MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

Il-kwistjoni ta’ l-UE tibqa’!

Għalkemm il-politiċi jgħidu li l-kwistjoni tas-sħubija ta' pajjiżna fl-Unjni Ewropea m'għadhiex teżisti, huma jafu li eluf ta' Maltin u Għawdxin huma kontra s-sħubija u jivvutaw biex noħorġu mill-Unjoni jekk isir referendum dwar din il-kwistjoni.

Il-fatt li l-politiċi jħossu l-ħtieġa li jgħidu li din il-kwistjoni m'għadhiex teżisti, jixhed li huma jibżgħu li għadha teżisti u jħossu l-bżonn li jipperswadu lill-Maltin u l-Għawdxin biex jaqtgħu jieshom li jistgħu joħorġu mill-Unjoni.

Iżda eluf ta' Maltin u Għawdxin mhux se jirrassenjaw ruħhom għax-xorti ħażina li messet lill-poplu tagħna li erġajna sirna kolonja, din id-darba mhux ta' l-Ingilterra iżda ta' l-Unjoni Ewropea, u dawn l-eluf jittamaw li jfittex jitfaċċa mexxej nazzjonali kuraġġjuż li jifdina mill-ġdid ħalli nerġgħu niksbu l-Indipendenza u l-Ħelsien għal pajjiżna.

Ma jistax jonqos li eluf ta' Maltin u Għawdxin ikunu kontra s-sħubija fl-Unjoni Ewropea, għax l-Unjoni taħti għal parti kbira tad-dejn enormi li l-pajjiż huwa mgħobbi bih, għal sehem kbir tal-piż finanzjarju ta' taxxi indiretti li l-poplu Malti qiegħed iġorr, u hija l-kagun għal parti kbira ta' l-għoli tal-ħajja li l-poplu qed iġarrab u għat-telf ta' mpjiegi u tnaqqis fil-kundizzjonijiet tax-xogħol li eluf ta' ħaddiema u impjegati batew u għall-għeluq ta' ħafna impriżi u oħrajn li ċkienu.

L-Unjoni Ewropea hija responsabbli għal ħafna mid-dejn tal-pajjiż għax biex il-poplu Malti jinxtara ħalli jarmi l-Indipendenza u jivvota favur is-sħubija fl-Unjoni, il-Gvern, fuq medda ta' snin nefaq ħafna aktar miljuni milli tmexxija għaqlija kienet tgħidlu li għandu jagħmel.

Illum il-Gvern jinsab midjun biljun u nofs lira Maltija, u dan wara li biegħ bl-iskuża tal-privatizzazzjoni ordnata mill-Unjoni l-ġid tal-poplu Malti, bħal ma kien il-Mid Med Bank, il-Maltacom, l-Air Terminal, il-Posta, il-Lottu u impriżi iżgħar oħra.

Kull sena d-dejn nazzjonali jikber u jiżdied l-iżbilanċ bejn id-dħul u l-ħruġ tal-Gvern. Is-sena d-dieħla d-dejn nazzjonali se jibqa' jiżdied b'aktar minn miljun lira Maltin kull ġimgħa Lm54 miljun), minkejja d-dħul ta' Lm48 miljun aktar mit-taxxi li fis-snin imgħoddija żdiedu enormament.

Taxxi tort ta’ l-UE

L-Unjoni Ewropea taħti għal ħafna mit-taxxi indiretti li l-poplu Malti qiegħed iħallas.

It-taxxa tal-VAT (18 fil-mija) fuq oġġetti u servizzi li nixtru, il-Gvern daħħalha għax hija obbligatorja fil-pajjiżi ta' l-Unjoni.

Parti mill-38 miljun liri Maltin li l-poplu se jħallas is-sena d-dieħla f'taxxi fuq il-prodotti taż-żejt, tridhom l-Unjoni li bl-iskuża li jitrażżan il-konsum taż-żejt, iġġiegħel lill-gvernijiet jimponu taxxi għoljin fuqhom.

L-'Eco Tax' imponietha l-Unjoni fuq il-Gvern bl-iskuża li jitħares l-ambjent.

Dawn it-taxxi, barra li huma piż finanzjarju fuq il-poplu, għandhom l-effett ukoll li jgħollu l-ħajja billi jżidu l-prezzijiet.

Għalhekk l-Unjoni Ewropea taħti wkoll għall-gholi tal-ħajja li l-poplu qiegħed iġarrab kemm minħabba dawn it-taxxi indiretti, kif ukoll minħabba l-prezzijiet ogħla li qiegħed ikollu jħallas għall-prodotti mixtrijin minn pajjiżi barra l-Unjoni, li fuqhom l-Unjoni timponi d-dazji tal-'Common External Tariff', fosthom laħam, ċereali, qmugħ, u aktar riċenti, żraben tal-ġilda miċ-Ċina.

