MERĦBA FIL-PAĠNA TAS-CNI

KAMPANJA ĦELSIEN NAZZJONALI

Kienet, għadha u tibqa' favur il-ħaddiema Maltin

u kontra s-sħubija ta' Malta fl-Unjoni Ewropea

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

Ta’ xejn fakkarna lbieraħ Jum il-Ħelsien                                             

* jekk ma fhimniex li jeħtiġilna nerġgħu nissagrifikaw ruħna             

* ħalli niksbu lura l-ħelsien li sitt snin ilu bigħna lill-Unjoni Ewropea.

Għax wara li sseħibna fl-Unjoni,

* tlifna d-dritt li mmexxu ħwejjiġna

* kif kull ħames snin tiddeċiedi l-maġġoranza,

* u baxxejna rasna ħalli nitmexxew

* skont ir-rieda tal-maġġoranza tal-barranin tal-Unjoni Ewropea,

* allavolja ma tkunx taqbel mar-rieda tal-poplu tagħna.

Kemm m’għadniex ħielsa li mmexxu ħwejjiġna,

* nifhmuh aħjar meta nsemmu t-tibdil li ma jaqbilx għall-popli tagħna

* fl-arranġamenti tal-Frontex mill-Unjoni Ewropea dan l-aħħar,

* meta nfakkru fid-deċiżjoni tal-Unjoni ta’ ftit ġimgħat ilu

* li twaqqaf is-sajd għat-tonn kontra r-rieda tal-Gvern ta’ Malta

* u bi ħsara għal pajjiżna,

* u meta ninsew il-passi li l-Unjoni ħadet kontrina

* biex ma tħallix issir ebda kaċċa fir-rebbiegħa,

* kontra dak li l-Gvern ta’ Malta kien qabel is-sħubija fl-Unjoni

* ntrabat mal-poplu tagħna li għandu jseħħ.

Inkunu qegħdin inqarrqu bil-poplu tagħna li ngħidulu li aħna ħelsin

* meta l-Gvern tagħna ma jistax jagħmel ftehim kummerċjali ma’ pajjiżi barranin,

* kemm-il darba l-Unjoni Ewropea ma tħallihx jagħmlu,

* minkejja li l-Gvern ta’ Malta jkun jemmen li l-ftehim huwa ta’ ġid għall-poplu.

Inkunu qegħdin ningannaw lill-poplu jekk nagħtuh x’jifhem

* li sakemm pajjiżna huwa msieħeb fl-Unjoni Ewropea,

* ir-rieda tal-maġġoranza tal-poplu tista’ tiddeċiedi f’elezzjoni ġenerali

* b’liema politika ekonomika jitmexxa pajjiżna,

* meta hija l-Unjoni li tiddeċiedi l-politika ekonomika li kull gvern li jkollna jkollu jaċċetta.

Inkunu qegħdin nidħku bina nfusna jekk niftaħru li aħna ħelsin

* meta l-Unjoni Ewropea ma tħalliniex ngħinu lill-industrija tagħna kif jaqblilna nagħmlu,

* meta hija timponilna kif nintaxxaw il-prodotti u s-servizzi li nixtru,

* meta tinsisti li l-Gvern ineħħi kull sussidju tas-servizzi essenzjali,

* meta ma nistgħux nikkontrollaw id-dħul f’pajjiżna tal-immigranti illegali jekk mhux kif trid l-Unjoni,

* u meta jkollna bilfors nesiġu l-Visa biex popli ġirien u ħbieb tagħna jistgħu jiġu f’pajjiżna,

* mhux biex inħarsu l-poplu tagħna,

* iżda għax l-Unjoni ssostni li nagħmlu dan.

Wara li nifhmu li m’għadniex ħelsin,

* irridu ngħassu kontra dawk li jgħidulna

* li issa ma nistgħu nagħmlu xejn

* biex nerġgħu niksbu l-ħelsien li tlifna

* mas-sħubija fl-Unjoni Ewropea,

* jew li ma jaqblilniex noħorġu min­nha.

Mhux minnu li ma nistgħux noħorġu.

(Araw dan il-video tal-Parlament Ewropew kif nistgħu noħorġu)

Mhux minnu li ma jaqblilniex noħorġu biex nerġgħu nkunu ħelsin.

