MERĦBA FIL-PAĠNA TAS-CNI
KAMPANJA ĦELSIEN NAZZJONALI
Kienet, għadha u tibqa' favur il-ħaddiema Maltin
u kontra s-sħubija ta' Malta fl-Unjoni Ewropea
Is-sħubija
fl-Unjoni ttellef xogħol il-Maltin
F’dawn il-ġranet il-propogandisti tal-Gvern u ta’ l-Unjoni Ewropea kemm-il darba tennew li ma seħħetx it-theddida ta’ barranin li jiġu Malta wara li sseħibna fl-Unjoni Ewropea u jieħdu x-xogħol tal-Maltin.
Iżda fil-fatt hekk qiegħed jiġri, mingħajr
ma l-poplu jintebaħ.
Eżempju ċar ta‘ dan huwa dak li ġara mill-ħaddiema tas-Sea
Malta.
Il-144 haddiem Malti tas-Sea Malta ntefgħu ’l barra, u xogħol ingħata lill-ħaddiema Taljani tal-kumpanija Grimaldi.
Mhux ġew Malta l-ħaddiema Taljani, iżda ħadulna x-xogħol li kienu jagħmlu l-ħaddiema Maltin tas-Sea Malta.
In-nolijiet li bihom is-Sea Malta kienet tħallas 144
paga lill-ħaddiema Maltin, issa qegħdin jinġabru mill-kumpanija
Taljana u jitħallsu l-pagi tal-baħrin u ħaddiema Taljani
tal-Grimaldi.
Dan id-delitt tal-ħaddiema Maltin seħħ għax l-Unjoni Ewropea
ġagħlet lill-Gvern jitlaq minn idejh in-negozju li kienet tagħmel
is-Sea Malta, u għax il-Gvern, mingħajr kuxjenza nazzjonali, minflok
żgura li x-xogħol imur għand il-privat Malti, ftiehem minn taħt
sabiex ix-xogħol tal-kumpanija tal-poplu Malti jittieħed b’xejn
mill-barranin, ħbieb tal-Ministru Gatt.
Mhux biss ix-xogħol tal-Maltin qiegħed jittieħed mill-barranin,
minhħabba s-sħubija tagħna fl-Unjoni Ewropea, iżda anki
l-qligħ li kienu jagħmlu l-Maltin, issa ħafna minnu qiegħed
jittiekel mill-barranin ta’ l-Unjoni.
Għadu kif tħabbar li l-Awstrijaċi issa kisbu aktar min-nofs ta’
l-azzjonijiet tal-kumpanija ta’ l-airport terminal, l-MIA, u b’hekk
jikkontrollaw huma l-kumpanija u t-terminal.
Huwa għajb u tal-mistħija li l-uniku bieb ta’ safar bl-ajru li l-poplu Malti għandu, huwa mhux f’idejn il-Maltin, iżda f’idejn il-barranin.
Il-qligħ mit-terminal minflok jibqa’ f’idejn
il-Maltin, imur għand il-barranin.
Sena ilu ġara l-istess fil-kaz tal-Freeport tagħna.
L-uniku port ħieles li għandna
waqa’ f’idejn kumpanija barranija u hija għandha l-kontroll tiegħu,
minflok li l-kontroll inżamm f’idejn il-poplu tagħna.
Issa l-istess storja tista’ tiġri fil-każ tal-Port il-Kbir kemm-il
darba l-Gvern jiddeċiedi li jagħti l-kuntratt tal-ħatt u t-tagħbija
tal-merkanzija fil-Port il-Kbir lil kumpanija barranija li tefgħet offerta
għall-kuntratt.
Jekk jiġri dan, nispiċċaw
li anki ż-żewġ bibien ta’ safar bil-baħar, il-Freeport u
Port il-Kbir, ikunu kkontrollati mill-barranin, u mhux aktar f’idejna
l-Maltin.
Din hija konsegwenza ħażina oħra tas-sħubija ta’ Malta
fl-Unjoni Ewropea.
M’għadniex
nikkmandaw f’darna, u erġajna sirna f’idejn il-barranin.
L-Unjoni
Ewropea tipprova tirxoxta l-Kostituzzjoni
Il-mexxejja ta’ x’uħud mill-pajjiżi ta’ l-Unjoni Ewropea qegħdin
jittamaw li, bħal ma Lazzru reġa’ rxoxta mill-mewt, hekk iseħħ
lill-kadavru tal-Kostituzzjoni ta’ l-Unjoni, li l-Franċiżi u
l-Olandiżi qatlu s-sena l-oħra meta vvotaw kontriha fir-referenda.
