MERHBA FIL

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LID-DEPUTAT PARLAMENTARI TIEGĦEK LI TRID LI MALTA TIKSEB LURA

L-INDIPENDENZA U L-ĦELSIEN!

L-Unjoni Ewropea ordnat li fis-sena 2011 il-Maltin u l-Għawdxin iħallsuha €68,000,000

€186,000 kuljum misruqa minn ħalq uliedek

minn KARMENU MIFSUD BONNICI Kampanja ghall-Helsien Nazzjonali CNI

X’se jiġri mill-assi tal-Libja?

Fil-Kunsill tas-Sigurtà tal-Ġnus Magħquda, l-Afrika t’Isfel opponiet li l-assi Libjani ffriżati ngħataw lill-Kunsill ta’ Benghazi għax l-Afrika t’Isfel sostniet li dak ikun ifisser għarfien tal-Kunsill ta’ Benghazi bħala l-Gvern tal-Libja meta fil-pajjiż għadha għaddejja l-gwerra mal-forzi ta’ dak li kien il-Gvern Libjan ta’ Tripli.

Intlaħaq kompromess li jingħataw $1.5 biljun mill-assi ffriżati biex jintużaw għal skopijiet umanitarji.

L-Istati Uniti tal-Amerika, Franza u l-Ingilterra riedu li l-assi ffriżati jingħataw lill-Kunsill ta’ Benghazi li huma kienu għarfu bħala l-Gvern leġittimu tal-Libja, waqt li l-Afrika t’Isfel ma kinitx tagħtu rikonoxximent.

Hu stmat li l-assi Libjani fil-pajjiżi barranin, li ġew iffriżati mill-Ġnus Magħquda mill-Unjoni Ewropea jlaħħqu mal-$150 biljun.

F’Malta, skont il-Gvern, l-assi Libjani ffriżati huma stmati €377 miljun.

Il-Gvern Malti ddikjara li jrid jgħaddi lill-Kunsill ta’ Benghazi, li għarfu bħala l-Gvern tal-Libja, iżda ġab l-iskuża falza li jkollu jistenna li jingħataw direttivi dwar l-assi mill-Ġnus Magħquda u mill-Unjoni Ewropea.

Min-naħa tiegħu l-Kunsill ta’ Benghazi qiegħed jinsisti li jingħata b’mod urġenti l-assi ffriżati għax għandu ħtieġa kbira għall-fondi biex iħallas l-ispejjeż u s-salarji u jixtri l-provvisti meħtieġa għall-poplu Libjan.

Investiment barrani fil-pajjiz

L-iffriżar tal-assi Libjani hu fatt skandaluż li jagħmel għajb kbir lill-Ġnus Magħquda, lill-Unjoni Ewropea u lill-pajjiżi kollha, inkluża Malta, li daħħlu fis-seħħ is-sanzjonijiet tal-iffriżar tal-assi Libjani.

Għax l-assi Libjani fil-pajjiżi barranin jirrappreżentaw investimenti li matul is-snin il-Gvern Libjan u l-kumpaniji Libjani għamlu fil-pajjiżi barranin.

Dawk l-investimenti saru biex huma jirrendu dħul lill-poplu Libjan permezz tal-Gvern tiegħu u tal-kumpaniji Libjani, kif ukoll biex ikunu ta’ għajnuna għall-ekonomiji tal-pajjiżi barranin fejn saru l-investimenti.

Kull pajjiż jagħmel sforz biex jiġbed lejh investiment barrani, u biex jirnexxielu jagħmel dan, kull pajjiż jagħti assigurazzjoni legali li jipproteġi l-investiment barrani biex min jinvesti f’pajjiż barrani jkun assigurat li ma jitlifx l-investiment u li jkun jista’ jieħdu lura meta jidhrilu li għandu jagħmel dan.

Għalhekk meta Gvern jiffriża f’pajjiżu l-assi ta’ pajjiż barrani jkun qed jonqos mill-obbligu li għandu li jipproteġi d-dritt tal-pajjiż barrani għall-assi tiegħu.

Il-barranin ma jibqgħux jinvestu f’pajjiż jekk jibżgħu li l-Gvern ta’ dak il-pajjiż jista’ meta jrid jiffriżalhom u ma jħallihomx jieħdu l-profitti tagħhom minnhom.

Sabiex wieħed jifhem kemm l-iffriżar tal-assi barranin hu att ta’ min jistmerru u perikoluż, wieħed għandu jara x’iħoss kieku l-bank kellu jiffriżalu l-flus depożitati u ma jippermettilux li jieħu l-imgħaxijiet tagħhom, meta hu m’għandu jagħti xejn la lill-bank u lanqas lil ħadd.

