MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

L-immigrazzjoni illegali qiegħda tagħmlilna ħsara enormi kemm lokalment f’pajjiżna kif ukoll internazzjonalment mal-barranin.

Fl-aħħar ġranet dan l-aspett internazzjonali tal-kwistjoni ħa prominenza kbira meta l-midja barranija xxalat tkasbarna għax saħqet li ħallejna ’l fuq minn 70 immigrant mill-Eritrea jegħrqu għax ma ridniex inġibuhom f’pajjiżna u ridniehom jibqgħu sejrin Lampedusa, fejn waslu biss ħamsa minnhom.

Għalxejn ċħadna dan, għax xorta waħda l-impressjoni ħażina tal-kefrija tagħna baqgħet tingħata mill-midja barranija.

B’dan l-inċident il-problema tal-immigrazzjoni illegali issa ħadet dimensjoni oħra għalina.

M’għadhiex biss aktar problema kbira soċjali għall-poplu tagħna, iżda saret issa problema politika kbira għal pajjiżna fil-qasam internazzjonali.

U filwaqt li għandna mezzi jekk irridu, biex inrażżnu l-problema tal-immigranti illegali f’pajjiżna, m’għandniex mezzi u saħħa biex inrażżnu l-ħsara li l-midja internazzjonali tagħmlilna.

Fil-fehma ta’ ħafna ġejna fil-qagħda mwiegħra tal-lum minħabba l-fatt li ma mxejniex f’din il-kwistjoni bi trasparenza, anzi ħbejna mill-poplu ħalli nagħmlu dak li l-UE riditna nagħmlu, u mhux dak li kien fl-interess suprem tal-poplu Malti.

Ma fissirniex lill-poplu li l-kwistjoni tal-obbligu tal-għoti tal-ażil hija kwistjoni differenti mill-obbligu ta’ salvataġġ mill-għarqa.

L-obbligu tagħna li nsalvaw mill-għarqa ma jikkontestah ħadd, kemm jekk ikunu immigranti li se jegħrqu, kif ukoll jekk ma jkunux.

Iżda dan l-obbligu ma jġibx miegħu l-obbligu li nagħtu l-ażil lil min insalvaw mill-għarqa.

L-obbligu ta’ salvataġġ mill-għarqa ma joħroġx mis-sħubija tagħna fl-UE, iżda mill-liġi internazzjonali li torbot lil kull pajjiż ċivilizzat.

Fil-każ tal-għoti tal-ażil ma tikkonsidrax jekk persuna kinitx se tegħreq jew le.

Anke l-għoti tal-ażil huwa rregolat minn konvenzjoni internazzjonali, dik dwar ir-refuġjati, u pajjiżna kien aċċetta dik il-konvenzjoni fl-1971.

Iżda l-Gvern Malti (tal-Prim Ministru Borg Olivier) kien għamel għadd ta’ riservi għall-konvenzjoni, għax iċ-ċokon ta’ pajjiżna u l-kobor tal-popolazzjoni ma jippermettux li naċċettaw refuġjati mingħajr limitu.

Meta mbagħad il-Gvern Malti

* (tal-Prim Ministru Fenech Adami)

* beda jinnegozja biex pajjiżna jissieħeb fl-UE,

* l-Unjoni inisistiet li Malta tneħħi r-riservi kollha

* għall-konvenzjoni dwar ir-refuġjati,

* inkella l-UE ma taċċettax li ssieħeb lil Malta.

U l-Gvern Malti ċeda u b’hekk ittradixxa l-interessi nazzjonali tagħna.

Agħar minn hekk,

* l-UE rabtet lil Malta bir-regoli tal-ftehim ta’ Dublin II,

* li jobbligawlna li nikkunsidraw l-għoti tal-ażilu

* lill-immigranti illegali li jiġu f’pajjiżna,

* u jekk ma jikkwalifikawx għall-istatus ta’ refuġjati,

* rridu nikkunsidraw jekk humiex intitolati

* li jingħataw protezzjoni umanitarja,

* li tfisser li l-immigranti jkollna nżommuhom f’pajjiżna.

B’dan il-mod,

* bil-pressjoni tal-UE

* bid-dgħufija tal-Gvern Malti,

* il-poplu Malti bla ma jaf għax ħadd ma qallu,

* sab li pajjiżna fetaħ il-bibien

* għall-invażjonijiet tal-immigranti illegali.