Dan il-fatt m’għandux għaliex jiskanta lilna meta niftakru li anki
l-Membri tal-Parlament Malti fis-6 ta’ Lulju tas-sena l-oħra, ivvotaw
favur il-ġisem mejjet tal-Kostituzzjoni ta’ l-Unjoni li ftit gimgħat
qabel fgawha l-Franċiżi u l-Olandiżi.
Fost dawn li jridu b’xi mod jagħtu l-ħajja lill-Kostituzzjoni ta‘
l-Unjoni Ewropea, insibu lil Anġela Merkel, il-Kanċillier ġdida
tal-Ġermanja, Jacques Chirac, il-President ta‘ Franza; u Wolfgant
Schussel, il-Kanċillier ta’ l-Awstrija, għalkemm ma jaqblux
bejniethom kif jistgħu jagħmlu dan.
Anġela Merkel trid li l-Kostituzzjoni tibqa’ sħiħa, bla tibdil,
kif tfasslet, u magħha tiżdied stqarrija dwar id-dimensjoni soċjali
ta’ l-Unjoni Ewropea.
Mentri Jacques Chirac hu tal-fehma li l-Parlament Franċiż jirratifika partijiet biss tal-Kostituzzjoni u mhux kollha kemm hi.
Fil-waqt li Wolfgang Schussel isostni li m’għandhomx
jintgħażlu mill-Kostituzzjoni dawk il-bċejjeċ biss li jintgħoġbu,
iżda huwa ma ħareġ b’ebda proposta konkreta x’jista’ jsir.
Hemm imbagħad Josè Luis Rodriguez Zapatero, il-Prim Ministru ta’ Spanja,
li wissa li Spanja mhix lesta taċċetta tibdil fil-Kostituzzjoni li
l-poplu Spanjol ivvota favuriha f’referendum.
Kontra
l-Kostituzzjoni
Min-naħa l-oħra, għandna mexxejja ta’ x’uħud mill-pajjiżi
l-oħrajn ta’ l-Unjoni li assolutament ma jridux jafu aktar
bil-Kostituzzjoni ta’ l-Unjoni.
Fost dawn hemm Bernard Bot, il-Ministru ta‘ l-Affarijiet Barranin ta’ l-Olanda, li stqarr li l-Olanda mhi sejra qatt tirratifika l-Kostituzzjoni, li għall-Olanda hija mejta.
Hemm ukoll il-mexxejja tal-partit fil-gvern tal-Polonja,
il-partit magħruf bħala “Law and Justice Party” li qal li qegħdin
jaħlu ż-żmien għalxejn dawk li qegħdin jippruvaw
jirxoxtaw Kostituzzjoni maqtula.
Anki Gordon Brown, il-Kanċillier ta’ l-Exchequer ta’ l-Ingilterra,
ikkritika lill-Unjoni Ewropea li trid terġa’ tagħti l-ħajja
lill-Kostituzzjoni.
Aktar kmieni din is-sena l-Parlament Ewropew approva rapport imħejji
mill-Membri tal-Parlament, l-Ingliż Andrew Duff u l-Awstrijak Johannes
Voggenhuber, li pproponew li jsiru dibattiti pubbliċi dwar l-integrazzjoni
ta’ l-Ewropa fil-ġejjieni, bil-għan li tiġi approvata
l-Kostituzzjoni ta’ l-Unjoni sas-sena 2009.
Membri tal-Parlament tal-Ġermanja, tal-Finlandja u ta’ l-Awstrija
kkritikaw ir-rapport u qalu li d-dibattiti proposti kien se jsiru biex jinbena
appoġġ għall-Kostituzzjoni li l-Franċiżi u l-Olandiżi
qatlu.
L-UE
tgħollilna l-prezzijiet bit-taxxi
Wieħed mill-effetti l-aktar ħżiena tas-sħubija ta’ pajjiżna
fl-UE huwa ż-żieda fl-għoli tal-ħajja.
Fost l-agħar żidiet hemm dawk tal-prezzijiet tal-pitrolju, tal-gass, tal-petrol, tad-dijżil u ta’ l-elettriku.
Fuq l-għoli tal-prezz taż-żejt li minnu dawn il-prodotti jiddependu, l-Unjoni Ewropea tordna lill-pajjiżi mseħbin biex jimponu taxxi u soprataxxi, mingħajr ma jimpurtaha mit-tbatijiet li tikkaġuna fuq il-massa tal-poplu li mhix f’qagħda li żżid id-dħul tagħha daqskemm jogħlew il-prezzijiet.