Kulma għandna bżonn hija r-rieda soda

* li ninfatmu mill-ħakma tal-Unjoni Ewropea

* u l-għaqal u d-dehen li wrew ta’ qabilna

* meta lill-poplu jissagrifika ruħu ħalli jinfeda mill-barrani,

* u ħadem u stinka biex dan l-għan qaddis iseħħ.

Il-ħelsien ma jinkisibx bil-kliem fieragħ.

Jintrebaħ bit-tbatija u bil-perseveranza,

u billi nwarrbu l-interessi personali

għall-ġieħ tal-poplu tagħna.

Il-kriżi ekonomika u finanzjarja li ħafna pajjiżi tal-Unjoni Ewropea jinsabu fiha hija kkaġunata mill-politika ekonomika u finanzjarja ħażina li l-Unjoni tħaddan u timponi fuq il-pajjiżi mseħbin fl-Unjoni.

Iżda l-Unjoni ma tridx tammetti li l-politika tagħha falliet, u l-Unjoni fi ħsiebha tissokta bl-istess politika li qiegħda tgħakkes miljuni kbar ta’ familji fil-pajjiżi maħkumin mill-kriżi.

Il-politika ekonomika u finanzjarja tal-Unjoni Ewropea

* kellha effetti ħżiena saħansitra fuq l-akbar pajjiżi tal-Unjoni,

* bħall-Ġermanja,

* Franza

* u r-Renju Unit,

* iżda lil pajjiżi iżgħar,

* bħal Spanja,

* l-Irlanda,

* il-Greċja

* u l-Portugall,

* ħarbtithom ħafna aktar,

* u lill-pajjiżi li ssieħbu fl-aħħar snin fl-Unjoni,

* bħall-Ungerija,

* il-Latvja

* u l-Litwanja,

tefgħethom lura saħansitra ħafna aktar.

Il-politika tal-kummerċ ħieles

* u tal-moviment ħieles tal-kapital

* imħaddmin mill-Unjoni Ewropea

* ġabu ’l fuq minn 23 miljun ħaddiem bla xogħol fl-Unjoni

* minħabba l-għeluq ta’ ħafna fabbriki

* u t-tkabbir fl-importazzjoni ta’ ħafna ħwejjeġ

* li qabel kienu jinħadmu fil-fabbriki tal-pajjiżi tal-Unjoni,

* u dan il-qgħad mifrux ġab tnaqqis fit-turiżmu

* u fl-impjiegi fis-settur turistiku.

Skont l-organizzazzjoni Kattolika Caritas,

* fil-pajjiżi tal-Unjoni Ewropea

* llum hawn 80 miljun persuna fil-periklu tal-faqar

* u aktar jiżdiedu għal 100 miljun

* b’effett tal-kriżi ekonomika u finanzjarja li hawn.

F’pajjiżna,

* fis-snin minn mindu sseħibna fl-Unjoni Ewropea, 

* ġarrabna l-konsegwenzi ħżiena                              

* tal-politika ekonomika                                           

* u finanzjarja tal-Unjoni,                                            

* billi ħafna fabbriki għalqu,                                     

* eluf ta’ impjiegi ntilfu,                                            

* l-esportazzjoni naqset,                                            

* l-industrija turistika marret lura fl-aħħar sentejn,

* filwaqt li l-qagħda finanzjarja ħżienet                    

* billi d-dejn nazzjonali baqa’ jiżdied kull sena.       

Skont l-aħħar Labour Force Survey tat-tliet xhur ta’

* Lulju, Awwissu u Settembru 2009,                         

* kien hawn f’pajjiżna 11,986 bla xogħol.                 

Skont stħarriġ ta’ dan l-aħħar tal-Caritas,

* il-periklu tal-faqar kiber ukoll f’pajjiżna

* li miexi bil-politika ekonomika

* u finanzjarja tal-Unjoni Ewropea

* għax il-pagi,

* il-pensjonijiet

* u l-benefiċċji soċjali

* ma żdidux biex ilaħħqu maż-żieda fl-għoli tal-ħajja,

* mat-tariffi ogħla tad-dawl u l-ilma,

* maż-żieda fil-prezz tal-gass,

* il-mediċini aktar għoljin,

* iż-żieda fil-kera,

* filwaqt li 42% taż-żgħażagħ li jispiċċaw l-iskola sekondarja

* jsibu ruħhom jiġġerrew mingħajr xogħol fit-toroq.

