MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIZMU U L-ĦAKMA DITTATORJALI ILLEGALI TA' L-UNJONI EWROPEA

GĦID LID-DEPUTAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

IL-GVERN qal li se jkollhom jirtiraw mix-xogħol ’il fuq minn 1,000 ħaddiem tat-Tarzna. 

Dan ifisser li jkollhom jirtiraw ħaddiema li għandhom 45 sena età jew aktar skond l-iskeda li l-Prim Ministru qiegħed fuq il-Mejda tal-Parlament, dan l-aħħar.

Fil-fehma tas-CNI hija rresponsabbiltà kbira li tħeġġeġ ħaddiema ta’ 45 sena jirtiraw mix-xogħol. 

Hija wkoll kontra l-politika li tħajjar lill-ħaddiema jibqgħu jaħdmu sakemm jilħqu l-età ta’ 65 sena.

Jonqos mid-dmir tiegħu soċjali l-Gvern meta jgħid li ma jiggarantix xogħol għall-ħaddiema li jagħżlu li ma jirtirawx mix-xogħol.

Għax dan ifisser li l-għażla li l-ħaddiem għandu hija, li jew jagħżel li jirtira u jieħu somma ta’flus, jew jagħżel li ma jirtirax u jipperikola li jispiċċa bla xogħol u bla somma.

Dan huwa eżempju skandaluż tal-Gvern. 

Għax jekk il-Gvern jimxi b’dan il-mod mal-ħaddiema f’intrapriżi tiegħu, jista’ jiskoraġġixxi lill-intrapriżi privati, bħall-ST MicroElectronics, ma jagħmlux l-istess lill-ħaddiema tagħhom?

Mhux ġustifikazzjoni li jġib il-Gvern li l-ftehim ma’ l-Unjoni Ewropea ma jħallihx jimxi mod ieħor dwar it-Tarzna wara l-aħħar ta’ din is-sena. 

L-interess nazzjonali jirbaħ fuq il-ftehim li sar fil-2002.

Jekk mhux fl-interess nazzjonali ta’ 1,000 ħaddiem jispiċċaw mix-xogħol fit-Tarzna qabel jilħqu l-età tal-pensjoni, il-Gvern għandu d-dmir lejn il-poplu Malti li jgħid lill-Unjoni Ewropea li ċ-ċirkostanzi tal-lum f’pajjiżna ma jippermettulux li jħeġġeġ 1,000 ħaddiem jirtiraw mix-xogħol fit-Tarzna, mingħajr qabel ma jiżgurahom minn xogħol xieraq alternattiv.

Is-CNI temmen li hekk għandu jagħmel Gvern Malti li jħares l-interessi nazzjonali qabel dak li tordna l-UE, li mhux ta’ ġid għal pajjiżna.

Finanzjarjament, aktar iqumlu lil pajjiżna li 1,000 ħaddiem tat-Tarzna jieqfu mix-xogħol, milli li t-Tarzna tingħata għajnuna biex tkun tista’ tkompli tħaddimhom.

Mil-lat soċjali huwa għal kollox aktar ġust għalihom u għall-familji tagħhom, li 1,000 ħaddiem jkomplu jaqilgħu ħobżhom bis-saħħa ta’ xogħolhom fit-Tarzna.

Mill-aspett ekonomiku, pajjiżna jmur aħjar jekk jagħti għajnuna ħalli bil-ħidma ta’ 1,000 ħaddiem tat-Tarzna jidħlu f’pajjiżna l-ħlasijiet għax-xogħlijiet li jagħmlu lill-barranin, li jkomplu jsiru l-kontribuzzjonijiet tagħhom għas-Sigurtà Soċjali, u li titħallas it-taxxa tad-dħul (l-income tax) mill-1,000 ħaddiem, li mbagħad jagħtu lill-Gvern 18 fil-mija mill-pagi li jonfqu fix-xiri ta’ prodotti u servizzi suġġetti għat-taxxa tal-VAT.

Is-CNI ssostni li għar-raġunijiet soċjali, ekonomiċi u finanzjarji l-poplu Malti ma għandux jaċċetta l-amar ta’ l-Unjoni Ewropea dwar it-Tarzna, li jfisser li 1,000 ħaddiem tat-Tarzna jirtiraw mill-impjieg, jew it-Tarzna tingħalaq wara l-aħħar ta’ din is-sena.

Mhux minnu li dawk huma l-uniċi toroq alternattivi li l-poplu Malti għandu għall-ġejjieni tat-Tarzna. 

L-interess kbir ta’ investituri barranin fit-Tarzna ta’ Malta, u d-domanda kbira li hawn bħalissa għat-tiswija tal-vapuri u tas-‘superyachts’, joffrulna l-opportunità li nsaħħu u niżviluppaw it-Tarzna, mhux li nċekknuha u nfarrkuha f’ħafna bċejjeċ.

Għandna bżonn iżda, id-dehen u l-kuraġġ li ngħidu lill-Unjoni Ewropea li l-kwistjoni tat-Tarzna hija kwistjoni nazzjonali għall-poplu Malti, u li fi kwistjonijiet nazzjonali, l-interessi tal-poplu Malti jiġu qabel il-kmandamenti u l-politika ta’ l-Unjoni Ewropea.

Is-CNI tisħaq li Malta m’għandhiex toqgħod għall-ultimatum ta’ l-Unjoni Ewropea li sa l-aħħar ta’ din is-sena, jew tirtira 1,000 ħaddiem mill-impjieg fit-Tarzna, jew tagħlaq it-Tarzna.

Kull Malti veru li jgħożż lill-pajjiżna, ma għandux joqgħod għall-ultimatum ta’ l-Unjoni Ewropea u tal-pappagalli tagħha f’pajjiżna. 

Pajjiżna jeħtieġ min imexxi ’l quddiem, mhux min jitmexxa minn imnieħru mill-barrani.

Is-Sibt, 2 ta’ Awwissu, 2008

IRRIDU L'INDIPENDENZA MILL-UNJONI EWROPEA

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

60A, Triq id-Dejqa,

Valletta

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