Iż-żieda fil-prezzijiet ikkaġunata mill-Unjoni Ewropea tolqot ħażin il-kompetittività ta' pajjiżna bi ħsara kemm għall-esportazzjoni, kif ukoll għat-turiżmu fejn ġieli jinstema' li btala f'Malta saret għalja wisq meta kkumparata ma' waħda f'pajjiż kompetittiv bħat-Tuneżija.

Illum bil-fatti jista' jingħad li s-sħubija fl-Unjoni ġabitilna tnaqqis kemm fl-esportazzjoni, kif ukoll fit-turiżmu.

It-tnaqqis fl-industrija tal-manifattura u fl-industrija tat-turiżmu, barra li jikkaġuna telf finanzjarju għal pajjiżna, jikkaġuna telf ta' impjiegi u jbaxxi l-kundizzjonijiet tax-xogħol tal-ħaddiema u l-impjegati Maltin.

Is-sħubija tagħna fl-Unjoni Ewropea għamlitilna ħsara kbira fiż-żewg oqsma ekonomiċi tal-manifattura u tat-turiżmu.

Il-wegħdiet li kienu għamlulna li jaqblilna meta nkunu fis-suq kbir ta' l-Unjoni sfaw kollha fix-xejn u sibna li meta dħalna fis-suq kbir, morna lura minflok ’il quddiem.

Minħabba l-politika u r-regoli ta' l-Unjoni Ewropea ħafna impriżi għalqu, tefgħu lill-ħaddiema barra u marru f'pajjiżi li m'humiex fl-Unjoni.

Impriżi oħrajn, li kienu jaħdmu għas-suq lokali, naqqsu l-kummerċ tagħhom u jew issensjaw għadd ta' ħaddiema, jew naqqsulhom il-kundizzjonijiet tax-xogħol tagħhom.

Id-daqqa ta’ ħarta li jmiss

Għadna ma ħassejniex l-effetti ħżiena kollha tas-sħubija fl-Unjoni Ewropea għax għadna ma daħħalniex l-Ewro u għadu m'għaddiex iż-żmien kollu tad-derogi mir-regoli ta' l-Unjoni li l-Unjoni tatna biex isseħibna.

Id-dħul ta' l-Ewro se jgħolli l-prezzijiet, kif ġara f'kull pajjiż ieħor ta' l-Unjoni li daħħal dik il-munita.

L-eluf ta' liri li qegħdin jintefqu fi propaganda vojta dwar l-Ewro mhux se jtaffu l-ħsara li se jġarrab il-poplu wara l-ewwel ta' Jannar ta' l-2008, meta naqilbu għall-Ewro.

L-Ewro hija imposta fuqna mill-Unjoni u l-Gvern ikollu jiftaħar bil-vantaġġi tagħha allavolja jaf li t-tliet pajjiżi li ma daħħluhiex, jiġifieri l-Ingilterra, l-Isvezja u d-Danimarka, qablilhom ekonomikament u jinsabu aħjar mill-pajjiżi li daħħlu l-Ewro, bħal Franza, il-Ġermanja u l-Italja.

L-Unjoni Ewropea tagħtina daqqa ta' ħarta oħra meta fis-sena 2008 tinsisti li ma nistgħux nagħtu għajnuna lit-Tarzna u b'hekk hija thedded l-impjieg tal-mijiet ta' ħaddiema tat-Tarzna, li għall-poplu Malti hija l-Università tas-snajja’ f'pajjiżna.

Għalkemm il-politiċi jagħmlu minn kollox biex jaħbu dawn l-iżvantaġġi kollha tas-sħubija fl-Unjoni Ewropea, il-kotra tal-poplu li hija milquta minnhom mhix se tinsihom u tipprotesta kontrihom.

Kif lanqas m'hi se tinsa li fis-sena d-dieħla, pajjiżna se jkollu jħallas lill-Bank Ewropew ta' l-Investiment is-somma ta' Lm893,000 u lill-Unjoni Ewropea stess l-ammont ta' Lm22,030,000 (skond paġna 110 ta' l-Estimi tal-Gvern).

Dawn il-piżijiet u l-iżvantaġġi kollha l-poplu Malti jeħles minnhom jekk jingħata l-opportunità jivvota f'referendum biex noħorġu mill-Unjoni Ewropea.

Sadanittant, jgħidu x'jgħidu l-politiċi, il-kwistjoni tas-sħubija fl-Unjoni tibqa' teżisti f'pajjiżna.

Il-fondi li gawdejna mill-Protokoll Taljan

Waħda mill-frott qares li qtajna bis-sħubija fl-UE kienet bla dubju ta' xejn il-fatt li tlifna dawk il-miljuni ta' liri li konna nirċievu sa din is-sena stess, b'riżultat tal-protokoll li Gvern Laburista kien iffirma ma' l-Italja fl-1980.

