MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

Il-ħaddiema tax-Xatt u l-UE

Il-Ħaddiema tax-Xatt għaddejjin mill-inkwiet tort tas-sħubija ta’ pajjiżna fl-Unjoni Ewropea. 

Għax is-sħubija fl-UE hija l-kaġun tat-tibdil fil-kundizzjonijiet tax-xogħol tal-ħaddiema tax-Xatt.

Bl-iskuża tar-riformi fil-portijiet, il-Gvern qed iwettaq id-direttivi ta’ l-Unjoni li jfissru li l-ħaddiema tax-Xatt jitilfu ħafna mid-drittijiet u l-benefiċċji li huma kisbu matul l-aħħar 50 sena.

Dawk li huma favur is-sħubija fl-Unjoni, allavolja din hija ta’ ħsara għall-ħaddiema, qegħdin jagħmlu minn kollox ħalli jaljenaw lill-ħaddiema tax-Xatt u jnessuhom li t-tibdiliet għall-agħar tal-kundizzjonijiet tax-xogħol huma kollha tort tal-politika u d-direttivi ta’ l-Unjoni. 

Minflok kontra l-UE, il-ħaddiema qegħdin jiġu mġiegħla jeħduha kontra l-mexxejja tat-trejdjunjin tagħhom, minkejja li dawn ma jaħtu xejn għall-għawġ li l-ħaddiema qegħdin ikollhom jiffaċċjaw.

Il-propagandisti ta’ l-UE mhux biss qegħdin jirnexxielhom ma jħallux lill-ħaddiema tax-Xatt jintebħu li l-gwaj kollu tagħhom ġej mis-sħubija fl-Unjoni, iżda wkoll qegħdin jirnexxielhom idagħjfu l-għaqda tal-ħaddiema u ta’ l-unjin tagħhom. 

B’hekk il-ħaddiema tax-Xatt ma jkunux b’saħħithom biżżejjed biex jiġġieldu ħalli ma jitnaqqsulhomx id-drittijiet u l-benefiċċji li huma kisbu fl-imgħddi.

Il-ħaddiema tax-Xatt imisshom jintebħu bil-qerq tal-propagandisti ta’ l-UE li qegħdin jingannawhom.

Dawn mhux biss iridu jnaqqsulhom mid-drittijiet u l-benefiċċji li qegħdin igawdu sa llum, talli wkoll iridu jdgħajfu lill-ħaddiema ħalli ma jkunux aktar b’saħħithom biex jieqfu kontra t-telfien ta’ drittijiet u benefiċċji aktar ’l quddiem. 

Din il-ħidma qiegħda sseħħ billi l-ħaddiema tax-Xatt qegħdin jitkesksu kontra l-mexxejja tat-trejdjunjin tagħhom biex joftmuhom minnha. 

U qiegħda sseħħ minn min ħadem favur is-sħubija ta’ pajjiżna fl-Unjoni u għaldaqstant għandu sehem kbir mit-tort tal-gwaj kollu li l-ħaddiema tax-Xatt għaddejjin minnu.

L-istess diskors għandu jingħad għal dak li ġarrbu l-ħaddiema tal-kumpanija Sea Malta. 

Tkesksu kontra l-mexxejja responsabbli għat-telfien tax-xogħol tagħhom.

Anki fil-każ tal-kumpanija Air Malta. Il-ħaddiema u l-impjegati tagħha tnaqqsulhom il-benefiċċji u dan kien kollu tort tas-sħubija ta’ pajjiżna fl-UE.

Huwa għajb li din il-ħsara kollha qiegħda tiġri lill-ħaddiema ta’ pajjiżna. 

Iżda huwa għajb akbar li l-ħaddiema qegħdin ikunu ingannati, tant li ma jindunawx min huma ħatja tal-ħsara li qiegħda ssirilhom u minflok, qegħdin jħottu l-għaqda ta’ bejniethom u jiċħdu lill-mexxejja tat-trejdjunjin tagħhom li permezz tagħha l-ħaddiema kien irnexxielhom jiksbu l-benefiċċji u d-drittijiet tagħhom.

Is-saħna tat-taqtiegħa ma tħallix lill-ħaddiema jirriflettu u jiflu sewwa x‘inhu jiġri. 