U bla ma qalu lill-poplu,

* biddlu l-liġi li kienet tqis bħala delitt

*  min jidħol f’pajjiżna bla permess,

* u għamlulha li ma baqgħetx bħala att illegali,

* iżda saret biss irregolarità amministrattiva.

Għalhekk waqt li tbiddlet il-liġi,

* min kien jinqabad bla permess f’pajjiżna,

* il-Qorti kienet tordna li jkun ddeportat.

Dan kollu seħħ mingħajr ħadd ma fisser lill-poplu x’se ikunu l-konsegwenzi –

* eluf ta’ immigranti illegali jiġġerrew mat-toroq ta’ pajjiżna.

It-tattika ta’ ħabi mill-poplu wasslet biex għal numru ta’ snin il-parlament Malti qatt ma jiddiskuti l-problema tal-immigrazzjoni illegali.

Saħansitra ntqal

* li kien hemm kunsens nazzjonali dwarha,

* meta l-maġġoranza kbira tal-poplu

* żgur ma kinitx taqbel bil-mod

* kif eluf ta’ immigranti illegali

* kienu qegħdin jinżammu f’pajjiżna.

Sabiex iħawdu aktar lill-poplu,

* bdew iħalltu d-dmir li għandna

* li nittrattaw tajjeb lill-immigranti,

* ma jekk għandniex dmir li nżommuhom hawn

* u nintegrawhom fis-soċjetà Maltija,

* kif l-UE tridna nagħmlu,

* u lesta tagħtina l-flus biex nagħmlu dan.

Inqasna li nfehmu lill-poplu li l-UE tħares lejn l-immigrazzjoni b’mod għal kollox differenti minn kif il-poplu tagħna jikkunsidra din il-problema.

L-UE għandha bżonn l-immigranti,

* u sakemm tħejji programmi li jiżgurawha minn immigranti illegali,

* lesta taċċetta immigranti illegali biex isostnu l-ekonomija tagħna.

Aħna bil-maqlub tal-Unjoni,                     

* mhux m’għandniex bżonn l-immigranti,

* iżda lanqas nistgħu naċċettawhom.      

Għalhekk fil-każ tagħna,                  

* qegħdin nagħmlu żball kbir           

* li nimxu bl-istess politika              

* u regoli tal-Unjoni f’dan il-qasam,

* meta nafu li dawn ma jgħoddux għaċ-ċirkostanzi tagħna.

Lill-poplu għandna ngħidulu li l-immigranti illegali għandhom dritt għal trattament xieraq għad-dinjità umana tagħhom, u fl-ewwel lok għad-dritt għall-ħajja.

Iżda għandna ngħidu lill-poplu wkoll li l-immigranti illegali m’għandhomx dritt li jgħixu f’Malta.

Lanqas l-UE ma għandha dritt tatihom id-dritt li jgħixu u jaħdmu f’pajjiżna, għalkemm għandha dritt tesiġi li nistmaw id-dinjità umana tagħhom.

Aħna għandna d-dmir li sa kemm l-immigranti llegali jkunu hawn, niprovdulhom bl-ikel, u nagħtuhom alloġġ diċenti, ilbies u servizz tal-kura tas-saħħa.

Iżda ma għandniex dmir niprovdulhom xogħol.

La darba l-immigranti llegali                      

* huma f’pajjiżna mingħajr awtorizazzjoni,

* għandna dritt li nagħmlu restrizzjonijiet 

* fuq il-moviment ħieles tagħhom,            

* billi inżommuhom f’ċentri magħluqin.     

Ma aħniex obbligati li naraw jekk l-immigranti llegali li jsibu ruħhom f’pajjiżna mingħajr ma jridu waqt li jkunu sejjrin lejn l-Ewropa, jikkwalifikaw għall-għoti tal-istatus ta’ refuġjati, u jekk ma jikkwalifikawx, jekk għandhomx jingħataw protezzjoni umanitarja.

Inkunu obbligati nikkunsidraw dan, jekk l-immigranti llegali jiġu f’pajjiżna biex jitolbu ażilu.

