MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦLSU LIL MALTA MILL-JASAR, IL-KOLONJALIŻU U L-ĦAKMA DITTATORJALI ILLEGALI TA' L-UNJONI EWROPEA

GĦID LILL-KANDIDAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

Araw kif tassew nistgħu nitilqu mill-Unjoni Ewropea

Dan huwa video tal-Parlament Ewropew

Il-kritiċi tal-ftehim li l-Gvern Nazzjonalista għamel ma’ l-Unjoni Ewropea jixlu lill-Gvern li qiegħed jaħbi mill-poplu dak li l-Unjoni tridu jagħmel jekk Malta tissieħeb fl-Unjoni. 

Huma jsostnu li esperti ta’ l-Unjoni Ewropea ġew Malta u ddiskutew mad-dipartimenti tal-Gvern id-dħul f’Malta tat-taxxa fuq id-djar. 

Din it-taxxa titħallas kull sena fuq l-istima tal-valur tad-dar. 

Min bena daru jew xtara daru, se jsib li jkollu jħallas taxxa fuq il-valur tagħha. 

Aktar ma l-valur jiżdied, akbar ikun l-ammont tat-taxxa li tkun trid titħallas.

Meta tidhol din it-taxxa, sid ta’ dar li tkun mikrija lil ħaddiehor, ikollu jħallas it-taxxa mhux fuq il-kera li jdaħħal biss, iżda fuq l-istima tal-valur tad-dar. 

Huwa mbagħad jgħaddi l-ammont tat-taxxa li jħallas lill-inkwilin billi jżidlu l-kera bl-ammont tat-taxxa.

Il-kritiċi jsostnu wkoll li l-politika ta’ l-Unjoni Ewropea hija kontra li jkun hemm kontroll mill-Gvern fuq il-kirjiet tad-djar. 

Dan ikun ifisser li l-kera togħla skond ma jrid is-suq.

Din il-politika ta’ ebda kontroll fuq il-kirjiet tad-djar, f’xi pajjiżi tfisser li madwar nofs il-paga jew salarju tmur għall-ħlas tal-kera.

Il-kritiċi tal-ftehim ma’ l-Unjoni Ewropea jixlu lill-Gvern Malti li qiegħed jaħbi mill-poplu l-fatt li wara s-sena 2006, Malta kull sena jkollha tħallas lill-Unjoni aktar milli l-Unjoni tagħti lil Malta.

Skond iċ-ċifri li l-Gvern xandar, għas-snin 2004-2006, il-fondi li l-Unjoni se tagħti lil Malta għall-proġetti se jlaħħqu s-somma ta’ 57 miljun lira Maltija. 

Għall-istess tliet snin, il-pagamenti li Malta jkollha tagħmel lill-Unjoni huma 73 miljun lira Maltija.

Dan ifisser li fit-tliet snin, il-pagamenti li Malta trid tagħmel huma Lm16-il miljun aktar mill-fondi li l-Unjoni tagħti lil Malta. 

Dan iġib li Malta trid kull sena tħallas Lm5 miljuni aktar milli tirċievi mingħand l-Unjoni.

Wara s-sena 2006, l-Unjoni Ewropea ma tagħmilx pagamenti għall-budget ta’ Malta. 

L-għajnuna għall-budget se tkun biss għall-ewwel tliet snin, sas-sena 2006.

l-kritiċi tal-ftehim tas-sħubija jixlu lill-Gvern Malti li qiegħed iqarraq lill-imprendituri Maltin li jaħdmu għas-suq lokali, għax mhux qiegħed igħidilhom li jekk Malta tissieħeb fl-Unjoni, il-Gvern ma jkunx jista’ jkompli jagħtihom l-għajnuna li jista’ jagħtihom illum.

Il-Gvern Malti aċċetta dak li l-Unjoni Ewropea trid, li Malta tħalli jidħlu mingħajr ebda rażan u mingħajr ebda dazju jew levy, il-prodotti li ġejjin mill-Unjoni Ewropea. 

Il-prodotti importati f’Malta se jinbiegħu flok il-prodotti maħduma f’Malta mill-ħaddiema Maltin li jaħdmu ma‘ l-imprendituri lokali. 

Inqas bejgħ ta’ prodotti maħduma f’Malta, ifisser inqas ħaddiema jaħdmu f’Malta.

Ifisser ukoll li imprendituri Maltin iżarmaw il-fabbriki u l-ħwienet tax-xogħol tagħhom u minflok jimportaw l-oġġetti mill-Unjoni Ewropea.

Għalhekk il-kritiċi jsostnu li l-politika ta’ l-Unjoni Ewropea tiffavorixxi lill-fabbriki tagħha, b’dannu għall-fabbriki u l-ħwienet tax-xogħol f’Malta.

Il-propagandisti tal-ftehim tas-sħubija jiftaħru li bil-politika ta’ l-Unjoni Ewropea, il-konsumatur se jgawdi għax il-prezzijiet se jonqsu bit-tneħħija tad-dazji u l-levies. 