Biex tikkumbatti l-kriżi ekonomika u finanzjarja

* l-Unjoni Ewropea qiegħda ssostni politika żbaljata

* li tkabbar il-faqar

* billi tinsisti li titnaqqas in-nefqa

* fuq is-servizzi soċjali u tas-saħħa.

Iżda l-politika tajba hija dik li tqabbad fuq xogħol

* li jkun ta’ benefiċċju soċjali lil dawk bla xogħol,

* u li tagħmel paga minima xierqa għall-għoli tal-ħajja tal-lum,

* kif ukoll li żżid il-benefiċċji lil min ma jistax jaħdem.

Din hija politika li tista’ tirnexxi jekk il-pajjiż ikollu r-rieda politika li jħaddimha, tgħid x’tgħid l-Unjoni Ewropea.

Għalkemm il-Gvern Malti jidher li ma jridx jinfatam mill-politika żbaljata tal-Unjoni Ewropea,

* il-kotra tal-popli qiegħda tħoss l-għafsa kbira tal-politika li s-suq ħieles,

* il-liberalizzazzjoni tal-kummerċ u l-privatizzazzjoni ġabu,

* u li wasslu lill-pajjiżi tal-Unjoni fil-kriżi li jinsabu fiha,

* bil-miljuni bla xogħol u miljuni akbar fil-periklu tal-faqar.

Dan huwa l-aqwa ċertifikat tal-falliment tal-Unjoni Ewropea

* li filwaqt li tiżgura li ftit setturi magħżulin jistennew aktar,

* tfaqqar ħafna setturi oħrajn,

* l-aktar is-setturi żgħar u medji,

* li huma l-kotra tal-poplu.

Bħax-Schengen, il-Frontex hija ħażina għalina.

Is-CNI dejjem sostniet

* li l-aġenzija Frontex mwaqqfa mill-Unjoni Ewropea,

* mhix ta’ ġid għal Malta

* jekk ma tilqax l-immigranti illegali

* u treġġagħhom lura.

Issa li l-Unjoni Ewropea ddeċidiet

* li l-immigranti illegali kollha

* għandhom jittieħdu fejn hawn il-missjoni tal-Frontex,

* li tfisser Malta,

* kulħadd jaqbel mas-CNI

* li l-aħjar għal Malta hu li titlaq mill-Frontex.

Kien żball li sseħibna fil-Frontex u żball akbar li ridna li l-missjoni tal-Frontex tkun f’pajjiżna.

Aħna dejjem għedna li l-Unjoni Ewropea

* ma tħarisx lejn l-immigranti kif narawhom aħna f’Malta,

* għax l-Unjoni tridhom billi għandha bżonnhom

* ħalli jpattu għat-tnaqqis fil-popolazzjoni,

* filwaqt li aħna f’Malta ma nistgħux naċċettawhom

* għax il-popolazzjoni tagħna hija kbira wisq għaċ-ċokon ta’ artna.

Kellu raġun il-Gvern Malti li fis-sena 1971           

* meta ffirma l-Konvenzjoni dwar ir-Refuġjati,   

* sostna li parti minnha ma tgħoddx għal Malta,

* għax iċ-ċokon u n-nuqqasijiet tal-pajjiż             

* ma jippermettux li nilqgħu refuġjati.                 

Għamel żball il-Gvern Malti

* li fin-negozjati dwar is-sħubija fl-Unjoni Ewropea

* ċeda għar-rikatt tal-Unjoni

* li ma riditx issieħeb lil pajjiżna

* jekk il-Gvern Malti ma jaċċettax ukoll

* il-parti tal-Konvenzjoni dwar ir-Refuġjati

* li fl-1971 kien żamm ma tgħoddx għal Malta.

L-iżball li l-Gvern għamel

* meta ċeda għar-rikatt tal-Unjoni Ewropea

* fetaħ il-bieb għall-invażjoni li pajjiżna ġarrab

* minn eluf ta’ immigranti illegali.

Warajh, il-Gvern Malti baqa’ jagħmel żball wara l-ieħor.

