MERHBA FIL

NAĦILFU LI NEĦILSU LIL MALTA MILL-JASAR, IL-KOLONJALIŻMU U L-ĦAKMA DITTATORJALI ILLEGALI TA' L-UNJONI EWROPEA

GĦID LILL-KANDIDAT PARLAMENTARI TIEGĦEK LI TRID LI MALTA TIKSEB LURA L-INDIPENDENZA U L-ĦELSIEN!

L-Unjoni Ewropea ordnat li mis-sena 2010 il-Maltin u l-Għawdxin iħallsuha

€182,192 kuljum misruqa minn ħalq uliedek

X’qed nitilfu minħabba s-sħubija fl-Unjoni Ewropea

Ħaddiema mill-pajjiżi ta' l-UE għandhom dritt jiġu jaħdmu f'pajjiżna flok il-Maltin bis-saħħa tal-ftehim ta' sħubija ta' Malta fl-Unjoni li l-Parlament Malti approva.

Skond stqarrija uffiċjali tal-Gvern diġà ġew 2,759 ħaddiema mill-Unjoni jaħdmu f'Malta.

Dawn ħadu post 2,759 ħaddiema Maltin.

Bid-dħul tar-Rumanija u l-Bulgarija fl-Unjoni Ewropea fil-bidu ta' din is-sena jistgħu jiġu ħafna ħaddiema oħrajn minn dawn iż-żewġ pajjiżi jaħdmu f'Malta għax waqt li xi pajjiżi ta' l-Unjoni llimitaw id-dħul għandhom tal-ħaddiema Rumeni u Bulgari, pajjiżna m'għamilx limitazzjonijiet dwarhom.

X'uħud mis-sidien fil-pajjiżi ta' l-Unjoni Ewropea qegħdin jippreferu li jimpjegaw ħaddiema barranin għax dawn ma jkunux imseħbin f'unjin u s-sidien jistgħu jħallsuhom inqas pagi u jagħtuhom kundizzjonijiet tax-xogħol inferjuri għal dawk tal-ħaddiema lokali.

Dan ifisser li l-ħaddiema barranin qegħdin mhux biss jieħdu l-ħobż tal-ħaddiema Maltin li ma jsibux xogħol, iżda qegħdin ukoll ibaxxu l-pagi u l-kundizzjonijiet tax-xogħol tal-ħaddiema f'pajjiżna.

Ftit tax-xhur ilu l-Unjoni Ewropea ħarġet direttiva dwar persuni li jagħtu s-servizzi tagħhom f'pajjiżi oħra ta' l-Unjoni.

Din id-direttiva hija ta' theddida serja għall-ħaddiema tal-pajjiż fejn ikunu qegħdin jingħataw is-servizzi minn persuni ta' pajjiż ieħor ta' l-Unjoni.

Għax skond din id-direttiva, m'għandhomx japplikaw il-liġijiet dwar ix-xogħol tal-pajjiż fejn is-servizzi jingħataw, iżda dawk tal-pajjiż l-ieħor ta' l-Unjoni tal-persuna li tagħti s-servizzi.

Għalhekk skond din id-direttiva ta' l-Unjoni Ewropea dwar is-servizzi, kumpanija Bulgara li tibgħat l-impjegati tagħha f'Malta, tista' tħallashom salarji skond ma jitħallsu fil-Bulgarija u mhux skond ma jitħallsu l-impjegati Maltin u tista' ma tosservax għalihom il-kundizzjonijiet tax-xogħol li għandhom impjegati Maltin.

L-istess tagħmel kumpanija Polakka li tibgħat il-ħaddiema tagħha jaħdmu fit-Tarzna ta' Malta.

Tħallashom il-pagi u tħaddimhom bil-kundizzjonijiet tal-liġijiet tax-xogħol tal-Polonja u mhux ta' Malta.

Minn stqarrijiet uffiċjali sirna nafu li ġew 838 ħaddiem barrani biex jaħdmu fit-Tarzna ta' Malta.

U dan seħħ meta l-Unjoni Ewropea ordnat lill-Gvern Malti biex inaqqas aktar minn elf ħaddiem Malti mit-Tarzna kif ukoll illimitat il-volum tax-xogħol li jista' jsir mit-Tarzna.

Kieku minflok it-838 ħaddiema barranin tħaddmu ħaddiema Maltin fit-Tarzna, il-pajjiż kien jiġbor mingħandhom il-kontribuzzjonijiet tas-Sigurtà Soċjali (il-bolla) u jiffranka l-ħlas ta' 838 benefiċċji tal-qgħad (unemployment benefit), u fuq kollox, jagħmel ġustizzja soċjali ma' 838 familji Maltin.