Iżda l-kritiċi tal-ftehim tas-sħubija jwieġbu li l-prezzijiet ta’ l-oġġetti li nimportaw minn pajjiżi barra l-Unjoni, se jiżdiedu bid-dazji li fl-Unjoni jġiegħelna nagħmlu ħalli nipproteġu l-prodotti ta’ l-Unjoni.

Il-kritiċi tal-ftehim tas-sħubija jsostnu li ħafna oġġetti li nimportaw mill-Unjoni wkoll se jiżdiedu fil-prezz għax illum l-Unjoni tissussidjahom jekk jinbiegħu lil pajjiż barra l-Unjoni, kif Malta hija llum, iżda jekk Malta tissieħeb, l-Unjoni ma tibqax tissussidjahom u għalhekk il-prezzijiet ikunu ogħla.

Il-kritiċi tal-ftehim iżidu jgħidu li l-iskuża li jġibu l-propagandisti tal-ftehim tas-sħubija, fis-sens li l-konsumatur se jgawdi bir-roħs fil-prezzijiet, hija vojta għax l-Unjoni mponiet li l-Gvern jintaxxa bil-VAT kemm l-oġġetti ta’ l-ikel, kif ukoll il-mediċini. 

Il-VAT fuq kull oġġetti, kif l-Unjoni Ewropea trid, se tgħolli l-prezzijiet li l-konsumatur Malti se jkollu jħallas.

Il-propagandisti tal-ftehim tas-sħubija jgħidu li mhux se jkollu effetti ħżiena fuq is-servizzi soċjali f’pajjiżna. 

Iżda l-kritiċi tal-ftehim isostnu li l-Gvern Malti se jkun imġiegħel mill-Unjoni Ewropea biex inaqqas is-servizzi jew benefiċċji soċjali ħalli tonqos l-ispiża tal-Gvern u jonqos l-iżbilanċ tal-budget.

L-Unjoni Ewropea tagħmel pressjoni fuq il-gvernijiet tal-pajjiżi membri ħalli jnaqqsu l-ispiża tagħhom.

Il-gvernijiet tal-pajjiżi membri jfittxu li jnaqqsu l-ispiża tagħhom billi jnaqqsu s-servizzi u l-benefiċċji soċjali.

B’hekk, għalkemm l-Unjoni Ewropea ma tiddettax il-politika soċjali tal-pajjiżi membri, xorta waħda tindaħal fil-qasam soċjali tagħhom, billi tinsisti magħhom li jnaqqsu l-ispiża tas-servizzi u benefiċċji soċjali.

L-istess ħaġa tgħodd għall-pensjonijiet. 

Il-propagandisti tal-ftehim tas-sħubija jgħidu li l-Unjoni Ewropea ma tindaħalx fil-pensjonijiet li jitħallsu fil-pajjiżi membri.

Iżda l-kritiċi ta’ l-Unjoni Ewropea jsostnu li l-Unjoni tagħmel pressjoni kbira fuq il-pajjiżi membri ħalli jnaqqsu l-piż tal-pensjoni fuq in-nefqa tal-gvernijiet tal-pajjiżi membri.

Għalkemm l-Unjoni Ewropea għadha ma għamlitx regola kemm għandha tkun l-età ta’ l-irtirar għall-pensjoni, l-Unjoni Ewropea qiegħda tirrikmanda li din għandha togħla għal 65 sena.

Il-propagandisti tal-ftehim tas-sħubija jgħidu li s-suldati Maltin li se jmorru fl-armata Ewropea, se jkunu volontiera u mhux se jieħdu sehem fi ġlied. 

Iżda l-kritiċi tal-ftehim tas-sħubija ma jaqblux ma’ dan.

Il-kritiċi jfakkru li l-Gvern Malti ntrabat li s-suldati Maltin li jmorru fl-armata Ewropea se jagħmlu sehem mill-kontinġent tas-suldati Taljani.

Dan ikun ifisser li se jkunu taħt fizzjali Taljani u jmorru kull fejn il-kontinġent Taljan imur u jagħmlu dak li l-kontinġent Taljan jiġi ordnat li jagħmel.

Il-kritiċi jfakkru wkoll li s-suldati li qegħdin jingaġġaw illum fl-armata Maltija, qegħdin jingħataw jiffirmaw li jkunu lesti li jservu barra minn Malta jekk ikunu ordnati jagħmlu dan. 

Il-kritiċi jgħidu li din ir-rabta li s-suldati ġodda qegħdin jintalbu jiffirmaw, turi li jekk ma jkunx hemm suldati voluntiera, suldati mhux voluntiera jkunu ordnati jmorru jservu barra minn Malta fl-armata Ewropea.