Il-Gvernijiet li ffriżaw l-assi Libjani wettqu att perikoluż u ta’ stmerrija għax il-Gvern Libjan u l-kumpaniji Libjani li l-assi tagħhom ġew iffirżati, m’għandhom dejn ma’ ħadd.

Ksur ta' dritt fundamentali

Il-Gvernijiet li ffriżaw l-assi Libjani wettqu ksur ta’ dan id-dritt fundamentali.

Hu ta’ għajb kbir li l-Ġnus Magħquda u l-Unjoni Ewropea kkommettew dan il-ksur tad-dritt fundamentali għall-proprjetà.

Imma l-gvernijiet li wettqu ksur ta’ dritt fundamentali meta ffriżaw l-assi Libjani, issa qegħdin iwettqu oltraġġi oħrajn.

Għax issa qegħdin ukoll jiddisponu mill-assi ffriżati mhux billi jħallu lis-sidien tagħhom joħduhom, iżda billi jgħadduhom lil oħrajn li mhumiex proprjetarji tal-assi ffriżati.

L-assi tal-Gvern Libjan għandu joħodhom il-Gvern Libjan, hu min hu, u l-assi tal-kumpaniji Libjani għandhom joħduhom il-kumpaniji proprjetari tagħhom, huma min huma l-azzjonisti tal-kumpaniji.

Imma l-gvernijiet jidhru li jridu jgħaddu l-assi Libjani ffriżati lill-Kunsill Tranżitorju ta’ Benghazi f’isem il-poplu Libjan.

Dawn huma atti li jiksru l-prinċipji legali bażiċi ta’ kull poplu ċivilizzat.

Il-Ġnus Magħquda u l-Unjoni Ewropea jafu li s-sanzjonijiet tagħhom dwar l-assi Libjani huma bi ksur tal-liġijiet tal-pajjiżi ċivilizzati, tant li fir-riżoluzzjoni tal-Kunsill tas-Sigurtà 1973 (2011) ipprovdew li l-gvernijiet li jdaħħlu fis-seħħ is-sanzjonijiet ikunu meħlusin minn kull responsabbiltà legali biex ħadd ma jkollu jagħmel kawża kontra Gvern li jkun iffriża l-assi Libjani u kif Gvern jiddisponi minnhom.

Ir-raġuni tgħidlek li jekk m’hemmx aktar skop għaliex l-assi Libjani jibqgħu ffriżati, dawn għandhom ikunu meħlusin huma ta’ min huma, ikollhom dritt joħduhom u jieħdu l-profitti tagħhom.

Jekk hemm kontestazzjoni dwar ta’ min huma, tkun il-Qorti li tiddeċiedi l-kwistjoni, mhux arbitrarjament il-Gvernijiet li jaġixxu kif jaqblilhom politikament u mhux kif għandhom jagħmlu skont il-ġustizzja.

Il-Libja minn ġot-taġen għal ġon-nar?

Dawk li jippriedkaw kontra l-vjolenza huma l-aktar li qegħdin jifirħu li l-vjolenza qiegħda tirrenja fil-Libja.

Konvenjentament insew il-prinċipju tal-etika li “the end does not justify the means”, u għalhekk ma kinitx ġustifikata li tintuża l-vjolenza fil-Libja, anke biex jinkisbu drittijiet ċivili.

Dawk li jiftaħru bil-ħidma umanitarja tagħhom, ma tawx kas tat-tbatijiet li l-bumbardamenti li saru fuq il-popolazzjoni ċivili Libjana u lanqas mill-imwiet u l-ferimenti ta’ mijiet ta’ Libjani.

Ma ddejqux jaraw is-servizzi infrastrutturali tal-Libja jitħarbtu, u sptarijiet, skejjel u djar jiġġarrfu.

Dawk li jsostnu li huma kattoliċissmi, ma tawx widen għall-appelli ripetuti tal-Qdusija Tiegħu l-Papa biex jieqaf il-ġlied fil-Libja u biex in-negozjati jieħdu post l-armi.

Irrifjutaw kull offerta għal ftehim u biex il-poplu kollu tal-Libja jingħata l-opportunità li b’mod ħieles jiddeċiedi hu dwar it-tmexxija tal-pajjiż.

Dawk li jsostnu li l-forza tar-raġuni għandha tirbaħ fuq il-forza tas-saħħa, warrbu r-raġuni u straħu fuq is-saħħa tal-armi u tas-sanzjonijiet ekonomiċi.

Injoraw il-prinċipju li pajjiżi m’għandhomx jindaħlu fil-ħwejjeġ interni ta’ pajjiż ieħor, u approvaw li Franza, l-Ingilterra, l-Istati Uniti tal-Amerika u n-NATO jattakkaw lil-Libja, mingħajr din ma pprovokathom.

Ittrasformaw protesta ta’ sezzjoni tal-poplu f’wieħed mir-reġjuni tal-Libja, l-ewwel fi gwerra ċivili, u mbagħad fi gwerra sħiħa tan-NATO u pajjiżi alleati kontra l-Gvern Libjan u l-poplu li kien jappoġġjah.

