MERHBA FIL

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LID-DEPUTAT PARLAMENTARI TIEGĦEK LI TRID LI MALTA TIKSEB LURA

L-INDIPENDENZA U L-ĦELSIEN!

L-Unjoni Ewropea ordnat li fis-sena 2011 il-Maltin u l-Għawdxin iħallsuha €68,000,000

€186,000 kuljum misruqa minn ħalq uliedek

minn Karmenu Mifsud Bonnici KAMPANJA ĦELSIEN NAZZJONALI CNI

Malta u l-ġlied fil-Libja

Biex twaqqaf ġlieda, tipprova tferraq mhux tgħin lil naħa tbatti lill-oħra.

Fil-gwerra ċivili li hemm fil-Libja, min ma jridx li jinxtered aktar demm, jagħmel li jista’ biex l-ewwel iwaqqaf it-tqabid bejn il-forzi tar-ribelli u l-forzi governattivi.

Iżda l-UE, mhix ħerqana li ma jkunx hemm aktar qtil bejn il-Libjani, imma hi ħerqana li l-oppożizzjoni tirbaħ.

U Malta, għax hi marbuta mal-Unjoni Ewropea, qiegħda tinjora li l-Kostituzzjoni Maltija tobbligana li taħdem attivament għall-paċi ma ħadet l-ebda inizjattiva biex tipprova twaqqaf il-ġlied fil-Libja u biex ma jinxteridx demm aktar.

Minflok, ikkundannat il-mezzi vjolenti li bihom il-forzi governattivi qegħdin jikkumbattu l-mezzi vjolenti tar-ribelli, bħallikieku, min ikun attakkat, mhux bilfors jkollu jiddefendi lilu nnifsu.

L-istess qegħdin jagħmlu l-Ġnus Magħquda, li qegħdin jimxu kif iridhom l-Istati Uniti tal-Amerika.

Qatgħu li jimponu sanzjonijiet fuq il-Gvern Libjan, bħallikieku mhux il-poplu Libjan se jkun milqut ħażin bihom.

Iżda l-Gvern Malti b’għaġġla kbira daħħalhom fis-seħħ mil-lum għal għada, mingħajr ma qagħad jara jekk is-sanzjonijiet hux se jagħmlu aktar ħsara milli ġid lill-poplu Libjan.

Il-Gvern Malti nesa l-ħsara li s-sanzjonijiet kontra l-Libja kienu għamlu fis-snin 90.

L-UE u l-Ġnus Magħquda kkundannaw l-użu tal-vjolenza kontra dawk li jipprotestaw paċifikament, iżda naqsu li jikkundannaw l-użu tal-vjolenza minn dawk li jipprotestaw, ikissru u jaħarqu postijiet pubbliċi, jisirqu minnhom, u joqtlu l-għassiesa u l-forzi tas-sigurtà li jipprovaw ma jħalluhomx ikissru, jaħarqu u jisirqu.

L-UE u l-Ġnus Magħquda jagħrfu lill-Gvern Libjan, u jafu li bħal kull Gvern ta’ kull pajjiż jagħmel minn kollox biex ma jitħarrbatx minn elementi ribelli fil-pajjiż u minn barranin ostili għalih.

L-UE u l-Ġnus Magħquda kixfu jdejhom billi għamluha ċara li huma kontra l-Gvern Libjan, u qegħdin jappoġġjaw lill-forzi ribelli, mingħajr dawn m’huma jagħtu ebda garanzija li se jħarsu d-drittijiet u l-libertajiet fundamentali, u lanqas li se jġibu fis-seħħ id-demokrazija fil-pajjiż.

L-Istati Uniti tal-Amerika huma aktar sfaċċati mill-UE, u taw għarfien uffiċjali lill-Kunsill tal-Liberazzjoni mwaqqaf mir-ribelli f’Benghazi, waqt li pajjiżi tal-UE qegħdin jagħtuhom għajnuna li jsejħulha umanitarja għax tinkludi mediċini servizzi tas-saħħa u ikel.

X’uħud mill-pajjiżi tal-UE bħall-Ingilterra jidhru li se jingħaqdu mal-Istati Uniti tal-Amerika biex jattakkaw militarment lill-forzi governattivi Libjani, bl-iskuża li jridu jevitaw ġenoċidju.

Bħallikieku l-attakk militari tagħhom mhux se jikkaġuna mwiet ta’ Libjani, bħalma jseħħ minħabba l-offensivi li r-ribelli jagħmlu, kif ukoll minħabba d-difiża li l-forzi governattivi jagħmlu.