L-ewwel aċċetta li jħares ir-regolamenti li l-Unjoni Ewropea għamlet ħalli l-immigranti illegali jitqiesu bħala refuġjati.

Aċċetta t-tibdil li l-Unjoni riditu jagħmel fil-liġi

* ħalli l-immigranti li ma jkunux f’Malta bil-permess,

* ma jitqisux aktar “illegali” iżda biss “irregolari”.

Aċċetta dak li l-Unjoni riditu jagħmel,

* li ma jħallix l-immigranti illegali jmorru minn pajjiżna

* għall-pajjiżi l-oħrajn tal-Unjoni.

Aċċetta dak li l-Unjoni ddeċidiet li l-immigranti illegali,

* wara ftit ta’ żmien f’ċentri ta’ detenzjoni,

* jinħelsu,

* jingħataw għajnuna finanzjarja

* u jistgħu jsibu jaħdmu.

Aċċetta li jinkoraġġixxi l-immigranti ħalli jintegraw ruħhom fis-soċjetà Maltija.

Ir-riżultat ta’ dawn l-iżbalji kollha

* huwa l-kriżi li għandna ta’ eluf ta’ immigranti illegali f’pajjiżna

* itaqqlu s-servizzi tas-saħħa,

* is-sevizzi soċjali

* u s-servizzi tas-sigurtà,

* barra l-piż finanzjarju li jsarrfu,

* u d-diżgwid soċjali għall-poplu tagħna.

Minkejja l-kriżi li għandna,

* il-Prim Ministru,

* fil-Kunsill tal-Unjoni Ewropea,

* minflok li insista li l-Unjoni Ewropea

* tħalli l-immigranti illegali li hawn f’pajjiżna,

* jmorru fil-pajjiżi l-kbar tal-Unjoni,

* lanqas kellu l-kuraġġ jivvota kontra

* li l-immigranti kollha li jinsabu fin-nofs tal-Mediterran jinġiebu f’Malta,

* minflok jittieħdu fl-eqreb port li jkunu.

U l-Unjoni Ewropea,

* minflok tgħinna ħalli nsolvu l-kriżi li għandna,

* tiddeċiedi li tibdel r-regolamenti tal-Frontex

* ħalli tkabbar il-kriżi ta’ Malta.

Għalhekk għandu raġun il-poplu jgħajjat

* biex nitilqu minn-Frontex

* u biex fil-kwistjoni tal-immigranti illegali,

* nagħmlu dak li jħares l-interessi tal-poplu tagħna,

* mhux dak li jogħġob l-Unjoni Ewropea.

Bħall-Frontex, ix-Schengen hija ħażina għal Malta.

L-Unjoni Ewropea imponiethomlna t-tnejn fuqna wara s-sħubija,

* mhux għall-ġid tagħna,

* iżda ħalli hija tikkontrollana aktar

* u tnaqqsilna s-sovranità.

It-tilwim bejn il-Libja u l-pajjiżi taż-Żona Schengen

* urietna xi ħsara nistgħu nġarrbu

* billi nkunu marbutin bir-regoli tax-Schengen

* li jġagħluna nobdu dak li pajjiż ieħor jiddeċiedi

* mingħajr ma jqis il-konsegwenzi ħżiena

* li d-deċiżjoni tiegħu se ġġib fuqna.

Għal ħames ġimgħat wara li l-Libja fil-15 ta’ Frar għalqet il-bibien għaċ-ċittadini tax-Schengen, mijiet ta’ familji Maltin għaddew minn in­kwiet kbir ma jafux hux se jitilfu għal kollox ix-xogħol u l-investiment tagħhom fil-Libja.

L-Ingliżi,

* l-Irlandiżi,

* iċ-Ċiprijotti

* u l-Bulgari

* ma għaddewx minn dan il-qtigħ ta’ qalb

* u setgħu jmorru l-Libja kemm riedu,

* għax il-mexxejja tagħhom kellhom id-dehen

* li ma jisseħbux fix-Schengen,

* minkejja li bħalna huma imseħbin fl-Unjoni Ewropea.

Bix-Schengen Malta mhi tirbaħ xejn.

Qiegħda titlef.

