MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

minn Kampanja Ħelsien Nazzjonali CNI

GĦID LILL-KANDIDAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

Ħadd ma sema’ l-vuċi ta’ Malta fil-laqgħa ta’ l-Organizzazzjoni Dinjija tal-Kummerċ (World Trade Organisation, WTO) li għadha kif saret f’Cancun, fil-Messiku u li ntemmet f’falliment sħiħ.

L-Unjoni Ewropea laqtet kritika ħarxa għas-sehem tagħha fil-laqgħa tal-WTO f’Cancun.

Il-Kummissarju Pascal Lamy mexxa’ r-rappreżentanti ta’ l-Unjoni Ewropea li nsistew li l-laqgħa kellha tiddiskuti l-erba’ suġġetti li kienu tqajmu f’laqgħa qabel li kienet saret f’Singapore.

L-erba’ suggetti huma 

* r-regoli li jikkontrollaw il-kompetizzjoni fil-kummerċ, 

* ir-regoli li għandhom x‘jaqsmu ma’ l-investiment f’pajjiżi barranin, 

* ir-regoli tat-trasparenza fl-għoti tal-kuntratti ta’ xiri u ta’ xogħol mill-gvernijiet u 

* l-faċilitajiet li għandhom jingħataw biex ikun hemm aktar kummerċ mill-Unjoni Ewropea.
 

Fil-laqgħa ta’ Cancun l-Unjoni Ewropea dehret li ma riditx tilħaq kompromess dwar dawn l-erba’ suġġetti. 

Sa 24 siegħa qabel il-laqgħa ntemmet, il-Kummissarju Ewropew Lamy baqa’ jinsisti li kellhom isiru negozjati dwar dawn l-erba’ suġġetti. 

Kien biss fl-aħħar jum tal-laqgħa, fil-għodu, li huwa ċeda li jiġu diskussi tnejn biss mill-erba’ suġġetti. 

Meta deher li l-laqgħa kienet sejra tintemm ħesrem b’falliment, l-Unjoni Ewropea tat ħjiel li kienu taċċetta li suġġett wieħed biss mill-erba’ jkun diskuss. 

Iżda din kienet mossa li saret tard wisq u saret għalxejn.

Il-pajjiżi fqar u dawk li qegħdin jiżviluppaw kienu deċiżi li lill-Unjoni Ewropea din id-darba ma jċedulhiex.

Għalihom, is-suġġetti li kellhom jiddiskutu kienu għal kollox differenti minn dawk li l-Unjoni riedet tiddiskuti.

Il-pajjiżi fqar u dawk li qegħdin jiżviluppaw talbu lill-Unjoni Ewropea 

* tnaqqas is-sussidji li tagħti lill-biedja tagħha, 

* taqta’ d-dazji li timponi fuq l-importazzjoni tal-prodotti tal-biedja, 

* ma tkomplix tissussidja l-esportazzjoni tal-prodotti tal-biedja tagħha, 

* li tbaxxi d-dazji fuq l-importazzjoni tal-ħwejjeġ maħduma fil-fabbriki u 
* tneħħi l-kontrolli fuq l-għoti ta’ servizzi lill-pajjiżi ta’ l-Unjoni minn pajjiżi barra l-Unjoni.

Il-pajjiżi fqar u li qegħdin jiżviluppaw sostnew li l-Unjoni Ewropea fil-laqgħa tal-WTO li kienet saret f’Doha, il-belt kapitali tal-Qatar, fis-sena 2001, kienet qablet li tiddiskuti dawn il-ħwejjeġ kollha. 

Iżda l-Unjoni Ewropea f’Cancun ma ħarġitx li kienet lesta tieħu passi dwarhom u ċaħdet li hija kienet xi darba aċċettat li ma tkomplix tagħti sussidji għall-esportazzjoni tal-prodotti tal-biedja tagħha.

