MERHBA FIL

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

JEKK TIRRISPETTA L-KOSTITUZZJONI TA' PAJJIŻEK GĦID LID-DEPUTAT PARLAMENTARI TIEGĦEK JIRRISPETTA L-FEHMIET TIEGĦEK U MA JIVVOTAX FAVUR IL-KOSTITUZZJONI TA' L-UNJONI EWROPEA LI TKASBAR IL-KOSTITUZZJONI TA' MALTA.

Ir-rikatt tal-Gvern dwar il-Kostituzzjoni Ewropea

IL-GVERN qiegħed jirrikatta l-Oppożizzjoni Laburista fuq il-Kostituzzjoni ġdida ta' l-Unjoni Ewropea.

Il-Gvern qiegħed jagħmel dan ir-rikatt billi jixli lil-Oppozizzjoni li mhux veru aċċettat ir-rieda tal-maġġoranza li fl-elezzjoni ġenerali li għaddiet ivvotat favur is-sħubija ta' Malta fl-UE, jekk l-Oppożizzjoni ma tivvotax mal-Gvern favur ir-ratifika tal-Kostituzzjoni ġdida ta' l-UE, meta din titressaq fil-Parlament f'Lulju li ġej.

Minflok jilqgħu l-isfida sfaċċata tal-Gvern li qarraq bil-poplu Malti dwar il-ftehim infami li għamel ma' l-UE, x'uħud mill-Membri Parlamentari ta' l-Oppożizzjoni jidhru li lesti jċedu quddiem dan ir-rikatt tan-Nazzjonalisti.

Min-naħa l-oħra, jekk ma jaqgħux għar-rikatt tan-Nazzjonalisti, huma jagħtu prova li għandhom il-kuraġġ li jiddefendu l-konvinzjonijiet tagħhom.

Fuq kollox, il-Membri Parlamentari Laburisti juru li m'humiex lesti jiksru l-ġurament li ħadu ta' lealta` għall-Kostituzzjoni Maltija.

Bejn id-dgħjufija ta' min iċedi għar-rikatt u l-kuraġġ ta' min ma jibżax mir-rikatt, il-maġġoranza tal-poplu u żgur il-Laburisti kollha, jistmaw lil min ma jċedix u jistmerru lil min iċedi.

Dawk ta' l-ewwel juru li għandhom karattru, filwaqt li l-oħrajn tat-tieni juru li huma biss opportunisti.

Tajjeb li nżommu f'moħħna x'hemm fin-nofs tal-kwistjoni tar-ratifika tal-Kostituzzjoni ġdida ta' l-UE. M'hemmx fin-nofs il-kwistjoni tas-sħubija ta' l-Unjoni.

Jekk il-Kostituzzjoni ġdida ma tiġix ratifikata minn xi pajjiż membru, l-Unjoni Ewropea tibqa' dik li hija llum.

Il-kwistjoni hija jekk irridux li l-Unjoni Ewropea tal-lum tinbidel kif il-Kostituzzjoni ġdida se tibdilha, u jekk l-Unjoni Ewropea għandhiex tingħata s-setgħat ġodda fuq il-pajjiżi membri li l-Kostituzzjoni ġdida se tagħti lill-Unjoni.

Aktar milli naraw x'titjib jista' jkun hemm fl-Unjoni jekk tidħol fis-seħħ, aħjar naraw il-ħsara li din il-Kostituzzjoni tista' tikkaġulnalna u l-iżvantaġġi tagħha.

Fil-każ tagħna, il-Kostituzzjoni ġdida ta' l-UE tagħmlilna ħsara kbira.

L-ewwel ħsara kbira li tagħmlilna hija li ġġib fix-xejn il-Kostituzzjoni ta' pajjiżna.

Dan tagħmlu billi ssostni li l-liġijiet li l-Unjoni tagħmel, huma aqwa u fuq x'tgħid il-Kostituzzjoni ta' Malta.

Bil-maqlub ta' dak li l-Kostituzzjoni ġdida ta' l-UE ssostni, il-Kostituzzjoni ta' Malta tgħid li hija l-aqwa liġi f'Malta, u kull liġi f'Malta li ma taqbilx magħha, ma tkunx tgħodd fejn ma taqbilx.

Lesti l-Laburisti jittradixxu dan il-prinċipju?

L-Ispanjoli mhux favur il-Kostituzzjoni

MINKEJJA l-propaganda enormi li l-Gvern u l-partiti ta' l-Oppożizzjoni fi Spanja għamlu biex jikkonvinċu lill-votanti jmorru jivvotaw favur il-Kostituzzjoni ġdida ta' l-UE, kienu biss 424 minn kull elf Spanjol li marru jivvotaw.

Minn dawn it-42.4%, 17% ivvotaw LE, 6% tefgħu l-vot vojt, waqt li 77% ivvotaw iva.

Jiġifieri, 326 biss minn kull elf viotant ivvotaw favur il-Kostituzzjoni ġdida ta' l-UE.

Dan ifisser li 674 minn kull 1,000 Spanjol ma vvotawx favur il-Kostituzzjoni ġdida, minkejja li marru jitolbuhom jivvotaw favuriha kemm il-President Franciż Chirac, kif ukoll il-Kanċillier Ġermaniż Schroeder.

