MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

Tletin sena ilu l-poplu Malti kiseb il-ħelsien sħiħ mill-barrani.

Ħames snin ilu, fl-1 ta’ Mejju 2004, il-poplu tilef il-ħelsien sħiħ meta ssieħeb fl-Unjoni Ewropea.

Għax bis-sħubija fl-UE ir-rieda tal-maġġoranza tal-Maltin ma baqgħetx sovrana f’pajjiżna u r-rieda tal-maġġoranza tal-UE saret hija sovrana f’pajjiżna.

Dan il-fatt huwa l-qofol tat-telfien tal-ħelsien sħiħ tal-poplu tagħna.

Fl-Unjoni mhux aħna niddeċiedu x’nagħmlu f’pajjiżna.

Tiddeċiedi l-maġġoranza tal-UE, anke kontra r-rieda tal-maġġoranza tagħna li ma tkunx taqbel mal-UE.

Għalhekk m’għandniex aktar ħelsien sħiħ.

Mhux il-Prim Ministru u l-Ministtri Maltin maħturin mill-poplu jmexxuna.

Tmexxina l-UE għax il-Prim Ministru u l-Ministri jesegwixxu l-ordnijiet li jirċievu minn Brussels, u ma jagħmlu xejn li ma tkunx approvata mill-UE.

Huma bħal pupazzi li jiġbdulhom l-ispaga.

Iżda jagħmlu ta’ bir-ruħhom li jiddeċiedu u jmexxu huma.

Mhu veru xejn.

Tal-UE jikkmandawhom.

L-UE ma tħalliniex nagħmlu ftehim ma’ pajjiżi barranin jekk mhux kif tgħid hi.

Mhux kif jaqbel lill-poplu tagħna, iżda kif trid l-UE.

M’għadniex ħielsa li nħarsu l-interessi tagħna l-ewwel, għax l-interessi tal-Unjoni jiġu qabel dawk tal-Maltin.

M’għadniex aktar ħelsin li nagħtu l-għajnuniet lill-industriji tagħna għax l-UE ma tħalliniex nagħtuhom vantaġġ fuq l-industriji tal-Unjoni, minkejja li pajjiżna għandu l-iżvantaġġi u taċ-ċokon, ta’ gżira, u mingħajr riżorsi naturali li l-pajjiżi kbar tal-Unjoni għandhom.

M’għadniex aktar ħelsin li ma nħallux barranin bla permess f’pajjiżna, għax l-UE tikkmandana x’nagħmlu fil-qasam tal-immigrazzjoni.

Qegħdin niffaċċjaw invażjoni.

B’idejn marbutin bil-politika tal-Unjoni, m’aħniex ħelsin li nieħdu l-passi kollha meħtieġa ħalli nwaqqfuha.

Aħna ħelsin biss li nitkarrbu l-għajnuna tal-Unjoni, li qatt ma tasal.

M’għadniex ħelsin li nużaw kif jaqblilna t-taxxi li nħallsu billi lill-poplu nagħtuh is-servizzi essenzjali, bħalma hi l-provvista tal-ilma, b’rati moderati li jista’ jlaħħaq magħhom bil-pagi li hawn.

L-UE ġġiegħlna ngħollu r-rati esaġerati biex ikopru l-ispiża kollha,

* ħalli b’hekk ngħakksu lill-familji,

* nheddu l-fabbriki,

* il-lukandi u

*  n-negozji, u

* nitilfu l-kompetittività.

M’aħniex ħelsin li nsegwu politika ta’ newtralità u non-allineament.

Is-sħubija fl-UE torbotna bil-politika komuni barranija, ta’ sigurtà u difiża allineata mal-organizzazzjoni militari tan-NATO.

L-akbar prova ta’ kemm tlfina l-ħelsien sħiħ, tagħtihielna l-UE stess meta spiss twaħħalna multi għax ma nobdux id-direttivi tagħha u theddidna li ttellagħna l-qorti tagħha jekk niksru r-regolamenti tagħha.

Erġajna sirna kolonja.

Mhux tal-Ingliżi… tal-Unjoni Ewropea.

L-aqwa ċertifikat ta’ kemm m’aħniex aktar ħelsin tatulna l-Kummissarju Ewropew Kroes meta ġiet fostna xhur ilu u pubblikament ċanfret lill-Gvern għax il-pjan tiegħu għall-privatizzazzjoni tat-Tarzna m’għoġobhiex u ordnatlu li jħejji pjan ieħor, inkella l-UE tieħu passi kontrih.

Ksibna l-ħelsien sħiħ billi ħadna f’idejna t-tmexxija ta’ kollox f’pajjiżna.