Il-miżuri li l-Unjoni Ewropea tħaddem ifissru li l-prodotti tal-biedja tagħha jkunu orħos fis-swieq tal-pajjiżi barra l-Unjoni li jimpurtawhom u b’hekk joqtlu l-prodotti tal-biedja mkabbra f’dawk il-pajjiżi. 

U jfissru wkoll li l-pajjiżi barra l-Unjoni ma jitħallewx ibiegħu fis-swieq ta’ l-Unjoni minħabba d-dazji għolja li l-Unjoni tagħmel. 

B’dan il-mod il-pajjiżi fqar u li qegħdin jiżviluppaw ma jistgħux jikkompetu ma’ l-UE fil-bejgħ tal-prodotti tal-biedja tagħhom.

Fil-laqgħa ta‘ Cancun l-irvell kontra l-Unjoni Ewropea tmexxiet minn alleanza ġdida ta’ pajjiżi li saret magħrufa bħala “G 21” għax hija magħmula minn 21 pajjiż. 

Dawn huma: 

* l-Arġentina, 

* il-Bolivja, 

* il-Brażil, 

* iċ-Ċili, 

* iċ-Ċina, 

* il-Kolombja, 

* il-Costa Rika, 

* Kuba, 

* l-Ekwador, 

* l-Eġittu, 

* il-Gwatemala, 

* l-Indja, 

* l-Indoneżja, 

* il-Messiku, 

* in-Niġerja, 

* il-Pakistan, 

* il-Paragwaj, 

* il-Perù, 

* il-Filippini, 

* l-Afrika t’Isfel, 

* it-Tajlandja u 

* l-Venezwela.

Numru ta’ pajjiżi tal-Punent ta’ l-Afrika wkoll appoġġjaw bis-sħiħ l-alleanza tal-G 21.

Il-pajjiżi ta’ l-alleanza tal-G 21 (li tfisser il-grupp tal-21 pajjiż) flimkien għandhom nofs il-popolazzjoni tad-dinja u tnejn minn kull tlieta tal-bdiewa fid-dinja. 

Għalhekk il-vuċi tagħhom għandha saħħa u huma għarfu jużaw din is-saħħa fil-laqgħa ta‘ Cancun.

F’Cancun fl-istess żmien inġemgħu eluf ta‘ imsieħba ta’ għaqdiet mhux governattivi (magħrufa bhala NGO’s) biex jipprotestaw kontra l-politika tal-World Trade Organisation. 

Dawn kienu l-istess nies u għaqdiet li erba’ snin ilu fi Seattle, fl-Istati Uniti, irnexxielhom iħarrbtu l-laqgħa bid-dimostrazzjonijiet vjolenti li għamlu. 

Wara l-falliment tal-laqgħa ta’ Cancun, fi stqarrija għall-istampa, dawn l-NGO’s ftaħru li l-falliment tal-laqgħa kienet tfisser rebħa għall-popli (Victory to the people). 

L-NGO’s ħeġġew lill-pajjiżi fqar u li qegħdin jiżviluppaw biex ma jċedux għall-pressjoni ta’ l-UE u l-Istati Uniti, il-Ġappun u pajjiżi oħra avvanzati. 

Issa wieħed jista’ jistenna li kull meta jkun hemm laqgħa tal-WTO, se jkun hemm protesti u dimostrazzjonijiet kbar kontra.

Hawn f‘Malta l-Gvern ftit deher li ħa interess f‘dak li seħħ fil-laqgħa tal-World Trade Organisation f’Cancun.

Il-vuċi ta’ Malta ma setgħetx tinstema’ għax Malta tilfet il-vuċi fil-laqgħat fejn l-UE tieħu sehem. 

L-UE titkellem għall-pajjiżi membri kollha tagħha. 

Dan ifisser ukoll li Malta ħarġet telliefa mil-laqgħa ta’ Cancun għaliex l-UE tilfet il-partita.