Fil-50 anniversarju tat-trattat ta’ Ruma

Ħamsin sena ilu l-mexxejja ta' Franza, il-Ġermanja tal-Punent, l-Italja, l-Olanda, il-Belġju u l-Lussemburgu ffirmaw f'Ruma t-trattat magħruf bħala t-Trattat ta' Ruma, li waqqaf il-Komunità Ekonomika Ewropea li mal-medda tas-snin żviluppat fl-Unjoni Ewropea tal-lum.

F'Marzu li ġej fil-pajjiżi ta' l-Unjoni Ewropea (inkluż f'Malta) se jsiru ħafna attivitajiet u ċerimonji ħalli jfakkru l-ħamsin anniversarju ta' l-iffirmar tat-Trattat ta' Ruma u t-twelid ta' l-Unjoni.

Anki l-Knisja Kattolika fl-Ewropa se tikkommemora din il-ġrajja billi se tlaqqa' f'Ruma Kungress għall-Isqfijiet Ewropej organizzat mill-Kummissjoni tal-Konferenzi Episkopali ta' l-Isqfijiet tal-Komunità (COMECE).

Il-COMECE hija magħrufa u mgħejjuna mill-Unjoni Ewropea u tagħmlilha propaganda mal-kattoliċi ta' l-Ewropa.

Skond ma tħabbar b'mod bombastiku u propagandistiku l-Kungress se jittratta l-valuri u l-perspettivi għall-ġejjieni ta' l-Ewropa billi jidentifika l-valuri bażiċi ta' l-insara, jikkonferma dawk il-valuri li sawru l-proċess ta' l-għaqda Ewropea mill-bidu tagħha u jġeddidhom biex l-Unjoni Ewropea tkun tista' twieġeb għal dak li ċ-ċittadini tagħha u l-bqija tad-dinja qed jistennew minnha.

Jidher ċar li l-kungress se jservi ta' mezz ta' propaganda għall-Unjoni Ewropea u huwa maħsub biex iħalli mpatt fuq il-Kattoliċi Ewropej favur l-Unjoni.

Il-COMECE kkritikat

Kritiċi nsara ta' l-Unjoni Ewropea huma tal-fehma li l-Kummissjoni tal-Konferenzi Episkopali tal-Komunità Ewropea (il-COMECE) ma timxix sewwa meta tieħu pożizzjoni u tagħmel propaganda favur l-Unjoni Ewropea kif inhi llum.

Huma jsostnu li l-Unjoni hija għaqda politika u ekonomika u l-Isqfijiet m'għandhomx jieħdu sehem fl-għażliet politiċi u ekonomiċi ta' l-Unjoni, li ħafna nsara ma jaqblux magħhom.

Il-kritiċi ta' l-Unjoni jfakkru wkoll li anki jekk x'uħud mill-għanijiet ta' l-Unjoni Ewropea huma tajbin, xorta waħda ma jiġġustifikawx il-mezzi u l-metodi ħżiena ta' l-Unjoni, u dan skond il-prinċipju li m'għandekx tuza mezzi ħżiena biex tilħaq għanijiet tajbin.

Aktar u aktar meta dawk l-għanijiet ta' l-Unjoni li huma tajbin, jistgħu jintlaħqu b'koperazzjoni ta' xorta oħra bejn il-pajjiżi membri fl-Unjoni u b'politika differenti minn dik magħżula mill-Unjoni.

Il-kritiċi nsara ta' l-Unjoni jisħqu li meta l-Isqfijiet joħorġu stqarrijiet favur l-Unjoni Ewropea kif inhi llum, ikunu qegħdin ibierku l-għażliet politiċi u ekonomiċi ta' l-Unjoni li m'humiex imsejsa fuq il-prinċipji tal-moralità u etika nisranija u tal-ġustizzja soċjali nisranija.

Dawn il-kritiċi jagħmlu ħafna mistoqsijiet.

Huma jistaqsu kif jistgħu l-Isqfijiet jagħtu appoġġ lill-politika ekonomika ta' l-Unjoni mibnija fuq is-suq u l-profitt li tikkundanna miljuni ta' ħaddiema fl-Unjoni mingħajr xogħol għal numru ta' snin?

Kif jistgħu l-Isqfijiet japprovaw it-tkabbir ta' l-inugwaljanzi soċjali li l-politika ta' l-Unjoni qiegħda tikkaġuna fil-pajjiżi ta' l-Unjoni?

Kif jistgħu l-Isqfijiet jinsew li l-Unjoni uffiċjalment tippromwovi valuri li ma jaqblux mal-valuri nsara jew li huma saħansitra pagani?

Jistgħu l-Isqfijiet jagħlqu għajnejhom għall-korruzzjoni mifruxa li tifni l-Unjoni u għall-ħela li hemm fl-Unjoni meta fil-pajjiżi ta' l-Unjoni hemm faqar u familji neqsin mill-ħwejjeġ essenzjali għal għixien diċenti?

