit tiegħu, ħlief f’dawk il-każi meta ssir taxxa għolja bħala deterrent, bħal, per eżempju, fuq is-sigaretti u l-ispirti?
Inkomplu nistaqsu:
għaliex il-Kummissjoni Ewropea dejjem tagħfas biex it-taxxa tal-VAT tidħol fuq koll prodott u servizz, anke jekk dawn ikunu prodotti u servizzi essenzjali għall-ħajja?
Per eżempju, prodotti ta’ l-ikel u l-mediċini?
Mhux għax l-UE tirċievi
parti mit-taxxa tal-VAT ħalli tiffinanzja l-baġit tagħha?
Araw imbagħad l-ipokresija grassa ta’ l-Unjoni Ewropea.
Rigward il-ħrieqi tat-trabi u li
jużaw ukoll ċerti anzjani li jbatu minn “inkontinenza”, mhux biss
l-Unjoni Ewropea ġagħlet lill-Gvern Malti jdaħħal it-taxxa
tal-VAT fuq dan il-prodott essenzjali, iżda nsistiet u heddedt lill-Gvern
biex jgħolli din it-taxxa għal mhux inqas minn 15%!
Jiġifieri għal min isiefer għal vaganza, jew biex jagħmel xi
negozju, l-UE trid li jħallas inqas taxxa.
U lill-ommijiet li għandhom
tarbija, jew familja li għandhom xi anzjan li għandu bżonn il-ħrieqi,
tridhom iħallsu aktar taxxa!
Fl-aħħar nistednukom tistaqsu lilkom infuskom:
Min l-aktar isiefer u allur l-aktar li jgawdi bit-tnaqqis jew tneħħija tat-taxxa tat-tluq?
Biex ngħinukom ftit, ghax forsi
nsejtu, il-Membri Parlamentari Ewropej isiefru tista’ tgħid kull gimgħa!
Tiftakruhom
jghidu…
Li l-Unjoni Ewropea “ma tindaħalx fit-taxxi”?
Mela dan it-theddid kollu lill-Gvern Malti “dwar
taxxi” mhux indħil fit-taxxi?
Imma kif dejjem ngħidulkom, dak li l-Unjoni Ewropea ma tkunx tista’ ddaħħal
mill-bieb, tara kif tagħmel u ddaħħlu mit-tieqa, billi tirreferi
għal xi liġi jew direttiva tagħha, bħal “moviment ħieles
tas-servizzi”, li qiegħda tuża bħala skuża dwar it-taxxa
tat-tluq, ħalli tneħħi jew iżżid it-taxxa!
Hemm xi esponent tal-Gvern Nazzjonalista li lest li jqum bil-wieqfa u jirrepeti
li bis-sħubija “is-sovranità tal-Gvern Malti tissaħħaħ”?!
Inaqqas
taxxa u jżid oħra!
Niftakru tajjeb li meta kienet inqalgħet il-kwistjoni tat-taxxa fuq id-dixx
tas-satellita, u kienet qiegħda ssir pressjoni mal-Kummissjoni Ewropea biex
iġiegħel lill-Gvern Malti jneħħi dik it-taxxa, l-Onorevoli
Tonio Fenech, is-Segretarju Parlamentri fil-Ministeru tal-Finanzi, kien stqarr
li jekk ikollhom ineħħu xi taxxa, bħal dik fuq id-dixx
tas-satellita, il-Gvern jagħmel taxxa ġdida oħra jew iżid xi
taxxa li diġà tezisti!
U hekk naħsbu li kien għamel meta żied
it-taxxa tat-tluq (“Departure Tax”).
Għalhekk kull min jaħseb li jekk il-Gvern ikollu jnaqqas jew ineħħi
t-taxxa tat-tluq, se jiffranka l-flus mill-but, ikun sejjer żbaljat!
Għax il-Gvern, permezz ta’ l-Onorevoli Tonio Fenech, diġà għamilha
ċara li f’dak il-kaz idaħħal jew iżid taxxa oħra li
l-Unjoni Ewropea ma tkunx tista’ tindaħal fiha!
Ħajru
lit-tfal jilagħbu bl-Ewro!
Fl-aħħar Fiera Internazzjonali li saret għall-aħħar
darba fin-Naxxar, ir-rappreżentanza tal-Kummissjoni Ewropea f’pajjiżna,
organizzat padiljun ta’ propaganda għall-munita waħda ta’ l-Unjoni
Ewropea, l-Ewro, li se tiddaħħal f’pajjiżna fl-1 ta’ Jannar,
2008.
F’dan il-padiljun għamlu post fejn it-tfal setgħu “jilagħbu” b’din il-munita li tant ġabet għoli tal-ħajja f’pajjiżi oħrajn ta’ l-Unjoni Ewropea.
Saru wkoll diskorsi dwar kemm se jkollna benefiċċji
meta ndaħħlu l-Ewro f’pajjiżna!
Aktar milli jħajru lit-tfal biex “jilagħbu bl-Ewro”, aktar xieraq
li wieħed jgħid kemm se jilagħbu bina n-negozjanti meta tiddaħħal
l-Ewro!
Nagħmlu għonqna taħt mannara, li Dr Gonzi jgħajjat elezzjoni
qabel tiddaħħal l-Ewro għax jaf li għoli aktar tal-ħajja
se jkollna u mhux logħob tat-tfal.
Is-Sibt, 5 ta’ Awissu, 2006.
e-mail: cnimalta at yahoo.co.uk
IRRIDU L'INDIPENDENZA MILL-UNJONI EWROPEA
Inroddulek ħajr li żort il-paġna tagħna
Appoġġ fil-ġlieda għall-Indipendenza u l-Ħelsien
Trid tgħin biex niksbu mill-ġdid l-Indipendenza u l-Ħelsien?
Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.
Issieħeb fis-CNI billi tibgħat €5 flimkien ma' din il-formola lis-
Segretarju Finanzjarju CNI,
60A, Triq id-Dejqa,
Valletta
Isem .......................................................
Indirizz ...................................................
ID Numru ...............................................
Inroddulek ħajr ta’ l-għajnuna tiegħek
Malta ħielsa u newtrali fl-aħħar tirbaħ