Meta sseħibna fl-UE, it-tmexxija ta’ ħafna mill-oqsma importanti reġgħet għaddiet għand il-barranin –

* tal-akbar bank,

* tal-ajruport,

* tal-Freeport,

* tat-tagħbija u l-ħatt tal-merkanzija fil-Port il-Kbir,

* tat-trasport tal-merkanzija bil-baħar,

* tat-telekomunikazzjoni,

* tal-posta, u

* ta’ oqsma oħrajn.

Għalhekk m’għadniex ħelsin li mmexxu ħwejjiġna u m’għadniex aktar sidien f’darna.

Ħames mitt sena ilu r-raħħala Maltin kisbu l-ħelsien mill-ħakma tal-barrani billi ssagrifikaw ruħhom u ġabru s-somma ta’ flus ħalli jifdu gżiritna minn idejn min kien xtraha mingħand is-Sultan Alfonsu.

Tletin sena ilu eluf ta’ ħaddiema Maltin ma stmerrewx jissagrifikaw l-impjieg tagħhom mas-Servizzi Ingliżi biex il-poplu tagħna jikseb il-ħelsien sħiħ.

Iżda ħames snin ilu, b’għajb kbir għalina, biegħna l-aktar ħaġa għażiża li hija l-ħelsien, għall-flus li tal-UE wegħduna.

U llum, b’ipokresija kbira, għandna l-wiċċ niċċelebraw il-ħelsien li ttradejna.

Spiss jgħidulna kemm miljuni se nirċievu mill-Unjoni Ewropea.

Issa waslu biex isemmu biljun.

Mank iżda jgħidulna kemm miljuni qiegħda tiswielna s-sħubija fl-UE.

Jaħbu kemm inħallsu lill-UE f’kontribuzzjoniet diretti, kemm nagħmlu spejjeż biex inkunu konformi mad-direttivi tal-Unjoni, biex namministraw ir-regolamenti tagħha, u biex namministraw il-fondi tal-proġetti mgħejjuna mill-Unjoni.

Jaħbu kemm ikollna nħallsu prezzijiet ogħla għall-ikel li nimportaw, konsegwenza tal-politika tal-UE.

Il-Kummissjoni Ewropea tistma li ras għal ras kull ċittadin tal-UE jħallas kull sena €235 f’taxxi.

L-organizzazzjoni Ingliża Taxpayers’ Alliance issostni li l-ispiża reali ta’ kull ċittadin hija ta’ €2,400 fis-sena u mhux €235.

Dan ifisser li s-sehem tal-Maltin u l-Għawdxin mill-ispiża totali tas-sħubija fl-UE hija ta’ €960 miljun fis-sena.

Dawn il-kalkoli jġiegħlu lil Matthew Elliot, il-Kap Eżekuttiv tat-Taxpayers’ Alliance, isejjaħ is-sħubija fl-Unjoni Ewropea

“The Great European Rip OFF”,

li tfisser is-serqa l-kbira Ewropea.

L-Unjoni Ewropea mhix biss maħkuma bi kriżi finanzjarja u ekonomika, iżda agħar minn hekk, qiegħda tiffaċċja kriżi ta’ nuqqas ta’ appoġġ popolari.

Skont l-aħħar stħarriġ tal-Eurostat tal-UE, f’Malta dan l-appoġġ niżel għal 48% tal-poplu, waqt li skont l-aħħar stħarriġ magħmul mill-BBC, fir-Renju Unit 55 fil-mija tal-poplu jaqblu li joħorġu mill-UE.

Il-maġġoranza ta’ l-Irlandiżi ivvotaw kontra t-Trattat ta’ Riforma (ta’ Lisbona) tal-UE.

Sentejn ilu l-maġġoranza tal-Franċiżi u tal-Olandiżi kienu vvotaw kontra t-Trattat dwar il-Kostituzzjoni tal-Unjoni Ewropea.

Fl-elezzjonijiet tal-2004 għall-Parlament Ewropew, fl-UE kollha, il-medja ta’ dawk li interessaw ruħhom li jmorru jivvotaw kienet ta’ 45 fil-mija biss.

L-UE hija mħassba bis-sħiħ dwar il-mod kif l-interess u l-appoġġ popolari għaliha qiegħed dejjem jonqos.

Biex tipprova twaqqaf dan it-telf fl-interess u l-appoġġ popolari, l-UE nediet kampanja ta’ propa­ganda b’nefqa ta’ €18-il miljun għall-Elezzjonijiet li jmiss tal-Parlament Ewropew.