Sal-lum irċevejna miljuni kbar ta' liri.

Biżżejjed jingħad li f'dawn l-aħħar tliet snin irċevejna madwar Lm10 miljun fis-sena!

Fid-diskors tal-Baġit il-Prim Ministru, waqt li semma l-miljuni Ewros li rċevejna, jew se nirċievu s-sena d-dieħla, kull ma qal dwar il-fondi mill-Protokoll Taljan kien, li "l-fondi għall-proġetti mill-Protokoll Taljan se jispiċċaw fl-aħħar ta' din is-sena".

Jidher li Dr Gonzi staħa jsemmi l-ammont ta' fondi li se nitilfu kull sena grazzi għas-sħubija ta' pajjiżna fl-UE.

Naturalment din ma kinitx storja tajba li seta' jirrakkonta lill-poplu Malti.

U bħal din l-istorja hemm ħafna stejjer oħrajn li l-Prim Ministru beża' jsemmi fid-diskors tal-Baġit.

Nisperaw li dawn l-istejjer nirrakkontawhomkom ’il quddiem.

Ħela ta’ fjuwil minħabba l-Unjoni Ewropea

L-allat ta' l-Unjoni Ewropea qegħdin jaħsbu kif iġagħluna nsuqu l-vetturi bid-dwal mixgħulin, fid-dawl tax-xemx.

Jekk fil-pajjiżi fin-naħa ta' fuq ta' l-Unjoni, minħabba ċ-ċpar u t-temp ikraħ, jagħmel sens li l-vetturi jinstaqu dejjem bid-dwal mixgħulin, ma jagħmilx sens iżda li dan iseħħ fil-pajjiżi ta' l-Unjoni fejn ikun hemm temp sabiħ, ġranet ċari u spiss xemx tiżreġ.

Id-dwal mixgħulin għalxejn tal-vetturi jfissru ħela ta' fjuwil, ħela ta' arja u tniġġis aktar bla bżonn.

Barra l-ispejjeż żejda tal-konsum tal-fjuwil, noħolqu aktar tniġġis ta' l-arja meta naħarqu aktar fjuwil.

Għalkemm l-enerġija tad-dwal tal-vetturi toħroġ primarjament mill-batterija, (l-istess meta nqabbdu l-'istarter', nixgħelu l-air conditioner u ndoqqu l-ħorn tal-vettura), kif tistartja l-makna, l-'alternator', jew id-'dynamo' fil-vetturi antiki, ikun pront jiġġenera l-kurrent biex jiċċarġja l-batterija.

Meta jkun qed jiċċarġja l-batterija, l-'alternator' jibbies ħafna biex iddawru u għalhekk il-makna jkollha taħli aktar fjuwil biex tkopri u ddawwar l-'alternator'.

Tajjeb li niftakru li fil-vetturi, is-saħħa kollha tiġi mill-makna.

Il-makna ma toħloqx is-saħħa mix-xejn.

Il-makna tieħu s-saħħa mill-fjuwil (diżil jew petrol) u mill-arja, billi tħallat l-arja mal-fjuwil, tikkompressahom fi spazju żgħir u taħraqhom.

Meta l-arja tinħaraq, tikber f'daqqa, toħloq pressjoni u din il-pressjoni tintuża biex il-makna ddawwar lilha nfisha u l-mekkaniżmu tal-vettura, li fl-aħħar iddawwar ir-roti tal-vettura.

Tajjeb ukoll li nkunu nafu li biex jibdlu s-saħħa tal-fjuwil f'saħħa mekkanika, il-makni jaħlu ħafna mill-enerġija.

 Jekk nieħdu eżempju 10 litri ta' fjuwil maħruqin minn makna, 7 minnhom jinbidlu f'enerġija bla bżonn fl-arja li toħroġ mill-exhaust u fl-ilma msaħħan li mbagħad jiddawwar fir-'radiator' biex jerġa' jiksaħ u 3 litri biss jintużaw għat-tħaddim tal-vettura.

Dan ifisser li l-effiċjenza tal-makna tal-vettura hija biss ta' madwar 30 fil-mija, u għalhekk ta' l-enerġija li nieħdu, inħallsu ħafna minħabba l-prezz għoli tal-petrol u diżil li nitfgħu fil-vettura.

Aktar ma titgħabba b'toqol il-vettura, aktar il-makna tagħha trid tipproduċi enerġija biex tmexxiha u għaldaqstant aktar jinħela fjuwil.

Id-dwal tal-vettura għalhekk fl-aħħar ifissru ħela ta' fjuwil u tagħmel ħażin l-Unjoni Ewropea jekk iġġagħlna nixgħeluhom għalxejn fid-dawl tax-xemx tal-ġurnata.

Il-Ħamis 2 ta’ Novembru, 2006.

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

60A, Triq id-Dejqa,

Valletta

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