Għalhekk l-UE riedet li l-ewwel referendum jinżamm fi Spanja, bit-tama li jkun hemm vot massiċċ ta' iva, biex jinfluwenza l-votanti fir-referenda oħrajn f'pajjiżi oħrajn.

Minkejja l-propaganda qawwija li saret, xorta waħda l-votazzjoni kienet baxxa ħafna.

Fil-kampanja ta' propaganda hadu sehem personalitajiet magħrufin, inklużi kantanti jaqraw bċejjeċ mill-Kostituzzjoni, players kbar tal-football, leaflets jitqassmu waqt il-logħbiet, banners kbar, u birra bl-isem Referendum titqassam b'xejn fit-toroq.

Minkejja li sar ftaħir fil-pubbliku li l-vot iva kien suċċess, bejn l-erba' ħitan tal-Kummissjoni Ewropea ammettew li kien fjask

Anki wiċċ il-President tal-kummissjoni, Manuel Barroso, deher imqanżaħ, u l-viċi-President, Margot Wallstrom, stqarret li r-riżultat tal-votazzjoni fi Spanja jixhed li l-poplu ma jħosshiex il-Kostituzzjoni ġdida ta' l-Unjoni.

Jekk kien daqstant diffiċli biex jikkonvinċu lill-poplu Spanjol biex imur jivvota favur il-Kostituzzjoni ġdida ta' l-UE, kemm se jkun aktar diffiċli biex jikkonvinċu popli oħrajn li m'humniex favur l-Unjoni Ewropea daqs l-Ispanjoli, biex joħorġu jivvotaw għall-Kostituzzjoni ġdida ta' l-UE?

Fil-fatt, korrispondent tal-BBC minn Madrid, fisser dan l-ewwel referendum bħala l-ewwel żelqa tal-Kostituzzjoni Ewropea.

Ir-razziżmu ta' l-Unjoni Ewropea

DAN l-aħħar Maltija marret Pariġi u ħassitha kburija li kienet Maltija, issa li Malta saret biċċa mill-Unjoni Ewropea.

Hekk ftaħret fi programm televiżiv professjonista għarfa meta kienet qiegħda titkellem kontra r-razziżmu. Lanqas intebħet kemm kienet razzista f'dak li qalet.

Qalet li ħassitha kburija għax issa qegħdin nieħdu sehem fid-deċiżjonijiet li l-Ewropa tieħu.

Din il-professjonista li tippretendiha ħafna, mingħaliha li ggustawha b'dak li ftaħret.

Ma tafx li tkażaw bit-tkessieh u l-istupitaġni tagħha, dawk li semgħuha tippapra fuq it-televizjoni.

U lanqas intebħet kemm għadruha bħala meskina u vojta l-Franciżi li magħhom f'Pariġi esklamat l-istess diskors li qalet fil-programm televiżiv tal-PBS.

Meta niflu dan il-kliem ta' din il-Maltija li marret Pariġi, naraw kemm huwa falz u żbaljat.

M'għandniex inkunu kburin bħala Maltin għax issieħibna fl-Unjoni Ewropea.

Jekk f'dawn il-ħwejjeġ hemm lok għall-kburija, għandhom iħossuhom kburin dawk il-popli li żammew l-indipendenza u s-sovranita` tagħhom, bħalma għamlu l-Isvizzeri u n-Norveġiżi, u mhux il-popli l-oħrajn ta' l-Ewropa li ċedew l-indipendenza u s-sovranita` tagħhom lill-UE.

Xi kburija hija din tal-Ġermanja u Franza li biex ma jerġghux ibiċċru lil xulxin fi gwerer imdemma, kellhom jingħaqdu f'unjoni ħalli jikkontrollaw lil xulxin?

Xi kburija hija din tat-Taljani li biex ma jibqgħux lura, ħassew il-ħtieġa li jintrabtu mal-karru tal-Franċiżi u l-Ġermaniżi?

Min għandhom biex ikunu kburin, in-negozjanti li b'ħilithom kapaċi jimxu 'l quddiem, jew dawk li jingħaqdu ma' oħrajn biex ikunu jistgħu jkomplu jgħixu?

L-istess diskors għandu jingħad dwar il-fatt li Malta taghmel parti mill-Ewropa.

Li niftaħru li aħna Ewropej huwa sinjal ta' razziżmu, għax jixhed li naħsbu li b'daqshekk aħna superjuri għall-popli tal-kontinenti l-oħrajn.

Għalhekk il-Maltija li marret Pariġi u ħassitha aktar kburija li issa sirna Ewropej, uriet li hija razzista u għamlitilna għajb, waqt li mingħaliha qiegħda tikkritika r-razziżmu.

Daħqu Bina

F'LAQGĦA pubblika għar-residenti ta' Qui-si-Sana, ftit tal-gimgħat ilu, wieħed li vvota IVA fir-referendum dwar is-sħubija fl-Unjoni Ewropea, sostna li għandhom jingħataw spjegazzjoni għax wegħduhom ħafna affarijiet u issa kollox qiegħed isir bil-maqlub ta' dak li kien imwiegħed.