Tista’ tgħid li ħadd minnhom ma jrid ażilu f’Malta meta jaf li biħ ma jkun jista’ jmur jaħdem f’ xi pajjiż kbir tal-Unjoni Ewropea.

Għandna wkoll nfissur lill-poplu x’inhi sewwa l-missjoni tal-Frontex tal-Unjoni Ewropea.

X’għandhom jagħmlu l-laneċ tal-Frontex meta jilmħu dgħajsa bl-immigranti llegali?

Għandhom jilqgħuha u jreġġghuha lura,

* jew għandhom jakkompanjawha fi trieqta lejn pajjiż tal-Ewropa?

Jekk ma għandhom ireġġgħu lura dgħajjsa bl-immigranti llegali,

* ir-rondi tal-Frontex mhumiex qegħdin irażżnu l-immigrazzjoni llegali, * iżda qegħdin jgħinuha.

Jekk ir-rondi tal-laneċ tal-Frontex ma għandhomx iħallu lid-dgħajjes tal-immigranti legali sejrin fi triqithom lejn l-Ewropa, lill-immigranti jkunu qegħdin iċaħħduhom mill-opportunità li jitolbu l-ażilu.

Din hija d-dilemma tal-missjoni tal-Frontex

* u hemm bżonn li lill-poplu ngħidulu ċar u tond

* jekk il-Frontex twaqqfetx biex trażżan l-immigrazzjoni llegali,

* jew inkella biex tinkoraġġiha.

Rajna dan l-aħħar li uffiċċjali tal-Unjoni Ewropa joġġezzjonaw lit-Taljani li reġġgħu lura lejn il-Libja immigranti legali.

Saret oġġezzjoni lil Malta wkoll.

It-Taljani waqqfuha lill-unjoni u heddew li jużaw il-veto fil-każ ta’ kull deċiżjoni li l-Unjoni tkun trid tieħu.

Mhux magħruf x’kienet ir-reazzjoni tal-Gvern Malti.

Li hu ċert hu li,

* kieku kien għall-maġġoranza tal-poplu Malti,

lill-Unjoni għandna ngħidulha

* li jekk veramnet irridu nrażżnu l-immigrazzjoni llegali,

* nridu inwaqqfu lid-dgħajjes tal-immigranti

* milli jwassluhom fil-pajjiżi tal-Unjoni.

Għax jekk l-immigranti jkunu jafu li se jintbagħtu lura, ma jkunux lesti jkomplu jħallsu l–flus u jissugraw ħajjithom għal xejn.

Hemm bżonn li lill-poplu nfemhuħ li jekk ma nridux inkomplu ngħinu lill-organizazzjonijiet kriminali li n-negozju tagħhom jikkonsisti fi “human trafficking”, għandha nibgħatu lura lill-immigranti.

Sakemm nibqgħu naċċettawhom, l-organizazzjonijiet kriminali jkomplu jagħmlu l-flus minn fuq it-tamiet tal-immigranti llegali li jsibu ħajja ġdida fl-Ewropa.

Jekk niskuraġġixxu l-immigrazzjoni llegali, nevitaw ukoll li mijiet ta’ immigranti jitilfu ħajjithom fl-ibħra tagħna, minkejja li nagħmlu kull sforz biex dawn it-traġedji ma jseħħux.

Anke hawn tidħol l-etika morali –

* li nevitaw l-okkazjonijiet li fihom l-immigranti llegali jistgħu jitilfu ħajjithom,

* billi niskuraġġixxu l-immigranti milli ibaħħru lejn l-Ewropa klandestinament.

Għandna ngħidu lill-poplu li meta nibgħatu lura lill-immigrnati llegali, ma nċaħħduhomx mill-ikel u xorb u ħwejjeġ essenzjali li jkollhom bżonn fil-vjaġġ.

Niżguraw ukoll li l-mezzi bihom jintbagħtu lura jkunu tajbin u mhux ta’ periklu, tkun kemm tkun l-ispiża biex niżguraw dan.

L-alternattiva li l-immigranti llegali nibagħatuhum lura,

* mhix li nżommuhom f’pajjiżna,

* iżda li ngħinuhom li jibqgħu sejjrin fejn iridu fl-Ewropa.

