MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

Il-mijiet ta’ sidien tax-xarabanks

* li kellhom iċedu ħwejjiġhom u xogħolhom

* huma vittmi oħrajn

* tas-sħubija ta’ pajjiżna fl-Unjoni Ewropea,

* bħall-eluf ta’ ħaddiema tat-Tarzna li tħarbtet

* u tal-fabbriki li kellhom jagħlqu.

Qabel l-aħħar elezzjoni,

* il-Gvern wiegħed lill-assoċjazzjoni tas-sidien tax-xarabanks

* kuntratt għal għaxar snin.

Iżda wara l-elezzjoni,

* fit-13 ta’ Mejju tas-sena l-oħra,

* il-Ministru Gatt stqarr

* li ma setax jagħti l-kuntratt tat-trasport pubbliku

* lill-assoċjazzjoni tas-sidien,

* għax l-Unjoni Ewropea ma ħallietx lill-Gvern

* jonora l-wegħda ta’ qabel l-elezzjoni,

* u ġiegħlitu joħroġ sejħa pubblika għall-offerti

* miftuħa wkoll għal kumpaniji barranin.

Issa l-Gvern ġiegħel lis-sidien iċedu l-liċenzji u jbiegħu l-vetturi tagħhom, u ta’ dan se jitħallsu s-somma ta’ €53,824,800.

Mill-400 xarabank li l-Gvern xtara, 125 biss se jkun jista’ jbiegħ lill-kumpanija li se tingħata l-kuntratt tat-trasport pubbliku, waqt li se jarmi 315-il xarabank qadima.

Għal-liċenzji li l-Gvern ħa u għax-xarabanks qodma li se jarmi, se tkun tħallset is-somma ta’ €38,449,800.

Filwaqt li fil-każ ta’ 125 xarabank, il-Gvern jista’ jiġbor lura mingħand il-kumpanija li tingħata l-kuntratt, is-somma ta’ €1,625,000 mis-somma ta’ €15,375,000 mħallsa għalihom, l-ammont akbar ta’ €38,449,000 mhux se jkun jista’ jirkuprah u għalhekk se jiżdied mad-dejn nazzjonali tal-pajjiż.

Il-Gvern qiegħed jiftaħar li l-pajjiż jaqbillu bit-tibdil li se jsir fit-trasport pubbliku għax mhux se jkompli jħallas is-sussidju ta’ madwar €8 miljun fis-sena.

Iżda dan mhux minnu u l-pajjiż se jitlef u mhux jiggwadanja, u t-tort hu kollu tal-Unjoni Ewropea u tas-servili f’Malta li jaqduha u jittradixxu l-interessi nazzjonali.

Għax jekk il-Gvern kellu l-għan li ma jkomplix iħallas sussidju għat-trasport pubbliku, kien jilħaq dak il-għan kieku onora l-wiegħda ta’ qabel l-elezzjoni u ta l-kuntratt tat-trasport pubbliku lill-assoċjazzjoni tas-sidien tax-xarabanks.

Ma kellux għalfejn jagħti l-kuntratt lill-barranin, ħlief biex jissodisfa lill-Unjoni Ewropea kontra l-interessi tal-pajjiż.

Għax il-kumpanija barranija se tieħu f’idejha t-trasport pubbliku f’pajjiżna, biex tagħmel qligħ minn fuqna.

Il-qligħ se jsir minn fuq in-nollijiet li l-poplu Malti se jkollu jħallas għat-trasport u se jmur għand il-barranin.

Kieku l-kuntratt ingħata lill-assoċjazzjoni tas-sidien tax-xarabanks,

* il-qligħ kien jibqa’ għand il-Maltin

* u ma kienx la jitħallas sussidju

* u lanqas is-somma ta’ €38,449,000

* li qiegħda titħallas għat-teħid tal-liċenzji

* u għax-xiri tax-xarabanks qodma li se jintremew,

* u t-€13,750,000 għal 125 xarabank li l-Gvern se jżomm.

Il-kumpanija barranija li se tingħata l-kuntratt tat-trasport pubbliku għal għaxar snin trid tagħmel mhux biss qligħ, imma trid tifdi l-kapital li toħroġ fix-xiri ta’ 125 xarabank mingħand il-Gvern, li tagħhom dan ħallas €1,625,000, u fix-xiri ta’ xarabanks oħrajn biex tgħaqqad il-flotta meħtieġa għas-servizzi tat-trasport pubbliku f’pajjiżna.

Il-qligħ u l-irkuprar lura tal-kapital li l-kumpanija barranija trid tagħmel, iridu jiġu min-nolijiet li l-pubbliku Malti se jkollu jħallas.

Il-Gvern qiegħed iġib ruħu bħal Ġaħan f’din il-kwistjoni tat-trasport pubbliku.

Qiegħed jiftaħar li l-pajjiż se jiffranka, mentri l-pajjiż se jitlef.

Għax barra l-qligħ li se jmur għand il-barranin, il-pajjiż qiegħed jitgħabba b’dejn ta’ €52,199,000, u l-imgħaxijiet li jridu jitħallsu kull sena fuqhom.

Jekk l-imgħax ikun ta’ 6 fil-mija,

* kull sena,

* il-Gvern se jkollu jħallas is-somma ta’ €3,131,940,

* li tiżdied mad-dejn nazzjonali ta’ aktar minn €4 biljun,

* li l-pajjiż diġà għandu.

Din il-ħsara se sseħħ kapriċċ tal-Unjoni Ewropea u tal-kompliċità kriminali tal-Gvern Malti.