Jekk wieħed verament irid jevita ġenoċidju għandu jitħabat biex jieqaf il-ġlied, u wara, li jsiru negozjati bejn iż-żewġ naħat, mingħajr indħil tal-barranin.

Hu ta’ għaġeb li l-Gvern Malti jidher li wera li sejjer ukoll jappoġġja attakk militari fil-Libja.

Hi ta’ stmerrija li l-Prim Ministru jappella biex il-poplu Malti japprova li pajjiża jagħti s-sehem tiegħu fit-twettieq tal-attakk militari.

Bla tlaqlieq għandu jingħad li l-Prim Ministru se jikser il-kostituzzjoni ta’ Malta meta jagħti l-awtorizzazzjoni biex pajjiżna jintuża bħala bażi militari mill-forzi barranin li se jattakkaw militarment lill-forzi governattivi Libjani.

Malta m’għandhiex tħammeġ id-dehra tagħha ta’ pajjiż li jaħdem attivament għall-paċi billi tingħaqad mal-pajjiżi tal-UE u l-Istati Uniti tal-Amerika li, l-ewwel biegħu kemm setgħu armi u armamenti lil-Libja, u issa jattakkawha.

Jekk għall-Prim Ministru din mhix ipokrezija, għall-maġġoranza tal-Maltin hi.

Kif jistgħu l-pajjiżi tal-UE, fosthom l-Ingilterra u l-Istati Uniti tal-Amerika jikkundannaw l-użu tal-armi mill-forzi governattivi Libajni, meta huma m’għamlu xejn biex iwaqqfu lill-forzi governattivi Iżraeliti milli jbiċċru mijiet ta’ Palestinjani f’Gaża u f’inħawi oħrajn tal-Palestina?

Mhux l-Istati Uniti tagħti regolarment biljuni ta’ dollari u armamenti lil Iżrael minkejja l-atroċitajiet u l-vjolenza li dawn jikkommettu kontra l-popolazzjoni ċivili tal-Palestina?

U l-Prim Ministru Malti, minkejja dawn l-atroċitajiet u vjolenza ta’ Iżrael, se jagħmel żjara f’Iżrael biex juri lid-dinja li Malta tbierek il-kontinwazzjoni tal-okkupazzjoni Iżraelita fil-Palestina bi ksur tar-riżoluzzjonijiet tal-Ġnus Magħquda.

F’din il-kwistjoni tal-inkwiet fil-Libja, Malta wriet li tilfet il-ħila li taġixxi politikament minn rajha, u qiegħda titkaxkar kif teddeċiedi l-UE minflok li Malta turi lill-UE kif għandha timxi fl-inkwiet li jinqala’ fir-reġjun tal-Mediterran.

Issa hemm il-periklu li Malta titlef ukoll il-vokazzjoni ta’ pajjiż li ma jieħux aktar sehem fi gwerer u li dejjem jaħdem attivament għall-paċi fost il-ġnus, jekk Malta lanqas baqgħalha l-ħeġġa li taħdem biex iġġib il-paċi fost il-ġens Libjan.

Falliment tal-politika Mediterranja tal-UE

minn KAMPANJA ĦELSIEN NAZZJONALI CNI

Il-kriżi fil-Libja kixfet il-faqar u n-nuqqasijiet tal-politika tal-UE li ma tafx kif se tilqa’ għall-konsegwenzi tal-gwerra ċivili f’dak il-pajjiż.

L-ewwel konsegwenza tal-kriżi tal-Libja hi ż-żieda fil-prezz taż-żejt u l-waqfien tal-provvista taż-żejt mil-Libja.

Dan se jkollu effett ħażin fuq l-ispejjeż tal-Industriji tal-pajjiżi tal-UE fi żmien meta l-industriji Ewropej qegħdin jisfurzaw biex jirpiljaw mill-kriżi ekonomika tal-aħħar snin.

Konsegwenza oħra tal-ġlied fil-Libja hi l-massa kbira ta’ ’l fuq minn mitt elf ħaddiema barrani li ħarġu minn dak il-pajjiż fejn kienu jaħdmu.

Fil-waqt li għadd kbir ta’ dawn il-ħaddiema jinsabu fuq il-fruntiera tat-Tuneżija mal-Libja mingħajr saqaf fuq rashom u jistennew li jingħataw għajnuna tal-ikel u xorb, l-Unjoni Ewropea moħħha li timponi sanzjonijiet fuq il-Gvern Libjan minflok qiegħda tieħu passi urġenti meħtieġa biex tegħleb il-kriżi umanitarja ta’ dawn l-eluf ta’ ħaddiema.