L-Isqfijiet m'għandhomx jiftħu ħalqhom kontra l-infiq enormi ta' l-industrija ta' l-armamenti fil-pajjiżi ta' l-Unjoni Ewropea, li qed tfornihom lil pajjiżi barra l-Unjoni għall-gwerer qerrieda ta' eluf ta' bnedmin u tħarbit ta' bliet u rħula sħaħ?

Dawn il-mistoqsijiet jirrigwardaw ftit mill-ħafna oġġezzjonijiet li ħafna nsara għandhom għall-Unjoni Ewropea kif inhi llum u għall-mod kif inhi il-politika tagħha.

M'humiex ta' importanza żgħira għal ħafna Maltin u Għawdxin li żgur ma jistennewx li l-Arċisqof tagħhom ma jagħtix każhom u jħalli ruħu li jinġarr mill-heġġa propagandistika tal-Kummissjoni tal-Konferenzi Episkopali li se torganizza l-Kungress f'Ruma x-xahar id-dieħel favur l-Unjoni Ewropea kif inhi llum.

L-UE marida moralment u spiritwalment

F’Settembru tas-sena l-oħra, fl-omelija tal-Quddiesa Pontifikali fl-anniversarju ta' l-Indipendenza, l-Arcisqof Mercieca kien qal li mudelli ta' ħajja kif inhi f'pajjiżi Ewropej qegħdin iġibu kull xorta ta' deni u qegħdin jagħmlu lill-Ewropa marida moralment u spiritwalment.

Dawn l-istess ħsibijiet dwar l-Ewropa ikkonfermahom il-Professur Taljan Salvino Acquaviva, espert fis-soċjoloġija, fil-ktieb li għadu kif ippubblika bit-titlu

Il-Professur Acquaviva jgħid li fl-Ewropa il-prinċipji ta' l-etika li fuqhom tfasslet l-istorja ta' l-Ewropa, qegħdin jgħibu, u fl-Ewropa hawn ukoll kriżi fil-qasam tal-ġustizzja li għaliha l-Ewropa kienet magħrufa sa miż-żmien ta' l-imperatur Ruman Ġustinjanu, tant li minn ismu ġejja l-kelma "ġustizzja".

Skond dan l-espert tas-soċjoloġija, il-qagħda mwiegħra ta' l-Ewropa jixhduha wkoll it-tixrid kullimkien tal-pornografija u l-għadd ta' fatturi oħra li qegħdin jikkaġunaw tħarbit soċjali, bħalma huma t-tkissir tal-familji, u l-faqar psikologiku u n-nuqqas ta' l-ideali tal-ġenerazzjonijiet żagħżugħa.

Dan kollu qiegħed iseħħ waqt li titbiegħed mill-Ewropa l-ħajja nisranija.

U l-iskola mhux talli mhux qiegħda tgħin biex tilqa' għal dawn l-isfidi, talli saret fattur ta' edukazzjoni obbligatorja żbaljata għax ma tħejjix iż-żgħażagħ ħalli jgħixu tajjeb u l-edukazzjoni universitarja qiegħda ttellfilhom l-identità Ewropea tagħhom.

Il-Professur Acquaviva jsostni li anki fil-qasam ekonomiku l-Ewropa qiegħda fi kriżi kif jixhdu l-ħafna mpriżi li qegħdin imajnaw u l-iżvilupp kajman, waqt li għadd kbir ta' immigranti qegħdin idgħajjfu l-identità li l-Ewropa kellha.

Hemm fatturi oħrajn li qegħdin jitfgħu lura l-kwalità tal-ħajja fl-Ewropa, bħalma huma l-konsumiżmu sfrenat, in-nuqqas fis-saħħa tat-trejd unjins, it-telfien tal-ħeġġa għax-xogħol u l-għadd kbir ta' vaganzi mix-xogħol.

Dan l-espert fis-soċjoloġija jgħid li l-Ewropa qiegħda timxi b'politika qadima u mhux aktar addattata għad-dinja li tbiddlet.

M'għadx hemm il-ħeġġa għall-progress u hawn fatturi oħra ġodda li ma kinux jeżistu qabel li qegħdin itaqqlu l-mixja ta' l-Ewropa.

Dawn huma l-ħafna mezzi tal-midja li jgħattnu l-bniedem, il-leħen u l-ħsejjes tagħhom lejl u nhar itambru lis-semmiegħa, il-mewt li saret xi ħaġa komunissima, il-moda ta' l-ilbies sfaċċat, u l-mod artifiċjali tal-ħajja mxandra mill-midja li hija għal kollox imbegħda miċ-ċirkostanzi tal-ħajja mgħejxa mill-poplu.

U n-nuqqas ta' ħeġġa għall-ħajja ġabet tnaqqis fir-rata ta' twelid fl-Ewropa, waqt li qed jikber il-proporzjon ta' l-anzjani għan-nies li jaħdmu.

Jekk iva, għin lis-CNI fil-ħidma tagħha biex il-maġġoranza tal-poplu tkun trid li neħilsu mill-ħakma ta' l-Unjoni Ewropea.