Ma’ dan il-pajjiż se jitgħabba bil-piż tal-ħlas kull sena tal-pensjonijiet lil numru ta’ sidien tax-xarabanks li għażlu li jirtiraw mix-xogħol qabel jagħlqu l-età normali tal-irtirar.

Din il-fakultà li l-Gvern tahom, tfisser ukoll li kull sena se jonqos id-dħul tal-kontribuzzjonijiet li huma kienu jħallsu għas-Sigurtà Soċjali.

Dan ma jgħinx biex tittaffa l-problema tal-piż tal-pensjonijiet akbar mid-dħul tal-kontribuzzjonijiet li jitħallsu għas-Sigurtà Soċjali.

Quddiem dan l-isfreġju finanzjarju kollu li l-pajjiż se jġarrab bit-tibdil li se jsir fit-trasport pubbliku, il-Gvern qiegħed jinganna lill-poplu għax mhux qiegħed jistqarr il-verità li mhux fl-interess nazzjonali li mhux qiegħed jonora l-wegħda elettorali li kien għamel li jagħti l-kuntratt għat-trasport pubbliku lill-assoċjazzjoni tas-sidien tax-xarabanks għal għaxar snin.

It-titjib kollu li l-Gvern jgħid li jrid iseħħ fis-servizz tat-trasport pubbliku, xorta waħda l-Gvern seta’ jiżgura li jseħħ billi jimponih fil-kundizzjonijiet tal-kuntratt il-ġdid lill-assoċjazzjoni tas-sidien.

Gvern responsabbli kien iżomm kelmtu mas-sidien tax-xarabanks, tgħid x’tgħid l-Unjoni Ewropea, u ma kienx jaqsmilhom qalbhom u jesproprjalhom ħwejjiġhom, u jgħabbi lill-poplu Malti b’piżijiet finanzjarji kbar għal żmien twil.

Marta Andreasen hi l-eks-Chief Accountant tal-Kummissjoni Ewropea.

Hi tkeċċiet mill-pożizzjoni tagħha ta’ importanza kbira għax ma riditx tagħlaq għajnejha għall-atti ta’ fondi, korruzjoni u immaġinar skandaluż tal-frodi tal-Unjoni Ewropea.

Ir-raġuni banali li l-Kummissjoni Ewropea tat biex ħelset minn Marta Andreasen kienet li “hi ma kinitx leali” lejn il-Kummissjoni Ewropea.

Marta Andreasen ppubblikat ktieb f’Mejju 2009, eżatt qabel l-elezzjonijiet tal-Parlament Ewropew.

F’dan il-ktieb li t-titlu tiegħu hu “Brussels laid bare” (Brussels, jew l-UE mikxufa berah), Marta Andreasen tagħti dettalji li żgur ibellħu lil min jemmen li l-UE hi xi istituzzjoni serja u trasparenti.

Għax il-fatti li kixfet, jagħtu stampa kompletament differenti.

Mhux ta’ b’xejn raw kif ivvintaw kull skuża biex jeħilsu minn Andreasen biex ħadd aktar ma jiftaħ ħalqu u jikxef il-mod skandaluż kif il-flus li ċ-ċittadini jħallsu f’taxxi li jintbagħtu lill-UE, qegħdin jinsterqu.

Biex tieħu idea ta’ x’se ssibu jekk takkwistaw u taqraw dan il-ktieb, se nirrepeti dak li hemm miktub fuq il-qoxra ta’ wara tal-ktieb “Brussles laid bare”.

“Dan il-ktieb jista’ jkun li hu l-aktar importanti li qatt inkiteb dwar l-UE. Għax waqt li oħrajn ipprovaw jikxfu x’għaddej fil-qalba korrotta ta’ Brussels, ma kien ħadd tal-livell ta’ Marta Andreasen, li kienet iċ-Chief Accountant responsabbli għall-Baġit kollu tal-UE.

Bħala ħlas għall-isforzi tagħha biex tagħmel il-finanzi tal-UE trasparenti u kontabbli, l-apparat korrott ta’ Brussels l-ewwel ħadem biex jgħalqilha ħalqha, imbagħad jumiljaha, u fl-aħħar jeqridha.

Possibilment l-ebda każ ieħor ma juri b’mod aktar ċar kif l-UE, permess tal-ħabi (stealth), ingann u bullying, saret tirannija moderna."

Għal kull min hu inkwietat dwar il-poter tal-biża’ tal-UE, dan il-ktieb huwa ta’ bżonn.

Nissuġġerixxi

* kemm lill-Kummissarju John Dalli

* u lill-MEPs Maltin,

* lill-Membri Parlamentari Maltin,

* kif ukoll lill-Maltin u l-Għawdxin

* li ma jridux li flusna li nħallsu f’taxxi

* jinsterqu bil-mod skandaluż

* kif qed jiġri fl-UE,

* li jakkwistaw dan il-ktieb.

Fl-elezzjonijiet għall-Parlament Ewropew, Marta ġiet eletta mal-partit tal-United Kingdom Independence, li jrid li r-Renju Unit joħroġ mill-UE.

Mank li Andreasen tiġi wkoll f’pajjiżna u tinforma lill-poplu Malti.

Min jaf kieku s-CNI jistiednuha?

Mela flok li l-Kummissjoni Ewropea irnexxielha tagħlaq ħalq Marta Andreasen, illum din qiegħda f’pożizzjoni li aktar tista’ tkompli tikxef lill-UE beraħ.

Il-Ħamis, 4 ta’ Frar, 2010

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

60A, Triq id-Dejqa,

Valletta

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