Hemm il-periklu li ħafna mill-ħaddiema li ħarġu mil-Libja jipprovaw jidħlu fil-pajjiżi tal-UE.

Biex jilqgħu għal dan, il-pajjiżi tal-UE għadhom qegħdin jiddiskutu x’għandhom jagħmlu, u s’issa jidhru li ma jridux jaċċettaw li jaqsmu bejniethom il-piż tal-eluf li jmorru fl-eqreb pajjiżi tal-UE, bħalma hi l-Italja u Malta.

L-UE naqset li tifhem li l-inkwiet li nqala’ fil-Libja kien se jwassal għal gwerra ċivili fejn il-Gvern jirreżisti l-isforzi tal-oppożizzjoni biex twarrbu.

L-UE ma ratx id-differenzi li jeżistu bejn iċ-ċirkostanzi soċjali tat-Tuneżija u tal-Eġittu u dawk tal-Libja, u ħasbet li fil-Libja se jseħħ l-istess li seħħ fit-Tuneżija u fl-Eġittu.

Sa ftit tal-ġimgħat ilu l-Unjoni Ewropea kienet qiegħda tiddiskuti mal-Gvern Libjan ftehim li bih l-UE kienet se tagħtih fondi u għajnuniet f’diversi oqsma.

Issa l-UE qiegħda tikkundanna bl-aktar mod aħrax l-istess Gvern li ma kienet tara xejn ħażin fih sa ftit ġimgħat ilu, tant li għamlet pressjoni fuq l-Iżvizzera biex tneħħi l-bojkott li kienet ordnat lill-pajjiżi tas-Schengen jagħmlu fuq għadd ta’ mexxejja Libjani.

L-istess bħalma ġralha fit-Tuneżija u fl-Eġittu fit-taqlib politiku li kien hemm, l-UE fil-Libja m’għandha ebda element li tista’ fuqu tibni r-rabiet li l-UE jista’ jkollha mal-Gvern tal-pajjiż jekk ma jibqax dak li hemm illum.

L-UE tinsab fid-dlam dwar il-ġejjieni tal-Libja, bħalma tinsab fid-dlam dwar dak taż-żewġ pajjiżi l-oħrajn.

It-taqlib f’dawn it-tliet pajjiżi tal-Mediterran wera l-falliment tal-politika tal-UE f’dan ir-reġjun.

Partnership bejn it-Turkija u l-UE

Il-ġimgħa l-oħra l-President Franċiż Nicolas Sarkozy għamel żjara uffiċjali fit-Turkija u qal pubblikament li t-Turkija jmissha tagħmel “Special Partnership Agreement” mal-Unjoni Ewropea.

Il-proposta ta’ Sarkozy ta’ ‘partnership’ bejn l-UE u t-Turkija jgiddeb lil dawk kollha li qabel ir-referendum tas-sħubija ta’ Malta fl-UE kienu żguraw lill-poplu Malti li fl-UE ftehim ta’ ‘Partnership’ ma setax isir.

Il-President Franċiż mhux biss ‘Partnership’ irid li jkun hemm, imma jrid ‘Special Partnership’, li tfisser li l-UE lesta tagħmel anke arranġament speċjali għal pajjiż li ma jkunx japplika bħal pajjiżi oħrajn.

Fil-każ ta’ Malta ħadd ma kien qiegħed jitlob li pajjiżna jkollu ‘Speċial Partnership’ mal-UE.

It-talba kienet għal ftehim ta’ ‘Partnership’ li l-UE komunament tagħmel ma’ ħafna pajjiżi.

B’dan kollu,

Il-President Franċiż sostna li t-Turkija ma tistax tkun membru sħiħ tal-UE, minkejja li hi ilha issa s-snin tiddiskuti mal-UE t-talba tagħha biex tissieħeb bħala membru sħiħ.

Sarkozy insista li t-Turkija ma jaqblilhiex li tadotta r-regoli u r-regolament tal-‘aquis communitaire’ tal-UE għax ixekkluha ekonomikament u soċjalment, u li ftehim ta’ ‘Partnership’ jippermetti lit-Turkija li tadotta l-politika tal-UE f’dawk l-oqsma li ma jxekkluhiex fil-progress tagħha ekonomikament u soċjalment.

B’hekk it-Turkija tista’ tikseb il-vantaġġi kollha tal-UE mingħajr ma titwikka bl-iżvantaġġi tas-sħubija u mingħajr ma tkun marbuta li tmexxi skont il-politika barranija komuni tal-UE.

