MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LID-DEPUTAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

L-akbar ħrafa li rnexxielhom ibellgħu lill-maġġoranza tal-poplu Malti qabel ir-Referendum u l-Elezzjoni Ġenerali tal-2003, kienet li jekk nidħlu fl-UE is-sovranità ta’ pajjiżna mhux talli ma kinitx se tiddgħajjef jew tispiċċa, anzi kienet se tissaħħaħ.

It-taparsi argument li kienu jġibu kien dak li billi nkunu qegħdin naqsmu s-sovranità ta’ pajjiżna, mhux talli ma konniex se nnaqqsuha, talli konna se nsaħħuha.

Ma tridx tkun għaref wisq biex tinduna bil-falsità ta’ dan l-argument.

Biżżejjed taħseb kif jekk ikollok ħaġa tiegħek biss, tiddeċiedi li taqsamha ma’ ħaddieħor, dik il-ħaġa mhux se tibqa’ tiegħek biss, għax se tkun anke ta’ ħaddieħor.

Jekk ikollok kejk u flok tieklu l-familja tiegħek, taqsmu ma’ ħaddieħor, żgur li tal-familja tiegħek se jmisshom parti ferm iżgħar minn dak il-kejk milli kieku kieluh waħedkom.

Aħna tas-CNI dejjem sħaqna li d-dħul fl-UE ikun ifisser it-tmiem tal-Indipendenza u l-Ħelsien ta’ pajjiżna. Jiġifieri, it-tmiem tas-sovranità tal-poplu Malti.

Dak li seħħ dan l-aħħar meta ġiet il-Kummissarju Ewropew għall-Kompetizzjoni Neellie Kroes kienet l-aqwa prova ta’ kemm is-sovranità, l-Indipendenza u l-Ħelsien ta’ pajjiżna jeżistu biss fuq il-karta u mhux fir-realtà.

Meta Kroes qalet li l-pjan tal-Gvern dwar it-Tarzna ma kienx aċċettabbli għall-UE, fil-fatt kienet qiegħda tgħid lill-Gvern Malti li issa f’pajjiżna hija l-Unjoni Ewropea li tiddeċiedi x’jista’ jsir jew ma jsirx.

Il-Gvern Malti qiegħed hemm biss biex jagħmel li tordnalu jew dak li tħallih jagħmel l-UE.

Is-CNI qalet tajjeb li dak li l-Kummissarju Kroes qalet kien ta’ umiljazzjoni għall-poplu Malti kollu.

Dan żgur għal dawk li jgħoddu ruħhom li huma Maltin – li aħna nemmnu li huma l-maġġoranza tal-Maltin.

Dawk li biegħu ruħhom lill-UE, x’qalet Kroes ma jolqothom xejn.

Anzi forsi ħadu pjaċir, għax huma jemmnu li aħna l-Maltin mhux kapaċi mmexxu lil pajjiżna u rridu li min hu ferm akbar minnha li jmexxina.

Dawk li biegħu ruħhom lill-UE, x’qalet Kroes ma jolqothom xejn.

Anzi forsi ħadu pjaċir, għax huma jemmnu li aħna l-Maltin mhux kapaċi mmexxu lil pajjiżna u rridu li min hu ferm akbar minnha li jmexxina.

X’se jgħidu dawk li sostnew li bis-sħubija fl-UE is-sovranità ta’ Malta tissaħħaħ meta jaraw lill-Gvern li kienu vvotawlu jiġi rredikolat bil-mod li rredikolatu Neellie Kroes?

Tgħid anke dan l-insult qegħdin iqisuh bħala turija ta’ kemm is-sovranità ta’ Malta ssaħħet bis-sħubija fl-UE?

Aktar ma jgħaddi ż-żmien il-poplu Malti se jinduna kemm kienu daħku bih u ngannawh bil-ħafna wegħdi li għamlulu qabel ir-Referendum u l-Elezzjoni Ġenerali tal-2003.

Is-sħubija mhux is-sovranità saħħet! Saħħet żgur il-kont tal-bank ta’ dawk li sabu post f’xi istituzzjoni Ewropea.

ID-DELEGATI tat-Trade Union Congress (TUC) appoġġjaw b’maġġoranza assoluta proposta biex isiru protesti madwar l-Ewropa kollha kontra d-deċiżjonijiet li ħadet il-Qorti tal-Ġustizzja ta’ l-Unjoni Ewropea, għax iqisu dawn id-deċiżjonijiet bħala attakk fundamentali fuq il-ftehim kollettiv u d-dritt ta’ l-istrajk.