L-agħar ħaġa li Malta setgħet jiġrilha hija li f’għajnejn il-pajjiżi fqar u li qegħdin jiżviluppaw Malta dehret waħda mill-għedewwa tagħhom u dehret tagħmel parti mill-pajjiżi sinjuri ta’ l-UE, li bil-politika kummerċjali tagħhom qegħdin jagħmlu ħsara lil u jżommu milli jimxu ’l quddiem, il-pajjiżi u li qegħdin jiżviluppaw.

L-Unjoni Ewropea reġgħet qiegħda titriegħed b’terrimot ta’ frodi u korruzzjoni fl-uffiċċju ta’ l-Istatistika ta’ l-Unjoni, magħruf bl-isem ta’ Eurostat. 

F’dan l-uffiċċju hemm madwar 730 impjegat. 

Id-direttur ta’ l-Eurostat, Yves Franchet, tneħħa minn postu f’Lulju li għadda minħabba l-iskandlu li faqqa’ f’April ta’ qabel.

Il-ġimgha l-oħra l-President tal-Kummissjoni Ewropea, Romano Prodi, deher quddiem il-presidenti tal-gruppi tal-partiti politiċi li hemm fil-Parlament Ewropew u quddiem il-Kummissjoni tal-Parlament li tissorvelja l-kontijiet ta’ l-UE, biex jagħtihom rendikont dwar l-iskandlu ta’ frodi u korruzzjoni li nstab s’issa fl-Eurostat.

L-Eurostat jaqa’ taħt ir-responsabbiltà diretta tal-Kummissarju tal-ħwejjeġ monetarji u ekonomiċi, l-Ispanjol Pedro Solbes.

Jiżfnu fl-inkwiet maħluq mill-iskandlu ta’ l-Eurostat jinsabu mhux biss il-Kummissarju Pedro Solbes, iżda anki l-Vici President tal-Kummissjoni Ewropea, l-Ingliż Neil Kinnock u saħansitra l-istess President, Romano Prodi.

Numru ta’ deputati tal-Parlament Ewropew qegħdin jixlu lil Romano Prodi u Neil Kinnock li ma ħadux il-passi meħtieġa kontra min kien responsabbli, meta huma saru jafu bil-frodi u l-korruzzjoni.

Skond rapporti li saru mill-uffiċċju ta’ kontra l-frodi mwaqqaf mill-Unjoni Ewropea u magħruf bl-isem ta’ OLAF, il-Eurostat għamlet kuntratt frawdolenti ma’ kumpaniji privati li tqabbdu jagħmlu 

* xogħol ta’ statistika dwar l-ekonomija, 

* il-finanzi, 

* il-popolazzjoni, 

* l-industrija, 

* kummerċ u 

* oqsma oħra ta’ l-Unjoni. 

Tnejn minn dawn il-kuntratti huma kbar, wieħed ta’ għaxar miljuni u nofs Euro u ieħor ta’ erba’ miljuni u sitt mitt elf Euro.

Jingħad li l-qerq fil-kuntratti sar billi l-kuntratti ngħataw valuri aktar milli kienu jiswew. 

Id-differenza marret jew f’kontijiet bankarji ta’ uffiċjali ta’ l-Eurostat jew fi ħlas ta’ vjaġġi u vaganzi tagħhom jew inkella f’benefiċċji oħra mogħtija lilhom. 

Instab li ma kienx hemm kontroll tajjeb tal-kontijiet u ta’ l-infieq tal-flus u l-għoti ta’ kuntratti lill-kumpaniji ta’ l-istess uffiċjali ta’ l-Eurostat jew li l-uffiċjali għandhom interess qawwi fihom.

F’Lulju tas-sena l-oħra l-OLAF, l-uffiċċju ta’ kontra l-frodi ta’ l-UE, wissa lill-Kummissjoni Ewropea li aktarx kien hemm frodi f‘kuntratti mogħtija mill-Eurostat lill-kumpaniji privati Eurogramme u Eurocost.