Issa huma kuntenti għax ħolqu kriżi umanitarja f’pajjiż li qabel il-gwerra, tant kien qed jiżviluppa li kien meqjus li se jkun “Dubai” tal-Mediterran.

Kien iħaddem ’il fuq minn miljun ħaddiem u jinvesti l-biljuni f’ħafna pajjiżi barranin.

Illum il-Libja, li għandha assi stmati biljuni ta’ dollari f’pajjiżi barranin, irriduċuha f’tallaba għall-ilma, ikel u mediċini, għax il-kapriċċi tal-Ġnus Magħquda u tal-Unjoni Ewropea ssekwestraw l-assi Libjani kollha fil-pajjiżi barranin.

Pajjiż li kien jesporta 1.2 miljun barmil żejt kuljum ġabuh m’għandux fjuwil għall-bżonnijiet interni tiegħu.

Dan kollu tort tal-pajjiżi tal-Punent li b’għejra kbira għall-progress tal-Libja, ħalfu li jkissruha biex wara jistagħnew minn fuq ir-rikostruzzjoni tagħha, għax għandha riżorsi biżżejjed biex terġa’ tqum fuq saqajha u tinbena mill-ġdid.

Jekk sar sew li l-popolazzjoni ċivili f’Benghazi ngħatat protezzjoni mill-attakki tal-forzi governattivi Libjani, ma sarx sew li l-popolazzjoni ċivili ta’ Tripli ma ngħatatx l-istess protezzjoni mill-attakki tal-forzi tar-ribelli u mill-bumbardamenti tan-NATO.

Bl-iskuża tat-twaqqif ta’ żona ta’ bla titjir fuq il-Libja għall-protezzjoni tal-popolazzjoni ċivili, kissru l-ajruplani Libjani kollha, iżda tħallew itiru l-ajruplani u l-ħelikopters tan-NATO li minflok ipproteġew, ikkaġunaw ħsarat lill-popolazzjoni ċivili.

Għalkemm kellhom jirrikorru għal mezzi meħtieġa biex jipproteġu n-nies ċivili u l-postijiet fejn hemm il-popolazzjoni ċivili, skont il-mandat tal-Ġnus Magħquda, wettqu bumbardamenti għal skopijiet oħrajn biex idgħajfu s-saħħa tal-forzi governattivi għax dawn ma jifilħux jirreżistu għall-attakki tar-ribelli, u ma ħabbrux rashom li bil-bumbardamenti tagħhom kienu qegħdin jikkaġunaw imwiet u ferimenti ta’ nies ċivili.

Bidlu l-iskop tal-mandat tal-Ġnus Magħquda li kien li tingħata protezzjoni lill-popolazzjoni ċivili għall-għan tagħhom li jitwarrab il-Gvern Libjan li kien hemm u l-pajjiż jingħata tmexxija differenti.

Bl-iskuża li jiċħdu lill-Gvern Libjan mill-użu tal-fondi kbar investiti barra l-pajjiż, iffriżaw l-assi Libjani kollha fil-pajjiżi barranin, u b’hekk ma ħallewx jixtri mill-pajjiżi barranin il-ħwejjeġ kollha metieġa mill-poplu Libjan, u b’konsegwenza ta’ dan, kien hemm nuqqasijiet fl-ikel, tal-mediċini u tal-fjuwil fil-Libja.

Bl-iskop li jiżolaw lill-mexxejja tal-pajjiż, imponew is-sanzjonijiet fuq l-ivvjaġġar u l-mezzi ta’ trasport biex il-poplu Libjan spiċċa li la jista’ jsiefer bl-ajru u lanqas bil-baħar.

Imponew embargo fuq l-importazzjoni tal-armi u l-armamenti fil-Libja, iżda l-ewwel bil-moħbi, u mbagħad bid-deher, taw kwantità kbira ta’ armi u armamenti lir-ribelli ta’ Benghazi u tal-Punent tal-Libja.

Sostnew li l-Gvern Libjan ma kienx demokratiku għax ma kienx elett demokratikament, u hemm minfloku l-Kunsill ta’ Benghazi li mhux demokratiku għax mhux elett demokratikament.

Jekk qabel kienu jinqatlu nies inġustament, issa qegħdin jinqatlu nies bl-addoċċ bi tpattijiet u b’vendikazzjonijiet, u saħansitra l-kap kmandant tar-ribelli stess inqatel minn sħabu.

Fittex li tiffirma l-petizzjoni popolari lill-Parlament Malti biex jgħaddi miżuri li jrażżnu l-immigrazzjoni illegali f’pajjiżna.

IRRIDU L'INDIPENDENZA MILL-UNJONI EWROPEA

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.