Fl-istess mozzjoni mressqa min Bob Crow, intqal li t-Trattat ta’ Lisbona kien se jkompli jżid l-attakki fuq id-drittijiet tat-trade unions, billi jagħtiu lill-Qorti ta’ l-UE ħafna aktar poteri ġodda.

Id-drittijiet tat-trade unions se jkunu attakkati bl-iskuża tal-“moviment ħieles tal-prodotti, servizzi u ħaddiema fl-UE”.

Fil-2005 id-delegati tat-TUC kienu vvotaw b’maġġoranza assoluta kontra l-Kostituzzjoni ta’ l-UE.

Is-sena l-oħra huma talbu li jsir referendum dwra it-Trattat ta’ Lisbona.

Din is-sena d-delegati reġgħu kkonfermaw l-oppożizzjoni tagħhom kontra dan il-proġett anti-demokratiku ta’ l-UE.

Għalhekk biex jilqgħu għal dan l-attakk fuq il-moviment trejdunjonistiku, qabli li jappoġġjaw dawn il-miżuri:

(1)   Dimostrazzjoni u ‘lobby’ tal-membri parlamentari biex iħassru d-deċiżjonijiet tal-Qorti tal-Ġustizzja ta’ l-UE;

(2)   Dimostrazzjoni ta’ protesta fl-istati membri kollha;

(3)   Jiġu faċilitati laqgħat bejn il-membri biex jippromwovu din il-kampanja.

F’pajjiżna ma jingħata l-ebda tagħrif dwar dawn il-ħwejjeġ serji li jolqtu ħażin l-għaqdiet tal-ħaddiema u l-eluf kbar tal-membri tagħhom.

Ebda membru parlamentari ma tkellem dwar dawn id-deċiżjonijiet tal-Qorti tal-Ġustizzja ta’ l-UE fil-każ ta’

* Viking,

* Laval,

* Ruppert u

* Lussemburgu,

li dawwru l-arloġġ lura billi mminaw id-drittijiet tat-trejdunjons b’diversi modi.

Ħadd ma tkellem għax ma jridux lill-poplu Malti  jisma ħwejjeġ mhux sbieħ dwar l-UE.

Aħna nerġgħu nappellaw lill-Onor Dr Chris Said, is-Segretarju Parlamentari responsabbli mill-informazzjoni,biex jibda jagħti tagħrif lill-poplu dwar id-deċiżjonjijiet li semmejna tal-Qorti tal-Ġustizzja ta’ l-UE.

Dawn id-deċiżjonjijiet huma aktar importanti għall-eluf ta’ ħaddiema mix-xinxilli tal-fondi ta’ l-UE.

Għandu jagħti tagħrif lill-poplu kemm is-sħubija fil-blokk qiegħda tiswielna aktar mill-fondi li jistgħu jiġu mill-UE sa’ l-2013.

Wara dik is-sena, Alla biss jaf x’se jsir mill-fondi ta’ l-UE, meta pajjiżna ma jibqaxmeqjus li jikkwalifika għal “Objective 1 status”.

L-ahhar darba li ġie l-President tal-Kummissjoni Ewropea, Josè Manuel Barroso, ċempilli Peppi Azzopardi ta’ “Xarabank” u staqsieni xtaqtx nagħmel mistoqsija lil Barroso.

Qalli wkoll li kien se jkun hemm erbgħa jew ħamsa li jagħmlulu mistoqsijiet.

Jiena aċċettajt.

Lill-President Barroso għidtlu li fl-opinjoni tiegħi l-aġenzija FRONTEX se sservi biex aktar immigranti illegali jiġu, flok tnaqqashom, kif kien l-għan tagħha.

Għidtlu li meta l-‘patrol boats’ tal-FRONTEX kienu se jinterċettaw id-dgħajjes bil-klandestini, ma kinux se jġiegħluhom imorru lura minn fejn telqu.

Kienu se jtellgħuhom fuq il-‘patrol boats’ u jieħduhom lejn l-eqreb pajjiż.

Għidtlu li nispera li l-eqreb ma tkunx Malta.

B’hekk, l-immigranti illegali kien se jkollhom aktar ċans li jaslu f’pajjiż tal-UE minn qabel, ladarba l-FRONTEX ma kellha ebda ftehim li teħodhom lura minn fejn telqu.