Lill-Unjoni Ewropea għandha ngħidulha li jekk ma tridnix nibgħatuhom lura, għandha tħallina ngħinuhom jibgħu sejjrin fejn iridu fl-Unjoni.

M’hemmx dubbju li l-maġġoranza kbira ħafna tal-poplu tagħna taqbel li ttieħed din il-linja mal-Unjoni Ewropea fuq l-immigrazzjoni llegali.

U tistenna li l-Parlament Malti jsostni din il-linja għall-ġid u fl-interess tal-poplu tagħna, u mhux iħalli li ssir il-ħsara enormi internazzjonali li pajjiżna qiegħed iġarrab u l-ħsara enormi soċjali li l-poplu tagħna qiegħed ibati.

Il-membru parlamentari Ewropew, Dr Simon Busuttil – dak li kien imexxi ċ-Ċentru ta’ Informazzjon (MIC) rigward in-negozjati li kienu qegħdin isiru bejn il-Gvern Malti u l-UE biex Malta tissieħeb fl-UE – dan l-aħħar inqabad kemm seta’ kien qiegħed jgħawweġ il-verità tal-fatti meta kien imexxi l-MIC.

F’artiklu li kiteb f’ġurnal lokali bl-Ingliż fil-5 ta’ Awwissu, Dr Busuttil ikkritika wieħed mill-punti li l-Kap tal-Oppożizzjoni ppropona biex jitrażżan l-għoli tal-ħajja.

Il-proposta li qabad magħha l-eks-mexxej tal-MIC kienet tirreferi għal prodotti u servizzi li l-Gvern diġà qiegħed jimporta, bħal per eżempju, il-petrol, id-diżil u żjut.

Però Dr Busuttil ra ċ-ċans li jislet biss l-ewwel sentenza tal-paragrafu li kien jirrigwarda din il-proposta, li kienet tgħid:

“Il-Gvern jimporta prodotti u servizzi huwa stess u jimbiegħu lill-pubbliku b’mod differenti.”

U ħalla barra l-bqija tal-paragrafu waqt li akkuża lill-PL li jrid li l-Gvern jibda jimporta l-istess oġġetti u servizzi bħalma kien isir fi żmien tal-“Bulk Buying’, għexieren ta’ snin ilu!

Il-punt tiegħu hu dan.

Kif Dr Busuttil qabad u interpreta kif jaqbel lilu u lill-partit tiegħu fil-Gvern dak li l-Kap tal-Oppożizzjoni ppropona, ma setgħax Dr Busuttil għamel l-istess rigward in-negozjati li kienu saru bejn il-Gvern Malti u l-UE biex Malta tissieħeb fl-UE?

Fil-fatt wieħed mill-konsulenti tal-Gvern li kellu sehem importanti f’dawk in-negozjati rigward l-ambjent u l-kwistjoni tal-kaċċa u l-insib, kien is-sur Saviour Balzan.

Is-Sur Balzan stess kien kixef l-ingann li kien sar waqt dawk in-negozjati biex Malta tissieħeb fl-UE, meta fis-7 ta’ Mejju, 2007, kiteb hekk:

“I would remind Simon (Busuttil) that there were countless untruths about Europe that were presented to the public so as to give the impression that Europe was a bed of roses.”

Bil-Malti:

“Nista’ nfakkar lil Simon kemm gideb intqal bla qies biex tingħata l-impressjoni li l-Ewropa kienet xi ġenna tal-art.”

Jien kemm-il darba kelli skontri ma’ Dr Busuttil kemm fuq il-ġurnali u anki fil-programm “Xarabank”.

Darba waħda Dr Busuttil (li personalment ma għandi xejn kontrih) qalli:

“Ed, għaliex dejjem taqbad miegħi?”

Għedtlu;

“jien naqbad miegħek l-aktar mhux fuq dak li tgħid, iżda fuq dak li tħalli barra u ma tgħidux.”

Alla biss jaf kemm affarijiet ma ntqalux lill-poplu Malti qabel ir-Referendum u li issa l-poplu qiegħed isibhom ma’ wiċċu. Semmuhomlhom dawn l-affarijiet meta l-appostli tal-UE jiġu fil-pjazza tar-raħal tagħkom.

Il-Ħamis, 3 ta’ Settembru, 2009

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

60A, Triq id-Dejqa,

Valletta

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