MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIMU U L-ĦAKMA DITTATORJALI ILLEGALI TA' L-UNJONI EWROPEA

GĦID LID-DEPUTAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

L-Unjoni Ewropea qiegħda tittratta ħażin lill-Prim Ministru u l-Ministri Maltin fil-laqgħat li jkollhom tal-Kunsill Ewropew u tal-Kunsill tal-Ministri. 

Hija qiegħda ċċaħħadhom minn dokumenti u informazzjoni li joħorġu min-NATO, anke meta jirrigwardaw deċiżjonijiet ta’ l-Unjoni Ewropea u ma tħallihomx jieħdu parti fil-laqgħat fejn jiġu diskussi dawk id-dokumenti u informazzjoni.

Dan it-trattament ħażin mogħti lill-Prim Ministru u l-Ministri Maltin inkixef fl-istqarrija li l-Gvern ħareġ fl-20 ta’ Marzu, dwar il-parteċipazzjoni ta’ Malta fl-alleanza militari Partnership for Peace (PfP) tan-NATO.

Il-Gvern, minflok żamm sod u ġiegħlha lill-Unjoni Ewropea timxi miegħu kif jixraq lil pajjiżna, ċeda għall-pressjoni u aċċetta li jsieħeb lil Malta fil-Partnership for Peace tan-NATO, kif rieduh jagħmel l-Unjoni u l-Istati Uniti ta’ l-Amerika. 

Lil dawn għoġobhom, iżda lill-poplu Malti ttradih għax m’onorax il-ġurament li ħa li jħares u jkun leali għall-Kostituzzjoni tagħna.

Huma l-Frozi Armati ta’ Malta (FAM) li se jieħdu sehem fl-attivitajiet tal-Partnership for Peace, mhux il-membri tal-Protezzjoni Ċivili ta’ Malta. 

Għax il-Partnership for Peace hija organizzazzjoni militari u l-attivitajiet tagħha huma operazzjonijiet militari. 

Hija wkoll alleanza ta’ pajjiżi li jagħmlu ftehim man-NATO u hi din ta’ l-aħħar li tikkontrolla u tmexxi l-alleanza.

Indipendentament mix-xorta ta’ l-attivitajiet li s-suldati Malti se jieħdu sehem fihom, il-fatt stess li pajjiżna huwa msieħeb fil-Partnership for Peace tan-NATO jammonta għal parteċipazzjoni f’alleanza militari, kontra dak li hemm espressament ipprojbit fil-Kostituzzjoni Maltija.

L-Unjoni Ewropea taħti għall-ksur tal-Kostituzzjoni Maltija mill-Gvern, għax qiegħda tostakola li pajjiżna jipparteċipa bla xkiel, bis-sħiħ u bla kundizzjoni fl-organi ta’ l-Unjoni jekk ma jiħux sehem fil-Partnership for Peace, skond ma l-Gvern stqarr fl-20 ta’ Marzu.

L-UE mhix lesta tgħaddi lill-Gvern dokumenti u informazzjoni kunfidenzjali li jiġu għandha min-NATO, jekk Malta ma tipparteċipax fil-Partnership for Peace. 

Bħallikieku, Malta tista’ tiġi f’data biss jekk tkun fil-Partnership for Peace, skond l-Unjoni.

Dan l-atteġġjament ta’ l-Unjoni Ewropea huwa insult lil pajjiżna u jagħmel għajb lill-Unjoni u l-Gvern waqqa’ l-ġieħ ta’ pajjiżna meta qagħad għal dan it-trattament li jżebblaħ l-integrità u s-serjetà ta’ pajjiżna. 

Għax meta l-maġġoranza vvotat favur is-sħubija fl-Unjoni Ewropea, riedet tifhem sħubija sħiħa, mhux nofs sħubija għax ma konniex fil-Partnership for Peace.

L-Unjoni Ewropea m’għamlithiex kundizzjoni ta’ sħubija sħiħa, li nkunu fil-Partnership for Peace, li wkoll qatt ma ssemma x’imkien fil-kampanja tar-Referendum.

FAKKARNA, mhux iċċelebrajna Jum il-Ħelsien, il-31 ta’ Marzu, 1979, għax il-Ħelsien tlifnieh meta sseħibna fl-Unjoni Ewropea. 