Il-kritiċi tal-ftehim tas-sħubija joġġezzjonaw li l-Unjoni Ewropea ġagħlet lill-Gvern Malti jikser il-wegħda elettorali li kien għamel qabel l-aħħar elezzjoni lill-kaċċaturi u n-nassaba, li ma jnaqqsilhom xejn minn dak li kellhom u li jikkonsultaw il-ħin kollu dwar in-negozjati li huwa jagħmel ma’ l-Unjoni Ewropea dwar il-kaċċa u nsib f’Malta.

Il-mexxejja tal-kaċċaturi u nassaba jixlu lill-Gvern Nazzjonalista li ma żammx kelmtu magħhom u ma kkonsultahomx f’kollox u lanqas ħalla l-affarijiet kif inhuma llum. 

Il-kaċċaturi u nassaba jixlu lill-Gvern Malti li bil-ftehim li għamel ma’ l-Unjoni Ewropea l-kaċċa u nsib f’pajjiżna, biż-żmien se jinqerdu.

Il-kaċċaturi u n-nassaba jilmentaw li l-Gvern ma żammx sod kontra l-Unjoni Ewropea u ma qalilhix li jkun ħafna u ħafna aħjar għaż-żgħażagħ Maltin li jibqgħu mehdijin fil-kaċċa u fl-insib, mill-jinfexxu fil-vizzji, fosthom tad-droga.

Il-kaċċaturi u nassaba jinsistu wkoll li l-Gvern naqas li juri lill-Unjoni Ewropea kemm huma jieħdu ħsieb l-ambjent tal-kampanja fejn imorru għall-kaċċa u għall-insib.

Il-propagandisti tal-ftehim tas-sħubija u anki x’uħud mill-Ministri, qegħdin jitqanżħu ħafna biex iqarrqu bil-ħaddiema tax-xatt, billi jipprovaw jgħidulhom li d-direttivi ta’ l-Unjoni Ewropea m’humiex se jagħmlulhom ħsara.

Iżda l-ħaddiema tax-xatt fehmu sewwa li d-direttivi ta’ l-Unjoni Ewropea jfissru għalihom li se jħarrbtulhom is-sistema u d-drittijiet li huma kisbu bil-ġlidiet li matul is-snin għamlu biex jakkwistaw id-dinjità u d-drittijiet li huma għandhom illum.

Il-liberalizzazzjoni tax-xogħol tal-portijiet tfisser għall-ħaddiema tax-xatt telf tad-dħul li għandhom u telf ta’ drittijiet li għandhom. 

Tfisser li x-xogħol fil-port jerġa’ jmur lura għaż-żmien meta l-ħaddiema la kienu żguri mix-xogħol u lanqas kellhom garanzija ta’ dħul diċenti u kienu jitqabbdu għax-xogħol mis-sidien, skond ma s-sidien kien jaqblilhom jagħmlu.

Ix-xatt kien ġungla, fil-waqt li llum, ix-xogħol tax-xatt huwa mill-aktar ordnat. Id-direttivi ta’ l-Unjoni Ewropea se jħarbtu l-ordni li hemm fix-xogħol tax-xatt.

Il-propagandisti tal-ftehim tas-sħubija ma’ l-Unjoni Ewropea jħobbu jgħidu li bis-saħħa ta’ l-Unjoni ħafna postijiet tax-xogħol u ħafna fabbriki se jirristrutturaw ruħhom. 

Il-kritiċi tal-ftehim iwieġbu li dan id-diskors jaħbi l-fatt li bil-politika u r- regoli ta’ l-Unjoni Ewropea, ħafna postijiet tax-xogħol u fabbriki jkollhom inaqqsu lill-ħaddiema u x’uħud mill-fabbriki u postijiet tax-xogħol ikollhom jagħlqu u jżarmaw.

Il-kritiċi jgħidu li l-kelma ta’ ristrutturar taħbi l-kruha tat-telf ta’ l-impjiegi lill-ħaddiema u tal-falliment ta’ l-impriżi lis-sidien. 

Skond il-kritiċi tal-politika ta’ l-Unjoni Ewropea, ir-regoli tas-suq ma jagħtux kas il-ħtieġa soċjali tax-xogħol u l-impjiegi, li huma s-sisien tad-dinjità tal-bniedem. 

L-Unjoni Ewropea tqim is-suq aktar mill-bniedem u minħabba dan, tinġieb l-iskuża li bil-globalizzazzjoni, trid isseħħ ristrutturar ta’ l-industrija u ta’ l-impiegi.

Il-kritiċi tal-politika ta’ l-Unjoni Ewropea u tal-ftehim li l-Gvern Malti għamel magħha, isostnu li jekk pajjiżna jħalli r-regoli tas-suq jiddettaw x’jiġri mix-xogħol f’pajjiżna u mill-impjiegi f’pajjiżna, nispiċċaw b’numru ħafna akbar ta’ nies qegħda u ta’ żgħażagħ li ma jsibux xogħol. Ir-ristrutturar ikun ifisser qgħad.

It-Tnejn, 3 ta’ Marzu, 2003

IRRIDU L'INDIPENDENZA MILL-UNJONI EWROPEA

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola liċ-

Segretarju Finanzjarju  CNI,

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