F’Marzu ta’ din is-sena l-Parlament Ewropew talab lill-Kummissjoni Ewropea tagħmel inkjesta dwar il-kuntratti kollha ta’ l-Eurostat sa mis-sena 1999.
 

F’Lulju li għadda, Romano Prodi ħabbar li waqqaf “task force” biex tagħmel investigazzjoni tal-kuntratti u l-kontijiet ta’ l-Eurostat u ħa miżuri drastiċi biex jikkontrolla l-ħidma tagħha fosthom billi ssospenda lid-direttur ta’ l-Eurostat, Yves Franchet.

Il-Parlament Ewropew xejn ma deher sodisfatt li l-Kummissjoni Ewropea kienet qdiet dmirha sew fit-tmexxija ta’ l-Uffiċċju ta’ l-Istatistika, l-Eurostat, li tiegħu l-Kummissjoni hija responsabbli. 

Il-Parlament talab li jisma’ lil 

* Romano Prodi, 

* lill-Viċi tiegħu Neil Kinnock u 

* lill-Kummissarju responsabbli ta’ l-Eurostat, Pedro Solbes. 

Xi membri tal-Parlament jidhrilhom li l-Kummissarju Solbes għandu jirriżenja għaliex ma kkontrollax kif kellu jagħmel l-Ufficcju ta’ l-Istatistika. 

Mentri oħrajn jgħidu li anki l-Viċi President Kinnock għandu jirriżenja għax dan kellu d-dmir li jagħmel ir-riformi meħtieġa wara l-iskandli ta‘ korruzzjoni li waqqgħu l-Kummissjoni Ewropea fl-1999 li kienet imexxija minn Jacques Santer, tal-Lussemburgu.

Anki Romano Prodi huwa mhedded flimkien mal-Kummissjoni Ewropea kollha għaliex huma mixlija li kaxkru saqajhom u ma ħadux passi mill-ewwel hekk kif saru jafu bil-każi ta’ frodi u korruzzjoni ta’ Eurostat. 

La Solbes u lanqas Kinnock m’huma mdaħħla personalment fil-każi ta’ frodi u korruzzjoni. 

Huma mixlija biss li naqsu milli jagħmlu dmirhom kif mistennija minnhom.

Romano Prodi, meta fil-25 ta’ Settembru deher quddiem il-kapijiet tal-gruppi tal-partiti politiċi tal-Parlament Ewropew u tal-Kummissjoni Parlamentari li tikkontrolla l-infieq ta‘ l-Unjoni, saħaq li l-akbar każi ta’ frodi u korruzzjoni ġejjin minn qabel l-1999 taħt il-Kummissjoni Ewropea li kienet imġagħla tirriżenja. 

Huwa insista wkoll li ma kienx hemm traskuragni min-naħa tal-Kummissarju Solbes u lanqas nuqqasijiet mill-Viċi President Kinnock. 

Huwa warrab għal kollox il-ħsieb li l-Kummissjoni Ewropea kollha tirriżenja minhabba l-iskandlu ta’ l-Eurostat.

Għad mhux magħruf x‘se jiddeċiedi l-Parlament Ewropew dwar din il-ġrajja ta’ għajb li tkompli ddgħajjef il-fiduċja tal-pubbliku fl-UE.

Lanqas m’huwa magħruf kemm miljuni ta‘ Euros tħallsu żejda mill-UE bi frodi u b’korruzzjoni. 

Il-fondi ta‘ l-UE ġejjin kollha mit-taxxi taċ-ċittadini tal-pajjiżi membri.

IRRIDU L'INDIPENDENZA MILL-UNJONI EWROPEA

Il-Ħamis, 2 ta’ Ottubru, 2003

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola liċ-

Segretarju Finanzjarju  CNI,

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