MERHBA FIL

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LID-DEPUTAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

L-Unjoni Ewropea ordnat li mis-sena 2010 il-Maltin u l-Għawdxin iħallsuha

€182,192 kuljum misruqa minn ħalq uliedek

Tradiment ta’ l-interessi nazzjonali

Il-President tal-Kummissjoni Ewropea, Josè Manuel Barroso, u l-mexxejja ta’ xi wħud mill-pajjiżi ta’ l-Unjoni, fosthom il-Prim Ministru Malti, kienu daqstant sfaċċati li ftaħru li t-Trattat ta’ Riforma maqbul fil-laqgħa għolja ta’ Lisbona, fit-18 ta’ Ottubru, isaħħaħ ix-xejra demokratika ta’ l-Unjoni, meta huma kienu qatgħuha li ma jħallux lill-popli jivvotaw demokratikament iridux it-Trattat.

Fih x’fih it-Trattat, l-akbar impatt li kellu fuq il-poplu kien dan – il-poplu fehem li l-Unjoni Ewropea qiegħda tifga’ d-demokrazija billi tiċħad liċ-ċittadini tagħha milli jivvotaw dwar, u qiegħda tbellagħhulhom, iriduh jew ma jriduhx.

Din il-fehma mferrxa se tnaqqas, mhux iżżid, l-appoġġ tal-poplu għall-Unjoni, u qiegħda tikxef l-ipokresija kbira tal-politiċi (anke Maltin) li jiftaħru li huma paladini tad-demokrazija, iżda jiċħduha lill-popli tagħhom, u jimponu fuqhom dak li l-politiċi jridu.

Il-mexxejja ta’ l-Unjoni u tal-pajjiżi membri (inkluża Malta) jsostnu li t-Trattat ta’ Riforma se jsaħħaħ l-Unjoni.

Meta jgħidu dan, lanqas jintebħu li l-poplu b’daqshekk jifhem li t-Trattat se jkompli jdgħajjef is-setgħat tal-gvern nazzjonali tiegħu, għax is-saħħa ġdida li t-Trattat jagħti lill-Unjoni, jeħodha mingħand il-gvernijiet tal-pajjiżi membri.

Aktar ma l-UE jkollha setgħat, inqas jibqgħalhom setgħat il-gvernijiet nazzjonali.

Il-poplu mhux biss jirrealizza dan it-telf, iżda jħossu miblugħ u skandalizzat kif il-politiċi tiegħu jiftaħru meta jgħaddu lill-Unjoni Ewropea t-tmexxija ta’ ħwejjeġ li l-poplu jkun feda fil-politiċi tiegħu u li hu jaħtar fl-elezzjoni biex imexxuh.

Spiċċajna bil-qagħda ta’ l-għajb li nivvotaw għall-politiċi tagħna biex imbagħad insibu li qegħdin imexxuna l-barranin li la nafuhom u lanqas ivvotajnilhom.

Għax f’kull qasam li l-UE tiddeċiedi xi ħaġa bil-maġġoranza tal-pajjiżi membri u kontra l-oppożizzjoni ta’ Malta, il-poplu Malti jkollu joqgħod għal dak li ma jridx u li ma jistax ibiddel bil-voti tiegħu fl-Elezzjoni Ġenerali.

F’dawk il-każi kollha, ir-rieda tal-maġġoranza tal-poplu Malti ma tiswa xejn, għax is-sovranità m’għadhiex f’idejh, iżda l-politiċi għaddewha lill-maġġoranza tal-barranin ta’ l-UE.

Dan huwa tradiment ta’ l-interessi tal-poplu Malti li dawk kollha li jiftaħru bit-Trattat ta’ Riforma ta’ l-UE qegħdin iwettqu.

Huma jittamaw li l-poplu llum ma jintebaħx b’dan għax idamdmuh bi propaganda ma taqta’ xejn u li ż-żmien iderri lill-poplu din l-umiljazzjoni nazzjonali.

L-istorja turi li llum jew għada l-poplu jħoss li għandu jqum u jerġa’ jkun ħieles minn dan il-madmad tal-barrani.

U għal dan l-iskop ifittex politiċi li jistgħu jifduh, jerġgħu jagħtuh ġieħu u jagħmluh sovran f’daru.

Aktar tagħrif dwar l-Unjoni Ewropea:

Immigrazzjoni

Il-politika ta’ l-Unjoni Ewropea dwar l-immigrazzjoni hija bil-maqlub tal-politika li pajjiżna għandu jkollu fir-rigward.

Minħabba ċ-ċokon ta’ pajjiżna, l-iffollar tal-popolazzjoni, in-nuqqas ta’ riżorsi, il-limitazzjoni ta’ l-opportunitajiet tax-xogħol, ma nistgħux nilqgħu immigranti.