Hi għalhekk tikkwalifika għall-Neighbourhood Policy tal-UE u għall-għoti ta’ fondi mill-UE lill-pajjiżi ġirien tagħha.

Malta wkoll kienet tikkwalifika għal Neighbourhood Policy tal-UE għax hi ġara tal-UE.

Barra l-UE, Malta setgħet tissieħeb magħha mingħajr ma tissieħeb fiha, u b’hekk Malta kienet tikseb il-vantaġġi kollha tal-UE mingħajr ma titgħabba bl-iżvantaġġi.

Dan il-pass Malta għadha tista’ tagħmlu jekk tapplika t-Trattat ta’ Lisbona li jagħtiha s-setgħa li toħroġ mill-UE u tagħmel ftehim ġdid ta’ sħubija magħha.

Ikun ta’ vantaġġ kbir għall-poplu Malti li pass bħal dan isir mill-aktar fis.

Ir-raġuni vera għall-attakk fuq il-Libja

L-indħil militari tal-Ingilterra u l-Amerika fil-Libja jidher f’għajnejn id-dinja Għarbija bħala repetizzjoni tal-aggressjoni li seħħet kontra l-Iraq.

Bħalma ġara fil-gwerra tal-Iraq, tikber il-mewġa Musulmana kontra l-Punent u jissaħħaħ il-fundamentaliżmu Iżlamiku.

Il-vantaġġ li l-pajjiżi tal-Unjoni Ewropea u l-Istati Uniti tal-Amerika jaħsbu li se jirbħu jekk iħarbtu lill-Gvern Libjan, ma jagħmilx tajjeb għar-rabja li ndħil militari barrani jqanqal f’miljuni ta’ Għarab u Musulmani li joġġezzjonaw li l-pajjiżi tal-Punent ifittxu kull okkażjoni biex idgħjafu il-pajjiżi Musulmani.

Għarab u Musulmani li llum huma kontra l-Gvern Libjan, iduru kontra l-Ingilterra u l-Istati Uniti u l-pajjiżi l-oħrajn tal-UE li jieħdu sehem fl-attakki militari fil-Libja.

Dan ikun ifisser pass ieħor fit-triq tal-gwerra bejn il-Punent u d-dinja Musulmana.

L-ewwel effetti tal-indħil militari barrani fil-Libja jkunu fiż-żewġ pajjiżi li jmissu magħha, it-Tuneżija u l-Eġittu.

F’dawn iż-żewġ pajjiżi ħadd ma jaf x’gvernijiet se jkun hemm fil-ġejjieni wara t-taqlib politiku li seħħ dan l-aħħar.

M’hemmx dubju li l-elementi estremisti fiż-żewġ pajjiżi jipprovaw japprofittaw mill-fatt tal-indħil barrani fil-Libja biex jinfluwenzaw l-opinjoni pubblika kontra l-Punent u kontra l-Ewropej.

Dawn jidhru f’għajnejn il-massa tal-popli Musulmani bħala li jridu jerġgħu jiddominaw bħalma għamlu għal tant żmien fl-imgħoddi.

* li r-raġuni vera għall-indħil militari huwa l-preżenza tal-provvista taż-żejt fil-pajjiż,

* u ma jridux jissugraw li jkun hemm fit-tmexxija min kapaċi jwaqqfilhom iż-żejt.

Attakk militari fuq il-Libja jkun ifisser qerda ta’ ammont kbir ta’ armi u armamenti, li ħafna minnhom kienu nbiegħu lil-Libja mill-istess pajjiżi li se jwettqu l-attakk.

Il-qerda tal-armi u l-armamenti toħloq il-bżonn ta’ produzzjoni ta’ armi u armamenti ġodda u l-industrija militari tal-produzzjoni tal-armi u armamenti tal-pajjiżi tal-Punent tmur tajjeb meta jinqerdu l-armi u l-armamenti fl-attakk li jsir fil-Libja.

Jekk il-Libja tiddgħajjef, iserraħ rasu aktar Iżrael, u l-Istati Uniti u l-pajjiżi tal-UE jridu li jonqos il-periklu lil Iżrael, li jagħmel kulma jista’ biex jimbottahom ħalli jdgħajfu lil-Libja.

Fittex li tiffirma l-petizzjoni popolari lill-Parlament Malti biex jgħaddi miżuri li jrażżnu l-immigrazzjoni illegali f’pajjiżna.

IRRIDU L'INDIPENDENZA MILL-UNJONI EWROPEA

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.