Erbat ijiem ilu, wieħed prominenti li jappoġġja l-Gvern, kiteb f'ġurnal internazzjonali li l-Unjoni Ewropea kienet daħqet bil-Gvern Malti meta wegħditu ħafna ħwejjeġ qabel ir-referendum, u issa l-Gvern sab li ħafna mill-wegħdiet kienu fierha u ma jistgħux jitwettqu.

Għax huwa l-poplu li jkollu jġorr il-piż tat-taxxi ġodda, it-tnaqqis tal-kundizzjonijiet tax-xogħol, l-introduzzjoni tal-ħlas għas-servizzi tas-saħħa, il-qtugħ fl-istipendji u d-dħul tas-sistema ta' ħlas għat-tagħlim terzjarju, it-tibdil fil-pensjonijiet u ż-żieda fl-għoli tal-ħajja, li s-sħubija fl-Unjoni Ewropea ġabet magħha.

Min huwa prinċipalment ħati tal-mod kif daħqu bil-poplu, mhux talli mhux qed ibati wkoll, iżda ġie ppremjat.

Joe Borg, li kien Ministru ta' l-Affarijiet Barranin li mexxa l-ftehim ma' l-UE, laħaq Kummissarju Ewropew.

Simon Busuttil, il-kap propagandist tas-sħubija fl-Unjoni, inħatar membru tal-Parlament Ewropew.

Cachia Caruana laħquh Ambaxxatur ta' Malta fl-Unjoni Ewropea u Joanna Drake tawha post imħallas tajjeb hafna.

Kollha marru tajjeb bis-sħubija ta' Malta fl-Unjoni, mhux bħall-poplu, li mar ħażin hafna.

Illum, hafna li vvotaw IVA fir-referendum, huma mgħaddba għall-mod kif ġew ingannati dwar kemm se jmorru tajjeb bis-sħubija.

Il-maġġoranza żgħira li kien hemm favur is-sħubija, illum inqalbet f'maġġoranza akbar kontra s-sħubija fl-Unjoni.

Fost dawk li biddlu fehmthom, hemm il-ħaddiema u l-impjegati li tilfu x-xogħol tagħhom minħabba s-sħubija.

Hemm l-imprendituri li kellhom iżarmaw jew iċekknu l-impriżi tagħhom, minħabba s-sħubija.

Ma' dawn hemm in-nisa tad-dar li ma jistgħux ilaħħqu ma' l-għoli tal-ħajja u l-għarajjes li ma jifilħux għall-prezzijiet m'għola s-smewwiet tad-djar u tal-plots.

Ibda mill-Kummissarju Verheugen, li ġie hawn darba darbtejn biex jgħidilna kemm se nkunu tajjeb fl-Unjoni u spiċċa bil-Prim Ministru Fenech Adami li jibqa' magħruf bħala l-aqwa illuzjonista politiku li l-pajjiż kellu.

Ġurament ta' lealta` li jieħdu l-Membri Parlamentari kollha

Jiena ................................................ solennement naħlef / niddikjara li nkun tassew fidili u leali lejn il-Poplu u r- Repubblika ta’ Malta u l-Kostituzzjoni tagħha. (Hekk Alla jgħini).

Ġurament għall-qadi xieraq tal-kariga ta’ Prim Ministru jew Ministru ieħor jew Segretarju Parlamentari.

Jiena ................................................ solennement naħlef / niddikjara li naqdi fedelment u skond il-kuxjenza d-dmirijiet tiegħi bħala (Prim Ministru/Ministru/Segretarju Parlamentari) skond il-Kostituzzjoni u l-liġijiet ta’ Malta, mingħajr biża’ jew favur. ( Hekk Alla jgħini).

Ġurament għall-qadi xieraq tal-kariga ta’ President.

Jiena ..............................................., solennement naħlef / niddikjara li naqdi fedelment il-kariga ta’ President (li naqdi fedelment il-funzjonijiet tal-President) ta’ Malta, u li, skond l-aħjar ħila tiegħi nikkonserva, inħares u niddefendi l-Kostituzzjoni ta’ Malta. (Hekk Alla jgħini).

Sezzjoni 6 tal-Kostituzzjoni ta' Malta

6. Bla ħsara għad-disposizzjonijiet tas-subartikoli (7) u (9) ta’ l-artikolu 47 u ta’ l-artikolu 66 ta’ din il-Kostituzzjoni, jekk xi liġi oħra tkun inkonsistenti ma’ din il-Kostituzzjoni, din il-Kostituzzjoni għandha tipprevali u l-liġi l-oħra għandha, safejn tkun inkonsistenti, tkun bla effett.

Artiklu I-6 tal-Kostituzzjoni ta' l-Unjoni Ewropea

Il-Kostituzzjoni u l-liġijiet adottati mill-istituzzjonijiet ta’ l-Unjoni fl-eżerċizzju tal-kompetenzi konferiti lilha għandhom jipprevalu fuq id-dritt ta’ l-Istati Membri.

Tista' tafda lil min jikser il-ĠURAMENT tiegħu/tagħha?

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.