U qiegħda tagħfas lill-Gvern ħalli jdaħħal fis-seħħ id-direttivi tagħha dwar l-integrazzjoni ta’ l-immigranti f’pajiżna.

Saħansitra tridna li nagħtuhom iċ-ċittadinanza Maltija wara ċertu żmien.

Qiegħda tinsisti magħna biex inħallu membri tal-familji ta’ l-immigranti jingħaqdu magħhom biex jgħixu f’pajjiżna.

Lill-poplu qegħdin jaħbulu x’inhi l-qagħda vera ta’ l-immigrazzjoni f’pajjiżna.

Skond stħarriġ ta’ organizzazzjoni Ingliża, is-sena l-oħra kellna f’Malta 1,913-il immigrant legali li mhux ġejjin mill-pajjiżi ta’ l-UE, u fis-sena ta’ qabel daħlu f’pajjiżna l-istess numru ta’ immigranti illegali.

L-Unjoni qiegħda ċċanfarna għax ftit huma dawk fostna li emmnu li t-taħlit tar-razez itejjeb il-kultura nazzjonali tagħna.

Dan jixhed li l-politika li l-Unjoni tridna nimxu biha hija li nħeġġu l-immigrazzjoni għal pajjiżna, mux li nopponuha għax ma nifilħux għaliha.

Unjoni Mediterranja

Il-ġimgħa l-oħra l-President Franċiż Nicolas Sarkozy reġa’ saħaq li għandha titwaqqaf Mediterranean Union li fiha jissieħbu l-pajjiżi kollha Ewropej li jmissu mal-Mediterran, u l-pajjiżi ta’ l-Afrika ta’ Fuq u tal-Lvant Nofsani bi xtuthom fil-Mediterran.

Huwa stieden lill-gvernijiet tal-pajjiżi kollha tal-Mediterran għal-laqgħa li għandha ssir fi Franza f’Ġunju li ġej.

Fil-laqgħa għandu jkun miftiehem is-sisien ta’ din l-unjoni ta’ xejra politika, ekonomika u kulturali, u fiha l-pajjiżi kollha jkunu meqjusin ugwali, hu x’inhu d-daqs tagħhom.

Sarkozy stqarr li jekk ’il quddiem ikun hemm gwerer ħorox taċ-ċiviltajiet u r-reliġjonijiet, dawn iseħħu fil-Mediterran u l-istess jiġri jekk se ssir gwerra bejn il-pajjiżi tat-Tramuntana u dawk tan-Nofsinhar tad-dinja.

Din l-unjoni tkun tista’ tieħu ħsieb kwistjonijiet kbar tal-mument, bħalma huma t-terroriżmu, l-immigrazzjoni, il-kriżi ta’ l-enerġija, it-tkabbir tal-kummerċ, l-iskarsezza ta’ l-ilma għax-xorb u l-iżvilupp sostenibbli tal-pajjiżi Mediterranji.

Ħela

Il-laqgħat għolja (magħrufin bħala ‘summits’) ta’ erba’ darbiet fis-sena tal-mexxejja tal-pajjiżi ta’ l-UE jqumulha bagatella enormi (u għalhekk lill-pajjiżi membri li jħallsu l-fondi lill-UE).

Kemm hi kbira l-ispiża tirriżulta miċ-ċifra li l-Unjoni ddeċidiet li tagħti lil Franza li se torganizza żewġ ‘summits’ fis-sitt xhur tas-sena d-dieħla meta Franza jkollha l-presidenza ta’ l-Unjoni.

Is-somma hi ta’ madwar €95 miljun, li tfisser spiża ta’ madwar €47 miljun għal kull ‘summit’.

'Partnership'

X’għandhom ikunu r-relazzjonijiet ta’ l-UE mat-Turkija hija kwistjoni li qiegħda tifred il-pajjiżi membri fil-blokk Ewropew.

Hemm pajjiżi li jridu li t-Turkija tissieħeb fl-UE, iżda hemm oħrajn li jriduha biss bi ftehim ta’ ‘partnership’ mhux ‘membership’.

Fost dawn ta’ l-aħħar hemm il-Ġermanja, li qabel kienet favur ‘membership’ għat-Turkija, iżda issa tidher li trid ftehim ta’ ‘partnership’.

Fl-aħħar ta’ din is-sena jagħlaq ftehim ta’ ‘partnership’ ieħor li l-Unjoni Ewropea għamlet mar-Russja għaxar snin ilu, magħruf bħala l-Partnership and Cooperation Agreement (PCA).

Sa erba’ snin ilu, fl-2003, l-UE kienet tgħid lil Malta li ftehim ta’ ‘partnership’ magħha ma jeżistux, meta sitt snin qabel hija kienet diġà għamlet wieħed simili mar-Russja.