Iżda kull ħaddiem għandu f’xi mument jew ieħor jintebah li qed jiġi ngannat. 

Jirrealizza li l-kaġun ta’ l-inkwiet huwa t-tibdil li l-Gvern irid jagħmel fil-kundizzjonijiet tax-xogħol. 

U li dan it-tibdil ġej mid-direttivi ta’ l-UE u mis-sħubija ta’ pajjiżna fl-UE. 

Kull ħaddiem għandu jsib li dawk li ħadmu favur is-sħubija, jaħtu ta’ dak li qed jiġri llum. 

Għandu jifhem li dawn illum qegħdin jgħinu lill-Gvern idgħajjef is-saħħa tal-ħaddiema ħalli jimponi t-tibdil kollu li l-UE trid li jsir.

Fil-każ tal-ħaddiema tax-Xatt, dawn għandhom jiftakru li erbat ijiem ilu l-Gvern ċaħħadhom milli jkollhom sehem fil-kumpanija li tħaddem il-merkanzija fil-Port il-Kbir, meta ma aċċettax l-offerta tal-kumpanija li fiha l-ħaddiema tax-Xatt u l-GWU kellhom l-istima. 

Dawk li llum qegħdin ikesksu lill-ħaddiema, taw l-appoġġ tagħhom lis-sidien li għandhom sehem fil-kumpanija li ngħatat l-monoplju tax-xogħol tal-Port il-Kbir u mhux lill-ħaddiema tax-Xatt.

L-industrija tal-manifattura u tat-turiżmu u l-UE

Il-politika ta’ l-Unjoni Ewropea fl-oqsma ekonomiċi u soċjali, li l-Gvern Malti jkollu bilfors iwettaq, qiegħda tagħmel ħerba mill-industrija tal-manifattura u jtellef l-impjieg ta’ ħafna ħaddiema.

L-aħħar aħbar ta’ l-għeluq tal-fabbrika tal-Menrad u t-tmiem ta’ l-impjieg ta’ 120 ħaddiem, ifakkarna fl-għeluq ftit taż-żmien ilu tal-fabbrika tad-Denim u t-telfien ta’ l-impjieg ta’ 700 haddiem, kif ukoll f’għadd ta’ fabbriki oħrajn li kellhom jagħlqu fl-aħħar sentejn minn mindu Malta ssieħbet fl-Unjoni Ewropea.

Il-Gvern Malti ma jista’ jagħmel xejn biex iwaqqaf il-ħerba fl-impjiegi f’pajjiżna, sakemm jibqa’ marbut bil-politika ta’ l-Unjoni Ewropea li ma tħallihx jagħti l-għajnuna meħtieġa biex nevitaw il-qgħad f’pajjiżna.

Dan huwa fatt ikrah ħafna għal pajjiżna u l-Gvern Malti jagħmel minn kollox biex ma jsemmuħx, halli l-poplu tagħna ma jkomplix jiftah għajnejh għall-hsara enormi li s-sħubija fl-Unjoni qiegħda tagħmlilna.

Il-ġurnalisti u x-xandara Maltin huma komplici mal-politiċi Maltin fil-konġura tal-ħabi mill-poplu tal-fatt tat-telfien ta’ l-impjiegi f’Malta ikkaġunati mill-politika ta’ l-Unjoni Ewropea.

Mhux biss l-industrija tal-manifattura qiegħda titħarbat b’konsegwenza tas-sħubija ta’ pajjiżna fl-Unjoni Ewropea, iżda anki l-industrija tat-turiżmu. 

Iż-żieda fl-ispejjeż kkaġunati mid-direttivi ta’ l-Unjoni qiegħda tagħmel lil pajjiżna inqas kompetittiv u qiegħda tnaffar lit-turisti milli jiġu f’pajjiżna.

Qabel ir-referendum dwar is-sħubija fl-Unjoni, kienu jgħidulna li l-industrija tat-turiżmu tikber jekk nissieħbu fl-Unjoni.

Isseħibna fl-Unjoni u t-turisti minflok żdiedu, naqsu, fil-waqt li pajjiżi oħrajn li m’humiex fl-Unjoni, bħat-Tunezija, żdiedu fit-turisti u dan minkejja li m’għandhomx il-munita ta’ l-Ewro u minkejja l-ħtieġa tal-passaport u tal-visa.