Għalhekk jaqblilna li noħorġu mix-Schengen bl-istess mod li jaqblilna nitilqu mill-Frontex.

Meta noħorġu mix-Schengen,

* nerġgħu nikkontrollaw il-passaporti ta’ min jidħol Malta

* u l-merkanzija li nimportaw mill-pajjiżi tax-Schengen.

B’hekk, inħarsu aħjar lill-poplu tagħha, mhux kif aħna llum mingħajr ebda kontroll fuq min ġej u x’ġej mill-pajjiżi tax-Schengen.

It-tilwima bejn il-Libja u l-pajjjiżi tal-Unjoni Ewropea li huma fix-Schengen

* għandha tiftħilna għajnejna għal bżonn ieħor,

* il-bżonn li jneħħu l-ħtieġa tal-Visa

* biex il-Libjani jiġu Malta

* u aħna mmorru l-Libja.

Dan il-bżonn imponietu fuqna l-Unjoni Ewropea mas-sħubija.

Qabel, ebda Gvern Malti ma ħass il-ħtieġa li jdaħħal il-Visa biex il-Libjani jiġu hawn.

Lanqas illum ma tinħass ebda ħtieġa għal dan, u għalhekk għandna nneħħu l-visa bejn Malta u l-Libja.

Jekk inneħħu l-visa għal-Libjani, nerġgħu nuruhom li rridu nsaħħu l-ħbiberija tagħna li tnaqqset minħabba s-sħubija tagħna fl-Unjoni Ewropea ma tagħmilx tajjeb għat-telf li nġarrbu jekk innaqqsu l-ħbiberija mal-Libja.

Għalhekk fl-interess nazzjonali għandna nneħħu l-visa għal-Libja u huma jneħħuha għalina.

Barra li nneħħu l-ħtieġa tal-Visa għal-Libjani, huwa fl-interess tagħna wkoll li nerġgħu nagħmlu l-ftehim kummerċjali li kellna qabel isseħibna fl-Unjoni, u li l-Unjoni ġagħlitna nħassru mal-ftehim tas-sħubija.

Tlifna ħafna vantaġġi li kellna mal-Libjani kemm dwar xogħol u impjiegi, kif ukoll dwar il-kummerċ u l-investiment fil-Libja.

Il-ftehim kummerċjali mal-Libja mhux ta’ ħsara għas-sħubija tagħna fl-Unjoni Ewropea, u l-Unjoni nsistiet biex il-ftehim jitħassar minħabba raġunijiet politiċi, u għal ebda raġuni oħra.

Illum, ħafna pajjiżi tal-Unjoni Ewropea, fosthom l-Italja u l-Ġermanja, ifittxu li jagħmlu ftehim kummerċjali mal-Libjani bħalma kellna aħna l-Maltin qabel.

Minħabba l-Unjoni Ewropea, tlifna l-vantaġġ li kellna fuq il-pajjiżi Ewropej mal-Libjani.

Fl-interess tal-poplu tagħna li nerġgħu nirbħu lura l-fiduċja u l-ħbiberiija li s-sħubija fl-Unjoni Ewropea tellfitna.

Wara kollox l-Unjoni Ewropea llum m’għandhiex toġġezzjona għal ftehim kummerċjali bejn Malta u l-Libja għax l-istess Unjoni fl-24 ta’ Marzu kkonkludiet ftehim li jġib ’il quddiem id-djalogu u l-koperazzjoni bejn l-Unjoni u l-Libja fl-oqsma politiċi, ekonomiċi u soċjali.

Il-Ħamis, 1 ta’ April, 2010

e-mail: cnimalta at yahoo.co.uk 

Inroddulek ħajr li żort il-paġna tagħna

Appoġġ fil-ġlieda għall-Indipendenza u l-Ħelsien

Trid tgħin biex niksbu mill-ġdid l-Indipendenza u l-Ħelsien? 

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.

Issieħeb fis-CNI billi tibgħat €5 flimkien ma' din il-formola lis-

Segretarju Finanzjarju  CNI,

60A, Triq id-Dejqa,

Valletta

Isem .......................................................

Indirizz ...................................................

ID Numru ...............................................

Inroddulek ħajr ta’ l-għajnuna tiegħek

Malta ħielsa u newtrali fl-aħħar tirbaħ