Sussidji

Il-politika tal-biedja ta’ l-Unjoni Ewropea, magħrufa bħala l-Common Agricultural Policy (CAP), hija kkritikata bl-aħrax għal ħafna raġunijiet.

Fosthom, għas-sistema ta’ sussidji li tagħti għar-raba li ma jinħadimx.

X’uħud mill-akbar proprjetarji ta’ l-art jirċievu miljuni ta’ Ewros fis-sena għar-raba li ma jaħdmux.

Fost dawn hemm ir-Reġina Eliżabetta ta’ l-Ingilterra li fl-2003-2004 ingħatat €1.5 miljun f’sussidji agrikoli mill-Unjoni.

Reċiproċita'

Il-mexxejja ta’ l-Unjoni Ewropea u tal-pajjiżi l-kbar tal-blokk, fosthom il-Ġermanja, Franza u l-Ingilterra, fil-laqgħa tagħhom f’Lisbona, ġimgħatejn ilu, waslu biex aċċettaw li jisħqu li jkun hemm reċiproċità bejn l-istess Unjoni u l-pajjiżi li huma barra, rigward il-qasam ta’ l-investimenti.

Huma ftehmu li biex iħallu pajjiżi barra l-Unjoni jixtru impriżi fil-pajjiżi ta’ l-UE, dawn l-istess pajjiżi jridu jħallu bl-istess mod lill-pajjiżi Ewropej jixtru l-impriżi tagħhom.

Madwar 30 sena ilu l-Gvern Malti, immexxi mill-Perit Mintoff, daħħal f’pajjiżna l-kunċett tar-reċiproċità fil-kummerċ bejn Malta u l-pajjiżi barranin.

Bis-saħħa tal-politika ta’ reċiproċità, pajjiżi barranin kienu jitħallew ibiegħu f’Malta l-prodotti u s-servizzi tagħhom, kemm-il darba huma jixtru l-prodotti maħdumin f’Malta u s-servizzi mogħtijin mill-Maltin.

B’din il-politika kabbarna l-industriji Maltin tal-manifattura u tas-servizzi.

Tant konna nisħqu fuq ir-reċiproċità fil-kummerċ, li fil-każ ta’ l-Italja li ma setgħetx tieħu prodotti u servizzi minn għandna, waslet biex taċċetta li flokhom, tagħtina għotjiet kull sena biex tpattilna għall-ammont kbir ta’ prodotti u servizzi li nixtru kull sena mingħandha.

La darba l-Unjoni Ewropea qiegħda tinsisti fuq il-prinċipju tar-reċiproċità fl-investimenti, ma tistax tiċħdu fil-kummerċ.

Illum l-Unjoni waslet biex taċċetta politika li Malta taħt Mintoff ħaddnet 30 sena ilu.

Aħbarijiet

L-aġenziji ta’ l-aħbarijiet u l-midja mżokkin mill-Unjoni Ewropea jonfħu kull aħbar dwarha u jostru kull kritika kontriha.

Ftit ’il bogħod minn fejn kienu qegħdin jiltaqgħu l-mexxejja tal-pajjiżi ta’ l-UE, it-trejdunjins Portugiżi għamlu laqgħa pubblika ta’ protesta kontra t-Trattat ta’ Riforma ta’ l-Unjoni.

L-aġenziji ta’ l-aħbarijiet u l-midja, li kellhom mijiet ta’ korrispondenti għas-‘summit’, ma rrapportaw xejn dwar il-laqgħa enormi ta’ protesta ta’ 200,000 ħaddiem kontra t-Trattat.

Huma qagħdu jaħlu l-ħin jistennew li l-uffiċjali ta’ l-UE jagħtuhom rapporti ta’ propaganda dwar il-laqgħa tal-mexxejja li spiċċat kif kien mistenni, bi ftehim dwar it-Trattat il-ġdid li mhu xejn ħlief verżjoni differenti tat-Trattat li kien iffirmat f’Ruma f’Ottubru 2004.

Protesta kbira ta’ 200,000 ħaddiem mhix aħbar li għandhom jagħtu lill-pubbliku, unikament għax kienet kontra, mhux favur, l-Unjoni.

Edukazzjoni

Skond rapport maħruġ il-ġimgħa l-oħra mill-organizzazzjoni EuroChambers, l-ogħla rata ta’ edukazzjoni fl-Unjoni Ewropea tinsab fil-Belġju, fir-reġjun ta’ Brabant Wallon, fejn 45.4% tal-popolazzjoni għandhom ‘higher education degree’, waqt li f’Malta, huma biss 11.4% tal-popolazzjoni bl-istess digriet.

IRRIDU L'INDIPENDENZA MILL-UNJONI EWROPEA

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.