Nerġgħu niċċelebrawh, meta noħorġu minn taħt il-madmad ta’ l-UE.

Qabel ma Malta kisbet l-awtonomija sħiħa minn taħt il-ħakma Ingliża, ħafna oqsma importanti kienu meqjusin “reserved matters” taħt il-kontroll ta’ Londra u l-Gvern Malti ma kellux setgħa fuqhom. 

Wara li pajjiżna ssieħeb fl-Unjoni Ewropea, ħafna oqsma importanti għaddew minn taħt il-kontroll tal-Gvern Malti għal għand l-Unjoni.

Pajjiżna reġa’ waqa’ lura għall-qagħda ta’ ħafna “reserved matters” li l-Gvern Malti m’għandux setgħa fuqhom għax huma taħt il-kontroll ta’ Brussels. 

F’dawn l-oqsma kollha Malta tilfet is-sovranità, li għaddiet għand l-Unjoni Ewropea.

Dan ifisser li l-poplu Malti m’għandux rajh f’idejh fl-oqsma kollha li l-ftehim tas-sħubija fl-UE ċedihom lill-Unjoni. 

Fihom, il-poplu Malti ma jikkmandax, iżda huwa kkmandat mill-UE.

Għalhekk il-poplu Malti m’għadux ħieles għax f’dawn l-oqsma kollha huwa dipendenti mill-barranin ta’ l-Unjoni.

L-indipendenza ta’ pajjiż jew hija sħiħa, jew il-pajjiż mhu indipendenti xejn. Il-ħelsien għal pajjiż jew ikun sħiħ, jew il-pajjiż ma jkunx ħieles xejn. 

Għalhekk pajjiżna tilef l-Indipendenza u l-Ħelsien tiegħu, għax f’ħafna oqsma hija l-Unjoni li tikkmandana, mhux il-Gvern Malti.

Huwa għajb kbir li fostna għandna min huwa kuntent u ferħan li aħna mmexxijin mill-UE u mhux mill-Gvern Malti. 

U l-għajb huwa akbar ta’ dawk il-politiċi li dejjem lesti li jagħmlu dak li l-Unjoni tgħidilhom jagħmlu, minkejja li dan ma jkunx fl-aħjar interessi tal-poplu tagħna.

M’għandhomx il-fibra morali li jieqfulha lill-Unjoni u jgħidulha li mhux se jobduha fejn l-interessi ta’ l-Unjoni ma jkunux ukoll jaqblu ma’ dawk tal-poplu Malti.

Hu preċiżament dan l-agħar tal-ftehim tas-sħubija fl-Unjoni li għamilna ħames snin ilu. 

Li ċedejna lill-Unjoni s-sovranità u l-Indipendenza u l-Ħelsien ta’ pajjiżna għall-wegħdiet tal-fondi li l-Unjoni tagħtina. 

Partatna l-libertà tal-poplu mal-fondi ta’ l-Unjoni, meta l-libertà m’għandhiex prezz. 

Għax aħjar ma jkollokx ġid, iżda tkun ħieles, milli jkollok il-ġid, iżda tkun maħkum.

L-akbar ħsara s-sħubija fl-Unjoni Ewropea għamlitha liż-żgħażagħ

Dgħajfitilhom il-valuri u mewtitilhom il-ħeġġa nobbli li jaħdmu għal art twelidhom u biex iservu lil ġenshom, u minflok għamlithom egoisti u jimportahom biss mit-tgawdija personali. 

Ma jħossu xejn li huma ċittadini Maltin, basta kburin li huma Ewropej. 

Ma jirrealizzawx li l-aqwa forza kontra l-UE u l-politika tagħha, huma ż-żgħażagħ tal-pajjiżi ta’ l-Unjoni, li spiss jirribellaw kontra l-inġustizzji soċjali li jifnu lill-popli ta’ l-Unjoni.

ĦAMES snin ilu, fit-8 ta’ Marzu, 2003, maġġoranza żgħira qalet IVA għall-ftehim tas-sħubija fl-Unjon Ewropea nnegozjat mill-Gvern ta’ Malta. 