Lil Barroso staqsejtu jaqbilx mal-argument tiegħi. Barroso deher xi ftit imħawwad x’jaqbad jgħid.

Qalli biss li għalhekk hemm bżonn li tinstab soluzzjoni għal din il-problema diffiċli.

Dak li kont bassart lil Barroso, fil-fatt ġara!

Dan ikkonfermah l-istess Kap tal-FRONTEX, Illka Laitinen, kif ikkwotat f’ġurnal lokali bl-Ingliż fit-22 ta’ Settembru.

Laitinen qal li din is-sena daħlu numru rekord ta’ klandestini f’Malta u Lampedusa, għax “żdiedu r-rondi tal-FRONTEX barra Malta u Lampedusa”.

Minkejja r-rondi, f’dawn l-aħħar tliet snin daħlu f’Malta 6,000 klandestin, b’2,500 li daħlu s’issa din is-sena biss.

Għalkemm il-Kap Kmandant tal-FAM, il-Brigadier Karm Vassallo, qal li r-rondi fl-ibħra tagħna saru kważi mill-forzi Maltin biss, hi x’inhi l-verità, jidher ċar li l-FRONTEX aktar serviet biex tinkoraġixxi ħafna aktar klandestini jitilqu lejn l-Ewropa mill-Afrika, bit-tama li jinstabu minn xi ‘patrol boat’ tal-FRONTEX u jitwasslu fl-eqreb pajjiż tal-UE, qawwijin u sħaħ, kif hi t-tama ta’ kull immigrant illegali li jsalpa mill-kosta tal-Afrika ta’ Fuq.

Xahar ilu stedint lis-Segretarju Parlamentari Chris Said biex wara li kien indirizza konferenza stampa li fiha qagħad isemmi fuq liema proġetti qegħdin jintefqu l-fondi allokati għal Malta mill-UE, isib il-ħin u jiġbor informazzjoni dwar kemm qiegħda tiswa lill-poplu Malti s-sħubija fl-UE.

Dakinhar għamiltlu lista ta’ punti li tlabtu jinforma lill-pubbliku dwarhom.

Mhux biħsiebi noqgħod nerġa’ nirrepetihom.

Kull mhu se nagħmel illum, inżidlu żewġ punti oħrajn ma’ dawk ta’ xahar ilu.

(1) Kemm qed iħallas sussidju l-Gvern għall-qasam tal-agrikoltura (bdiewa, raħħala, eċċ.) kull sena minħabba s-sħubija fl-UE? Veru li madwar Lm7 miljun fis-sena? (Għamilthom bil-liri Maltin ħalli jifhimhom kulħadd).

(2) Kemm qed iħallas imgħax fuq id-dejn li l-Gvern qed ikollu jagħmel fuq il-fondi li suppost jiġu mill-UE għall-proġetti, liema fondi l-Gvern qiegħed ikollu l-ewwel joħroġhom hu sakemm dawn jaslu mill-UE wara li jitlestew il-proġetti – li jdumu anke xi snin sakemm jaslu?

Ma tantx għandi tama li l-Onor. Chris Said se jinformana dwar dawn iż-żewġ punti ukoll, ladarba baqa’ ma qalilna xejn wara xahar sħiħ dwar il-punti l-oħrajn li semmejtlu.

Minn dan taraw kif jibqgħu jikkonfrontaw il-verità dwar jekk Malta hiex qiegħda tiggwadanja jew le mis-sħubija fl-UE.

Jistgħu jagħmlu dan għax m’hawnx min lest jikkonfuthom u jitlob fil-Parlament l-informazzjoni li kemm-il darba aħna tas-CNI sfidajna lill-Gvern biex jagħti lill-poplu.

Għaliex la ġurnalisti u lanqas il-politiċi m’huma lesti jagħmlu dan – li jinsistu li jingħata rendikont ta’ kemm is-sħubija fl-UE qiegħda tiswa lill-poplu Malti?

Ir-raġuni għal dan is-silenzju hi li l-ġurnalisti u l-politiċi ma jridux li l-poplu jkun jaf li s-sħubija fl-UE tiswilna ħafna aktar minn kemm qegħdin nieħdu minnha.

Il-Ħamis, 2 ta’ Ottubru, 2008

IRRIDU L'INDIPENDENZA MILL-UNJONI EWROPEA

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

60A, Triq id-Dejqa,

Valletta

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