Dawn it-€18-il miljun, l-Unjoni se tonfoqhom f’‘billboards’, f’reklami u fuq mezzi oħrajn ta’ propaganda.

Dan mhux l-uniku każ ta’ kif l-UE taħraq il-miljuni li tiġbor mit-taxxi taċ-ċittadini tal-pajjiżi membri.

Skont l-ewroxettiċi tal-Irlanda, l-Unjoni qatgħetha li tonfoq €1.8 miljun oħrajn f’kampanja fl-Irlanda, bl-iskuża li teħtieġ tgħarraf lill-votanti Irlandiżi x’inhuma l-benefiċċji tat-Trattat ta’ Lisbona, bit-tama li fir-referendum li għandu jsir fil-ħarifa li jmiss, il-maġġo­ranza dik id-darba tivvota favur it-trattat.

Sakemm tibqa’ l-kriżi tal-immig­ranti klandestini f’pajjiżna, se nkomplu ntambru ħalli nwaqqfuhom milli jiġu fostna.

Mhux għax ma nagħrfux id-dinjità tagħhom bħala bnedmin, xejn inqas minna l-Maltin,

* iżda għax għandna d-dmir ewlieni li nħarsu lil ħutna l-Maltin,

* lil uliedna u

* ulied uliedna,

* mill-inkwiet soċjali u

* mit-theddid għas-saħħa u

* s-sigurtà tagħhom.

Il-Parlament Malti qiegħed jonqos milli jiddeċiedi dwar it-teħid ta’ miżuri konkreti ħalli jwaqqaf l-immigrazzjoni klandestina f’pajjjiżna.

Jeħtieġ li ssir aktar pressjoni popolari ħalli l-Parlament jgħaddi mid-diskors għall-azzjoni f’din il-kriżi li l-poplu tagħna qiegħed jiffaċċja.

Ma nistgħux inkomplu nittamaw li s-soluzzjoni tal-kriżi ta’ l-immigrazzjoni klandestina f’pajjiżna tiġi mill-Unjoni Ewropea jew mill-gvernijiet tal-pajjiżi tal-Afrika ta’ Fuq.

Is-soluzzjoni qiegħda f’idejn il-Parlament Malti li għandu s-setgħa jagħlaq il-bibien ta’ pajjiżna għall-immigranti klandestini.

Pajjiżna fetaħ il-bibien għall-immigranti klandestini meta ċeda għar-rikatt tal-UE li jekk ma naċċettawx li nżommu għandna l-immigranti illegali li jiġu, ma sseħibniex fiha.

Dan il-fatt miskin kixfu fid-29 ta’ April, 2008, fit-Times Louis Cilia, li kien wieħed mill-uffiċjali tal-Gvern Malti li kienu qegħdin jiddiskutu mal-UE s-sħubija ta’ Malta fl-UE.

Illum qegħdin inbatu l-konsegwenzi tal-iżball oħxon li sar meta ħassarna r-riservi kollha li l-Gvern Malti kien għamel fl-1971 għall-Konvenzjoni dwar ir-Refuġjati.

* Dawk ir-riservi kienu jagħtuna d-dritt li ma naċċettawx immigranti illegali

* minħabba ċ-ċokon ta’ pajjiżna,

* il-kobor tal-popolazzjoni u

* l-ħafna nuqqasijiet li pajjiżna għandu.

Is-soluzzjoni għall-kriżi tal-immigranti klandestini hija li pajjiżna jerġa’ jagħmel ir-riservi li kellna u li l-UE sforzatna nneħħu.

Hemm oħrajn membri tal-UE li għandhom riservi għall-Konvenzjoni dwar ir-Refuġjati.

Malta għandha raġunijiet akbar minn dawk il-pajjiżi biex tagħmel riżervi għall-konvenzjoni.

La darba l-UE ma tridx tgħinna ħalli nwaqqfu l-immigranti klandestini,

* aħna għandna d-dritt li nagħmlu dak li hu fl-interess nazzjonali tal-poplu Malti

* biex inħarsuh minn inkwiet soċjali, t

* heddid għas-saħħa u

* għas-sigurtà tal-poplu.

Jekk l-UE toġġezzjona li nerġgħu ndaħħlu r-riservi li għamilna fl-1971, għandna ngħidulha li se nħallu l-immigranti klandestini jmorru minn pajjiżna għall-pajjiżi l-oħrajn tagħha, kif wara kollox l-immigranti kollha jridu jagħmlu.

Il-Ħamis, 2 ta’ April, 2009

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

60A, Triq id-Dejqa,

Valletta

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