Dak in-nhar il-maġġoranza approvat is-sħubija ta’ pajjiżna fl-Unjoni kif kienet bir-regoli magħmulin bid-diversi trattati li l-Unjoni għamlet matul is-46 sena minn mindu twaqqfet fl-1957. 

Jekk il-maġġoranza kinitx taqbel mas-sħubija kieku r-regoli ta’ l-Unjoni kienu differenti minn dawk li kienu fl-2003, ma jistax jingħad.

Iżda issa bit-Trattat ta’ Lisbona r-regoli ta’ l-Unjoni Ewropea qegħdin jinbidlu. 

M’għandniex dritt ngħidu li l-maġġoranza xorta waħda kienet tapprova li pajjiżna jissieħeb fl-UE magħmula skond ir-regoli l-ġodda tat-Trattat ta’ Lisbona.

M’għandniex dritt nassumu dan, aktar u aktar meta ħadd ma fisser sewwa x’inhuma r-regoli l-ġodda magħmulin bit-Trattat ta’ Lisbona.

Għamlu abbuż kbir ir-rappreżentanti tal-poplu fil-Parlament li assumew li għandhom mandat mill-poplu biex japprovaw ir-regoli l-ġodda ta’ l-UE magħmulin bit-Trattat ta’ Lisbona, mingħajr ma kienu qatt qabel tkellmu mal-poplu dwar ir-regoli l-ġodda ta’ l-Unjoni u mingħajr ma vverifikaw jekk il-maġġoranza kinitx trid li tkompli bil-ftehim tas-sħubija f’unjoni li qiegħda tibdel ir-regoli tagħha.

M’hemmx dubju li fiċ-ċirkostanzi l-ġodda maħluqin bit-tibdil tar-regoli ta’ l-Unjoni, kien doveruż f’pajjiż demokratiku li l-poplu jiġi mistoqsi jekk japprovax li jibqa’ msieħeb fl-UE bir-regoli l-ġodda mibdulin bit-Trattat ta’ Lisbona. 

Hekk jitlob ir-rispett li jixraq lir-rieda tal-poplu minn min jipprattika d-demokrazija, mhux jiftaħar dwarha, iżda b’għemilu jkasbarha.

Kien imissha l-UE stess, kieku kienet istituzzjoni demokratika, li tinsisti mal-pajjiżi membri tagħha li jfittxu jistabbilixxu l-fehma tal-popli dwar ir-regoli l-ġodda ta’ l-Unjoni mdaħħlin bit-Trattat ta’ Lisbona. 

Minflok imxiet kif titlob id-demokrazija, l-Unjoni Ewropea nsistiet bil-maqlub li l-pajjiżi membri jaħarbu milli jagħmlu referenda, għax beżgħet li l-poplu f’ħafna mill-pajjiżi membri, ma jaqblux mar-regoli l-ġodda tat-Trattat ta’ Lisbona.

Dan l-aġir ta’ l-UE ċarratilha l-maskra ta’ l-ipokresija u kixifha kemm mhi demokratika xejn u kemm ma tirrispettax ir-rieda tal-poplu fejn din ma tkunx taqbel mar-rieda tagħha.

B’hekk id-“democratic deficit” fl-Unjoni kiber u l-appoġġ popolari għaliha naqas… u naqas sew. 

Il-ftaħir kollu u l-propaganda kbira ta’ dawk kollha li rikbu l-‘gravy train’ ta’ l-UE billi ħasbu fl-interessi personali tagħhom, mhux se jwaqqfu l-oppożizzjoni popolari għall-UE milli tkompli dejjem tinfirex.

Aktar ma jgħaddi ż-żmien, aktar jidher ċar li l-UE hija biss ħlejqa artifiċjali tal-politiċi, mhux wild naturali tal-popli ta’ l-Ewropa.

Nifirħu

Nifirħu liż-zgħażagħ tal-Graffiti li ħarġu jipprotestaw kontra l-Partnership for Peace (PfP) u lil Żmienijietna li kkundannat il-parteċipazzjoni ta’ Malta f’din l-alleanza tan-NATO.

IRRIDU L'INDIPENDENZA MILL-UNJONI EWROPEA

Il-Ħamis, 3 ta’ April, 2008

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