Il-Ministru tat-Turiżmu xi ġranet ilu tkellem dwar il-miżuri li se jittieħdu ħalli l-industrija tat-turiżmu terġa’ tirpilja. 

Iżda l-Ministru saħaq li dawn il-miżuri jridu jkunu skond d-direttivi u l-politika ta’ l-Unjoni Ewropea.

Dan ifisser li l-Gvern huwa mxekkel x’miżuri jista’ jieħu biex iqajjem l-industrija tat-turiżmu għax l-Unjoni Ewropea ma tħallihx jaddotta miżuri li jgħinu biex pajjiżna ikun aktar kompetittiv jekk il-miżuri ma jħallux mhux imtiefsa l-kompetizzjoni fis-suq turistiku ma’ pajjiżi oħrajn.

Fi kliem ieħor is-sħubija fl-Unjoni Ewropea timponi ħafna restrizzjonijiet fuqna li pajjiżi oħrajn mhux fl-Unjoni, bħat-Tuneżija, m’humiex suġġetti għalihom.

Imissna nifhmu li aktar ma pajjiżna jsir bħall-pajjiżi l-oħrajn ta’ l-Unjoni Ewropea, inqas ikun attraenti għat-turisti li ġejjin mill-pajjiżi ta’ l-Unjoni Ewropea.

Hawn ifittxu ħwejjeġ li għandhom f’pajjiżhom. 

Għalhekk aktar ma nkunu differenti mill-pajjiżi ta’ l-Unjoni Ewropea, aktar inkunu nistgħu niġbdu lejn turisti mill-pajjiżi ta’ l-Unjoni.

Billi l-munita tagħna ma tkunx l-Ewro, m’aħniex se nnaffru lit-turisti ta’ l-Unjoni Ewropea li jiġu Malta. 

U billi naqilbu għall-Ewro mhux se nħajru aktar turisti mill-pajjiż ta’ l-Unjoni jiġu f’pajjiżna.

L-industrija tal-manifattura u l-industrija tat-turiżmu kienu żewġ pilastri li fuqhom bnejna il-ġid ta’ pajjiżna.

Issa ż-żewġ industriji qegħdin jitharbtu minħabba s-sħubija tagħna fl-Unjoni Ewropea. 

Narawhom jitħarbtu u ma nistgħu nagħmlu xejn għax idejna huma marbutin bid-direttivi u l-politika ta’ l-Unjoni.

U l-politiċi Maltin m’għandhomx id-diċenza li jgħidu dan lill-poplu Malti għax ma jridux li aktar u aktar mill-poplu jintebah x’iżball għamilna meta sseħibna fl-Unjoni.

Biex iż-żewġ industriji ma jibqgħux sejrin lura, rridu ninħallu mid-direttivi u l-politika ta’ l-Unjoni Ewropea ħalli nkunu nistgħu nadottaw il-miżuri kollha li huma meħtieġa biex ngħinu liż-żewġ industriji u lill-ħaddiema tagħhom.

L-immigranti illegali u l-UE

Il-poplu Malti xeba’ jisma’ li se jsiru laqgħat sabiex tiġi mitħaddta l-kwistjoni ta’ l-immigrazzjoni illegali f’pajjiżna u sadanittant in-numru ta’ immigranti illegali dejjem jiżdied. 

Din il-kwistjoni qbadniha ħażin mill-ewwel meta aċċettajna li noqogħdu għad-direttivi ta’ l-UE dwar l-immigranti.

Għax fil-waqt li fil-każ tal-pajjiżi l-oħrajn ta’ l-UE l-immigranti illegali jridu jmorru fihom, fil-każ ta’ Malta dawn ma riedux jiġu f’Malta u sabu ruħhom f’Malta minħabba ċirkostanzi li ma kellhomx kontroll fuqhom. 

Dan ifisser li huma ma ġewx Malta illegalment, iżda sabu ruħhom f’Malta aċċidentalment.

 Għaldaqstant il-liġijiet ta’ l-UE li japplikaw għall-immigranti illegali li jmorru fi Sqallija, fl-Italja u fi Spanja, ma għandniex napplikawhom għall-immigranti illegali li jsibu ruġhom aċċidentalment f’Malta.