Minn dan il-kalvarju l-UE qiegħda tgħaddi lill-poplu Malti.
Malta jkollha tobdi d-Direttiva numru 2003/96/EC ta’ l-Unjoni li tgħid x’għandha tkun lanqas taxxa li titħallas fuq il-petrol, id-dijżil, il-pitrolju u l-gass.
Din id-Direttiva timponi li jkun hemm taxxa ta’ 421 Ewro fuq kull elf litru petrol biċ-ċomb.
Għandu jkun hemm taxxa ta’ 359 Ewro fuq kull elf litru tal-petrol bla comb.
U fuq id-dijżil u l-pitrolju, għandu jkun hemm taxxa ta’ 302 Ewro għal kull elf litru, li titla’ għal 330 Ewro fis-sena 2010.
Fil-waqt li fuq iċ-ċilindri tal-gass, għandu jkun hemm taxxa ta’ 125 Ewro kull elf kilogramma.
Dawn huma kollha ċifri uffiċjali li huma
ppubblikati fil-ġurnal uffiċjali ta’ l-UE.
Fuq l-elettriku, barra t-taxxa ordnata fl-istess Direttiva, hemm ukoll it-taxxa
tal-VAT li l-UE tinsisti li tkun applikata bilfors, għalkemm fil-każ
ta’ Malta, l-UE aċċettat li ma tkunx ir-rata kollha ta’ 18
fil-mija.
Mat-taxxa fuq l-elettriku, u l-VAT fuqu, issa l-poplu Malti qiegħed jiġi
mġiegħel iħallas ukoll is-soprataxxa li telgħet għal 67
fil-mija, li tfisser li għal kull lira, irridu nħallsu lira u 67
ċentezmu.
Dan huwa serq tal-poplu li qiegħed isir bis-saħħa
tas-sħubija fl-Unjoni Ewropea.
Infakkru li ftit taż-żmien ilu l-Ministru Austin Gatt ħarbitlu li
dawn it-taxxi jridu jkomplu jogħlew aktar minħabba t-taxxi li l-UE
timponi f’dan is-settur ta’ l-enerġija.
Barra l-impożizzjonijiet ta’ l-Unjoni Ewropea, hemm ukoll fin-nofs logħba
qarrieqa tal-Gvern Malti.
Bl-iskuża ta’ l-għoli taż-żejt, il-Gvern għamel soprataxxa kbira ħalli jnaqqas id-dejn ta’ l-EneMalta u jkun jista’ jdaħħal l-Ewro kemm jista’ jkun malajr.
Meta mbagħad tasal l-elezzjoni ġenerali, inaqqas is-soprataxxa.
B’dan il-mod, il-Gvern ikun qiegħed iqarraq
bil-poplu darbtejn, issa, u qabel l-elezzjoni.
L-istess qerq intwera mill-Gvern meta għolla ħafna l-prezz tal-pitrolju.
Qal li għollieh għax kien jintuża minn tal-linja.
Fil-fatt, għollieh, għax l-Unjoni għamlet l-istess taxxa fuq id-dijżil u l-pitrolju.
M’hemmx tmiem, għall-qerq ta’ l-Unjoni Ewropea.
Naħsbu ftit
Il-Laħma għall-barrani – Ix-xaħma għall-Maltin
Miljuni ta’ liri qligħ
Jiftaħru l-banek bih.
Is-sidien mghattnin bil-flus
U d-depożitanti b’imgħax magħkuż.
Kollox se jisirqulna
Kollox se jisirqulna!
Aħna żgħar u bla saħħa.
Se jġibuna fixxa
Mid-Med, Sea Malta – kollox sparixxa!
Is-Sibt, 4 ta’ Marzu, 2006.
IRRIDU L'INDIPENDENZA MILL-UNJONI EWROPEA
e-mail: cnimalta at yahoo.co.uk
Inroddulek ħajr li żort il-paġna tagħna
Appoġġ fil-ġlieda għall-Indipendenza u l-Ħelsien
Trid tgħin biex niksbu mill-ġdid l-Indipendenza u l-Ħelsien?
Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.
Issieħeb fis-CNI billi tibgħat €5 flimkien ma' din il-formola lis-
Segretarju Finanzjarju CNI,
60A, Triq id-Dejqa,
Valletta
Isem .......................................................
Indirizz ...................................................
ID Numru ...............................................
Inroddulek ħajr ta’ l-għajnuna tiegħek
Malta ħielsa u newtrali fl-aħħar tirbaħ