L-immigranti illegali fl-Italja u fi Spanja jridu li joqogħdu hemm. 

Fil-każ ta’ Malta, ma jridux li joqogħdu hawn. Għalhekk ma għandniex nittrattawhom l-istess bhal ma t-Taljani u l-Ispanjoli jittrattawhom. 

Ma għandniex inkunu marbutin li nittrattawhom skond id-direttivi u l-politika ta’ l-UE dwar l-immigrazzjoni illegali ghall-Unjoni, la darba l-immigranti jkunu hawn biss “in transit”.

Għamilna żball meta aċċettajna li l-immigranti illegali li jsibu ruħhom aċċidentalment f’Malta fi triqthom lejn il-pajjiżi ta‘ l-Ewropa, huma problema tagħna u mhux tal-pajjiżi fejn kienu sejrin lejhom. 

Jekk l-immigranti riedu jmorru Sqallija, ma jmissniex inwaqqfuhom li jmorru hemm. 

Jekk imbagħad it-Taljani ma jridux li aħna nħallu lill-immigranti jmorru lejn Sqallija, it-Taljani jridu jerfgħu l-piż ta’ dawk l-immigranti li nżommu f’pajjiżna u ma nhallux imorru lejn Sqallija.

Issa tħabbar li se ssir laqgħa bejn Malta, l-Italja u l-Libja dwar l-immigranti illegali. 

Sejrin nerġgħu niżbaljaw li mmorru nitħaddtu mal-Libjani bl-istess mod li t-Taljani jitħaddtu magħhom dwar l-immigranti illegali. 

Id-diskors tagħna ghandu jkun differenti minn dak tat-Taljani għax filwaqt li l-immigranti illegali jridu jmorru l-Italja jew Sqallija biex joqogħdu hemm, mhux l-istess fil-każ tagħhom f’Malta.

Il-Libjani jistgħu lit-Taljani jgħidulhom li huma mhu se jagħmlu xejn biex l-immigranti li jridu jmorru l-Italja, iwaqqfuhom milli jagħmlu dan. 

Jew jistgħu jitolbu mingħand it-Taljani xi kontro-partita biex ma jħallux lill-immigranti jitilqu mil-Libja għall-Italja, jew biex jaċċettaw li jeħduhom lura jekk it-Taljani jibagħtuhom lura l-Libja.

Lil Malta l-Libja mhux se tittrattaha l-istess bħal ma tittratta lill-Italja għal ħafna raġunijiet, fosthom għax taf li Malta qiegħda ssib ruħha intortament b’ħafna immigranti illegali li lanqas iridu joqogħdu f’Malta. 

Minbarra dan, in-numru ta’ immigranti illegali li jsibu ruħhom f’Malta huwa ħafna iżgħar minn dak li għandhom Sqallija u l-Italja. 

Għalhekk jekk il-Libja mhix lesta tittratta ma’ l-Italja dwar l-eluf kbar ta’ immigranti illegali li jmorru hemm, il-Libja tkun lesta ġġib ruħha differenti ma’ Malta dwar il-ftit mijiet ta’ immigranti li jaslu hawn.

Fil-laqgħa bejn Malta, l-Italja u l-Libja, ma nistennewx li l-Libjani jitkellmu magħna differenti milli jitkellmu mat-Taljani. 

Iżda jekk Malta tittratta mal-Libja waħeda u mhux flimkien mal-pajjiżi l-oħrajn ta’ l-UE, il-Libjani jkunu jistgħu jitħaddtu magħna b’mod differenti milli jitħaddtu ma’ l-UE.

Wara kollox irridu nifhmu li l-eluf li jitilqu mix-xtut tal-Libja, jinsabu fil-Libja bħala immigranti, u ħafna minnhom, jinsabu fil-Libja fi triqthom lejn l-Ewropa. 

Hu għalhekk fl-interess tal-Libja li tħallihom imorru lejn l-Ewropa li għandha bżonn l-immigranti u għalkemm l-UE turi li hija mħassba dwar il-kwistjoni ta’ l-immigranti illegali, fil-fatt ħafna fl-UE huma kuntenti bihom u jisfruttawhom, iżda ma jridux juru li jriduhom.

Is-Sibt, 2 ta’ Settembru, 2006.

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien?

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

60A, Triq id-Dejqa,

Valletta

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